مـنـتـدى الـعـرب الـمـسافـرون

هذا الموقع مخصص للسياح العرب وهو احد افضل المواقع المخصصة للسياحة و مساعدة المسافرين ، و هو أحد مواقع شبكة منتديات مكتوب !Yahoo ، انضم الان و احصل على فرصة متابعة أخبار و معلومات و صور و مقاطع فيديو من كل دول العالم.



صفحة 1 من 4 1 2 3 4 الأخيرةالأخيرة
النتائج 1 إلى 10 من 40
Like Tree0Likes

الموضوع: تقرير: منتجع الحواس الست

  1. #1
    مسافر فعال
    تاريخ التسجيل
    Oct 2007
    المشاركات
    68

    افتراضي تقرير: منتجع الحواس الست




    اسم الفندق وعنوانه:

    منتجع الحواس الست خليج زغي

    Six Senses Hideaway Zighy Bay

    خليج زغي، محافظة مسندم، سلطنة عمان

    Zighy Bay, Musandam Peninsula Sultanate of Oman

    Tel: +968 26735 555, Fax: +968 26735 556 (Resort 24 hrs)

    Tel: +968 26735 888, Fax: +968 26735 887 (Reservations 9am-9pm)

    E-mail: reservations-zighy@sixsenses.com | Property contact list

    نوع الحجز ومواصفاته:


    فيلا مع حوض سباحه (غرفة نوم واحدة)
    Pool Villa - 1 Bedroom (33) Total area 247 sqm (82 sqm internal)


    Infinity-edged pool size 21 sqm
    Traditional Arabic summer house and / or outdoor Majlis
    Private sunlounge and outdoor dinning suite
    Indoor and outdoor shower
    Oversized bathtub
    Individually controlled air-conditioning and ceiling fans
    Working and dressing table
    Private wine cellar
    Personal safe, hairdryer and espresso machine
    IDD Telephone, wireless internet and cordless phone
    Large daybed
    Tea and coffee making facilities
    CD, DVD Home Integrated Theatre System
    Flat panel TV with satellite TV channels
    Interconnecting Villas available
    5 Spa Pool Villas offering private treatment room are available at an
    additional cost

    طبعا سعر الغرفه تقريبا 3400 درهم مع عرض خاص لمواطني دول مجلس التعاون ، والعرض عباره عن حجز ليله والليله الثانيه تكون مجانية ولازم يكون الحجز عن طريق الاتصال في الفندق وليس عن طريق الانترنت.

    وهذا لينك العرض:

    عرض مواطني دول مجلس التعاون

    تاريخ الحجز:

    من يوم الخميس الموافق 18-6-2009 وحتى يوم السبت الموافق 20-6-2009

    طريق الوصول للمنتجع:

    للقادمين من الامارات هنالك عدة طرق تستطيع الوصول منها للمنتجع وهي :

    1- طريق راس الخيمه - دبا

    2- طريق مسافي - دبا

    3- طريق الفجيرة - دبا

    وهذي خريطه توضح طريق الوصول للمنتجع



    وهذا ملف pdf يوضح الطريق للمنتجع من موقع المنتجع نفسه

    الاحسن تستخدمون الخريطه علشان توصلون للمنتجع لان الطريق يضيع بصراحه واللوحات الارشاديه قليله وبتمرون على طريق ترابي وثاني شي لما توصلون لبوابة المنتجع بيسألونكم الموجودين على البوابة اذا تحبون تروحون للمنتجع بسيارتكم الخاصه (في حالة انها تكون فورويل) او انهم يوصلونكم بسيارة المنتجع ، لان اللي يفصل بين البوابة والمنتجع جبل مرتفع والشارع ضيق وترابي ... بس بصراحه تجربته روعه وخصوصا للي ما يخافون من المرتفعات :24:

    وهذي صور الطريق لين البوابة:

    طريق راس الخيمة - دبا



    انتبهوا الطريق فيه بعض التصليحات





    لحظة الوصول لدبا





    نقطه تفتيش تابعه للشارقة لضبط المتسللين، تقدرون تستخدمون الهويه او حتى الليسن





    اللوحة الوحيده اللي شفتها وتكون قبل السد













    لوحة حجريه باسم المنتجع عند البوابه



    البوابة





    طريق الصعود للجبل





    البوابة من اعلى الجبل





    مرايا عاكسه توضح القادم من الجهة الاخرى









    واخيرا هذا هو المنتجع من فوق الجبل










    برتاح شوي وبرجع ارفع لكم الصور .... فاصل ونواصل :101:


    اخوكم: مــــــــــــــايد




  2. #2


  3. #3
    مسافر فعال
    تاريخ التسجيل
    Oct 2007
    المشاركات
    68

    افتراضي

    اقتباس المشاركة الأصلية كتبت بواسطة مسقطية مشاهدة المشاركة
    ارتاح بس لا اطول بالراحات ههههههه،،، متابعين
    :109:

    ان شاء الله اختي والحين بكمل الموضوع :24:




  4. #4
    مسافر فعال
    تاريخ التسجيل
    Oct 2007
    المشاركات
    68

    افتراضي

    عدنــــــــــــــا

    الحمد لله وصلنا على الساعه ونص تقريبا للمنتجع واستقبلونا الجماعه بمشروب بارد وعرفونا على الشخص اللي راح يكون مسؤول عن اي شي نحتاجه.

    ملاحظة مهمه:

    طبعا انا قريت قبل ان اسعار الاكل في المنتجع غاليه وكنت حاط في بالي اطلع اخذ اكل من اقرب مطعم خارج المنتجع بس من شفت الطريق الجبلي قلت فخاطري " ابرك لي اصوم ولا اني اطلع مره ثانيه للجبل الا عند المغادره لان الدرب صعب ووعر بصراحه " فعملت احسابي واشتريت ثلاجه تشتغل في السيارة عن طريق الولاعه وخذت لها وصله علشان اقدر اشغلها في الغرفه وترستها اكل :109:





    المهم توجهنا للشاليه الخاص فينا وكان خلف الاستقبال مباشره ، شاليه رقم 53 الشاليه كان وايد حلو بس فيه عيب شرعي واحد وهو ان الحاجر اللي في الامام منخفض يعني اللي برع يشوف اللي داخل الشاليه ، فطلبت تغييره ، وهني بداء الموقف الطريف اللي صارلي :108:

    اول شي بقولكم الموقف وبعدين بكمل باقي الصور :

    طبعا بعد ما طلبت تغيير الشاليه قالي المرافق اللي معاي انه فيه شاليه على يسار الاستقبال ومرتفع وغير مكشوف ، قلت له خلاص شوف اذا فاضي والا لا ، راح واتاخر تقريبا ثلث ساعه وقالي تعال بتشوفه ، لما رحت وشفته لقيته وايد حلو ومرتفع ومحد يكشف اللي داخل ، قلت خلاص بخذه ، قالي يباله تنظيف اتريا ساعه ، قلت مب مشكله وانتظر لمده ساعه واتصل فيني وقالي خلصوا تنظيف الشاليه بس الحوض يباله تنظيف بعد وبيتاخر ساعه قلت مب مشكله وبعد ساعه اتصل وقالي اتريا نص ساعه شوي وبيكون خالص قلنا مب مشكله اللهم طولج يا روح ، وقالي خذ راحتك في الشاليه الاول لين نخلص، المهم بعد ساعتين ونص خذونا من الشاليه الاول ورحنا الشاليه الثاني وكان رقمه 72 وارتحنا شوي بس كان الشاليه حاررررر ، قلنا يمكن توهم مشغلين المكيفات ... المهم اخوكم ما صدق على الله وطب في الحوض المهم بعد ما خلصت سباحه دخلت الشاليه والا هو بعده حار :114:

    اتصلت فيهم وخبرتهم وقالوا بيرسلون الفنيين يصلحه واتريا واتريا واتصل مره ثانيه وثالثه :112: المهم في الاخير وصلوا ونظفوا المكيف من برع وزاده غاز وقالي الحين بيصير تمام ، انتظر نص ساعه واتصلوا قالوا كيف الحين قلت لهم بعده يمكن يباله وقت ، مرت ساعه والحاله مثل ما هو واتصلت فيهم وطرشوا الفنيين مره ثانيه ونظفوا الفلتر وقالي الحين تمام ، وترييت انه يبرد بس نفس الشي .... هني عاد بلغ السيل الزبد عندي بصراحه :112:

    وكانت الساعه 9 بالليل ، اتصلت فيهم وقلت لهم جهزوا سيارتي ، قالوا خير ان شاء الله ، قلت لهم برد دبي هاي مب حاله اليوم كله راح علي وانا ما ارتحت ولا تهنيت بالشاليه ، قالي المرافق اصبر بكلم المدير ، مرت ربع ساعه ومحد رد علي واتصل مره ثانيه في المرافق قالي الحين رايح اشوف لك شاليه ثاني واكبر من الاول ، المهم مرت ربع ساعه والا الحبيب يدق الجرس قالي تعال انت واهلك والاغراض نحن بينبهم ، المهم خذانا للشاليه اليديد وكان رقمه 5 ودخلنا ، طلع انه سويت عباره عن غرفه وصاله مع حوض سباحه اكبر ومطل مباشره على البحر وعلى يسار الشاليه مساحه فاضيه وعلى يمينه فيلا طابقين بس محد ساكن فيها يعني قمة الخصوصيه، وكل المواصفات هي كانت فخاطري بس غاليه وايد واخوكم لقاها بارده مبردة :24:

    طبعا لما بغيت احجز اول مره قلت لهم ابا على البحر بس قالوا لازم تدفع 1000 درهم زياده اذا تبا على البحر ، قلت لا خلاص عطوني فوق قمة الجبل اذا شي :109:

    وطبعا سعر السويت هذا تقريبا 6000 درهم مع الاطلاله على البحر حق ليله وحده ، المهم ياني المدير نفسه وتم يعتذر ويتأسف ويقولي شو تبا اطلب اللي تباه ( ذكرنا بمارد المصباح :109: ) ، قلت له اليوم بطوله راح علي وانا لازم اغادر يوم السبت الساعه 12 ( الشيك اوت) فقلت له بتطلع الساعه 4 العصر ، فقال للمرافق خله يطلع الساعه 6 مب اربع :109: ، قالي شو تبا بعد قول قلت له الحين ما فيه شي في بالي ، قال عندك المرافق اذا تبا اي شي خبره وعطني البزنس كرت ماله وقالي خبرني باي شي تريده.

    عاد اخوكم قعد يفكر ومثل ما يقولون عقل الريال في بطنه :109: وبما ان الاكل غالي وايد قلت للمرافق بطلب غداء باجر ، قالي خلاص بخبر المدير واطلب اللي تباه باجر، قلت له تم

    المهم اليوم الثاني اتصلت في المرافق على الساعه 12 وقلت له اطلب الغداء قالي هيه اطلب اللي تباه ، عاد اخوكم استلم المنيو وطلبت نص اللي في قائمة الاكل :109: في الاخير طلع مجموع الاكل اللي طلبته تقريبا 1000 درهم ، وطبعا الاكل زاد فتغديت الباقي في اليوم اللي بعده ... تفكير اقتصادي بحت :114:

    وهاي صورة الاكل

















    والحين مع صور الشاليه الاول رقم 53:
















































  5. #5
    مسافر فعال
    تاريخ التسجيل
    Oct 2007
    المشاركات
    68

    افتراضي

    يتبــــــــــــــــع


    وهذي صور الشاليه الثاني رقم 72 :




































    وهاي صور الشاليه الثالث ورقمه 5 :





























































































    الحين بروح ارتاح لانه صدق تعبت وعيوني عورتني :110:

    بس بغيت اقولكم شي عن المنتجع ، الصراحه المنتجع رهيب والمكان روعه واهم شي خالي من المفاصيخ يعني من رحت لين رجعت ما شفت شيفه واحد منهم على البحر يعني الواحد يقدر يتمشى على البحر مع اهله :24:





  6. #6
    مسافر متميز الصورة الرمزية متبشبشه
    تاريخ التسجيل
    Jun 2009
    المشاركات
    290

    افتراضي

    أما الصراحه الشاليهات شي
    والأكل شي
    وتصويرك شي
    وأسلوبك شي
    باختصار تقريرك شي
    يلله بانتظار البقيه


    سبحان الله والحمد لله ولا إله إلا الله والله أكبر ولا حول ولا قوة إلا بالله العلي العظيم
    اللهم صلي وسلم على سيدنا محمد


    كلمة شكرا حلوة بس الدعوة دوووم أحلى


    تقرير عن باصات ايرولاين

    فطور في وسط البحر
    فندق برنس في كوالالمبور


  7. #7
    مسافر فعال
    تاريخ التسجيل
    Oct 2006
    المشاركات
    71

    افتراضي

    حلو الموضوع يعطيك الف العافية




  8. #8
    مشرف فرنسا الصورة الرمزية مغرور نجد
    تاريخ التسجيل
    Apr 2009
    المشاركات
    3,018

    افتراضي

    خطيررررررررررررررررررررررررررررررررررررررررررررررر ررررر والله روعه يعطيك الف عافيه يالغالي


    ..
    ربي أستودعناك من بات في قبره وحيداً
    ربي اجعل أعمالة مؤنسة له ...
    واجمعنا به ومن نحب في فردوسك الاعلى ...
    الله يغفر لك يا أبوي ..
    ..


  9. #9
    مسافر فعال
    تاريخ التسجيل
    Oct 2007
    المشاركات
    68

    افتراضي

    عــــــــــــدنا

    السلام عليكم جماعة الخير

    طبعا انا نزلت كل الصور تقريبا وبقت صور بسيطه للشاليه الكبير ، طبعا كان مفتوح وقلت اخذلي كم صورة ، بس بشكل عام المنتجع حلو لشهر العزله لعزلته عن المدينه ولهدؤه ، وينفع حق العوائل بس اللي ميزانيتهم زايده شوي لانه غالي بصراحه :108:

    المهم اذا فيه اي استفسار انا حاضر ان شاء الله ، والحين اترككم مع الصور:















    هذا كل شي وان شاء الله عجبكم التقرير والتصوير ، مجموع الصور 126 صورة ، والحين ما يردكم الا لسانكم :24:




  10. #10
    مسافر فعال
    تاريخ التسجيل
    Oct 2007
    المشاركات
    68

    افتراضي

    اقتباس المشاركة الأصلية كتبت بواسطة متبشبشه مشاهدة المشاركة
    أما الصراحه الشاليهات شي
    والأكل شي
    وتصويرك شي
    وأسلوبك شي
    باختصار تقريرك شي
    يلله بانتظار البقيه
    مشكورة اختي وما قصرتي بصراحه ، ردج شي :101:




صفحة 1 من 4 1 2 3 4 الأخيرةالأخيرة

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 0 (0 من الأعضاء و 0 زائر)

     

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك