 |
 |
 |
||
|
|
|
||
 |
|
 |
|
|||||||
 |
|
|
أدوات الموضوع | انواع عرض الموضوع |
06-03-2004, 11:52 AM
|
#1 (permalink) |
|
مسافر خبير
تاريخ التسجيل: Mar 2003
الدولة: السعودية -اسبانيا - فرنسا
رقم العضوية :91
المشاركات: 5,888
|
رحلة عبدول 2
وأخيرا يعود عبدول مع الجزء الثاني من الرحلة بعد غياب طويل أتمنى لكم وقتا ممتعا مع القصة ولمن لم يتابع الجزء الأول الرجاء الدخول على هذا الرابط كانت شغالة ومعها بزر  (( مزعججججججججججججج  )), طبعا الشغالة جمبي هي والبزر ولكن أهل هالبزر جالسين في الدرجة الأولى, قلت ((الشكوى لله)), جلست في مكاني وأخذت وضعيتي وقلت توكلت على الله. ثم قمت أردد دعاء السفر, طفوا الأنوار ودق كابتن السيارة السلف ( يعني شغل الطيارة ) وأقلعت الطيارة ومشينا. بعدها التفت على البزر أضحك له  , وما إن ضحكت له إلا وبدأ يصارخ أو بالأصح ( يزاعق ), بلعت ريقي وصديت ولكنه لم يسكت إلا يوم التفت الجهة الثانية. لأنه كان على يميني وماسكت إلا يوم التفت يسار, ثم رجعت أناظر قدامي والتفت بعيني عليه ( الوجه قدام والعيون يمين ) ثم رجع مرة ثانية يزاعق. قلت لنفسي ((لاحول )) الله يعين, ثم فتحت الستارة الفاصلة بين الدرجة الأولى والسياحية وإذا برجل ((كبير جدا وشواربه أكبر منه )) ينظر إلي بطرف عينه ((شوي وياكلني  )), عرفت أنه أبو البزر المزعج, يسأل الشغالة: وش فيه يصيح ؟والتفتت علي الشغالة, قصدها أنه بسببي عندها (( قفلت معاي الأخلاق )), عطاني الأبو نظرة (( بما معناها: يقول لي لاتخلي البزر يصيح )) وأنا ميت قهر: قلت يارب ألاقي مكان فاضي. طبعا قلت للمضيفة ابغى مكان فاضي غير هذا, قالت لي طيب (( طبعا بلغة الإشارة, ومعها شوي تأتأة)) لأن لغتي الإنجليزية وقتها ((الله بالخير)), انتظرت و انتظرت  وإنتظرت ولكن لامجيب, طبعا كل هذا وأنا قالب وجهي للجهة الثانية, حشان هالبزر ((آخ من ذاك البزر )) ثم قالت لي الشغالة أبغى أطلع (( بلغة الإشارة وبدون تأتأة )) قمت, ثم طلعت وخلت البزر على الكرسي وفتحت الدرج اللي فوق راسي, وطلعت الحفايظ ((إثر طويل العمر هالبزر يبي يغير التكميلة )) وحطتها على الكرسي اللي فيه البزر وطلعت شنطة صغيرة مع الحفايظ اللي فيها عدة التكميلة مثل البودرة والمناديل المعطرة وغيرها. ثم بديت أحس بشي غريب وإذا هو فعلا (( طبعا طويل العمر, خيسننننننننننننننننننا)) جتني وقتها دوخة فظيعة, قمت من مكاني أبغى أستنشق هواء, المهم أخذت لفة ورجعت وطبعا البزر وشغالته راحو الدورة, وفجأة جاءت المضيفة وقلت لها : واللي يرحم والديك أبغى أغير مقعدي ( طبعا قلت لها واللي يرحم والديك بلغة الإشارة ), قالت لي إصبر الله لا يهينك ( طبعا بما معناها ), المهم إنلــطعت (يعني إنسفطت أو إستنييت بلغة الحجاز), جابوا العشاء وقتها كنت جوعان ( لأني أكول ) تعشيت جمب هالبزر وشغالته, خلصت من العشاء. طبعا كان مع العشاء كاكاو ( طبعا أنا خليته مع البيبسي في الأخير ), وما إن فكيت القرطاسة حقت الكاكاو إلا بالبزر ينفص عيونه ( طير عيونه )يبي الحلاو, قلت في نفسي ( معصي ) يا أنا ياهالبزر, لكن كسر خاطري  وعطيته الحلاو, قلت لا قعاد لي هنا, قمت من مكاني أنتظر المضيفة وقلت لها دبري لي مكان الآن ( وأخيرا دبرت لي مكان) جمب واحد فلبيني أربعيني (يعني عمره في الأربعينات) قلت كويس خلني أسولف معه بالإنجليزي أو لايتكلم أهم شي أريح, المهم إبتسمت له أول ماجلست جمبه ورد علي الإبتسامة بهزة راس وبدون نفس, سولفت مع الرجال شوي ( من وين ؟ وش إسمك ؟ ...الخ) رد علي بدون نفس قلت وحدة من ثنتين ( إما إنه كان عند كفيل سعودي وكره كل السعوديين أوأنه كان ماخذ راحته في المقعد وجيت خربت عليه) , قلت ماعلينا , خلني أنام أحسن لي , قلت خلني أشوف البزر وش سوى , لقيته يتلفت يدور علي , صديت عنه لايزاعق , وسدحت المرتبه ( المقعد ) كي أنام وإذا بشخص ( ماشاء الله ماأدري كم وزنه كان وراي وماقدرت أسدح المرتبه لأنه سميييييين), قلت والله الوهقة , سدحت المرتبه شي بسيط أبنام , غمضت عيوني بنام ولكن ماأكاد أن أنام طوال هذه السفرة إلا والفلبيني يشششششاخر شخار غير طبيعي وملتفت على جهتي , واللي وراي يصقع بركبته على مرتبتي أو بالبزر يزاعق قدام , إنهرت بغيت أبكي بس ماقدرت , قلت مالي إلا أني أتفرج على التلفزيون وأحط السماعات أفتك من الإزعاج , المهم مع التلفزيون هدئت أعصابي شوي وبدى النوم يجيني وقدرت انام من التعب ( لأني كنت مواصل ) نمت وإلا بالفلبيني قومني يبي يطلع بيروح الدورة (الحمام) قفلت معاي الأخلاق , قلت والله ماأتحرك خله يقمز من فوقي أو يروح من الجهة الثانية يدبر عمره , وفعلا قمز من فوقي , وأنا فيني نوم وإلا الحمد لله جاني النوم مرة ثانية ونمت وإلا بخوينا يصحيني مرة ثانية يبي يدخل , بلعتها وسكت , ونمت مرة ثالثة نومة حليوة وإلا بخبطة صحتني من النون , ركبتي كانت طالعة على السيب شوي والمضيفة مرة بعربية الهدايا وخبطت ركبتي صحتني من النوم مفجوع ( ماأدري أصرخ من القهر أو من الألم ) , قلت مافيه نوم , إنتظر الله لايهينك . وأخيرا جاءت إشارة ربط الأحزمة من أجل الهبوط , وهبطت الطيارة والحمد لله بسلام في مطار زيورخ , قمت أبغى أدور أقرب مطعم وأنا أرجف من البرد ( ماتوقعت أن المطار برد من جوة ) , رحت للمطعم وأنا شايل هم الخنزير, المهم كليت وعدا الموضوع على خير والحمد لله , قعدت أنتظر موعد الرحلة اللي بعدها والمتجهة إلى مدريد , فكان باقي على الرحلة أكثر من ساعتين , قلت لا لازم أقوم وأروح أجلس عند البوابة بدري شوي , ((على بالي نظامي )) , وأنا متجه للبوابة إلا قبل الرحلة بساعتين وشوي , إلا وأسمع بمكرفونات المطار ينادون على إسمي , وإرتجفت من الخوف لماذا , وعندي وصولي للبوابة حصل مالم يكن في الحسبان . إنتظرو الجزء الثالث ولا أقول , كأني مصختها شوي , يلا بكمل هذا الجزء , المهم , لقيت البوابة مفتوحة والركاب ركبوا كلهم , وقالوا لي اللي عند البوابة أنت آخر من يركب (( شي طبيعي , كذا السعوديين والعرب دائما )) , لأن كنت مخلي الجوال على توقيت زيورخ ,طبعا هذا قبل ماامشي من السعودية , وأنا قبل الرحلة أقعد أنقص ساعتين فرق , لكن الحمد لله إني لحقت الرحلة , جيت أركب الطيارة , وركبت عند الشباك , وعلى يميني شخصين , طبعا أنا ماأحب أجلس عند الشباك لأني ماأقدر آخذ راحتي في الدخول والخروج , وصلت لمدريد بالسلامة والحمد لله  , أخذت العفش , وقعدت أدور الجمارك , لكن ماكان فيه جمارك , ((على بالي في السعودية بيفتشون)) وطلعت برة المطار أبي أركب تاكسي ,ركبت مع التاكسي , أبي أقول له ((السفارة السعودية )) سألته تعرف إنجليزي , قال لي لأ , وأنا على بالي أتكلم إنجليزي وقتها , كنت أعرف كلمة منزل , وكنت أعرف وشلون تنقال السعودي بالإسباني , فقلت له CASA ARABIA SAUDI وأشرت بيدي على شكل علم يرفرف , ثم قال لي كلمة ,ماأدري وش هي , قلت له أيوه بس si si si ودني هناك , وداني , وكنت فرحان لأن عرفت أشرح له عن السفارة , وكان ذا الشايب يسولف علي وأنا والله ماأدري وش يقول لكني كنت أهز راسي على بالي فاهم , المهم وصلنا باب السفارة السعودية حصل مالم يكن في الحسبان |
|
|
|
06-03-2004, 02:09 PM
|
#3 (permalink) |
|
مسافر خبير
تاريخ التسجيل: Aug 2003
رقم العضوية :1060
المشاركات: 1,103
|
لأن كنت مخلي الجوال على توقيت زيورخ ,طبعا هذا قبل ماامشي من السعودية , وأنا قبل الرحلة أقعد أنقص ساعتين فرق , لكن الحمد لله إني لحقت الرحلة.........
[line] ههههههه والله ضحكتني على سالفة التوقيت ياخي وصفك للرحلة أكثر من رائع... وفعلا كلامك صحيح كلش والا هالبزران في الطيارة... ذكرتني مرة راجع من مصر وقعدت في المقاعد الوسطى وكانت وحده وبزارينها (يعني انا بالطرف وهي بالطرف الثاني والأطفال بينا ) والي يشوفنا يقول كلنا عيلة وحده 
|
|
|
|
|
06-03-2004, 03:25 PM
|
#6 (permalink) |
|
مسافر خبير
تاريخ التسجيل: Mar 2003
رقم العضوية :3
المشاركات: 8,022
|
وعليكم السلام ورحمة الله وبركاتة
من طول الغيبات جاب البزران وألتفت يميناً ومن هالشغلات وأخرتها بزر لا وبعد معه عدته ......على سالفة التوقيت هذي صارت معي بروحتي هذي وبعد مارجعت لدبي من تايلاند ... صحيت الصبح واشوف ساعة الجوال وأثرها 11 وربع .. قلت خير وأطقها ترويشه واعين من الله خير لما جت 12 ونص قمت اصلي الظهر ..... واتصل برا علشان ابي اغير الفندق وشيل وحط معهم .. وبعده قلت خلاص بروح الحين للفندق .. قالو وين ابو الشباب الساعه 9 ونص ...... واثر الدعوه التوقيت حق تايلاند تعيش وتآكل غيرها ..... والجزء الثالث لا يتأخر ..... تحية وتقدير |
|
|
|
|
06-03-2004, 05:05 PM
|
#7 (permalink) |
|
مسافر خبير
تاريخ التسجيل: Sep 2003
رقم العضوية :1175
المشاركات: 4,472
|
قلت خلني أشوف البزر وش سوى , لقيته يتلفت يدور علي , صديت،،،
الظاهر مخوفك شنب أبوه بس تكفى حبيب قلبي كافي تسحيب وحط القصة والا دق علي وتكلم عن الرحلة وبسجلها وأعطيها النساخ اللي عندي يكتبونها خطهم أحس من خطك خخخخخخخ ،،، وياليت تجمع الأجزاء كلها بمشاركة وحدة ،،، |
|
|
|
|
06-03-2004, 05:53 PM
|
#8 (permalink) |
|
مسافر خبير
تاريخ التسجيل: Mar 2003
الدولة: السعودية -اسبانيا - فرنسا
رقم العضوية :91
المشاركات: 5,888
|
الله لايوريك ياأبو خالد الجزء الثالث بيكون مليان تأتأة( توني رايح لبلد أتعلم لغتهم وماأعرف شي عن لغتهم , ولا ديرتهم )وشكرا لك .
أبو أحمد , تصدق إنها صارت لي مرة ثانية , وإن شاء الله ماأعودها , بس حلوة سالفة البزران . أخوي معجب شكرا لك , وإن شاء الله أن الرحلة أعجبتك البحر ماشاء الله عليك تتابع الشرهان , صراحة كنت لابس طاقية وبغت تنشق يوم قلت أن أسلوبي مثل الشرهان . ياماس , قاعد تدعي علي , لا إن شاء الله ماآكل غيرها , رغم إني كليتها مرة ثانية في السفرة الأخيرة . كبيان , والله ودي أسرد القصة مرة وحدة لكني عجاز |
|
|
|
|
07-03-2004, 07:28 AM
|
#11 (permalink) |
|
مسافر متميز
تاريخ التسجيل: Jan 2004
الدولة: دبي ... دار الحي
رقم العضوية :1526
المشاركات: 210
|
أخوي الشاب
هاي الرحلة من أولها كذية عيل بعدين شو صار..........رحلتك كلها نكت ومواقف مضحكة وسردك حلو ومشوق  ننتظر الجزء الثالث بس على الله يكون الأخير............كأنك مسلسل مكسيكي ....مائة حلقة ولا شو رايك!!!! المسافرة |
|
|
|
|
07-03-2004, 11:11 AM
|
#12 (permalink) |
|
مسافر خبير
تاريخ التسجيل: Mar 2003
الدولة: السعودية -اسبانيا - فرنسا
رقم العضوية :91
المشاركات: 5,888
|
أي جزء ثالث أختي المسافرة
لا فيه رابع وخامس وسادس و..... أنا لسا مابدت قصتي , لسا أنا في الرحلة وماوصلت لأسبانيا رحلة عبدول لسا باقي عليها كثير بس بتشوفون أشياء ماهي في بال أحد فيكم |
|
|
|
|
12-03-2004, 07:00 PM
|
#13 (permalink) |
|
مسافر خبير
تاريخ التسجيل: Sep 2003
الدولة: الرياض الحبيبة
رقم العضوية :1185
المشاركات: 2,008
|
اقووول شرايك
تتصل علي بالهاتف (هذا اذا انت الحين باسبانيا ) وتقلي القصة بالتفصيل الممل وانا راح اكتبها بالجهاز حرف حرف وانقلها بعد باكر للمنتدى (على اساس انا بنحتاج يومين نكتب فيه) الصراحة طريقتك جدا مشوقة بالطرح وننتظر باقي الاجزاء لكن لا تسوي مثل طاش وتكتب الجزء التاسع ولاخير وترجع تكمل يالله بالتوفيق ونحن بانتظارك ونروح وترجع بالسلامة |
|
|
|
|
13-03-2004, 07:30 AM
|
#14 (permalink) |
|
مسافر متالق
تاريخ التسجيل: Jan 2004
الدولة: أسباني الهوى
رقم العضوية :1513
المشاركات: 987
|
وعليكم السلام ورحمة الله وبركاته
[grade="00008B FF6347 008000 4B0082"]جميل هذا الجزء السرد كان موفق والاسلوب سهل ممتنع اضحكتني كلمات تحاكي الواقع (وقعدت أدور الجمارك , لكن ماكان فيه جمارك , ((على بالي في السعودية بيفتشون)) وطلعت برة المطار أبي أركب تاكسي ,) [/grade] عاد يارأفت الهجان ننتظر الجزء الثالث على احر من الجمر |
|
|
|
|
14-03-2004, 02:35 PM
|
#15 (permalink) |
|
مسافر خبير
تاريخ التسجيل: Mar 2003
الدولة: السعودية -اسبانيا - فرنسا
رقم العضوية :91
المشاركات: 5,888
|
أخوي سعودي مفلس شكرا لك بس تعليقك حلو, بس إذا قلت الجزء الأخير قد يكون الأخير, ولست متأكدا, يمكن تجيني ضغوط.
الاندلسي, لا والله يمكن يكون رأفت الهجان ويمكن ليالي الحلمية أو مسلسل مكسيكي على قولة المسافرة. |
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض العادي
|
|
|
الساعة الآن 08:11 PM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||