|
|||||||
| التسجيل | الرئيسية | معرض الصور | المنتدى | إشارة الأقسام مقروءة | التصنيفات |
| التقارير المصورة ومكتبة صور خاصة بتايلانـــــد : في هذا المنتدى يتم تزويد المستخدم بالتقارير المصورة الخاصة بتايلاند بالإضافة الى مكتبة صور خاصة. |
| التصنيفات: chiang mai , phuket |
 |
|
|
أدوات الموضوع | طريقة العرض |
14-11-2006, 08:08 PM
|
#1 (permalink) |
|
عضو العرب المسافرون المميز
 
تاريخ التسجيل: Jun 2005
المكان: β... OveR TheeeRe ...β
مشاركات: 1,665
|
تقرير رحلـــ ThE PrOGraMmErــة بالنكهة التايلندية <<< بالكاري والبصل :)
بسم الله الرحمن الرحيم
اعزائي الأعضاء/العضوات الكرام.. السلام عليكم ورحمة الله وبركاتة,, دايما البداية في اي شي تكون صعبه والواحد ما يدري وشلون يبدأ...لكن بوجود اعضاء رائعين ومتعاونين مثلكم...ما فيه شي صعب بإذن الله..  قبل ما ابدأ بالتقرير...احب اشكر بعض الأعضاء اللي لولا توفيق الله ثم هم...كان ما صارت رحلتي هذي لتايلند من افضل الرحلات في حياتي..  والفضل لهم جميعا علي بدون تفرقة والترتيب في سرد الأسماء ما له علاقه...كلكم فيكم الخير والبركة.. ابدأ بالأخ الوطواط وتقريره المميز...و الأخت الوفاء ومعاها في نفس التقرير الأخ الأنيق الأخ مولا ونصايحه وتوجيهاته اللي ما لنا غنى عنها...الأخ خالد قطر.. الأخ فرديناندو.. نهاية بالأخت راعية بانكوك والأخت ريشة المسك... وما يهونون باقي الأعضاء كلهم وتعليقاتهم ومشاركاتهم...لكن هذولي اللي يحضروني..والمعذره للي نسيت اسمه.. فلكم جميعا كل الشكر على اللي قدمتوه ولا تزالون تقدمونه والكلام يعجز عن شكركم جميعا ...وعسى الله يقدرني ارد ولو بعض جمايل هالمنتدى بشكل عام علي وبشكل خاص بوابة تايلند وايضا احب ان اعتذر عن تأخري في كتابة التقرير بحكم دوامي اللي ماخذ وقت كبير من يومي...وفي الآونة الأخيرة..الشغل على الصور وتنقيحها وتصغيرها ورفعها كله برضه اخذ حوالي الأسبوعين...فأرجو منكم المعذرة والتقرير تراه 290 صوره....صوره تنطح صوره...واللي يبي يستقعد لي ويعد....يوريني شطارته هههههههه فاصل إعلاني.... هذا البرنامج يأتيكم برعاية درعة للعطو....احم احم اقصد برعاية الخطوط الجوية القطرية (الراعي الجوي)   والراعي على الشبكة العنكبوتية....العرب المسافرون هييييييييييه "طق طق طق طق طق<<تصفيق سيووووط<<تصفير  ".. يا ولد انت اللي في الزاويه ليش ما تصفق...؟؟  اطلع برا...اوقف في الزاوية وارفع رجلك اليمين ويديك كلها...ووجهك للجدار  الراعي المادي "تهي تهي تهي" طبعا وفيه غيره؟؟!!  اولا...قبل ما ابدأ بالموضوع فيه عندي تحذير وتنويه للزوار الكرام  ممنوع الدخول لغير النزلاء Hotel's Guests Only هههههههههههههههههه معليش...تراني احب المزح كثير...والله يعينكم علي في هالتقرير... احب انوه اني راح اخلي التقرير ان شاء الله على شكل حلقات ...عشان يكون اسهل لي في جمع المعلومات وتنزيل الحلقات ...واسهل لكم انتم في قرائتها والإستفاده منها اكثر من لو كانت في دفعه وحده النقطه الثانيه اللي احب انوه لها....اني راح اجيب ادق التفاصيل...عشان كذا...اللي يحبون الزبده على طول...راح يملون مني ههههههههه...الله يعينكم بسم الله نبدأ التقرير.. بداية التخطيط للرحلة ما كان بالشكل هذا ابدا..كان تخطيطي على جنوب افريقيا ...حتى اني خلاص جمعت المعلومات وما بقيت شيء ما قريته في بوابة الدول الإفريقية لكن...بعد فترة...اللي كان يبي يروح معي ما قدر ياخذ إجازة..وخويي الثاني اللي ما كنت اتوقع ابدا ابدا اني راح اقدر اروح معه...تسهلت اموري انا وياه من ناحية الإجازة فيا سبحان الله وهنا الواحد يقتنع فعلا انه ما راح يصير له الا اللي رب العالمين كاتبه له لو مهما حاول يخالف الشيء هذا ...لكن للأسف ما كان خويي الثاني ذا مقتنع تماما مثل خويي الاول بجنوب افريقيا بعد عدة مشاورات...توصلنا الى اننا نروح لتايلند...خصوصا اننا العام الماضي كنا في ماليزيا وسمعنا انهم بينهم فروقات كثير حتى ولو كانوا جغرافيا ومناخيا ومن ناحية شعبها متقاربات جدا....لكن كان فيه فعلا فروقات كثيره..."أغلبها" لصالح تايلند...وبعضها لصالح ماليزيا..ولعلي في نهاية التقرير اسوي مقارنة سريعه بين تايلند وماليزيا بإذن الله.. قررنا اخيرا قرار نهائي على تايلند..وتوكلنا على الله...وبديت رحلة تجميع المعلومات وطبعا مباشرة ومن دون اي تفكير....وين تدور المعلومات فيه يا المبرمج ...؟؟وهو فيه غير حبيب قلبي العرب المسافرون ؟؟؟!! دايركت على بوابة تايلند....وخذ لك تجميع معلومات لدرجة اني كنت اجلس بشكل شبه يومي على المنتدى 4 و5 ساعات بعض الأيام...لمدة ثلاث اسابيع تقريبا وصلت لمرحلة اني من كثرة المعلومات اللي اخذتها وصلت لمرحلة تشبع معلوماتي وصرت كني قد رحت لتايلند وبديت اتفلسف على بعض اللي يسألون عن تايلند واجاوبهم عنها وانا توني ما بعد رحت طبعا الشيء هذا طبع فيني وما اقدر اتركه (اللي هو جمع معلومات بشكل زايد)...صح انها ميزه مهيب زينه..لكن لها فايدتها اني الحمد لله رحت ورجعت وولا احتجت اسأل اي احد عن اي شيء...وكله توفيق من الله ثم اعتمادا على المعلومات اللي اخذتها من هالبوابة.. طبعا اكثر شي كنت شايل همه هو حجوزات الطيران...والسبب ان الصيف هذ تحديدا كان فيه ضغط بشكل غير طبيعي على تايلند بعكس السنوات الماضيه !!! مشيت لكذا مكتب سياحي من المكاتب الكبار...ما لقيت فيه خيارات كثيره وكل ما لقيت شي...يا اما الخطوط مهيب زينه...ولا السعر مبالغ فيه...  في النهاية وصلت الى مكتب سياحي اسمه الرويبخ...في مدينة الرياض على طريق الإمام (اللي يسمى طريق الجامعة) مقابل بنك الراجحي وانا داخل على المكتب كنت مأيس اني القى حجوزات ومتوقع ان الوضع مثل باقي المكاتب....لكن تفاجأت ان خويي مضبط حجز من زمااان..ههههههههه صار حاجز لنا على الخطوط القطرية..الرياض - دوحة - بانكوك - دوحة - الرياض على تاريخ 24/8/2006 وعوده بتاريخ 7/9/2006 (14 ليلة و15 يوم)ووقت الإقلاع كان حوالي الساعه 5 العصر والوقوف مدة ساعة في مطار الدوحة وبسعر 2250 ريال سعودي تقريبا للشخص....سعر مناسب جدا....لكن انا وبصراحة ما كنت مقتنع بالخطوط القطريه ابدا...لييييش؟؟؟ هذا الصراحه موضوع كبير فينا احنا يا العرب....اننا اذا سمعنا عن الشيء من وجهة نظر احد ثاني...خلاااص...ناخذ فكره عنه ومن دون ما نجربه نحكم عليه بشكل قاطع بناء على وجهة نظر الشخص اللي اخذنا منه الكلام ....طبعا انا لقيت عكس الشيء هذا سواء في الخطوط القطرية وفي اشياء ثانية في الرحلة كلها...على سبيل المثال موقع السكن والفندق اللي سكنت فيه....تدرون وشلون...خلوا كل شيء في وقته... الرحله كانت توافق يوم خميس...وطبعا كعادة المبرمج ما يجمع اغراضه ويكمل لوازمه الا في الوقت الضايع ولازم يزنق نفسه<<<ما يتوب على كثرة المواقف المحرجة اللي صارت له.. المهم انه جا يوم الإربعاء ليلة يوم السفر...ونمت وما جمعت الا بعض الأغراض وكالعاده قلت بكرا ابكمل...يوم قمت والوقت ضيق معي وخربطت عمري وجمعت الأغراض بسرعه وطلعت معي هالصوره عدت على خير الحمدلله ومشينا قبل الرحله وبوقت كافي....والى المطااااار ووصلنا ومعنا وقت كااافي وزياده<<<<كااافي ولا شاهي هاهاها يتبع>>>
|
|
|
|
14-11-2006, 08:09 PM
|
#2 (permalink) |
|
عضو العرب المسافرون المميز
تاريخ التسجيل: Jun 2005
المكان: β... OveR TheeeRe ...β
مشاركات: 1,665
|
الخطوط القطريه...وبدون مبالغة "كانت أحلى خطوط ركبتها في حياتي"
وما تقارن لا مع الكاثاي باسيفيك ولا طيران الإمارات ولا السعودية...واكاد اجزم انها احسن خطوط في الخليج كله ...الصراحه من جميع النواحي...طيارات جديييده(طبعا كلها من حبيبة قلبي ايرباص...مهوب خياس بوينج اللي كل الخطوط السعودية منها)....سعر تذكره مناسب...ترتيب وسرعه كبيره في عمليات شحن العفش والصعود للطائرة...داخل الطياره...خدمات ولا اروع...تشكيلات الوان تفتح النفس...اهتمام بأدق التفصيل في كل شي..دورة المياه الل يعزكم متكااااملة بكل شيء مناشف -عطورات -امواس -مناديل اشكال والوان...مضيفين متعاونين ومبتسمين دايم واللي استغربته ان اغلب المضيفات كانوا بريطانيات!! ...شاشه كبيره اجزم انها اكبر من 18 انش ...مقاعد اوسع من باقي الخطوط بشكل ملحوظ(على الدرجة السياحية طبعا)...برامج ترفيهيه والله لو تلف العالم كله برحله وحده ما يمديك تخلص ولا نصها من افلام (بعضها موجود في السينما ذاك الوقت)الى مسلسلات الى برامج وثائقية ودينية الى اغاني وهذا كله غير الالعاااااب.. الوجبات والخدمه على مدار الساعه...وتحس فعلا انهم يبغون يكسبون عميلهم ويرضونه ....طبعا....جميع ما سبق ذكره...في الدرجه السياحيه...فما بالكم بدرجة رجال الأعمال والدرجة الأولى !! ...طبعا ممكن اكون توفقت بكل هالأشياء هذي لأن الطياره كانت جديده....احتمال!! فيه شغله في الطياره...ممكن تقولون انها حقت بزران...لكن من جد اعجبتتتتتني....اذا اقلعت الطياره واستقامت في الجو واعطوا الركاب الوجبه...يعني بالعربي جا وقت النوم ...يطفون الأنوار كلها....وما يبقى الا خط من النور في اعلى الكبينه على طول الطياره<<<<طيب وش الغريب في الموضوع؟؟؟ الشيء الغريب واللي اعجبني في الموضوع هو ان هالنور من نوع النيون ولونه اززززرق رااااايق مرررره....تحس انك تحب وحده وانت تناظره وودك تعطيها هديه<<<وراه بدا يخور ذا هههههههههههه وهذي صورة للطيارة وحنا في مطار الرياض...وتلاحظون ان شكلها ولونها غير طيارات القطرية...لأنها كانت حقت كاس آسيا او ما ادري وشو بالضبط...المهم كانت فيه بطوله وحاطين شعارها على الطياره لأنه كان مقر هالبطولة الدوحه<<<ما يفهم شي في الرياضه هههههه  ^^ ما كنها شعار الإتصالات "عبّــــــر" هههههههههههههههه المهم اننا ما امدانا نقلع ونربط الأحزمه ونعتدل في جلستنا الا وقالوا ترانا وصلنا الدوحه اربطوا احزمتك لا يصير معكم تفاهم ثاني<<<تخيلوا كذا هههههههههههههههه نزلنا مطار الدوحه في صالة الترانزيت....والصراحه كان ترتيبه حلو جدا مع انه صغير..لكن على مستوى عالي من التطور والفخامه والسرعه في الإجراءات...لكن للأسف فيه شي مهملينه...او بالأصح ما اعطوه حقه وهو المفروض يكون من اكبر الأولويات...اللي هو المسجد ...كان صغير ومتواضع للأسف.. مع ان المطار جديد توه حتى ان فيه بعض المناطق ما بعد اكتمل بنائها...المهم صلينا المغرب والعشاء وما امدانا نخلص ويدخن خويي الا وحنا راكبين الطياره الثانيه...واحب انوه لشغله هنا.... تحياااااااااااتي لكم يا أهل قطر ....والله انكم شعب قمّة في حسن التعامل والكرم والطيبة..وأمنيتي اجي قطر وانزل فيها اشوف الديره...هاه من يعزمني..ولا يهونون أهالي باقي دول الخليج...لكن هذا الشيء حق للقطريين ولازم نعترف به.. ومن ضمن الأشياء الحلوة في مطار الدوحه كان فيه وايرلس... المهم اقلعنا من الدوحه متجهين لبانكوك ومشى الوقت ووصلنا لبانكوك بشكل سريع جدا لأني ما حسيت بالوقت مع هالبرامج و.........هاه؟؟ وشي العابه ؟؟ وهذي صور لبانكوك من الجو   وهذي صورة لحظة الوصول  والشماغ كان مرافقنا  وهذي صورة من داخل المطار  المعذره على الصورتين الأخيرات مهيب واضحه لكن كنت امشي وانا اصورها صورة العلم التايلندي في مواقف المطار وهو يرفرف كما يرفرف الديك الجائع <<<اقول يا زينك ساكت  طبعا احنا كنا حاجزين رحلة الى شانغ ماي مباشرة من دون ما ننزل الى بانكوك..اوه صح نسيت اقول لكم ترتيب الرحلة..كان حجزنا الداخلي وترتيب الأيام كالتالي... بانكوك - شانغ ماي ... ونجلس في شانغ ماي 4 ليالي شانغ ماي - فوكيت ... ونجلس في فوكيت 7 ليالي (وللمعلومية ما فيه الا رحلة وحده يوميا من شانغ ماي الى فوكيت على الخطوط التايلنديةThai) فوكيت - بانكوك ... ونجلس في بانكوك ليلتين وهذي صورة لوحده من طيارات الخطوط التايلندية Thai  وكان سعر التذاكر الداخليه 850 او 950 ما اتذكر بالضبط...اللي اتذكره انها كانت هي مع الدوليه ب 3100 ريال سعودي للشخص طبعا كل الرحلات الداخلية كانت على الخطوط التايلاندية Thai وخلينا حجز رحلة بانكوك شانغ ماي بينها وبين وصولنا من الدوحه 4 ساعات احتياط في حالة لو تأخرنا وما اقلعنا من الدوحه او في حالة صار لنا شي لا سمح الله مع الجوازات ...لأنه الرجال اللي في مكتب الرويبخ قالي سالفه صارت لواحد من عملائه....قصصصصه كنها فلم مسكين  يقول انه مسوي مثلكم بالضبط وتأخرت رحلته ما وصلت الى بانكوك...وفاتته رحلة بانكوك شانغ ماي..وما لقى حجز الى شانغ ماي غير الرحلة اللي فاتته...بعدين تعب الين لقى له فنندق قريب من المطار في بانكوك...بعد ما لقى ولقاه غالي طبعا...جلس يومين بعدين راح لشانغ ماي...قالوا له الفندق اللي هو حاجز فيه انت ما جيت على الوقت المحدد عشان كذا الغينا حجزك...ولكم ان تتخيلوا سلسلة المشاكل اللي صارت له....بإختصار...بسبب هالتأخير البسيط تلخبطت سفرته كلها... المهم اننا كنا حاسبين حساب الشيء هذا على بال ما خلصنا الجوازات واخذنا عفشنا ومشينا للصالة الداخلية...صار باقي على الرحلة ساعتين...قضيناها بالنت لأنه فيه وايرلس المطار واخذنا لنا سناك خفيف واللي انا مستغربه ان الصاله الداخلية كانت فاضيه !! نسيت اقول لكم..انا كنت ماخذ الفيزا من الرياض وما اخذت الا يوم واحد عند السفارة وهي طالعه..والحمدلله اني اخذتها من الرياض لأنه كان عندهم زحمه في اصدار التاشيرات عند الوصول بشكل ممكن يخليني افوت رحلتي الى شانغ ماي... شوي واحنا راكبين الطيارة المتجهه الى شانغ ماي وهذي صورة من داخل الطيارة  لاحظوا الفرق بين جناحها وجناح القطريه...اااااااه يا القطريه...والله ما فيه بحلاك اي خطوط ثانيه وصلنا بحمد الله لشانغ ماي وهذي مناظر لها من الجو...وتلاحظون الخضرة في كل مكان...حتى الشوارع<<والله النصبة البايخه      وهذي بعض "الأشياء" اللي قدموها لنا على أساس انها اكل....استغفر الله يكرم النعمه بس...  وهذا العيب الوحيد في خطوطهم ذي...اللي هو الأكل...مع انه في وحده من الرحلات كان اكلهم حلو نوعا ما ... وهذي لحظة الوصول ولله الحمد....ولاحظوا الضباب اللي فوق الجبل  المهم طلعنا من المطار وخلصنا امورنا بسرعة واخذنا لنا تاكسي.....تدرون شلون...خلوا الباقي في الحلقة الجاية...يكفي كذا  وهذي صورة من الحلقة الجاية تصبييرة لكم...  والله الله بالردود الزينه..ولا ترا مانيب مكمّل التقرير <<لا تكفا والمعذرة على الإطالة واذا كان تفاصيل ما لها داعي(الحمدلله قايل لكم من الأول هههههههههه ) مع محبتي لكم,,,
|
|
|
|
|
15-11-2006, 09:12 AM
|
#8 (permalink) | |
|
مسافر متالق
تاريخ التسجيل: May 2005
مشاركات: 741
|
تحية عطرة لك اخوي ThE PrOGraMmEr
تقرير ولا أروع تعجبني تقارير تايلاند خاصة وباقي الدول عامة لأني من رواد تايلاند وتقريرك قمة الصراحة واسمحلي احجز مكان في رحلتك واتابع الرحلة من البداية لنٌهاية ويعجبني التفصيل الممل عن السفرة اقتباس:
افا والله عليك وانا بوخالد  بدون عزيمة يالشيخ حياااك بلادك وفي أي وقت بس أششر  ولك مني خالص التحية اخوك القـــطــــــري
|
|
|
|
|
|
15-11-2006, 10:08 AM
|
#10 (permalink) |
|
مسافر متميز
تاريخ التسجيل: Nov 2004
المكان: Dammam
مشاركات: 386
|
الحمد لله على السلامة
واصل ونحن متابعين لتقريرك الجميع والمفصل تفصيل تفاصيل جميلة ..حلوة لأن بصراحة التقرير لازم يكون مفصل بس مايكون ممل ومطول بصورة مبالغ فيها وهذا الشي ان شاءالله انه ماهو فيك وبإنتظارك
|
|
|
|