بسم الله ،

عــُــدنـــا !

[ الحلقة السادسة ]

// الحلقة اليوم دسمة شويتين ! ، تعويضاً عن الغياب اللي حصل في الاسبوع الماضي ، الله يعين أهل الدايل أب .. الصور كثيرة شوي .

كنـّـا يوم أمس .. وأثناء عودتنا من برج الإتصالات .. ومن توفيق الله تعالى .. أن عدنا مع سائق تاكسي .. يدعى "مختار" .. مسلم .. هادئ .. حبّوب وطيّب مرّه .. أول ماشفته ماأعجبني .. بس سبحان الله .. صدق من قال [ لاتحكم من نظرتك الأولى ] ! <-- ياهو ألـّــف له مثل !

الشاهد من الموضوع .. أننا اتفقنا مع "مختار" .. على أنـّـه يأخذنا اليوم في جولة كاملة .. من الساعة التاسعه صباحاً .. إلى فوق السحاب ! .. إلى مدينة جنتق ! .. وقبلها يمرّ بنا على الشلالات .. والمعبد الهندوسي .. والأنهار .. والبحيرات .. كل هذا حسبه لنا بـ 250 ريجنت .. ذهاباً وعودة !

لكن قبل ماأبدأ حلقة اليوم .. خلوني أتكلم شوي عن "مختار" .. هالإنسان روعه .. مخلص .. تحسّ أنه واحد منكم ! .. أجودي بمعنى الكلمة ! .. كان كل ماركبت للسيارة .. يسألني " معك الكاميرا ؟ .. معك كاميرا الفيديو ؟ .. نظاراتك الشمسية وينها ؟ " .. بعد مايتأكد من كل هالأشياء .. يحرّك السيارة ويمشي ! .

أيضاً هذا الآدمي .. فيه ميزة عجيبة ! ، انـّه سبحان الله العظيم .. على الريحه ! .. يعني مايمدك تقول شيء إلا مسويه ! .. أذكر سألته عن اصله .. قام وعدّ لي وشرح لي .. وشوي يطلّع لي بطاقة أحواله ! .. بس أنا عيّيت .. أيضاً أذكر إني سألته إذا كان متزوج أو لا .. قام وفتح الدرج وطلّع صور عياله وبنته الصغيره .. قال هذولا هم ! .. أيضاً .. كنت أسأله عن أشرطة كاميرة الفيديو .. وين أقدر ألقاها ؟ .. قام ودخل بأقرب حارة .. قال أنزل أشتر ! .. والمحل طلع رخيص جداً ! .. باع لي الشريط .. 120 دقيقة بـ 15 ريجنت بس ! .. أستغليت الموقف واشتريت نصف درزن .. ستة أشرطة .. بـ 90 رجينت بس !

ايضاً هالآدمي هذا " نصوووح " .. يعني مايبخل علينا بأي معلومة .. ويودينا لكل مكان .. ودّه يورينا كل شيء ! .. لدرجة أنه ودانا لمكان ماشفت فيه أي عربي .. المكان غير معروف أبد .. وكلّه ماليزيين !

أيضاً .. الآدمي هذا وسيع صدر .. ودبّ شوي الله يذكره بالخير .. لدرجة أنه يقصّ لنا التذاكر نفسه ! ، مشكلته الوحيده .. أن مامعه الا تاكسي صغير ! .. ياليت معه مايكروا باص ! ..

رقمه هو 0162345664 - تلقونه في كوالا - قولوا له من طرف " تـركـي " ؛ لأني مواعده إني أسوي له دعاية إذا رجعت ! .



مـُــخــتــار !


محل الإلكترنيات "الشعبي" .. اللي اشتريت منه أشرطة لكاميرا الفيديو !

إستيقظنا في هذا اليوم - وخلافاً لعادتي - في الساعة الثامنة صباحاً .. نزلنا لتناول الفطور .. إلى أن أشارت عقارب الساعة .. للتاسعة صباحاً .. كان "مختار" عند بوابة الفندق .. أخبرني بهذا بإتصال هاتفي أجراه معي في تلك الساعة ! .. نزلنا للإسفل .. ركبنا مع مختار !

كان جدولنا لهذا اليوم .. ينصّ بالتالي [ المعبد الهنودسي - الشلالات - البحيره - الأنهار - ثم أخيراً الصعود إلى جنتق ! ] ، ذهبنا مباشرة إلى المعبد الهندوسي .. بعد أن مررنا بمحل الإلكترونيات الذي ذكرته سابقاً ! .. كنتُ متردداً من دخول المعبد من عدمه ! .. خوفاً من جواز ذلك من عدمه شرعاً .. لكن بعد نقاشات بسيطة مع الوالدة .. أقنعتني بالدخول .. وبأن ذلك يزيد من معرفة ً بفضل الإسلام .. وأننا بنعمة من الله ! .. وبأننا أولاً وأخيراً .. لم ولن نرضى بما يفعلون ! ..

كان يلزمنا لدخول المعبد .. أن نصعد 270 درجة ! .. " هاه ؟! .. تجزمون ترقون فوق ؟! .. والا مافيكم حيل ؟! " .. قالوا " قدّام ! " ، صعدنا إلى الأعلى بعد جهد جهيد .. صعدت أنا وأخي المراهق الصغير .. وتجولنا .. ورحنا وجينا ! .. ويوم بغينا نطلع لقينا بقيّت الشعب توّهم ياصلون ! .. لا ويلهثون من التعب بعد ! ؛ الدرج كان متعب فعلاً ! .. وكان طويل ! .. أصلاً وانت تمشي فيه بتشوف الناس كل شوي موقفه تريّح ! .. وفيه ناس ماشاء الله عليهم . يطامرون مطامر ! .. لا .. وبعضهم يتسابقون بعد !

صعدنا إلى أعلى .. والحمدلله أن أمي إستطاعت إقناعي بالدخول ! ، فعلاً ياإخوان .. والله ثم والله ثم والله إن حنـّـا بنعمه ! .. تشوف أشكالهم .. إعتقاداتهم ! .. حركاتهم ! .. تحمد ربك على العافية ! .. اللهم لك الحمد على نعمة الإسلام ! .. هذا اللي أقدر أقوله !

أخذنا جولة بسيطة .. وكانت كاميرا الفيديو بيدي .. أما الكاميرا الفوتوغرافيه فكانت بيد أخوي المراهق الكبير اللي يوم خلّص الـ 270 درجه .. تعب وماصار فيه حيل يدخل .. قام ونزل ! .. طيّب وشوله ترقى أصلاً ؟!



صورة خارجية للمعبد !


صورة المدخل المؤدي لدرج الصعود !


واحد من شبابهم .. يالله يالله يرقى ! ، هذا وأنت توّك شاب ! ، وش خلّيت لشيبانكم ؟!


صورة علوية .. من منتصف الدرج تقريباً !


الدرج كان مرّقم ! ، وهذانا قرّبنا نوصل للنهاية !


المعبد كان يقع في منطقة مثل الكهف تقريباً .. اجمل مافيها .. الفتحه العلوية الموجوده في سقف المعبد !


الحمدلله الذي عافنا مما ابتلاهم ، وفضلنا على كثير من خلقه تفضيلاً !

كانت جولتنا في المعبد .. لاتزيد عن الـ نصف ساعة .. أغلبها ذهب في الصعود والنزول ! ، نزلنا الدرج .. وبالطبع .. نزول الدرج ليس كـ صعوده ! .. طامر إلى ماتاصل .. بس أنتبه لاتصدم بأحد وتجيب العيد أنت وإياه .

وجدنا "مختار" بإنتظارنا .. نقلنا إلى [ الشلالات ] .. وصلنا إليها قرابة العاشرة ، طول الطريق و"مختار" يقول .. "شلالات .. ايز فيري فيري نايس ! ، يو ويل إنجووووي ! " .. قلنا خلنا نشوف هاللي تمدحه لنا ! .. دخلنا الشلالات .. وبلا رسوم دخول طبعاً ، المكان روووعة ! .. في أنواع وأشكال الشلالات .. والمنطقة واسعة ، ومازاد الأمر حلاوة .. برودة المياه .. يااااه ، ممتعة فعلاً .. المياه بااارده .. الوالده كانت تقول " لاتبللون ملابسكم .. ثم تمرضون إذا رقينا لجنتنق البارده ! " .. مع ذلك ماقدرنا نقاوم ! .. من دون شعور تلقى نفسك "غاطس" سيقانك .. وواقف تحت واحد من الشلالات ! .. العالم تسبح .. وفيه ناس رحنا وجينا وهم متسدحين تحت الشلالات .. بصراحة ، يكفي كلام ! .. الصور بتعبّر لكم أحسن مني !



لوحة الدخول ، أظنها بلغتهم الملاوية !


نهر صغير ممتد من إحدى الشلالات ! ، مدري إذا يسمونه نهر أو لا !


يالله يالله طلعت معي هالصورة من كثر الإزعاج ! .. " تركي تركي .. أنتبه .. أنتبه .. طاحت الكاميرا بالمويه طاحت ! "


ياااويل قلبي على واثق الخطوة اللي يمشي على يمين


+ فـلـسـفـة عـدسـة ! +


في تلك المنطقة .. لن تسمع صوتاً غير أصوات الشلالات القوي !


شلالات مزدوجه !


شلال مفرد !


ودي أروح الآن لماليزيا .. أدفّ ثاني واحد يسار .. وأرجع !


توأم !


+ فـلـسـفـة كـاميــرا ! +


هذولا الظاهر أنهم ساكنين هنا خلقه !

هالصغيّر ذا .. ودّه يطبّ صاروخ ، بس مالقى له محل يطب فيه !


إحدى الأشجار .. قصوها بساطور .. وكتبوا عليها بطباشير ! <-- ماودكم يشرح شيء


وحنا بطريقنا طالعين من الشلالات .. لقيت هالقردين ينكتـّون على بعض ، الظاهر إن اللي على يسار قال نكتة قوية .. ماقوى اللي على يمين يمسك نفسه .. تشوفونه مـتـمـّـغـط من الضحك !

خرجنا من الشلالات .. بعد أن مكثنا فيها قرابة الساعة أو أكثر ! .. وجدنا "مختار" بإنتظارنا ! .. مباشرة قلت له " والله صادق يوم تقول إنها فيري فيري نايس " .. وأفلقوني إذا فهم شيء !

إتجهنا بعدها لمنطقة قريبة .. عبارة عن بحيرة .. منظرها فعلاً فعلاً روعة ! .. سألت مختار عنها .. قال لي إنها تساعد في توليد الكهرباء .. وإن السباحه فيها خطر ! .. بصراحة عجزت أفهم كيف تولد الكهرباء ! .. بس مايهمّ .. قال لنا " تبون نوقـّـف ؟! " .. قلنا " مابدهاااش يامختار ! " ، طبعاً هذا بالإنجليزي .. بس أنا قاعد أترجم لكم ، وإياني وإيّاكم أحد يسأل وش معنى " مابدهااش " بالإنجليزي !



أثناء الطريق .. لقيت هالدعاية لـ منتجع افاموسا .. أنتم شوفوا بس الإغراء ، ماصار سينما ! .. مطعم ذا ! .. أجل شمّها ؟!


الخضرة .. والماء .. بس ماااش .. مافيه وجه حسن !


إحدى الجزر !





قبل مانركب السيارة .. لقيت هالسرير اللي ماكنت أشوفه إلا في أفلام الكرتون ! ، ربـّط لي مختار الحبل زين .. أخذت لي غفوة فيه ! ، بس بصراحة السرير هذا رووعة بجد .. خصوصاً اللي يحب يفكّر أو يسترخي في مكان هادئ ! ، قولوا ماشاء الله لاأطيح منه


بعدها إنتقلنا لمكان .. كلّه أنهار .. مدحه لنا "مختار" .. هالمكان هذا كلّـه ملاويين .. واضح أن العرب مايعرفون عنه شيء ! .. كان ذاك اليوم يوم أحد ! .. يعني إجازة ! .. بالتالي .. ابو ملاوي كلهم كاشتين فيه ! .. جلسنا فيه .. وغيرنا ملابسنا .. ولبسنا ملابس السباحه .. وسبحنا .. ! ، أول مره أسبح وسط نهر ! .. عمقه بسيط .. بس أنه يدّف بقووة ! .. يعني المويه تتحرك بسرعة .. لكنـّه ممتع ! .



في الطريق إلى الأنهار !


فـلـّـة حـجــاج !

الدبابات منتشرة عندهم بشكل كبير !

الوقت الآن يشير إلى الواحدة والنصف تقريباً ! .. إتجهنا لـ فوق السحب .. لمدينة جنتق الباردة ! ، استغرق الطريق قرابة النصف ساعة .. وصلنا بعدها إلى بوابة التلفريك الذي يصعد بك لـ جنتق !


الطريق المؤدي إلى جنتق !


من زاوية أخرى !


سـحـر الـطـبـيـعـة !


أدري إن الصورة داخله بالغلط .. بش خلونّا نغير شوي ، دايم طبيعة طبيعة


كما قلت قبل قليل .. أن ذلك اليوم كان يوم أحد .. يوم إجازة .. المكان مزدحم فعلاً .. خـيـّرنـا "مختار" .. بين أن نقصّ التذكرة العادية بـ 4 ريجنت .. وننتظر في طابور طوويل ! .. أو نقصّ تذكرة "اكسبريس" بـ 6 ريجنت .. وندخل مباشرة ! ، إخترت الثانية بكل تأكيد ! .. أخذ مني الفلوس وقال إنتظر .. راح وقصّها لي ورجع ! .. لولا الله ثم مختار .. كان قعدنا ساعة ننتظر ! .. مباشرة إتجهنا للتلفريك .. وإستقلينا إحدى العربات !



الكل بإنتظار دوره .. لركوب العربة !


أرووح وطي أنا على رجل على رجل !


العربة اللي على يمين .. كان فيها واحد صيني دبّ .. طاحت فيهم عاد ! - أستغفر الله -


كلما أرتفعنا .. كلما زات البرودة .. وأقتربت السحب !


الطريق ، طويل ! .. موب مثل تلفريكاتنا .. عشر دقايق وأنت واصل !


لن تتمكن من رؤية محطة الوصول بالكامل .. فالضباب بينكما !


أقتربنا من محطة الوصول !


قبل الوصل بقليل .. أدرنا رؤوسنا للخلف .. فإذا بهذا المنظر !

وصلنا إلى الأعلى ! .. الأجواء بااارده ! .. مباشرة .. ذهبنا لغرفة المصلين .. توضأنا .. وصلينا الظهر والعصر جمعاً وقصراً .. بعدها دفعنا حب الفضول لفتح نوافذ الغرفة .. فتحناها بالكاد ! .. فالهواء قوي ! ، ربطت الكاميرا بيدي .. واخرجت يدي لألتقط لكم بعض الصور !


خويتـنـّا - العربة - للحين تدور وماأحد عطاها وجه !


لأول مرة .. أحس بأني "فوووووق .. فوق هام السحب ! "


منظر آخر .. من نافذة المصلى !


يااااه ،

بعدها انتقلنا للخارج .. هناك نوعان من الملاهي .. ملاهي داخلية .. وأخرى خارجية ! ، إنتقلنا لمدينة الملاهي الخارجية .. قصصنا التذاكر .. عشرون ريجنت للشخص الواحد تقريباً .. والصغير بـ 15 ريجنت تقريباً .. هذا للملاهي الخارجية فقط ! .. لاأذكر تذكرتهما سوياً !

دخلنا الملاهي .. مدخلها كـ مدخل الصن وي لاقون ! .. عبارة عن مطلّ ترى من خلاله أغلب الألعاب .. هذا إذا لم يحل بينك وبينها سحابة صيف !


قطار الموت ! - مالقوا لها اسم غير هذا ؟! -


منظر عام !


فاتتني هاللعبة بـ جد ! ، ماانتبهت لها لأنها كانت بعيده شوي + البرد أقلقنا شوي !


صورة لإحدى الألعاب !


هنا يقف السحاب حائلاً بينك وبين تلك اللعبة !


وهنا أيضاً !


معجبتني الصورة ذي !


اللعبة هذي تحتاج واحد "جزوم" .. ومايهوّن إذا وصل دوره ! .. مشكلتها الطابور الطويل اللي لازم تنتظم فيه ! .. زحمة عليها ، طريقتها أنها ترفعك فوووق .. بعدها وبسرعة قوية تنزلك تحت ! .. وعلى هالمنوال . .
بيني وبينكم .. سبق لي ركبتها في الكويت .. لكن الفرق أنه هنا يوم صرنا فوق .. صار كل شيء أبيض × أبيض .. عينك ماتشوف الإ السحاب .. حولك وحواليك ! ، قمة المتعة


الكل بإنتظار دوره في هذي اللعبة !


لحظات الصعود . . !


ديكور حلو !


وش رأيكم بالصورة ؟!


يالله يالله ألتقطت هالصورة ، البطارية كانت فاضية ومنهلكة بقوّة .. ماألومها والله !
عاد اللعبة هذي لها قصة معي ! ، جلست انتظر دوري فيها .. وأناظر في هالعالم اللي يلعبون فيها .. ماعندهم حركات ! .. مافيه أكشن ! .. بس ضاغطين على البنزين ويلـّـف لك بالدركسون ! ، عاد يوم جاء دوري .. خذ ياتنطيل ! .. بعضهم طارت عيونه ! .. وش يسوي ذا ! .. كنت محافظ على المركز الاول بكل الثلاث دورات .. إلى قبل خط النهاية بشوي ! .. واحد من الشباب الصينين مدري من وين جته هالقوة وصار يزاحمني .. الظاهر شرب بايسن ، الشاهد من الموضوع إني تهورت وصرت ألـّـف عليه كل ماشفته بجنبي .. يظطر هو يربط فرامل .. وأسبقه أنا .. وعلى هالحال إلى ماعرف اللعبة .. وسبقني قبل خط النهاية بشوي .. عاد هذا اللي الله كاتبه لي .. بلاي ستيشن خسران .. سباق سيارات خسران !


بعدها أكملنا بعض الألعاب البسيطة .. إلى ماقرصنا البرد .. بالذات وإني حسّاس جداً من البرد ! .. اظطررنا بعد المغرب إننا نرجع .. قصّينا تذاكر العودة بـ 4 ريجنت .. بعدها رجعنا .. وكانت [ حيولنا ] .. [ مـنـهـدّة ] .. من تعب الرحلة .. مثل ما [ حيلي ] الآن [ مـنـهـدّ ] من الكتابة ! ..

ماعندي أية إضافة . .

أتمنى أن هالحلقة حازت على رضاكم وإستحسانكم . .

اتمنى إن عوضت ولو شيء بسيط عن الغياب اللي خصل الاسبوع الماضي . .

دعواتكم عاد ،