مـنـتـدى الـعـرب الـمـسافـرون

هذا الموقع مخصص للسياح العرب وهو احد افضل المواقع المخصصة للسياحة و مساعدة المسافرين ، و هو أحد مواقع شبكة منتديات مكتوب !Yahoo ، انضم الان و احصل على فرصة متابعة أخبار و معلومات و صور و مقاطع فيديو من كل دول العالم.



+ الرد على الموضوع
صفحة 1 من 4 1 2 3 4 الأخيرةالأخيرة
النتائج 1 إلى 10 من 37
Like Tree0Likes

الموضوع: منتجع موفنبيك البدع بعدستي في عيد الأضحى 2010 .. Movenpick al bidaa ] ~

  1. #1
    مسافر متالق الصورة الرمزية غلا الإمارات
    تاريخ التسجيل
    Jul 2004
    المشاركات
    1,031

    Wink منتجع موفنبيك البدع بعدستي في عيد الأضحى 2010 .. Movenpick al bidaa ] ~

    السلام عليكم ورحمة الله وبركاته ..


    شخباركم اخواني وخواتي ؟


    مثل ما تعرفون انا قبل فترة عيد الأضحى كنت ضيفه دائمة في بوابة الكويت ^.^


    و حطيت استفسارات سياحيه و ما قصرتو معاي الله يعطيكم العافية


    و من باب رد الجميل قلت بحط لكم تقرير عن منتجع موفنبيك البدع ..


    لأني احترت جداً في اختيار السكن و ما حصلت تقرير شامل ومتكامل عن المنتجع على الانترنت !


    زيارتنا للكويت كانت في اجازة عيد الأضحى 2010 و للأمانة انا كتبت تقرير الرحلة في منتدى آخر بعنوان (الكويت يا حب ما نعده يا شوق ما بعده بعد )


    و هذا الجزء الأول من التقرير بس ما كملته للحين بسبب ظروف خاصه و انشغالي بالسفر مع الوالد للعلاج في المانيا الله يشفيه و يعافيه و دعواتكم له و انا في ميونخ حالياً ..


    الحين بخليكم مع التقرير و ان شاء الله ينال على اعجابكم و تستفيدون منه


    و انا آسفة تقريري بصيغة المؤنث لأن المنتدى اللي مشتركه فيه نسائي يعني كلام حريم ههههه



    -------------------------------------------------------------------------------------------------------------------------------





    درة ولها قلب من ذهب درة درة
    حبها بالقلب انكتب الكويـت الكويـت
    حـرة وماتعرف صعب حـرة حرة
    راية في عيون العرب الكويت الكويت


    :


    :



    السلام عليكم ورحمة وبركاته

    شحالكن خواتي؟

    انا سافرت الكويت في اجازة عيد الأضحى 2010

    بالتحديد من 15 / 11 إلى 20 / 11 .. و كانت رحلة سعيده و موفقة و استانسنا الحمدلله ^.^

    و هذا التقرير إهداء للعضوه الغالية miss q8


    فدييتها ما قصرت ويانا و اقولها مشكووورة حبيبتي و الله يعطيج العافية =)

    طبعاً انا استفتحت التقرير بصورة بابا زايد و بابا جابر الله يرحمهم و يغفرلهم

    و فضّلتها على صورة العلم او ابراج الكويت او أي شي ثاني !

    و كنت قاصده لان هالصورة فيها معاني حلوة

    و ترمز للحب و التعاون و عمق العلاقات الأخوية المتميزة اللي تربط بين البلدين و الشعبين الشقيقين :)

    التقرير بيكون على اجزء لأن عندي ما يقارب 400 صورة ما شاء الله

    و من الحين اقولكم ترى اذا ما شفت تفاعل ويا الموضوع ما بنزل باقي الاجزاء كيفكم لول :D

    قبل ما ابدأ في التقرير بخبركم باختصار عن الرحلة بشكل عام و السلبيات و الايجابيات لني كتبتها بطلب من صديقتي miss q8 في موضوعها :



    اقتباس المشاركة الأصلية كتبت بواسطة الغر الحشيم مشاهدة المشاركة
    هلا حبيبتي
    الله يسلمج و الكويت منوره بأهلها الطيبين شراتج ^.^
    ان شاء الله انا اول وحده بجاوب على موضوعج :
    1 - رايكم بالكويت؟
    الكويت دولة حلوة و فيها مقومات سياحية بس الصراحة محتاجه للتطوير !
    يعني لا تزعلين يا مس حسيت اني فالامارات ايام الثمانينات --> مع اني مواليد تسعين لول :D
    بعطيج مثال المباني و العمارات الجدييمه و المتكسره مسويه واجهة غير حضارية على الشوارع الرئيسية و المفروض يهدمونها
    و الشوارع و الدوارات محتاجه اهتمام اكثر يعني ما شفت ورود فالشوارع ولا دوارات مميزة مثل الامارات
    و ابراج الكويت لازم يطورونها و يسوون لها صيانه باستمرار لانها رمز للكويت و مادري كيف مغبره و شكلها جديمه حييل
    و هالاشياء ما تنتقص من جمال الكويت بس كلمة حق و قلتها بكل صراحة و حيادية
    و لاحظت شعب الكويت شعب يعشق المطاعم بشكل مب طبيعي .. و حتى اول يوم العيد نشوفهم بالمطاعم و فالويكند بعد حسب علمي الاغلبية لاازم يروحون مطاعم
    لدرجة اني اقول حق ابوي المطاعم اكثر عن الاوادم في الكويت ما شاء الله :D

    2 - تفكرون تعيدون الزياره ؟
    حالياً على المدى القريب ما افكر اعيد الزيارة
    بس يمكن فالمستقبل تتغير اشياء فالكويت و نرجعلها عشان نشوف اليديد ^.^

    3 - السلبيات والاجابيات بالرحله بشكل عام ؟
    اولاً ببدأ في الايجابيات :
    - شفنا دولة خليجية شقيقة و اتعرفنا على اهم معالمها و خذنا انطباع عن الحياة فالكويت و الشعب و العادات و غيرنا عن اجواء العيد التقليدية فالبلاد و استانسنا الحمدلله .
    الشعب الكويتي و خصوصاً البنات شعب طيب و مضياف و متعاون و يقدمون المساعدة بدون ما نطلبها و اتعرفنا على وايد ناس و صارت لنا صداقات و معارف من الكويت .
    - عيبتني فكرة المطاعم الكويتية التراثية مثل فريج صويلج و الستينات و غيرهم .. لانها تعطي انطباع حقيقي للسياح عن تاريخ البلد و التراث و الماضي و كانت تجربة مميزة جداً .
    - الكويت فيها واجهة بحرية كبييرة ما شاء الله لانها مطله على امتداد الخليج العربي و معظم الواجهات البحرية مستغلينها بطريقة حلوة و مسوين كورنيش و استراحات و العاب وانا وحده من عشاق البحر و هذا اكثر شي حبيته فالكويت .
    - عيبتني الفعاليات العائلية المتنوعة في العيد مثل المسرحيات و الاحتفالات في المطاعم الكبيرة و الجمعيات يسوون حفلات لليهال و مهرجين و العاب و نطاطيات و مسابقات و العوايل يتجمعون مع عيالهم .. يعني حسينا باجواء العيد في الكويت .

    اما السلبيات :
    - شباب الكويت مب الكل لكن فئة كبيرة الله يهديهم طايشين و مستهترين جداً و مافيهم روح المسؤولية و يومياً مسوين زحمة على شارع الخليج العربي بالسيارات و الاستعراضات و الاغاني و الحشرره .. و هالحركات تعطي السياح انطباع سيء عن الشعب الكويتي مع ان الخير باقي في أمتي مثل ما قال الرسول صلى الله عليه وسلم لكن الخير يخص و الشر يعم !
    - لاحظت الكويت مافيها التزام ولا تطبيق جاد للقوانين .. خصوصاً قوانين السير و المرور وايد مستهترين فيها و الشرطة متساهله من هالناحية .. يعني الدنيا سايبه ذكرتني في الامارات قبل 10 سنوات بس الحين اتغير الوضع عندنا نهائياً
    - المطار محتاج تطوير و اهتمام اكثر و تقديم خدمات اضافية للمسافرين .. مثلاً يوم رجعنا من الكويت كنا بنتعشى قبل موعد الطيارة بس مافي غير كوستا كافيه فقط و كان زحمة و السوق الحرة صغييرة و كل الكاكاوات والاكل اللي فيها بالجملة يعني اكياس كبيرة ما يبيعون بالحبة !
    - اتضايجت جداً من التدخين في الأماكن العامة و المغلقة و المفروض يكون ممنوع منعاً باتاً مثل القانون اللي عندنا في الإمارات .

    4 - الاماكن اللي رحتوا لها؟
    رحنا مارينا مول و مارينا كريسنت و سوق شرق و مول 360 و الأفنيوز و مجمعات شارع سالم المبارك و مجمع المهلب في حولي و مطعم فريج صويلح و مطعم ميس الغانم و سوق المباركية و سوق الصفاة (البلوكات) .
    اما الاماكن اللي كانت في البرنامج و ما رحناها بسبب ضيق الوقت ؛ المركز العلمي و المدينة الترفيهية و ابراج الكويت (بس شفناها من برع) و مجمع الكوت والمنشر و اسواق الفروانية (مثل العربيد و الحمرا و الخيمة مول) و مجمعات حولي القدييمة والصغيرة (مثل النقرة الشمالي والجنوبي و مجمع بيروت و مجمع العثمان) و مجمع الاوقاف للجلابيات في مدينة الكويت .
    5- مكان السكن؟
    منتجع موفنبيك البدع 5 نجوم قريب من السالمية على شاطي البدع و كانت تجربة حلوة ..
    حجزنا شقة بغرفتين نوم و حمامين الله يعزكم و صالة و مطبخ مفتوح على الصالة بسعر 1600 درهم اللية تقريباً و السعر شامل بوفيه افطار يومياً حق كل العايلة .
    و تقييمي للمنتجع 8 / 10 .. حلو و نظيف و المسابح متنوعة و الخدمة ممتازة جداً (كل ما نطلب شي دقايق يكون عندنا و بدون جارج اضافي) و الاسعار مناسبة و بوفيه الريوق لا باس فيه بس العيب الوحيد البحر كان مسكر و متلوث يعني ما تقدرين توصلين للشاطي بس تيلسين من بعيد .. و برع المنتجع وايد مطاعم و كافيهات تقدرين تسيرين لها مشي شرات تشليز و فرايديز و سراي و كوستا و ستار بوكس و شوكليت بار و حلوة اليلسات فيها المسا .

    6 - اي اضافه حابين تضيفونها ؟
    ما شااء الله وايد اتكلمت و قرقرت و ما خليت ولا شي لوول
    بس باختصار كانت تجربة حلوة و استانسنا الحمدلله و احلى شي اني اتعرفت عليج يا مس الكويت و كسبتج اخت عزيزة و غالية و يزاج الله خير ما قصرتي ويانا في التجمع و ان شاء الله نتلاقى في دبي المره اليايه ^.^

    7 - ناطره تقاريركم المصوره اذا سمحتوا
    افا عليج ما طلبتي .. احلى تقرير لعيوونج بس عطيني كم يوم لين ما اخلص الصور و اصغرها ^_*
    و ثاانكس على الموضوع الحلو فديتج



    :


    :



    انتظروني مع الجزء الأول من رحلتنا في الرد القادم

    و اتمنى لكم متابعة ممتعه ^.^


    (( إمــــــــــــاراتـــــــية )) و أفتخر يوم اصبح من بنات زايــــــد !! .. احنا أهل الكرم و الجود احنا من تغنت ابنا القصـــايد

    ...:: | الزحليقة الصيفية في DuRcHhOlZeN .. تقرير مصوّر | ::...

    ●|¦|» رحلة ميــ Munich ــونخ 2007 >> تقرير مصوّر «|¦|● :106:


  2. #2
    مسافر متالق الصورة الرمزية غلا الإمارات
    تاريخ التسجيل
    Jul 2004
    المشاركات
    1,031

    افتراضي

    بسم الله الرحمن الرحيم

    يوم الوقفة تاريخ 15 / 11 انطلقنا من البيت الساعة 11 الصبح إلى مطار دبي الدولي و بالتحديد المبنى 2 المغادرون

    و كنا صايمين الله يتقبل منا و منكم ياارب ^_^

    كان حجزنا على طيران فلاي دبي



    حجزت التذاكر في العرض الخاص 250 درهم ذهاب و عوده للشخص الواحد
    شامل الضرايب و الهاند باق 10 كيلو فقط ..

    وصلنا تريمنال 2 و هالمبنى قدييم و خاص حق شركات الطيران الاقتصادي

    رحت عند الموظقة اللي في الرسبشن طبعت الحجز و بعدين سرنا الكاونتر مال فلاي دبي خلصنا اجراءات السفر و تأكدو من الهاند باق كل وحده ما يزيد وزنها عن 10 كيلو و خذنا البوردنق كارد و انطلقنا إلى الجوازات

    طبعاً بتلاحظون ماشي صور فالمطار لني اولاً ماحب اصور فالمطار اكون مرتبششه و ثانياً كاميرتي العزيزة طاحت عني في لندن و اختربت ما تصور اهيء اهيء

    بس منوو يقول كله ولا سيدات الامارات عشان جيه اول ما دخلنا السوق الحرة طيراان صوب الالكترونيات و اشتريت كاميرا كانون يديده لعيوونكم ^_*

    هالمره كاميرتي فوشية دلع لوول .. تصويرها 14 ميجابكسل و نوعها Canon IXUS 130



    بعدين انتظرنا في صالة المغادرين لين موعد اقلاع الطيارة و كان ويانا عوايل مواطنين و شباب ما شاء الله و اتحوطنا في السوق الحرة و ما حسينا بالوقت ..

    كان طيارتنا الساعة 1 الظهر و ركبنا الباصات عشان توصلنا للطيارة لان هالمبنى الظاهر مافيه خراطيم للطيارات

    و هنيه كانت الصدمة ! الطيارة وااااايد ضيقة و معاناه اتلعوزنا ويا الشنط على الدرج و كل وحده تسحب شنطتها وراها و الممر ضيق و الطيارة كتمه ماعرف كيف !

    ما انصحكم تسافرون على فلاي دبي !!!

    كانت اتعس رحلة في حياتي *_*

    صح اني اول مره اسافر على طيران اقتصادي في الخليج

    بس جربت الطيران الاقتصادي ايزي جيت في اوروبا فرق السما عن الارض !

    اول شي بالنسبة للمواعيد فلاي دبي تأخرت ساعة كاملة عن الموعد المحدد للاقلاع و نقعونا فالطيارة

    ثانياً الطيارة واايد صغيرة و ضيجه و الممر زحمة و كتمة

    ثالثاً الرحلة ما كانت مريحة و اختضينا في الاقلاع لدرجة اني صرخت بصوت عالي انا وخواتي !

    و عند الهبوط واايد تأخرنا و خذنا جولة سياحية في سما الكويت ههههه

    و الكراسي طبعاً حدّث ولا حرج ما يحتاي اخبركم و الطيارة مافيها اهتمام

    بس مع هذا كله لو حصلت فيها عرض خيالي و رخييص بسافر عليها بعد مره لان عندي ادماان سفر << على كثر التحرطيم فالطيارة ولا اتوب :D

    المهم كانت مدة الرحلة ساعة ونص بالظبط و وصلنا مطار الكويت بالسلامة بعد هالرحلة الشااقة و المتعبه .. والله اني يوم اسافر اوروبا 7 ساعات ما اتعب هالكثر !



    نزلنا في مطار الكويت و خلصنا الجوازات بسرعة و كان الموظف بشوش و متعاون الحمدلله ..

    طلعنا من المطار و كنت حاطه فبالي بنستأجر سيارة من المطار بس لفيت على كل المكاتب وما حصلت ولا سيارة كبيرة لأن عددنا 8 ما شاء الله !!

    و اتوهقنا بس على آخر لحظه شفنا واحد كويتي يطالعنا و اقترب صوبنا يرمس ابويه و قاله انا عندي سيارة كبيرة عن طريق مكتب تأجير من برع المطار و اتفق وياه على السعر و قال انا بوصلكم الفندق بسيارتي و اتوكلنا على الله و ركبنا وياه و كانت سيارته صغييرة بس قلنا العوض ولا القطيعه =)

    و في الدرب كان يسولف ويا ابويه و عرفنا قصته انه من فئة البدون و ما يشتغل و تم يشكي الحال و يخبرنا عن مشاكل البدون لين ما وصلنا و طلب منا 20 دينار حق التوصيله مع ان التكسي يوصل على 5 دنانير من المطار ! بس قلنا ماعليه فقير و مسكين و عطيناه 15 دينار

    كنا حاجزين في منتجع موفنبيك البدع

    Movenpick Hotel & Resort Al Bida'a



    و انا ذكرت تفاصيل المنتجع في بداية الموضوع بس برجع اعيدها :

    حجزنا شقة بغرفتين نوم و حمامين الله يعزكم و صالة و مطبخ مفتوح على الصالة بسعر 1600 درهم اللية تقريباً شامل الخدمة و الضرايب و بوفيه افطار يومياً حق كل العايلة و انترنت مجاني في الشقة

    و تقييمي للمنتجع 8 / 10 .. حلو و نظيف و المسابح متنوعة و الخدمة ممتازة جداً (كل ما نطلب شي دقايق يكون عندنا و بدون جارج اضافي) و الاسعار مناسبة و بوفيه الريوق متنوع و لا باس فيه بس العيب الوحيد البحر كان مسكر و متلوث يعني ما تقدرين توصلين للشاطي بس تيلسين من بعيد .. و برع المنتجع وايد مطاعم و كافيهات تقدرين تسيرين لها مشي شرات تشليز و فرايديز و سراي و كوستا و ستار بوكس و شوكليت بار و حلوة اليلسات فيها المسا

    هالصور اول ما وصلنا المنتجع





    رحت عند موظفة الاستقبال و خلصت اجراءات الشيك ان و استلمت المفاتيح



    و طلع ويانا موظف من الفندق يدلنا على شقتنا اللي كانت في الدور الأرضي



    جزء من الصالة و المطبخ المفتوح عليها



    اليلسه في الصالة و باب البلكونة



    غرفة النوم الماستر مع حمامها





    زاوية ثانية من الغرفة



    حمام غرفة النوم الثانية - الله يعزكم -





  3. #3
    مسافر متالق الصورة الرمزية غلا الإمارات
    تاريخ التسجيل
    Jul 2004
    المشاركات
    1,031

    افتراضي



    غرفة النوم الثانية .. كانت غرفتنا انا و خواتي لول



    طاولة الطعام في الصالة
    و الباب اللي تشوفونه تقدرون تفتحونه على الشقة الثانية اذا سايرين عايلتين



    المطبخ الصغير و مفتوح على الصالة



    نظرة عامه على الشقة
    الغرفة الاولى هي غرفة النوم الماستر و في النص حمام الصالة و الغرفة الاخيرة غرفتنا انا وخواتي



    حمام الصالة الله يعزكم





    المستحضرات الشخصية [ شاور كاب / شامبو / بلسم / ليفه / فرشاه / ميني معجون / مرطب ]



    و الحين بنطلع في البلكونة الكبيرة و بنشوف الفيو من الشقة على المسابح











    دخلنا الشقة ..



    و هذي ضيافه من الفندق عباره عن فواكه فرش و مياه معدنية غازية

    :

    :

    بعد ما حطينا اغراضنا و ارتحنا في الشقة

    راح ابويه ويا الريال اللي قلتلكم عنه فالمطار عشان يستلم السيارة من مكتب التأجير

    بس كان مكتبهم بعييد في الفروانية ! و تأخر وايد و كان تعبان من السفر الله يعطيه العافية

    استأجر عنهم سيارة ميستوبيشي ماعرف نوعها لانها كانت آخر سيارة كبيرة متوفره عندهم بس واسعه و مريحه لوول على 10 دنانير في اليوم .. يعني 135 درهم تقريباً

    و يابلنا فطور وياه من ماكدونالدز لان كنا صيام مثل ماخبرتكم >> حد يفطر على ماكدونالز ؟ ههههه بس كان اقرب شي عند المكتب و الحمدلله على النعمة فطرنا و صلينا و انخمدنا من التعب

    و جيه يكون انتهى اليوم الأول لنا في الكويت ^.^




  4. #4
    مسافر متالق الصورة الرمزية غلا الإمارات
    تاريخ التسجيل
    Jul 2004
    المشاركات
    1,031

    افتراضي

    هاليلسات حلوة على البحر يجتمعون فيها العوايل واليهال فليل .. ربشه و ونااسة ^.^



    اللي تبغي تنسدح ع البحر حيااها ^_*
    و مثل ما تلاحظون الشاطي مُغلق بعد الكراسي لأن البحر متلوث شرات ما خبرني السكيورتي !


    الحين بنسير عند المسابح الرئيسية في المنتجع






    ممرات المنتجع و الشقق المتنوعة ..
    على فكرة عندهم غرف فندقية و شقق بغرفتين نوم و 3 غرف نوم و فلل دورين كبييرة بـ 4 غرف نوم



    مسابح كثيره و متعدده في المنتجع


    اعتقد هذي الفلل اللي بـ 4 غرف نوم
    لني شفت عايلة كويتية كبيرة ماخذينها و الصالة واسعة و شرحه
    و سهرانين كلهم برع مسوين باربيكيو و حشره و سوالف


    و هالمسابح بعد في مكان ثاني فالمنتجع


    و اخييراً خلصنا جولتنا في المنتجع و طلعنا برع نتريا ابويه يرجع من الجمعية


    مثل ما تشوفون المطاعم اللي خبرتكم عنها .. تشليز و سراي و غيرهم


    و اخييراً وصل ابويه و اتحركنا من المنتجع متجهين إلى مارينا مول و مارينا كريسنت ..

    بس براويكم زيارتنا للمارينا في الجزء الثاني من التقرير قريباً ان شاء الله ^_*

    اتمنى ينال الجزء الأول على اعجابكم و هالله هالله بالردود الحلوة و التشجيع

    ولا ترى هااه ما بكمل التقرير لوول

    دمــتم بود



    ---------------------------------------------------------------------------------------------------------------



    في النهاية اتمنى ينال التقرير البسيط على اعجابكم اخواني و خواتي اعضاء العرب المسافرون


    و أي استفسار عن المنتجع انا في الخدمة ^.^


    دعواتكم للوالد بالشفاء العاجل و الصحة والعافية ..


    و السموحة على القصور




  5. #5
    مــوقــوف
    تاريخ التسجيل
    Dec 2008
    المشاركات
    4,340

    افتراضي

    الله يشفي لكم الوالد وتردون ديرتكم بالسلامة ...............التقرير يونس ما شاء الله الصور حلوة واول مرة نشوف الموفنبيك من الداخل والمسابح كثيرة ...........ان شاء الله تردون الزيارة للكويت وتعجبكم اكثر ويعطيك العافية




  6. #6


  7. #7
    مسافر خبير الصورة الرمزية الذيب الشمالي
    تاريخ التسجيل
    Aug 2007
    المشاركات
    16,134

    افتراضي

    اسأله الله سبحانه ان يكتب الشفاء لوالدكم وان تفرحوا برجعته سالم غانم



    تقرير جميل ومكان اجمل
    يعطيكي العافية


    (( دام عزك يا وطني ))


    جديد الأردن

    https://travel.maktoob.com/vb/travel672237/

    الأردن

    https://travel.maktoob.com/vb/travel522798/

    https://travel.maktoob.com/vb/travel528740/



    رحلتي الصيفية إلى معشوقتي الأبدية
    ( 32 يوم .. 6800 كلم .. اكثر من 4000 صورة )

    https://travel.maktoob.com/vb/travel365817/


  8. #8
    مسافر متالق الصورة الرمزية غلا الإمارات
    تاريخ التسجيل
    Jul 2004
    المشاركات
    1,031

    افتراضي

    السموحة اخواني و خواتي هالجزء قبل الأخير من المنتجع سقط سهواً !!


    و اخترب ترتيب الموضوع لأني ما اقدر اعدل المشاركات :(




    -----------------------------------------------------------------------------------------------------------



    هلا خواتي

    السمووحة على التأخير بس كنت وايد مشغولة هاليومين =)

    و الحين بكمل وياكم الجزء الأول من رحلتنا إلى الكويت


    :

    :


    حرام العيد ما هو عيد من دونك ولا هو زين
    ولا حتى الجديد اللي علشانك أخذ قدره ..
    أقول المختصر كله أنا عيدي مهو هالحين
    بلى عيدي إلى من جيت وتصبح ديرتي خضرا !
    وتحلا دنيتي بشوفك و أغني لك مع التلحين
    وأبيك تقول أنا حبي لـ (فلانه) سابق "ن" شعره




    اصبحنا ثاني يوم فالكويت و كان صبح عيد الأضحى المبارك

    كل عام وانتو بخيير خواتي و لو انها متأخره و عساكم من عواده كل سنه و كل حول ^.^

    قمنا صلينا و اتكشخنا كشخة العيد و عايدنا على أهالينا و رباعتنا ..

    و الصراحة العيد مب حلو بعييد عن الأهل و الحبايب و هذي اول مره نعيّد برع البلاد =(

    و بعدين نزلنا انا و خواتي نتريق في البوفيه

    لان شرات ما قلتلكم بوفيه الريوق مجاني يومياً حق كل العايلة ..

    طلعنا من الشقة سايرين المطعم و هذا مدخل اللوبي


    و على فكرة ترى الاجراءات الأمنية مشددة في الفندق !

    يعني كل ما تدخلون في اللوبي لازم تحطون الشنطة و الموبايلات و الاغراض في جهاز التفتيش مثل اللي في المطارات

    و أي سيارة تدخل المنتجع عند البوابة لازم يفتحون البانيت و يفحصونها


    هالصور من اللوبي و اليلسات الحلوة اللي فيه ..
    واايد عيبتني الألوان و الثريات الكريستال و تنسيق الديكور




    واايد حبيتها هاللوحة لني من عشاق اللغة العربية
    و على فكرة هالأبيات قالها الشاعر حافظ ابراهيم دفاعاً عن اللغة العربية :
    أنا البحر في أحشائه الدر كامن .. فهل سألوا الغواص عن صدفاتي؟
    و في الجهة المقابله حاطين لوحة ثانية فيها تكملة الأبيات (فهل سألوا الغواص عن صدفاتي؟)


    دخلنا المطعم و كان البوفيه زحمة ما شاء الله كله عوايل خليجية
    حتى سمعت وحده كويتية تقول وييه احس اني مسافره مو بالديره لوول


    اخترنا هالطاولة و صورتها بعد ما خلصنا ريوق

    السموحة عاد استحييت ما قدرت اصور البوفيه و الأكل لان وايد زحمة

    بس صورتلكم التحليه بعد الريوق .. فواكه فرش و كيك لول


    بعدين طلعنا من المطعم نتمشى و نستكشف المنتجع




    هالقسم خااص حق اعضاء السي كلوب (اشتراك شهري او سنوي فالمنتجع)


    الخيم البيضا اللي تشوفونها على يمين الصورة يفتحونها المسا حق الشيشة


    شاطي البحر و ممرات المنتجع


    يلسات المطعم الخارجية و الصبح كنا نتريق فيها احياناً




  9. #9
    مــوقــوف
    تاريخ التسجيل
    Dec 2008
    المشاركات
    4,340

    افتراضي

    عيدج مبارك ...........البوفيه حسافة ما صورتيه جان يوم خفوا الناس صورتيه ههههههههه ادور البلعة ههههههبس شكل المنتجع وايد فله ووناسة الا بس ريحة الارجيله ما احبها ابد.........كملي




  10. #10
    مسافرجديد
    تاريخ التسجيل
    Sep 2008
    المشاركات
    54

    افتراضي

    حياااج الله اختي الغاليه بالكويت والله يشاافي الوالد وترجعون لزياره الكويت




معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 0 (0 من الأعضاء و 0 زائر)

     

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك