مـنـتـدى الـعـرب الـمـسافـرون

هذا الموقع مخصص للسياح العرب وهو احد افضل المواقع المخصصة للسياحة و مساعدة المسافرين ، و هو أحد مواقع شبكة منتديات مكتوب !Yahoo ، انضم الان و احصل على فرصة متابعة أخبار و معلومات و صور و مقاطع فيديو من كل دول العالم.



+ الرد على الموضوع
صفحة 1 من 3 1 2 3 الأخيرةالأخيرة
النتائج 1 إلى 10 من 21
Like Tree0Likes

الموضوع: اهل مكه حمام واهل المدينه قماري وأهل جده غزال اهداء000

  1. #1
    مميزة البوابة العامة الصورة الرمزية سعوديه امريكيه
    تاريخ التسجيل
    Mar 2010
    المشاركات
    1,704

    Thumbs up اهل مكه حمام واهل المدينه قماري وأهل جده غزال اهداء000

    بسم الله الرحمن الرحيم

    اليوم اول طرح لى فى بوابتى احب اهديه لمحبين اهل الحجازعامه ولمشرفنا عاشق رحال خاصه ولا يهنون البقيه وهو موضوع نتكلم عن .......

    مصطلحات اللهجه الحجازيه ....وامثال ...وألقاب ...وكنيه اصحابها ...ومحادثه حجازيه ....وخاتمه حجازيه جميله ...








    قــــــــــــــــــــراءه ممتعه .............



    اللهجة الحجازية على مر العصور

    هي لهجة أهل المنطقة الغربية في السعودية وتتمركز بالذات في مكه وجده والمدينة
    والمدن القريبة منها اكثر من باقي المدن اللي في الغربية وهي لهجة تأخذ من اللهجة البدوية و اللهجة المصرية ولكنها تميل الى المصرية والسبب انه ايام العثمانيين كان فيها مصارية كتير قد الجبل

    وطبعا تختلف لهجة العجايز عن الجيل الحاضر

    لهجة العجايز تحسوها معتقة ومصطلحاتها القديمة ما تنفهم وما يستخدموها الا عتقية البلد اما الشباب حقون دحين ما عاد صار يستخدموها .

    وكمان ما ننسى ان اللهجة الحجازية فيها الكثير من الأمثال القيمة


    وبسم الرحمن نبدأ في بعض ما تختص بيه لهجتنا الحجازية الغاليه



    مصطلحاتنا

    في كثير من المصطلحات الحجازية اللي من الصعب انو اي واحد غير حجازي يفهمها واتفضلوا هذي بعضها


    كلمات ومعانيها

    بيت الما: وهو ما يعرف حاليا (بدورة المياه) وقد سماه الجيل الصاعد المكاوي الآن (الطهارة) وقد ورد انه تم التسمية هذه على أساس
    انه مكان كبير في البيت يوجد فيه الماء فسمي بـ بيت الما

    المركّب: بتشديد الكاف، وهو ما يسميه جميع الناس الآن (المطبخ) والى الآن يعتبر علماء اللغة العربية هذه التسمية من عجائب التسميات لأنه لا يوجد سبب معروف للتسميه هذه إلى الآن


    الدقيسي: بتشديد الدال وكسرها وكسر السين، وهو ما يعرف بالمستودع ، يقول الكاتب المكاوي (محمد يواد فلاته) أن التسمية تعود إلى الحرب العالمية الأولى حيث استخدم أول مره كمخزن للذخائر وسمي في مكة بالدقيسي ، وقد قام جيل 2000 من شباب وشابات مكة بتسميته بالمخزن بدافع التطور


    القرندي: بفتح القاف والراء وتسكين النون وكسر الدال مشوارها؟
    وهذا نوع من أنواع مداعبة الأب المكاوي لابنه فعندما يناديه ويتأخر 3 ثواني يقله (بسرعة عساك القرندي)ويفسر علماء الجن أن القرندي نوع من أنواع الجن وببساطه يدعي الأب على ابنه بالقرندي شفتو اللطافه

    الفقده:مفعول عشانه من فعل يفقد، وهذا نوع آخر من أنواع المداعبة وهي الخاصة بالأم المكاويه.
    حيث تداعب أولادها بـ (تعال الله يفقدك)

    توتوا: وهو نوع من أنواع المعادن المكتشفة في الاوديه المكاويه. ويستخدمونها المكاوية في تصنيع نوعين من الأشياء اللي تنحط فيها مويه للشرب وهو ما يسمونها ( المغراف ) اللي هيا الكاسه

    المغراف:هو نوع من أنواع الكاسات التوتوا ، في حين انه تمت إضافة معلومة من علماء الجن المذكورين سابقا
    انه في مرة من المرات قامت أم تداعب ولدها لصغير (الشقي) اللي يلعب يالمغراف وقالتله الله يفقدك بس


    وبعدين قالت خلاص يامغراف خده وفي لمح البصر اختفى الولد ،

    والمغراف هو نوع من أ نواع الجن
    هه
    وكان بالصدفة متواجد في مكة هذا الجني


    على طبطابي .. : يعني على مزاجي


    مِرَسْتَكَه ..: يعني
    متأنتكه يعني مرة شياكة .. ومرتبّة




    وايق : .... يعني طالع .... يعني مثلاً تقول .. :

    ( ياواد وايق زي الناس لا اهبدك باتقل شي قدامي ..
    و لا أهبدك اللين أجدد ايمانك
    تزل .( بكسر التاء).. : يعني تمر
    مرحبمبك ... : يعني مرحبا بك .. بس باختصار شوية


    باطِرمَة ... : يعني جلسة ... كنب حاجة زي كده كَرَاوِيتَه : ... حاجة خشب كده ... يحطوا عليها الباطرمة


    مَدَارِيْه : ...... مراجيح

    ندرت عينك من حُقّها ... : يعني خرجت عينك من محلها .... كده


    شَلْمَه ...: يعني فجعه .. يعني مثلاً تقول

    ( اشبك ياواد مشلوم كده عالاكل ؟؟ )
    قيّسْتَك : ... يعني حسّبتك .... توقعتك .... هقيتك


    أقيس: حسبت
    يعني مثلاً ..



    ( قيستك ياواد حتزل على عمتك فتّو ) ..
    . وه ياستيته


    بُخْنُق ... : اللي يتلبس في الراس ويكون مخيّط على قده



    مِدَهْمَلْ : .... يعني مبهدل .... يعني مثلاً

    ( اشبك ياواد مدهمل كده .. لاتكون كنت بتلعب في المداريه ) ؟؟
    دهليز : يعني سيب



    (... سيب يعني محل كده زي اللي يكون قدام ابواب العمايرمن جوّه


    زنبيل : ... يعني كيس

    زلطة : .... سَلطة

    يدعك : ... يعني يفرك ... يعني مثلا ..

    ( ايش بتسوي يابت ... بادعك الاسورة :روحي يابت عساكي بداعوك يدعك مصارين شيطانك غسلي الصحون بدل مانتي قاعدتلي كده لاشغله ولا مشغله




    مجغجغ : مليان مويه


    اندر بره :اخرج

    العن : لما يعجب الواحد بشيء مبهر

    سنسفيلك : اهزأك

    اديلو : اعطيه

    الدهليز : مدخل البيت

    الكرتة : الفستان

    الكنتره : الجزمة اكرمكم الله

    القنعه : العبايه

    الكرويتة : دكة خشبية يقعدوا عليها الرجال الكبارية ويتجمعوا فيها

    الزقاق : الشارع الضيق

    وأعتقد أنها أصبحت كلمة معروفة بفعل النزح المكاوي على المدن الأخرى، وهو المعروف عند أهل نجد بالدعتسوس الداعوس زقاق أهون وربي
    باختصار هو الشارع الضيق


    دندرمة : ايس كريم و تراها مي سبّة تراها كلمه معروفة جداً، وبعد دخول التطور إلى الحواري المكّاوية أصبحت تعرف بالآيس كريم

    دحديرة : نزلة او منحدر

    الدبش : اغراض العروسة قبل لا تتزوج

    القابلة : بكره = اللي تولد الحوامل

    المملك : المأذون الشرعي

    الدقيسي :الفراغ اللي تحت الدرج أو المخزن

    المرقعة : الدلع والمياعه في الكلام والتصرف

    يتريق : يستهزء

    بلكنو: ربما

    اشكلو: كيف يكون

    اترنوا: حسبت و ظنيت

    اللغوصة : نقل الكلام وتسبيب المشاكل

    الدحلسة : اذا كنت بتتمصلح مع واحد عشان تبغى منه شي تقول يدحلس

    هججوني : ازعجوني

    قروشة: ازعاج واستهزاء

    حبرتي: ولد حارة وعربجي

    وي: ياللعجب

    قوامن : بسرعه , حالاً


    مضليون : طبعاً الكلمة هذي تحفة اللهجة المكاوية، وكانت النساء تتفاخر بمن تملك فيهن مضليون

    حتى أن أحدهن قالت : وي يا فايقة يا أختي .. والله جوزي صدقة جابلي مضليون والمضليون هو البروش الذهب

    الحرمصة: يقولك في غابر الغابرين ( واحد متحرمص على نتيجته) والمعنى العلمي لها هو عدم الاستقرار النفسي أو انتظار الشيء على أحر من الجمر

    المرمشة: يمين بالله علينا كلمات فلّه

    المرمشه: بفتح الميمين هي نهش ما على العظام من اللحم، أو نهش ما على أي شيء من أي شيء

    الزبلحة: ياساتر على الكلمات اللي تودي فدهية، المهم الزبلحة هي قلة الأدب والتواقح في الكلام

    العكننه : وهي التنكيد على شخص معين

    و في مصطلحات كتيرررررررررر غيرها




    أمثال حجازية

    إذا جيت رايح كتر من الفضايح

    او إذا جيت رايح كتر من الملايح
    بعد ما أكل واتكا قال ريحته مستكا
    حاجه ما تهمك وصي عليها جوز أمك
    ست وجاريتين على قلي بيضتين
    أعمى ويلضم خرز

    دلع الكبار زي الشقدف على الحمار
    اللي ماله أم حاله يغم

    كل حبه مسوسه لها كيال أعور
    على قد زيتوا سرجلوا


    الخايبه تتعلق بالحبال الدايب
    عقربه في الغار ولا ضره في الدار

    خاتم بفصو وكل شي ترصوا
    أهري وانكتي يا جاره وأنا
    ثابته زي العماره



    شايل لنا طيران عبد القادر
    لو لك شي عند الكلب قول له يا سيدي

    لا تقرصيني يا نحله ما أبغالك عسل
    يحسدوا الفقير على موتت الجمعه
    سكتنا له دخل بحمارووو

    ما يقدروا على الحمار يقدروا على البردعة
    اذا حلقوا لغيرك بل راسك واستنى

    ايش عرف الحمير بأكل الجنزبيل
    البيض الفاسد يدحرج على بعضه

    حاجة ما تهمك وصي عليها جوز امك
    ست و جاريتين على قلي بيضتين

    اذا تعاندوا الحمير يا بخت الركاب
    البيضه ما تخابط حجر

    حبيبك يمضغ لك الزلط وعدوك يعد لك الغلط
    حمارتك العرجة تغنيك عن سؤال اللئيم

    داخل مع بيت العروسه نادر مع بيت العريس
    ياريتني بيضه وعرجه اصلوا البياض فرجه(بضم الفا)
    يااخد القرد بماله يروح المال ويبقا القرد على حالو
    الله من محبته في عبيدو جعل العمر والرزق بيدو

    اللي يشوفني بعين اشوفوا باتنين
    اللي ماله ام حاله يغم

    كنس بيتك ورشه ماتدري مين يخشوا
    كل حبه مسوسه لها كيال اعور
    مين يشوفك يالي في الضلام تغمز

    على قد زيتوا سرجلوا
    ماتعرف خيري لين ماتجرب غيري
    عقربة في الغار ولا ضُرة في الدار
    فقير اتجوز فقيرة خلفوا وجع القلب

    كبيرهم فلفل وصغيرهم زنجبيل واللي في الكوفلة يقول من العايدين
    خاتم بفصو وكل شيء ترصوا


    خشوني لاتنسوني ولعوا الشمعة وشوفوني
    عمية تحفف مجنونة وتقولها حواجبك سودا ومقرونة
    الصرمة والقبقاب صاروا أصحاب

    يا داق الموية في المهراس يا مربي وليد الناس
    كل عيش البخيل ولا تأكل عيش المنان
    أدب ولدك وان زعلت امه

    يابخت من بكاني وبكى الناس عليه ولا من ضحكني وضحك الناس عليه.
    رضينا بالهم والهم ما رضي بينا

    اتملت العدوة وقلت المروه
    أكلوا الملوخية وصاروا أفندية
    لمن كنا ما كانوا ولمن رقدنا قاموا


    قالوا متى طلعت القصر قالوا أمس العصر
    العروسه للعريس والجري للمتاعيس

    سلامتك والهيل والقرنفل قمامتك
    اللي يشيل قربه مخروقه تنقط على راسه
    الحجر من الارض والدم من راسك


    أخوانك من أمك زي الدهب في كمك و أخوانك من أبوك زي القوم لما ينهبوك
    من بيت أصقع لبيت أرقع
    مطبق العاده و معصوب كل يوم
    كل محضر بالتوب الاخضر
    باب المجلس يقول باب السطوح .. اللي يجي يجي .. واللي يروح يروح


    خليها في القلب تجرح و لاتخرج بره ترمح

    الحر من غمزة والحمار من رفزه
    يضرب هذا المثل لايضاح الفرق بين النبيه والبليد.

    حمار الحكومة حكومة
    يضرب هذا المثل للموظف الصغير المتسلط على الناس

    خطبوها اتعززت تركوها اتندمت
    يضرب لمن يتظاهر بعدم الرغبة حينما يعرض عليه امر ولكنه يندم بعد فوات الاوان
    دلع الكبار زي الشقدف على الحمار


    يضرب هذا المثل لخروج العجوز عن وقاره وجديته
    والشقدف عشان الاسئلة بس:ما كان يوضع على الجمل ليجلس فيه المسافرون


    قلبي على ولدي انفطر وقلب ولدي عليا حجر

    و لا تنسوا ارضى بقردك لايجيك اللي أقرد منوو
    الحب عياقة ...توب بلا ياقة


    الألقاب/ الكنية

    عندنا في الحجاز وخصوصا مكه في اسماء يعطوها كنيه او لقب على سبيل المثال واحد اسمو عبد الله يقولولو أبو عابد ... وهذي بعضها

    عمر : أبوسراج
    حسن : أبو على
    حسين : أبو هلال


    يوسف : أبو يعقوب
    عبدالله : عبادي او ابو عابد
    عبدالرحمن : الوجيه

    عبد الرحيم : أبو رحمه
    فيصل : أبو عبدالله
    عبد العزيز : عزيز أو ابوسعود
    فاطمة : فتو

    مريم : منّة
    ابراهيم : أبو خليل
    خالد : أبو خلود


    كمان أهل الحجاز فيهم اخلاق و احترام حتى في كلامهم مع بعض

    لما يطلب منك سكينه ايش يقول ؟
    يقولك الله يخليك اديني سكينة في قلب العدو

    لما يقلك كنت ب أكل
    يقلك كنت ب أتعشى مثلاً فضله خيرك

    لعيونكم كمان محادثة حجازية مكاوية



    ماجد ابو صدقه / يواد يامعمر
    عمر ابو سراج / هلا مجود
    ماجد ابو صدقه / كيف الحال والتحوال
    عمر ابو سراج / خليها على ربك ياشيخ
    ماجد ابو صدقه / بلا في شكلك ... خاربها من بدري ... اشبك

    عمر ابو سراج / لا بس البزوره جابولي القلق
    ماجد ابو صدقه / صفقهم احسن لك
    عمر ابو سراج / يابن الحلال الحرمه دي زي المرض قاعدتلي
    ماجد ابو صدقه / من جد ... المهم رايح القهوة
    عمر ابو سراج / قدام ... والله مره المنجا عندي يبغالها ترويق
    ماجد ابو صدقه / هه مايبغالك الا باعشن


    عمر ابو سراج / من جد ... سرينا
    ماجد ابو صدقه / خلاص بعد نص ساعه امرك
    عمر ابو سراج / هيا لا تتاخر ... تراها واصله معايا
    ماجد ابو صدقه / بس تره مفلس

    عمر ابو سراج / لا تشيل هم .. انا منقرش
    ماجد ابو صدقه / الله عليك ياعمده .. او كي يالله القاك هناك
    عمر ابو سراج / على خير


    و في النهاية أقول تسلمولي يا أهل الحجاز

    يا أحلى ناس عشت معهم وعاشرتهم

    وتطبعت بأطباعهم

    ويابختي لاني وحده منهم

    وربي يخلي لي ياستي .....,,<<< ( مـــامــــا )
    وانتي باللبس العربي

    وفوقك رأسك المحرمه والمدوره

    وانت تحلي سفرة العيد

    بالدبيازة واللحم الندي

    ويازينها قعدتنا واحنا ننقنق

    على لبنية ولدو وهريسة

    ويازينه دجاج البر الحار

    واللبليلة المليانة طرشي

    والاكيد الاكل مايحلى الابالدقس

    وتسلميلي وتسلم يدك لمن تقلي الكروبه

    وتحطي المش جنبه عشان خاطري

    وربي يخلي لي <<< ( بابا )

    اقولها كل ماتذكرت عمتك وفوطتك

    وتذكرت دكتك وكرويتتك المكسورة

    وانت تلعب ضومنة مع جيراننا واهلنا


    وصدق من قال

    أهل مكة حمام

    وأهل المدينة
    قماري

    وأهل جدة(غير) غزال



    قصيده لأهل مــــــــــــــــــــــــــــــــكــــــــــــــــ ــــــــــــــــة
    أهل مكة
    أهل معروف
    أهل الخيرأهل مكه
    أهل سيمه
    أهل قيمه
    ناس كُمَّل
    أهل مكَّه
    ومع كل تعتيمه
    الناس تحلَّي
    بأهل مكه
    حماة البيت وجيرانو
    شجرالحب وأغصانو
    كده هُمَّا وكده كانو
    والميدان فرسانو
    أهل مكه
    ناس عاليه الهمَّه
    ناس تحفظ الذمه
    ولا مية الف كلمه
    ماتوفِّي أهل مكه
    ومين شكُّو الزمان شكَّه
    أوحالو مال أو تكَّى
    لايتعب ولا يشيل هم
    دوغري يروح لأهل مكه
    أهل الحبا .. وأهل الجبا
    وأهل القلوب الطيبه
    أهل الشهامه والكرم
    وأهل كلمة مرحبا
    وميزه تكون مكَّاوي
    ميزه تكون هنا اتربيت
    في ضل الرحمه جنب البيت
    تفرج في الحرم همَّك
    تصفي بزمزمو دمَّك
    يابختك إنت من مكه
    في أزقتها القديمه لعبت
    حرامي عسَّى لما تعبت
    وكبت ولاري وعزيزه
    من الهجله لحد الجميزه
    رمضان طول الليل سامر
    من النقا حتى شعب عامر
    في طرهً وزنه وكبوش
    وطبعاً مافاتك جوش
    مادام إنك مكاوي
    مكاوي
    يعني إبن حاره أصيل
    مكاوي
    وطبعي حلو وجميل
    مكَّاوي أنا وللحجي دليل
    وافتخر إني
    مكَّاوي






    اتمنى الموضوع يعجبكم .........ويعطيكم الف عافيه

    واحتـــــــــــــــــرامي للجميع



    اعــرف الحياء زين.. واعـرف بعد العيب
    كذا رباني ابــوي.. وكــنت بعينه كــبيره
    ::-::
    ايه نعم ابوي رباني على العــز والطـيب
    انا بنت امـــير وابقــى مثل ابـوي امـيره
    ::-::
    علمني ابوي الوفاء والإخلاص والمواجيب
    علمني مالعب لعبت غدر لو هي صغيره


  2. #2
    مسافر متميز
    تاريخ التسجيل
    Feb 2010
    المشاركات
    490

    افتراضي

    اولا لي الشرف اني اول من يرد على موضوعك اختي

    اقسم بالله موضوع راااايق ويروووح ابو المنجا

    وربي كل شيء في جده حلو وينحب



    يعطيك العااااافية اختي الغالية




  3. #3
    مشرف سابق الصورة الرمزية رحال عاشق
    تاريخ التسجيل
    Nov 2008
    المشاركات
    19,975

    افتراضي


    الله .. موضوع حجازي ميه ميه

    كلِّك تكميل يا أم البتول ، وألف شكر على الإهداء الطيب

    الله يخلي لك بابا وماما وكل من يعز عليك ويخليك لهم

    فرّحني طرحك الحجازي الحلو ، الله يحلّي لك أيامك ولياليك

    يسعدني ويشرفني تواجدك ببوابة الغربية ولو من حين لآخر

    مع وافر التقدير


    رحمة الله عليك أختي مسلمة لله
    دعواتكم لها إخواني وأخواتي


  4. #4
    مميزة البوابة العامة الصورة الرمزية سعوديه امريكيه
    تاريخ التسجيل
    Mar 2010
    المشاركات
    1,704

    افتراضي

    اقتباس المشاركة الأصلية كتبت بواسطة محمد الباحة مشاهدة المشاركة
    اولا لي الشرف اني اول من يرد على موضوعك اختي

    اقسم بالله موضوع راااايق ويروووح ابو المنجا

    وربي كل شيء في جده حلو وينحب



    يعطيك العااااافية اختي الغالية
    الشرف ليه اخى الكريم على تشريفك طرحى تحياتى وتقديرى




  5. #5
    مميزة البوابة العامة الصورة الرمزية سعوديه امريكيه
    تاريخ التسجيل
    Mar 2010
    المشاركات
    1,704

    افتراضي

    اقتباس المشاركة الأصلية كتبت بواسطة رحال عاشق مشاهدة المشاركة
    الله .. موضوع حجازي ميه ميه

    كلِّك تكميل يا أم البتول ، وألف شكر على الإهداء الطيب

    الله يخلي لك بابا وماما وكل من يعز عليك ويخليك لهم

    فرّحني طرحك الحجازي الحلو ، الله يحلّي لك أيامك ولياليك

    يسعدني ويشرفني تواجدك ببوابة الغربية ولو من حين لآخر

    مع وافر التقدير
    اولاً مشرفنا الفاضل اخجلتنى بثناءك الطيب

    ثانياً مشكور على الدعوات الصادقه وعلى الا طراء الى هوا وسام على صدرى

    واخيراً تمنياتى القلبيه لك اخى بالسعاده فى الدراين




  6. #6
    مشرف سابق الصورة الرمزية شاعرى
    تاريخ التسجيل
    Mar 2005
    المشاركات
    5,804

    افتراضي

    شكرا سعودية أمريكية على الموضوع الرائع ..
    الغالى رحال عاشق يستحق الإهداء كل يوم على جهوده المشكورة فى خدمة الأعضاء ..جزاه الله خيرا ..
    لى اضافة بخصوص تأثر اللهجة الحجازية بالمصرية كثيراً ، وهو أن الحجاز كان محكوما لفترة طويلة من مصر عبر والى جدة وكذلك لفترة من حكم الأشراف ، ولا ننسى العامل الاقتصادى المتثمل فى المحمل وما كان ياتى معه من معونات .
    دمتِ بكل خير


    بلادى منار الهدى
    https://www.youtube.com/watch?v=oREa...eature=related
    تحية إكبار لشعب الساجدين
    https://www.youtube.com/watch?v=XHlh...eature=related


  7. #7
    مسافر متميز الصورة الرمزية هايـــدي
    تاريخ التسجيل
    Mar 2007
    المشاركات
    516

    افتراضي

    ياعيني ع الموضوع المرستك

    بس ان جيتي للحق لازمه تسجيل صوتي بالكلمات

    لاني متأكده انه محد راح يتقنها غير اهلها

    ايش رايك باقتراحي >>> تلاقيك تقولي اندري من الموضوع يا هايدي لا اندرلك عيونك من حقها


    هع هع هع

    بس اغرب شي بالموضوع حكايه عمو مغراف

    من جد شي يخوف

    تشكرات ياعسوله على هالموضوع الكوول





  8. #8
    مميزة البوابة العامة الصورة الرمزية ارووومه
    تاريخ التسجيل
    Jun 2010
    المشاركات
    6,581



    افتراضي


    أهل مكة حمام

    وأهل المدينة قماري

    وأهل جدة(غير) غزال


    مشكوره أختى سعوديه امريكيه


    موضوع حجازى رائع ذكرنى بمدينتى الحبيبة طيبة الطيبة

    على صاحبها أفضل الصلاة وأتم التسليم

    مدينتى المدينة المنورة مرتع الطفولة والصبا...

    فديت ترابها الطاهر وفديت أهلها أهل الكرم والجود و اللقاء الطيب

    و البسمه الحلوه والأخلاق الذوق..

    الله يحفظ المدينة المنورة وأهلها ولا يحرمنا من زيارتها..






  9. #9
    مسافر فعال الصورة الرمزية ساحر جده
    تاريخ التسجيل
    Apr 2010
    المشاركات
    66

    افتراضي

    موضووووووعك بصراحه ولا احلى

    بجد يعطيك العافيه على كذا مواضيع

    اترنك منك هينه وي يااختي


  10. #10
    مشرف سابق الصورة الرمزية رحال عاشق
    تاريخ التسجيل
    Nov 2008
    المشاركات
    19,975

    افتراضي

    اقتباس المشاركة الأصلية كتبت بواسطة شاعرى مشاهدة المشاركة
    الغالى رحال عاشق يستحق الإهداء كل يوم على جهوده المشكورة فى خدمة الأعضاء ..جزاه الله خيرا ..

    ويجزاك خير على ثنائك الذي لا أستحقه يا زميلي الطيب والخلوق

    يشهد الله أني أحبك في الله

    آسف أختي الفاضلة أم البتول على هذه المداخلة الصغيرة

    صباحكما سعيد




معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 0 (0 من الأعضاء و 0 زائر)

     

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك