مـنـتـدى الـعـرب الـمـسافـرون

هذا الموقع مخصص للسياح العرب وهو احد افضل المواقع المخصصة للسياحة و مساعدة المسافرين ، و هو أحد مواقع شبكة منتديات مكتوب !Yahoo ، انضم الان و احصل على فرصة متابعة أخبار و معلومات و صور و مقاطع فيديو من كل دول العالم.



+ الرد على الموضوع
صفحة 1 من 9 1 2 3 4 5 6 7 8 ... الأخيرةالأخيرة
النتائج 1 إلى 10 من 90
Like Tree0Likes

الموضوع: 5 ليالي لا تنسى في سنغافورة الجميلة ( 125 صورة )

  1. #1
    مشرف دول اسيا الاخرى الصورة الرمزية ابن فطفوطه
    تاريخ التسجيل
    Jul 2011
    المشاركات
    1,619

    افتراضي 5 ليالي لا تنسى في سنغافورة الجميلة ( 125 صورة )

    السلام عليكم ورحمة الله وبركاتة


    هذا هو أول موضوع لي في هذه البوابه واحب ان اشكر كل من يكرس جهده ووقته لخدمة المسافرين فيها


    وكما احب ان اخص بالشكر لإخواني Stranger Man & Toty لمساعدتهم وتوجيههم لي لإعداد هذه الرحله


    بداية :


    لم تكن سنغافورة من ضمن مخططاتي المستقبليه للسفر إليها قبل فتره ابدا


    فكل ما اسمع عنه هو الغلاء والتطور العمراني والاقتصادي هناك


    فالسبب الرئيسي الي خلاني افكر فيها هو وجود صديق سنغافوري هناك وكان هو من يحثني على قضاء عطله معه في بلاده


    فلم يكن مني الا ان ابحث عن تقارير سنغافورة واستطلع بعض الصور لهذه البلاد التي لم يكن لي اطلاع عليها من قبل ابدا


    لكن بفضل الله ثم بجهود الأعضاء في هذه البوابه انهم نقلوا صوره واضحه عن سنغافورة الساحرة ولا اعتقد يوجد احد لم يعجب بها بتطوراتها العمرانيه والاقتصاديه ونظافتها وحسن خلق شعبها واتباعهم للقوانين بحذافيرها


    وتم بحمد الله العزم للسفر خلال فتره وجيزه


    ّّ```````````````````````````````````````````````` ``````````````````````````````````````


    تاريخ الإقامة في سنغافورة


    10/فبراير/2012 إلى 15/فبراير/2012


    ونظرا لضعف الميزانية فلم اكن ابحث الا عن الفنادق الرخيصه وهي قليله جدا جدا


    وتم اختيار فندق Robertson Quay Hotel


    بواسطه موقع بوكينج وكان سعر الليله تقريبا 30 دينار كويتي (400 ريال سعودي )


    سريرين منفصلين وشامل الإفطار


    والفندق الصراحه الغرف فيه صغيره جدا ولا انصح فيه الا لمسافر واحد او مسافرين من غير الأزواج


    لكن الجميل فيه هو موقعه لانه يقع مقابل نهر سنغافورة الوحيد وقريب من بعض الاسواق وقربه ايضا من محطه MRT


    ويبعد عن شارع اورشارد تقريبا 5 دقائق بالسيارة


    الطيران الناقل :


    على الخطوط السريلانكية الجميلة بتكلفه 132 دينار (1787 ريال سعودي )


    تم اختيار الطيران السريلانكي لرخصه بالرغم من طول خط الرحله وجميع شركات الطيران الاخرى زياده على الطيران السريلانكي ب 100 دينار على الاقل


    خط الرحله :


    الذهاب = الكويت - دبي ( انتظار ساعه ) - كولومبو ( ساعتين ونصف ) - سنغافورة


    الإياب = سنغافورة - كوالالمبور ( انتظار ساعه ) - كولومبو ( يوم كامل باختياري الشخصي ) - دبي ( انتظار ساعه ) - الكويت


    `````````````````````````````````````````````````` `````````````````````


    بعض المعلومات التي تخص السائح عن سنغافورة :


    - الأفضل صرف المصروف إلى دولارات امريكيه في بلدك ومن ثم تحويلها إلى دولار سنغافوري بسنغافورة لان الصرف يكون اعلى


    - العلكه ممنوعه في البلاد اطلاقا وممنوع جلبها


    - ممنوع جلب السجائر مع المسافر الا ان يكون علبه او علبتين ويتم اخذ ضريبه عليها بالمطار


    - ممنوع رمي القمامه في اي مكان ومن يفعل يتم دفع مخالفه فوريه ومبلغ وقدره


    - لغه الشعب الأولى في الشارع هي اللغه الانجليزيه


    - اغلب الشعب من اصل صيني والباقي من اصول ماليزيه وهنديه


    ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~ ~


    بسم الله ابدأ معاكم تقرير الرحله اربطوا الأحزمه


    اليوم الأول :


    صور من الطائرة قبل الوصول












    قبل الهبوط لمطار شانجي














    بعد الهبوط والدخول للمطار









    والجميل في المطار انه كبير جدا وواسع


    والمطار يتكون من محطات وكل طياره تنزل في محطه


    يعني لما تدخل المطار تشوف ان المطار فاضي وبس انت والمسافرين معاك بنفس الطياره هم الموجودين


    والكلام هذا معناه انك تخلص كل الاجراءات بثواني مع ضروره تعبئه استماره الدخول وارفاقها بالجواز قبل الختم






























    كاونترات الختم











    طاولات لتعبئة استماره الدخول قبل ختم الجوازات











    وبعد الإنتهاء من ختم الجواز واستلام الشنط وجدت صديقي في قاعه الإستقبال


    وذهبت بعدها لمكتب تحويل العملات وحولت مصروفي من دولار امريكي الى دولار سنغافوري


    1 دولار امريكي = 1.255 دولار سنغافوري = 276 فلس كويتي = 3.750 ريال سعودي


    واخذت من نفس المكتب خط Sing tel ب 50 دولار سنغافوري مع رصيد بنفس السعر وخدمه النت مفعله


    وعند الخروج من المطار يوجد منظمين يصفون الناس للخروج وينادون كل شخص ليركب التاكسي واحد تلو الاخر


    صوره من التاكسي خلال توجهنا للفندق











    ملاحظة : التكاسي غاليه غلاء فاحش ولا انصح فيها الا للذهاب والعوده للمطار
    ( رأيي الشخصي )


    صوره من داخل الغرفه











    المنظر من شباك الغرفه وواضح نهر سنغافورة والمارينا باي من بعيد











    وبعدها قعدنا نتناقش انا وصديقي وين راح نروح خلال ال 5 ليالي القادمه


    وكتبنا جدول رحلاتنا بورقه واتفقنا ان تكون جميع تنقلاتنا عن طريق ال MRT


    وانطلقنا بعدها لاول رحله في اليوم الاول




    الشارع المقابل للفندق Merbau Road











    حديقه فورت كانينج بارك قريبه من الفندق 3 دقائق مشي











    صوره مبنى جميل اعجبني بالقرب من محطة ال MRT













    اقتصرت رحلتنا في اليوم الأول لزيارة المجمعات في شارع اورشارد الشهير











    صورتين من فوق بعض المجمعات في شارع اورشارد


















    ودخلنا السينما في الليل وكان سعر التذكره للشخص الواحد 11 دولار


    ومن ثم العشاء بمطعم ماكدونالدز سعر الوجبه 6 ونصف دولار للوجبه والواحده


    وبعدها ذهبنا للفندق للراحه خصوصا وانا تعبان جدا ومو نايم لمده 32 ساعه


    واكمل معاكم رحله اليوم الثاني في المره القادمه ان شاء الله




  2. #2


  3. #3


  4. #4
    مميزة ماليزيا الصورة الرمزية *صوت السهاري*
    تاريخ التسجيل
    Aug 2007
    المشاركات
    4,656

    افتراضي

    تقرير راااااائع من البدايه

    بإنتظار بقيه الرحله بشغف..فلا تتأخر
    أختك أم عبدالعزيز


    ღاللهــمღ

    ْْ~..إمْنِحنِـيٍ العَآآآآآفيٍـــهُ~ْْ

    ღ...وألّهمنِــي الصبــــر...ღ
    ْْ~..وارّزُقنِـي الثــوآآآب في الآخــره~ْْ



  5. #5
    مميزة تركيا الصورة الرمزية Haty
    تاريخ التسجيل
    Oct 2008
    المشاركات
    1,610

    افتراضي

    بداية مميزة

    وبانتظار البقية

    وخصوصا اني ناوية اسستخدم المترو برحلتي وبسكن اقتصادي



    :
    اللهم صلي وسلم على نبينا محمد وعلى آله وصحبه وسلم
    :



  6. #6
    خبير سويسرا والنمسا الصورة الرمزية ابو نزيه
    تاريخ التسجيل
    Jul 2010
    المشاركات
    2,957

    افتراضي

    الحمد لله على سلامة الوصول

    بداية جميلة وتقرير رائع لبلد راقي ومنظم

    ذكرتنا بالايام الخوالي

    واصل ابداعك نحن في انتظارك


    ** احداثيات تهمك في النمسا **

    https://travel.maktoob.com/vb/travel537642/


    ** احداثيات تهمك في سويسرا **

    https://travel.maktoob.com/vb/travel644994/



  7. #7
    مشرف دول اسيا الاخرى الصورة الرمزية ابن فطفوطه
    تاريخ التسجيل
    Jul 2011
    المشاركات
    1,619

    افتراضي

    حياكم الله جميعا ما قصرتوا على التشجيع


    ان شاء الله راح يكون التقرير كل يوم بروحه


    والمره القادمه بنزل لكم اليوم الثاني




  8. #8
    مشرف أستراليا الصورة الرمزية أبو سعود Q8
    تاريخ التسجيل
    Dec 2009
    المشاركات
    1,421

    Thumbs up متابع معاك

    الحمد الله على سلامتك أخوي ابن فطفوطة
    والله يعطيك العافية على الصور المميزة بالتقرير
    ما شاء الله
    بس عندي استفسار
    ذكرت انك اعتمدت على الاندرقراوند mrt بالتنقلات بسنغافورة ، ياريت لو تقولنا شلون كان التنقل ؟ سهل صعب ؟ الخريطة واضحه ؟ تقدر تروح لأغلب الأماكن السياحية ولا لأ ؟
    لأني لما سافرت سنغافورة شفت المحطات هذي بس خفت أجربها لأن معاي يهال ومابي اتوهق ففضلت الطريقة الأسهل والأغلى وهي التاكسي ، بس ودي بالمرات الياية أستخدم mrt

    تابع التقرير وسجلني من المتابعين




  9. #9
    مشرف دول اسيا الاخرى الصورة الرمزية ابن فطفوطه
    تاريخ التسجيل
    Jul 2011
    المشاركات
    1,619

    افتراضي

    الله يسلمك ويخليك اخوي بو سعود


    التنقل سهل جدا ورخيص حيل


    وبخصوص الاماكن السياحيه انا رحت لها كلها عن طريق المترو


    يعني تنزل باقرب محطه قريبه من المكان الي تبيه وتروح له


    بس الصعوبه فيها انك ما تقدر تدخل او تطلع الا لما تاخذ تذكرتك من الجهاز الالي لاني انا متأكد اي شخص يشوفه اول مره ما يعرف يستخدمه


    بس مع التكرار تعرفله ويصير سهل


    وان شاء الله الحين ابي انزل شرح بسيط خاص فيني لطريقه شراء تذاكر وركوب المترو




  10. #10
    مشرف دول اسيا الاخرى الصورة الرمزية ابن فطفوطه
    تاريخ التسجيل
    Jul 2011
    المشاركات
    1,619

    افتراضي

    السلام عليكم


    حبيت احط شرح مبسط لطريقه شراء تذاكر وركوب المترو وان شاء الله اقدر اوصل لكم المعلومه عدل


    اولا :


    ّّ~ يوجد طريقتين لتذاكر المترو ~


    الاولى
    1 - شراء تذكره دائمه بقيمه 15 دولار للشخص ويكون فيها نفس السعر ايضا


    ملاحظه :
    - تقدر تشتريها من محل صغير تحت عند بوابات الدخول
    - انصح فيها للي تكون انتقالاتهم كثيره عبر المترو او وقت اقامته طويل


    الثانيه
    2 - شراء تذكره مسترده للرحله الواحده عن طريق الجهاز الآلي


    ملاحظه :
    - فيه صعوبه شويه ولازم تتعلم عليه عدل عشان ما تضيع ( الشرح بالاسفل )




    الشرح :


    هاذي صوره الجهاز الآلي الي تقدر تشتري منه التذاكر المسترده









    مثل ما اهو واضح الشاشه المربعه الكبيره بالنص شاشه لمس


    والمربع الي فيها على اليسار تختار منه انت شنو تبي تسوي


    والخيارات المهمه هي :


    - شراء تذكره رحله جديده
    - ارجاع التذكره ( راح اشرحه )
    - تعبئه الكارت الدائم ( الي قلت تشتريه من المحل تعبيه من هني بالمبلغ الي تبيه )


    الطريقه :


    1 - تختار شراء تذكره رحله جديده


    2 - تختار الوجهه من الخريطه الموجوده على الشاشه


    شرح الخريطه







    مثل ما انتوا شايفين كل قطار له لون


    خلونا نتكلم على الخط البنفسجي الحين الي هو من 6 الى 7


    ومبين انه هالخط في عده مناطق وعده محطات توقف


    مثال : انت في محطه little india وتبي تروح chinatown


    كل ما عليك انك تضغط على اسم chinatown فقط


    زين البعض يسأل يقول اذا ما كانت المنطقه الي ابيها على نفس الخط وصايره على خط لونه ثاني مثلا باللون الاحمر شنو اسوي ؟


    عادي اضغط عليها واختارها بس انتبه * انك لازم تنزل بالمحطه الي يتقاطع فيها اللون الاحمر مع البنفسجي


    عشان تركب بالمحطه الثانيه وتكمل طريجك الي باللون الاحمر وجذي تكون ركبت قطارين عشان توصل


    وبهالطريقه تكون انت اخترت وجهتك من الجهاز


    3 - راح يطلب منك الدفع للرحله وتلاحظون ان السعر يكون دبل عشان يضمنون انك ترجع الكرت عند انتهاء رحلتك


    يعني اغلب الرحلات يكون اسعارها 1.20 او 1.50 او 1.70 بس يكون السعر زياده دولار يعني يصير 2.20 او 2.50 او 2.70


    والحلو فيها انك تحط اي فلوس سواءا ورق او خرده حديد ترجع لك الباقي مع التذكره من الفتحه الكبيره تحت الجهاز ( مبين بالصوره السابقه )


    وهاذي صوره للتذكره





    وبهالطريقه تكون استلمت تذكرتك وتروح تدخل من البوابات المؤديه لمحطات القطارات


    صوره للبوابات







    كل ما عليك انك تلامس التذكره حقتك بالدائره الي لونها اخضر تحت الشاشه الصغيره الي مبينه على البوابه الصغيره وتفتح لك البوابه


    والحين تكون وصلت لمحطات المترو بس في مشكله صغيره لازم الواحد ينتبه لها


    مثل ما قلت لكم خل نتكلم على محطه اللون البنفسجي عشان الامر يسهل عليكم


    محطه اللون البنفسجي يرمز لها بالرقم 6 الى 7


    وهذا الخط يبدأ من نقطه harbour front الى punggol والعكس صحيح


    يعني مثلا انت ذاهب من little india الى chinatown


    <b><b>
    المطلوب منك تشوف القطار الي يوديك حق chinatown رايح اي نقطه
    ( harbour front او punggol )


    منو يجاوب ؟ وين رايح ؟


    صح القطار رايح لنقطه harbour front يعني تاخذ محطه المترو الي مكتوب عليها harbour front لان بطريجه يمر على chinatown


    زين اذا العكس ؟ يعني انت ب chinatown وتبي تروح حق little india اي محطه تاخذ ؟


    منو يجاوب ؟ هاا ؟


    صح تاخذ محطه punggol لانه بطريجه راح يمر على little india
    </b>




    </b>


    والطريقه هاذي تتبعها لكل المحطات وكل الالوان


    وهذا فيديو صورته لكم من داخل المترو





    زين الحين الحمدلله وصلت بالسلامه ونزلت بمحطتك الي تبيها شنو تسوي ؟


    تطلع من نفس البوابات الي دخلت منها عن طريق ملامسه التذكره للدائره الخضره


    وبعدها تروح لجهاز التذاكر عشان ترد الكرت وترد باجي فلوسك


    والطريقه سهله تدخل التذكره وتختار من الخيارات خيار ارجاع التذكره ويردون لك فلوسك الي خذوها منك زياده بس


    وبالنهايه اتمنى ان شرحي كان سهل وخفيف عليكم وقدرت اوصل لكم الصوره عدل


    والي عنده اضافه او تصحيح على بعض الاشياء لا يتردد




معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 0 (0 من الأعضاء و 0 زائر)

     

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك