مـنـتـدى الـعـرب الـمـسافـرون

هذا الموقع مخصص للسياح العرب وهو احد افضل المواقع المخصصة للسياحة و مساعدة المسافرين ، و هو أحد مواقع شبكة منتديات مكتوب !Yahoo ، انضم الان و احصل على فرصة متابعة أخبار و معلومات و صور و مقاطع فيديو من كل دول العالم.



+ الرد على الموضوع
صفحة 1 من 15 1 2 3 4 5 6 7 8 11 ... الأخيرةالأخيرة
النتائج 1 إلى 10 من 144
Like Tree0Likes

الموضوع: جدول سيــاحي لديـــرتــي الغــــاليــــه الكـــــويـــت ( محـــدث )

  1. #1
    مشرفة الكويت الصورة الرمزية q8ya metnaqla
    تاريخ التسجيل
    May 2009
    المشاركات
    3,794

    افتراضي جدول سيــاحي لديـــرتــي الغــــاليــــه الكـــــويـــت ( محـــدث )

    حياكم الله في ديرتكم الكـــــــويــــت وهذي الساعه المباركه
    سويت لكم جدول بعد ماعصرت مخي وسويت اتصالاتي اذا في شي يديد ولا لا وطلعت لكم في هالجدول اهو جدول لمده تقريبا 13 يوم يعني تقدرون اتقسمون ويصير جدولين او انتقون منه الايام اللي تبونها وعاجبتكم، وحسب وقت وجودكم في الكويت اذا مواسم او شتا او صيف ..

    بسم الله نبتدي معاكم

    اليوم الاول: يوم الوصول

    اذا قلنا وصلتوا الصبح ورحتوا الفندق وريحتوا وصليتوا الظهر تطلعون وتروحون اتغدون في

    الغدا : مطعم ميس الغانم ( لبناني ) ، منطقة شرق ، على شارع الخليج العربي على البحر ..

    بعد الغدا تروحون يمه سوق شرق اتمشون واتسوقون فيه وتقعدون في الكافيهات اللي على المرسى وعقب تطلعون منه وتروحون ..

    متحف بيت ديكسون ( بيت المقيم السياسي البريطاني في الكويت ) منطقة شرق مقابل وزارة الخارجيه وبجانب وزارة التخطيط ، يعني اذا طلعتوا من سوق شرق اخذوا يمين وراح تلقونه على ايدكم اليسار ..

    وبعده متحف بيت السدو على شارع الخليج العربي رقمهم 22432395 ، وبعدين ترجعون الفندق اتريحون بو ساعه وتطلعون على مارينا مول اتمشون و تحجزون فيلم وقت متأخر دشون بعد العشا ..

    العشا مطعم ماكي (ياباني) في مارينا ويفز تطلع من جسر مارينا مول يوديك على جهة المطاعم على البحر في مكان بالنص شكل خيمه بنص البحر المطعم موجود اهناك اكله واايد حلو او المطعم اللي يمه ايطالي واكله حلو ..
    وبعدها اتحلون في living room cafe تحتهم القعده مو طبيعيه بس لبسوا عدل (اذا كان الجو شتوي ) وبعدين دشوا الفيلم اللي حجزتوا له ..

    اليوم الثاني :

    الصبح على ال 9 اتريقون في مطعم واايد حلو اسمة ريوق ، منطقة الشعب البحري ، قطعه 8 بجانب مطعم فيلا فيروز ،، اذا كنتوا ماشين على خط فحيحيل باتجاه مدينه الكويت راح تصير الشعب على ايدكم اليمين الفرعي الثاني تدخلون وتمشون اشوي سيده تشوفون فيلا فيروز يمينكم دشوا يمين وبتشوفون المطعم ..

    وبعد الريوق اتروحون تطلعون على خط فحيحيل باتجاه مدينه الكويت وتروحون سوق المباركيه بما ان الجو حلو ويحتوي على كل شي ( الذهب ، الملابس ، البشوت ، المسابييح ، العطور ، المكياج ، الخضار ، الفواكة والخ .... ) بعد ما اتخلصون تسوق وتمشي اتغدون في احد المطاعم الشعبيه اكلهم ترا واااااايد حلو عندكم ( دلق سهيل ، السيخ البحريني والخ ... من مطااعم ) ..

    العصر تروحون متحف طارق رجب : عنوانهم الجابريه ، قطعه 12 ، شارع 5 ، اوقاتهم من 9-12 الظهر ومن 4-7 المسا تليفونهم 25317358 او 25339063.

    بعد المتحف المغرب تروحون سوق السالميه الاحمر مكانه عند دوار الجوازات الدائري الخامس اتسوقون واتمشون فيه ..
    العشاء على الساعه 10 مطعم الصنوبر (لبناني ) السالميه شارع البلاجات على البحر ..

    اليوم الثالث :

    الصبح اتريقون على 9:30 او 10 مطعم لونوتر في مول 360 منطقة جنوب السره على الدائري السادس ريوقهم وااايد حلوو بوفيه وبعد الريوق اتمشون واتسوقون في المول وسمعت توهم فاتحين لادوريه كافيه عندهم خوووش ماكروون بس لاتكشخون في هاليوم واايد وراكم لعب عقب ما اتخلصون سوق وتمشي اتغدون في مطعم B+F (امريكي ) اعتقد بس وااااااايد لذيييييذ ،، عقب اتصلون العصر في المول وتتجهون منطقة صبحان المنطقه مقابله لمنطقه جنوب السره وتروحون نادي الصيد والفروسيه ترمون اشوي وتركبون الخيل الدائري السادس بجانب مستشفى القوات المسلحة‫ظ†ط§ط¯ظٹ ط§ظ„طµظٹط¯ ظˆط§ظ„ظپط±ظˆط³ظٹظ‡ - ط§ظ„ظƒظˆظٹطھ | Facebook‬ ورقمهم 24717271
    وبعدين المنطقه اللي بجنب صبحان والمطار منطقه الضجيج تروحون وتسابقون سيارات PRO KART هذي خريطتهم ورقمهم 90096121 فاتحين من 10 ص لي 12 مساء
    Pro Kart Kuwait's Photos - Karting | Facebook

    بعد ما اتخلصون تروحون الفندق تريحون وبعد صلاه العشا تروحون منطقه البدع ، شارع التعاون عند الفنادق موفنبيك وشيك وريجينسي قعدات خارجيه كافيهات ومطااعم اتعشون في مطعم المياس ( لبناني ) داخل منتجع شيك يطل على البحر الاكل حلو والقعده حلووه ،، او المطعم الايطالي ما اعرف اسمه اعلانه بالمقلوب يمه جافا ديتور كافيه ... وبعدين اتحلون في شوكلت بار عند الموفنبيك ..

    اليوم الرابع :

    الصبح اتريقون في الفندق اتسون ريوق بيتوتي نخي وباجيلا وخبز ايراني جبن وخيار وزيتون من هالسوالف على اذان الظهر اتصلون واتوكلون على الله منطقة الدوحه ( المدينه الترفيهيه ) لي المغرب يعني لي 5 وبعدها تردون الفندق اتريحون ساعه او ساعه ونص ،، وتوكلون على الله باتجاه مجمع الافنيوز على الدائري الخامس اتسوقون واتمشون فيه ..

    العشا في نفس المجمع مطعم NAPKET ايطالي وحلووو او مطعم رايس (شبه كويتي ) او فيلا فيروز (لبناني )

    بعد العشا تدخلون السينما بالليل ..

    اليوم الخامس :

    الصبح الريوق على 9 في مطعم مركز سلطان بوفيه على البحر ، السالميه ، شارع الخليج العربي ..
    بعد الريوق تروحون حولي اتسوقون في اسواقها اذا تبون شي عملي او للحفلات مجمع المهلب (شارع بيروت ) مجمع النقره الجنوبي والشمالي (شارع بيروت ) مجمع العثمان (شارع بن خلدون ) ..

    الظهر الغدا في مطعم فريج صويلح (كويتي ) السالميه بجانب مارينا مول ،، بعد الغدا تروحون الفندق اتريحون وتطلعون على 3:30 انتوا داخل الابراج اتشوفون الكويت من فوق وبعدين تنزلون تحت الابراج تلعبون paintball حرب الاصباغ اللعبه واايد حلوه اذا كنتوا قروب تلعبون ضد قروب واذ شخصين تقدرون تدشون مع قروب هذا سايتهم Paintball Kuwait

    وبعد صلاه العشا تختارون تروحون مسرحيه او حفله .. وراح تلقون في الجرايد اليوميه فعاليات هلا فبراير والامسيات والحفلات والندوات الدينيه ..

    واذا ماتبون جذي تقدرون تروحون مجمع الصالحيه راقي وكله ماركات في مدينه الكويت شارع الجهراء اتمشون فيه وبعدين اتعشون في جوني روكتس (امريكي) بره مع المطاعم اللي عند النافوره ..


    اليوم السادس :

    الصبح 9:3 الريوق في مطعم البلد (لبناني)بوفيه ، منطقه شرق ، برج الخدمة المدنيه ويمهم برج الوطنيه للاتصالات ..

    وبعدها تروحون السالميه شارع سالم المبارك واتمشون واتسوقون في هالمجمعات ( ليلى غالاري ، البستان ، الفنار، سنتر بوينت ، مركز سلطان سوبرماركت حلوو ، مجمع زهره ، مجمع مريم ، مجمع الثريا وتقعدون في احدى الكافيهات اللي على الشارع وكلهم مشي يم بعض ..

    الغدا : دون ماريوز (ايطالي ) حلوو على البحر منطقه شرق مقابل ميس الغانم في مطاعم يسمونهم الضيافه فيلج او اتغدون في فيش ماركت (سي فود ) تحت الابراج..

    بعد صلاه العصر تروحون متحف بيت الكويت للاعمال الوطنية ، عنوانهم منطقة الشويخ ، قطعه 7 ، شارع 7 بجانب المسرح العام ، فيلا 32 ،، تليفون 24846336.

    بعد المتحف تروحون مجمع الرايه راقي وهدووء ، منطقه شرق ، شارع الشهدا ، مقابل المطافي اتسوقون وتقعدون في ماكرون كافيه وتاكلون ماكرون لذيييذ ..

    العشا مطعم سلايدر ستيشن (امريكي) مقابل قصر السيف ، منطقة شرق من بعد دوار مسيد الدوله الكبير اتكملون سيده تكون مطاعم على ايدكم اليسار ومن ضمنهم سلايدر وااايد حلوو ..

    اليوم السابع :

    الصبح الريوق مارينا ويفز السالميه ، مطعم زعتر وزيت على المرسى ،، بعد الريوق اتروحون المركز العلمي على شارع الخليج اذا خليتوا مارينا مول يمينكم كملوا سيده تلقون المركز العلمي على ايدكم اليسار لي وقت صلاه الظهر مثلا ..

    بعدين اتروحون اتغدون في منطقه الشعب البحري على شارع الخليج العربي في مكان اسمه ملتقى الشعب في مطعم النوخذه ( سي فوود ) واااايد حللللوووو ويمهم حديقه الشعب بعد الغدا ريحوا اشوي مو واايد وبعدين دشوا لعبوا على 6 تطلعون منها ..

    تروحون الفندق واتريحون اشوي بعد ماتصلون العشا تروحون يوم البحار مكان العاب وقعدات شعبيه واكل شعبي ،، او اتعشون في المباركية اذا تبون الاشياء الشعبيه ..

    اذا ماتبون شعبي تروحون منطقه البدع واتعشون في مطعم واسابي (ياباني) اعتقد ..

    اليوم الثامن :

    الصبح اتريقون في مول 360 كاكاو كافيه يم لورينزو واتسوقون لي حزه الظهر ،، بعدين تروحون منطقه فحيحيل مجمع الكوت والمنشر واتمشون فيهم واتغدون في مجمع الكوت مطعم ياميجانا (لبناني) يطل على البحر وعقب الغدا ادشون سينما في مجمع الكوت ،، عقب السينما على المسيان تقعدون في وحده من الكافيهات اللي يطلون على النافووره المكاان واايد حلووو ..
    واتمشون في اسواق فحيحيل الشعبيه وبعدها اتعشون في مكان اسمه spoons المكان حلوو باتجاه ابراج غاليه وعاليه اذا خليتوا مجمع كويت ماجيك يمينكم كملوا سيده تلقون مكتوب spoons اتعشون في فرايديز واتحلون في شوكلت بار ..

    اليوم التاسع :

    الصبح الريوق في مجمع الافنيوز مطعم لورنزو (ايطالي) واتسوقون اشوي مو وايد لان وراكم روحه الفروانيه مجمع العربيد في دراريع (الجلابيات) ومجمع مغاتير والحمرا مول ،، اتخلصون من الفروانيه تروحون السالميه اتغدون في مغل محل (هندي ) في ماركس اند سبنسر يم مارينا مول ..

    وبعدين على 5 بعد ماتريحون تروحون متحف القرين (بيت الشهيد بدر العيدان ) عنوانهم : القرين ، قطعه 4 ، شارع 3 ، منزل 59 .. تليفونهم 25430343 ..

    او اذا ماتبونه خلوه وريحوا وشوفوا لكم مسرحيه او حفله ، واذ ماتبون مسرحيه او حفله تقدرون تروحون سوق السالميه الاحمر او ارض المعارض في منطقه مشرف اذا كان في معرض او المعارض الصغيره اللي يم المستشفى الاميري منطقه شرق مثل ( fa gallary، بيت ديفا والسدره موجودين مطقه شرق ، 52 degrees موجود في الشويج مجمع التلال والمعارض اللي اعلاناتها في الجرايد والخ ... ) او مجمع البيرق في منطقه العقيله.

    والعشا يكون في مطعم شرين بانو (ايراني) منطقه دسمان مقابل قصر الشيج جابر الصباح رحمه الله ...

    اليوم العاشر :

    OPEN DAYلوووول عيزت

    اليوم الحادي عشر:


    الصبح اتريقون في prime toast مقابل قصر السيف منطقة شرق وزاره الخارجيه على يمينكم وسيده اييكم دوار المسيد الكبير اتكملون يعد سيده اتشوفون المكان على ايدكم اليسار ريوقهم حلوو ، المكان كله مطاعم ..
    يمكم متحف الكويت الوطني24565342 او 22451195 من ضمنه ( دار الاثار الاسلاميه 22400992 ، ومتحف التراث الشعبي 22429158 ) ويم المتحف بيت البدر واهو من اقدم البويت الكويتيه 22429158 ، ويمهم مكتبة الكويت الوطنية .

    بعد ما اتخلصون من المتاحف تتجهون السالميه عند المارينا ويفز تحجزون على عباره ام الخير وتتجهون على جزيره فيلجا (فيلكا) واتمشوف فيها واتشوفون اثارها وترجعون الديره على 5 او 6 المغرب ..

    تروحون الفندق وتريحون اشوي بعدها تروحون ، برج النصار مدينه الكويت ، يم فندق الشيراتون دور 32 اتعشون في مطعم ايطالي نسيت اسمه بس المكاان واايد حلوو راقي وهادي والطله فيه احلى واكله حلوو او اذا تبون اكل كويتي مطعم الستينيات في حولي شارع بيروت مقابل المطافي تقريبا..


    وبجذي انتهى يومكم الاثري بما انه كله اثار ومتاحف

    اليوم الثاني عشر:

    تروحون مدينه الكويت وبالتحديد منطقه دسمان (شرق) يم مجمع دسمان برج مشعل ، تحت مطعم baking try مقابل مطعم نواره . اتخلي برج الحمرا يمينك واتكمل سيده بعد الاشاره راح يبين برج مشعل وفيه المطعم .. ريوووقهم واايد حلو ..

    بعد الريوق اتروحون الفندق اتريحون اشوي لان وراكم رحله بحريه عندكم مكتب سلسان لتأجير اليخوت هذا سايتهم http://www.silsan.net/New/charter.php ، مكانهم شارع الخليج بجانب مطعم مركز سلطان اتأجرون بروحكم من 1 – 4 على كيفكم جم ساعه تبون وتقدرون تروحون وتشوفون الجزر الكويتيه او يتمشى فيكم في الديره ما يطلع على الجزر انتوا اللي تختارون.

    بعد ماتردون على المسيان وتريحون اتعشون في مطعم ساسو saso نفس مكان الريوق الجهه المقابله ل baking try ، بعد العشا تكونون حاجزين فيلم في 360 مول ..

    اليوم الثالث عشر:

    اتريقون في مطعم عبدالوهاب (لبناني) بوفيه ، شارع الخليج من بعد نادي ضباط الجيش ، .

    بعد الريوق تتجهون منطقة العميريه على الدائري الخامس Kuwait zoo وبعد ما اتخلصون zoo تروحون منطقه المرقاب الدائري الاول صاله التزلج واتسون skating
    بعدها على 3 اتغدون في برج جاسم مقابل صاله التزلج : مطعم ماكي ياباني او ماضينا كويتي دور 28 او المغربي في نفس الدور ..

    وبعدها تروحون جمعيه الشاميه منطقه الشاميه اتمشون فيها لان هذا الشي مو موجود عندكم اهو سوبر ماركت وسوق وكل شي فيها ، او جمعيه الروضه ( منطقه الروضه ) ..

    بعد ما اتخلصون من الجمعيه اتروحون منطقه الجابريه ( متحف محمد الشيباني ، منطقة الجابريه قطع 5 شارع 3 تليفون 25320901 .. او تمرون الجهراء وتروحون القصر الاحمر ومنها تشوفون الجهراء.

    اتخلصون من المكان اللي اخترتوه اتروحون مقهى شعبي سليمان الشميمري منطقه شرق يم سوق شرق واتعشون فيه او اذا تبون مطعم تروحون المطاعم اللي مقابله قصر السيف من بعد دوار المسيد الكبير مطعم the burger hub امريكي او مطعم pizetta ايطالي يمه او مطعم نارنج ( سوري ) في مجمع اولمبيا على شارع الخليج العربي بعد مارينا مول باتجاه المركز العلمي.

    او انكم تروحون وتلعبون هاللعبه مثل بينت بول بس عسكريه اكثر وحلووه وموجوده في حديقه الشعب على شارع الخليج العربي .. وهذا موقعهم ..



    اليوم الرابع عشر و الخامس عشر:

    تقدرون تحجزون شاليه لمده ليلتين او ليله وهذيل اسامي الشاليهات :

    1- شاليهات الوطنية - منطقه الخيران- طريج 290 جنوب الكويت- تليفونهم 22425211.
    2- منتزه الخيران- منطقه الخيران- طريج 278 جنوب الكويت- تليفونهم 23951122.
    3- فلل او شاليهات الفارس - منطقه الخيران - طريج 278 جنوب الكويت - تليفونهم 22659105/22659104/
    66992182/66992173
    4- منتزه خليفه - منطقه جليعه- طريج 240 جنوب الكويت- تليفونهم 23280144 او 232407262.
    5- شاليهات صالح شهاب- منطقه جليعه- طريج 245 جنوب الكويت- تليفونهم 23280573 / 23280571 / 23280865.
    6- فندق ومنتجع سيشل - منطقه جليعه- طريج 245 جنوب الكويت- تليفونهم 1844444.
    7- شاليهات الجون - منطقه جليعه - طريج 245 جنوب الكويت- تليفونهم 23281801 / 23281897.
    8- فندق ومنتجع هيلتون- منطقه المنقف- جنوب الكويت خط فحيحيل الساحلي- شاليهات عاديه وشاليهات بحوض سباحه خاص- تليفونهم 22256222 / 23725500 / 23724348.
    9- منتجع سفير الدانه - منطقه الفنطاس- طريج 209 جنوب الكويت خط فحيحيل الساحلي- تليفونهم 23902760.
    10- فنادق ومنتجعات - موفنبيك ، شيك ، رمال ، النخيل - منطقه البدع - شارع التعاون.
    تليفوناتهم : النخيل 25646266 / 1824060 ، موفنبيك : 22253100 ، شيك : 25725050.
    11- منتجع صحارى- منطقه صبحان - على الدائري السادس بجانب نادي الصيد والفروسيه- شاليهات عاديه وشاليهات بحوض سباحه خاص - المنتجع واايد راقي واايد هادي - تليفونهم 1840084.
    12- منتجع سليل الجهراء-منطقه الجهراء - شمال الكويت- تليفونهم 24575901 / 24567444.


    ملااحظات :- حديقه الشعب تصلح للكبار والاطفال.
    - المدينه الترفيهيه تصلح للكبار والاطفال.
    PRO KART تصلح للكبار والاطفال .
    - لعبه milsim مثل البينت بول وتصلح للكبار والصغار.
    - المركز العلمي يصلح للكبار والاطفال.
    - PAINTBALL تصلح للكبار والاطفال .
    - المجمعات كلها فيها اماكن خاصه للاطفال.
    - المتاحف تصلح للكبار والاطفال.
    - نادي الصيد والفروسيه يصلحون للكبار والاطفال .
    - اماكن للطائرات الورقيه في منطقه المسيله بجانب قريه المسيله المائيه او في منطقه بنيدر منطقه شاليهات .
    - مجمع ديسكفري مدينه الكويت على الدائري الاول للاطفاال.
    - مجمع الخليجيه منطقه شرق للاطفال.
    - حديقة حولي بارك منطقه حولي للاطفال.
    -المسرحيات في للاطفال وفي للكبار والحفلات والامسيات والندوات اعلانات يوميه في الجرايد (موسم مهرجان هلا فبراير- مواسم الاعياد)
    - مخيم وزارة الدفاع اعتقد في منطقه صبحان ( فيه انشطة ترفيهيه) .
    - مخيم شركة نفط الكويت اعتقد في منطقه جليعه جنوب الكويت (انشطه ترفيهيه).
    -القصر الاحمر منطقه الجهراء.
    - مزارع الوفره ( منطقه الوفره جنوب الكويت )
    - الاكوا بارك مائيه ( في الصيف ) منطقه شرق تحت الابراج.
    - قريه المسيله المائيه ( منطقه المسيله )في الصيف.
    - ملاعب الصابون كوره القدم (في الصيف).
    - ارض المعارض الدوليه في مشرف ( تشوفون اذا في معاض ولا لا بالجرايد )
    - معارض الازياء والكماليات ( مثل بيت ديفا - دار يوشا منطقه جبله (القلبه) من ورا الكنيسه ويمه بيت ديمه - معرض افكاري بالري بجانب السوق الايراني - معارض في هلتون المنقف (التأكد اذا موجودين قبل ماتروحون) - معارض في صاله الشيخ سالم العلي في قرطبه ( التاكد قبل ماتروحون ) ، معارض فندق رمادا في منطقه الرقعي (التأكد قبل ماتروحون ).
    - الشاليهات والمنتجعات ..

    اتمنى يعجبكم الجدول وما اكون قصرت فيه واتمنى اني غطيت اغلب الاماكن في ديرتي الغاليه الكويت وان شاء الله اي شي يديد راح اضيفه على هالموضوع

    واي استفسار بالخدمه

    الى زوار الكويت الحبيبه
    اي موقف يصادفكم في المحلات او فنادق او مطاعم الخ وحسيتوا انهم قاعدين يستغلونكم الرجاء الاتصال على الخط الساخن لحمايه المستهلك .. يعني مثلا فندق يقولكم ضريبه مافي على طول اتصلوا على حمايه المستهلك وبلغوهم ونفس الشي للمطاااعم وهذا اهو الرقم
    الخط الساخن لحمايه المستهلك 135


    The smile is a famous word without letters:smile:
    https://travel.maktoob.com/vb/travel487746/ جدول سيـــــاحي لديــرتي الغـــــاليــــه الكــــــــويت (محـــدث)
    https://travel.maktoob.com/vb/travel4...3/#post4509578 تقرير تايلند Thailand 2010
    https://travel.maktoob.com/vb/travel347408/ تقريري عن renew Bicester village outlet,london,cardiff

    https://travel.maktoob.com/vb/travel345898/ تقريري عن منتزة الخيران Khiran Resort
    https://travel.maktoob.com/vb/travel335552/ تقريري عن امريكا Los Angles,Las Vegas,New York

    راجـــع بشــوقي ولهفتـــي من غـــربتي .. راجـــع لربعــي وديــرتي ومحبـــوبتــي


  2. #2
    مــوقــوف
    تاريخ التسجيل
    Dec 2008
    المشاركات
    4,340

    افتراضي

    هذا الشغل العدل ما شاءالله كافي ووافي .........يعطيج العافية




  3. #3
    خبير الكويت الصورة الرمزية كويتي1968
    تاريخ التسجيل
    Jun 2010
    المشاركات
    527

    افتراضي

    الله يعطيج العافيه مجهود وايد حلو ومبين تعبتي عليه

    وايد ريحتينا اي استفسار راح ارد عليه بكوبي وبيست حق موضوعج لانه شامل

    مع حفظ حقوق النشر باسمج

    شكرااا




  4. #4
    مسافر فعال
    تاريخ التسجيل
    Jun 2006
    المشاركات
    120

    افتراضي

    والله ما قصرت وشغل متعوب عليه وانا جاي والعيله يمكم بعد اسبوع وحطيت برنامجك معي بعد ماطبعته بس طبعا اباختصره لأني اظن تكفينا 4 ايام وليت حطيتي الاسعارولو تقريبيه لفيلكا والرحلات البحريه وبعض المواقع والأماكن وهل هي برسوم او فريي ايضا لو ارفقت صور للمواقع والاماكن المذكوره يكون اكمل لبرنامجك الحلو والله يسلمك ويعطيك الصحه




  5. #5
    مسافرجديد
    تاريخ التسجيل
    Mar 2009
    المشاركات
    53

    افتراضي

    جزاك الله الف خير على هالموضوغ الرائع واتمنى يثبتونه

    انا جاية الكويت يوم الجمعة بأذن الله واتمنى يعبك برنامجي واذا ممكن تعدل عليه بكون ممنونه

    1/ راح نوصل بأذن الله على وقت الظهر بنروح الفندق نريح وبعد صلاة المغرب بنطلع لستي سنتر وبعدها سوق المباركة والعشاء في المطاعم الشعبية

    2/ الذهاب صباحا الى حديقة الحيوان ثم الغداء في أحد المطاعم القريبة (؟) وبعدها التوجه إلى منطقة الفروانية للتسوق مثل مجمع العربيد والحمراء وغيرها والعشاء (؟)

    3/ الذهاب الصبح إلى مجمع النقرة الشمالي وسوق السالمية والعصر الذهاب إلى احد المجمعات ثم العودة الى المباركة

    4/ الذهاب إلى الافنيوز ثم المدينة الترفيهية والعشاء في شارع سالم المبار ك ( اتمنى دلوني المكان)

    5/ العودة للوطن بأذن الله

    ودي ادل مجمع المثنى بالصالحية ومجمع السندس والايوب بحولي مو عارفة مكانهم

    وسوق السالمية الأحمر مو عارفته اهو نفسة المعلم ؟

    مع العلم ان احنا عائلية




  6. #6
    مشرفة الكويت الصورة الرمزية q8ya metnaqla
    تاريخ التسجيل
    May 2009
    المشاركات
    3,794

    افتراضي

    اقتباس المشاركة الأصلية كتبت بواسطة fab u lus مشاهدة المشاركة
    هذا الشغل العدل ما شاءالله كافي ووافي .........يعطيج العافية
    الله يعافيج فابيوو :)




  7. #7
    مشرفة الكويت الصورة الرمزية q8ya metnaqla
    تاريخ التسجيل
    May 2009
    المشاركات
    3,794

    افتراضي

    [QUOTE=كويتي1968;4809736]الله يعطيج العافيه مجهود وايد حلو ومبين تعبتي عليه

    وايد ريحتينا اي استفسار راح ارد عليه بكوبي وبيست حق موضوعج لانه شامل

    مع حفظ حقوق النشر باسمج

    شكرااا

    الله يعافيك كويتي ، افا عليك الجدول تحت امرك اللي تبيه وتامر فيه سووه
    العفـــــــو




  8. #8
    مشرفة الكويت الصورة الرمزية q8ya metnaqla
    تاريخ التسجيل
    May 2009
    المشاركات
    3,794

    افتراضي

    اقتباس المشاركة الأصلية كتبت بواسطة جدووع مشاهدة المشاركة
    والله ما قصرت وشغل متعوب عليه وانا جاي والعيله يمكم بعد اسبوع وحطيت برنامجك معي بعد ماطبعته بس طبعا اباختصره لأني اظن تكفينا 4 ايام

    انت تقدر تختار الايام اللي تبيهم من الجدول والا 4 اظنها تكفيكم.. وحياكم الله

    وليت حطيتي الاسعارولو تقريبيه لفيلكا والرحلات البحريه

    الاسعار لفيلكا اذا ماخانتني الذاكره من 3-5 دنانير ، اما الرحلات الخاصه تعتمد جم ساعه ونوع الطراد وين رايح وعدد الاشخاص..

    وبعض المواقع والأماكن وهل هي برسوم او فريي ايضا

    في متاحف فري بس ما اعرف ايهم والباجي رسوم رمزيه ..

    لو ارفقت صور للمواقع والاماكن المذكوره يكون اكمل لبرنامجك الحلو والله يسلمك ويعطيك الصحه
    ان شاء الله احاول انزل للصور لبعض الاماكن ، والله يسلمك وحياكم الله في ديرتكم الثانيه




  9. #9

    Thumbs up

    ممتاز جداً

    الحمدلله صارت هذي الدرر مستقله .. وأكثر تمييز








    [ وَمَا كَانَ اللّهُ لِيُعَذِّبَهُمْ وَأَنتَ فِيهِمْ وَمَا كَانَ اللّهُ مُعَذِّبَهُمْ وَهُمْ يَسْتَغْفِرُونَ ]





    *يارب تجيب العواقب سليمه
    2011-2-19






  10. #10
    مشرفة الكويت الصورة الرمزية q8ya metnaqla
    تاريخ التسجيل
    May 2009
    المشاركات
    3,794

    افتراضي

    [QUOTE=دلووعة محرقية;4812368]جزاك الله الف خير على هالموضوغ الرائع واتمنى يثبتونه

    ويجزيج ان شاء الله

    انا جاية الكويت يوم الجمعة بأذن الله واتمنى يعبك برنامجي واذا ممكن تعدل عليه بكون ممنونه

    حياكم الله وحي الله اهل المحرق

    1/ راح نوصل بأذن الله على وقت الظهر بنروح الفندق نريح وبعد صلاة المغرب بنطلع لستي سنتر وبعدها سوق المباركة والعشاء في المطاعم الشعبية

    حلو بس استراحتكم طويله لي المغرب انا اقول ريحوا ساعه وبعدها طلعوا ستي سنتر وبعد ستي سنتر تغدوا في ميس والمغرب روحوا المباركيه ..

    2/ الذهاب صباحا الى حديقة الحيوان ثم الغداء في أحد المطاعم القريبة (؟) وبعدها التوجه إلى منطقة الفروانية للتسوق مثل مجمع العربيد والحمراء وغيرها والعشاء (؟)

    دام انكم ناوين هاليوم الفراونيه اتغدون في مغل محل هندي مقابل جمعيه الفروانيه والعشا بعد بالفروانيه فندق كروان بلازا مطعم النوخذه سي فود بوفيه ..

    3/ الذهاب الصبح إلى مجمع النقرة الشمالي وسوق السالمية والعصر الذهاب إلى احد المجمعات ثم العودة الى المباركة

    بعد ماتخلصون من حولي والسالميه روحوا 360 مول وبعد المجمع المباركيه اتعزوون المباركيه يا اهل البحرين لان حتى اهلنا لما يون من البحرين لازم المباركيه يومي

    4/ الذهاب إلى الافنيوز ثم المدينة الترفيهية والعشاء في شارع سالم المبار ك ( اتمنى دلوني المكان)

    اذا ناوين تروحون الافنيوز بس تمشي من غير سوق يمدكم تروحون الترفيهيه اما اذا ناوين سوق ما راح يمدي خاصه اذا معاكم ياهال ... العشا عندج فريج صويلح كويتي يم مارينا مول وعندج نارنج سوري مقابل المركز العلمي على شارع الخليج العربي ..

    5/ العودة للوطن بأذن الله

    ودي ادل مجمع المثنى بالصالحية ومجمع السندس والايوب بحولي مو عارفة مكانهم

    المثنى اذا كنتوا على الدائري الاول باتجاه دوار الشيراتون اتكملون الدوار يمين الدخله الثانيه يصير فوربوينتس هوتيل يسارج والصالحيه يمينج اتكملون سيده اتيكم اشاره بعد الاشاره على ايدج اليمين مجمع المثنى .

    السندس والايوب تدشون حولي من الدائري الثالث اتصير القادسيه يساركم وحولي يمينكم اتيكم اشاره الاشاره هذي يمها فرعي يمين تدخلون اتمشون اشوي سيده يصير يمنج مجمع بلازا والايوب ويساركم السندس .

    وسوق السالمية الأحمر مو عارفته اهو نفسة المعلم ؟

    اي اهو المعلم وستي سنتر

    مع العلم ان احنا عائلية

    حياكم الله انتي وعايلتكم في ديرتكم الثانيه




معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

     

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك