 |
 |
 |
||
|
|
|
||
 |
|
 |
|
|||||||
| بوابة السفر إلى ايطاليا Italy في هذا المنتدى يتم تزويد المستخدم بالتقارير المصورة الخاصة بإيطاليا. |
| Tags: رحلة الى ايطاليا |
 |
|
|
أدوات الموضوع | انواع عرض الموضوع |
|
|
25-07-2005, 03:35 PM
|
#1 (permalink) |
|
مسافر متميز
تاريخ التسجيل: May 2005
رقم العضوية :22429
المشاركات: 185
|
رحلتي إلى بلاد الطليان((بالصور))
بسم الله الرحمن الرحيم اوآ سوري جدآ على التأخير بس خلوها على الله كل ما اقول خلصت مشكله طلعتلي جديده ... ايه ماعلينا  طبعآ انا راح احتسي بالعاميه لأن اللغه العربيه يبيلها واحد معه لياقه  <------ مثل هذا عمومآ راح اركز اكثر شيء على الصور واتكلم عن المواقع الي زرتها بشكل بسيط دون التعرض لكلام تاريخي عن المواقع واتوقع الكل عارف تاريخ الاثار المشهوره في إيطاليا وتكررت علينا في مواضيع سابقه ماقصرو الاخوان ... المهم إن شاء الله ما انسى شيء ... ولايتردد احد يسألني اي سؤال ((فري))  برنامجي كالتالي 4 ايام في روما 2 آمالفي 1 في بيزا 2 في فنيسيا 4 على ضفاف بحيرة ليجو دي جاردا 3 في ميلانو وكومو ــــــــــــــــــــــــــــــــــــــ روما العاصمة الايطاليه روما كانت المحطة الاولى السكن كان في فندق الشيراتون 4 نجوم فندق ممتاز صحيح انه بعيد عن وسط المدينه بس عندهم باصات تبع الفندق تنطلق من الفندق كل ساعه من الساعه 9 صباحآ إلى مكان قريب جدآ جدآ من ساحة فنيسيا ومن نفس هذا المكان تنطلق باصات الفندق لتقل النزلاء للفندق كل ساعه لين 11 بالليل ((حركه النزلاء))  عمومآ التكاسي غاليه في إيطاليا في باريس ارخص .. العداد يبداء ب 2 يورو وسبعين سنت وبالليل يختلف تسعيرة ثانيه يبداء بسته يورو والعداد يمشي بالوقت وليس بالمسافه . لأن والاشاره حمرا يزيد ذاك اليوم عند الاشارة زحمه ارتفع حوالي 2 يورو وزياده المهم اتحقرص على مكاني ودي ادوس على البنزين ونمشي ماله داعي يطلع الحساب مبلغ وقدره خخخخخ ... نسيت بعض سواويق التكاسي ياخذ على العفش وبعضهم ماياخذ يعني حوالي يوروين او يورو ونص المهم ماعلينا اول يوم في روما زرنا حديقة فيلا بورقيزي ((بعديه شوي عن وسط المدينه)) مبنى فنيسيا وزرنا الكولوسيم والفوي إمبريالي او روما القديمه كلها جنب بعض قريبه جدآ من بعض فوق ماتتصور وبعدها رحنا لشارع ديل كورسو وشارع فينيتو ...  الكولوسيم من بعيد وفي اسفل الصورة جزء من روما القديمه طبعآ سعر الدخول للمبنى 15 يورو  مبنى فنيسيا والدخول له مجانآ  صورة ل ساحه فنيسيا من مبنى فنيسيا  الفوري امبريالي او روما القديمه وتظهر إحدى الاعمده الرومانيه انا مادخلت ولكن اكتفيت بالمشاهده من الخارج والتقاط بعض الصور يعني مدري كم سعر التذكره لني كنت مزنوق بالوقت وطنشناها مادخلنا  صورة مع المصارعين الرومانيين ... ماكان لي نيه اصور معه بس ناداني وقال ل خويي صور ويوم خلصت قال الحساب ... شكل ماعليهم سوق ومجحودين المهم حاسبته ولعب علي بعد قال ب 5 يورو غشيم اول مرة اروح لأوربا .. ماعلينا اهم شيء ننبسط ((واحد يرقع ل عمره عشان انضحك عليه))  الكولوسيم من قريب  هذي صورة ل قوس بين الكولوسيم وبين روما القديمه لا تسألوني وش يرمز له او شيد لأجل ايش مدري جاز لي وصورته ((اي كلام التقرير شكلي بتصفق))  الكولوسيم من الداخل  صورة جانبيه للكولوسيم احسن صورة صورتها للكولوسيم  اخر شيء زرناه من اليوم الاول كان حديقة فيلا بورقيزي حديقة كبيرة وفيها منظاد كبير ركبناه في احسن وقت وقت الغروب حوالي الساعه ثمان ونص سعر تذكرة المنظاد 15 يورو  صورة اخرى امام نافورة في الحديقه  صورة للبحيرة التي توجد في وسط الحديقه بحيرة صغيرة وتوجد بها قوارب واسماك .. عادية جدآ  صورة ل مبنى فنيسيا بالليل توني راجع من شارع ديل كورسو قبل الرجوع للفندق على طاري دل كورسو فيه محل يبيع بيتزا وايس كريم ((جيلاتو)) بالايطالي رهيب جدآ جدآ وعنده ايضآ مأكولات غيرها بس هذ الي جربته صراحه عجيب خصوصآ الجيلاتو خوذو منه جيلاتو كافييه او توت بعدها ادعولي المحل هذا نسيت اسمه بس على اليمين وانت رايح للأدراج الاسبانيه يعني قبلها حوالي 500 متر وهو على زاويه |
|
|
|
25-07-2005, 04:57 PM
|
#2 (permalink) |
|
مسافر متميز
تاريخ التسجيل: May 2005
رقم العضوية :22429
المشاركات: 185
|
اليوم الثاني في روما ...  صورة من ساحت الفاتيكان طبعآ شراء خريطه للمكان الي انت موجود فيه امر مهم جدآ عشان تعرف وين تروح بدون ماتقعد تسأل كل شوي  صورة من بعيد للفاتيكان وانا متوجه ل قلعة سانت انجلو  صورة لأحد الجسور على نهر التيفر مأخوذه من إحدى الشرف في قلعة سانت انجلو ((بدت ترجع اللياقه))  صورة من بعيد ل قلعة سانت انجلو .. من على الجسر الي تو صورته سعر الدخول للقلعه اتوقع إذا ماخانتني الذاكرة انه 6 يورو او 10 المهم مو اكثر من 10 يورو ((في إطار الصورة على اليمين خال يبيع ل حرمه شنطه والظاهر انها تكاسره ولا اعجبة السعر .. في إيطاليا يصلح المكاسر والمفاصله في بعض الاماكن والمحلات))بعدها توجهت انا وخويي ل ساحة نافونا  صورة إحدى النوافير الموجوده في الساحه  صورة ل نافورة تريفي اكثر مكان مزحوم في روما كلها زحمة لا تطاق يالله صورة بعدها دزيت إلى الادراج الاسبانيه طبعآ كل المواقع السياحيه في روما قريبة من بعض ابعد شيء حديقة فيلا بورقيزي من الامكان الي زرت اما الباقي دقيتها كعابي بين بعضها واستمتع بالمشيء  صورة اخرى للادراج الاسبانيه وفي اسفل الصورة تظهر نافورة ديللا باركاتشا  صورة ل نافورة ديللا باركاتشا من قريب اليوم الثاني في روما انتهى اليوم الثالث في روما رحت ل قرية تيفولي الجميله والهادئه والتي تقع على قمة جبل قريبه من روما حوالي ساعه ما بين قطار وباص لين توصل انا اخذت اندر جراوند لاين Bونزلت في اخر محطه ربيبليا واخذت باص يودي ل تيفولي من امام مواقف الباصات الي تجي في وجهك اول ماتطلع من محطه ربيبليا  صورة من اعلى تيفولي  صورة قرية تيفولي المتربعه على قمة جبل ((حركه اللغه العربيه)) طبعآ هي قريه صغيرة مافيها إلا حديقة تيفولي موقعها هومايميزها قرية هادئة جميله حقت استرخاء رحنا لها من نفس اليوم ورجعنا ولا امدانا نروح للحديقه لأن باقي حوالي نص ساعه وتسكر لأنا رحنا متأخرين ل تيفولي راحت علينا نومه بالفندق وطلعنا متأخرين عمومآ هذا كل شيء عن روما ... والي عنده اي سؤال عن روما يسأل لأني عارف اني ماتكلمت كثير فقط اهتمامي كان اكثر بالصور ... على فكرة روما ماحبيتها ابد ابد وكانت اسوء مكان رحت له في إيطاليا في رحلتي يومين كافيه على زيارة اهم المعالم في روما .. فيها غلاء اكثر من غيرها المويه تشتريها من كوشك قدام الكولوسيم ب 2 يورو واحينآ ب 2 يورو ونص لكن ابعد عن الاماكن السياحيه وترخص الاسعار .. وفي تيفولي ارخص وارخص المويه والمطاعم ..ايضآ سبب سوء روما من وجهت نظري هي زحمتها بشكل كبير ونفسيات الناس الي فيها سيئه مش زي الي شفناهم في تيفولي وباقي الاماكن الاخرى في زيارتنا ل إيطاليا .. اليوم الرابع تحركنا من روما إلى ساليرنو للذهاب إلي شاطىء آمالفي |
|
|
|
|
25-07-2005, 08:19 PM
|
#5 (permalink) |
|
مسافر متميز
تاريخ التسجيل: May 2005
رقم العضوية :22429
المشاركات: 185
|
آمالفي اليوم الرابع من روما تحركنا في الصباح من محطة روما تيرمني إلى مدينة ساليرنو ومن ساليرنو تروح بالباص او بالتاكسي ل قرية آمالفي قصينا تذاكرنا على قطارات ترين ايتاليا درجه ثانيه حوالي الواحد 20 يورو إذا ماخانتني الذاكرة بالحدود هذي على العموم مدة الرحلة ساعتين ونصف بعد الوصول إلى مدينة ساليرنو سألنا وشلون نروح ل آمالفي قال لنا واحد فيه باصات تودي ل آمالفي ب 2.80 يورو رخيص جدآ ... بس خويي الله يهديه كان مستعجل وقال خل ناخذ تاكسي رحت للتكسي وقلت بكم تودينا قال ب80 يورو((طبعآ بدون عداد لو بيحسب بالعداد كان خذ منا مليون يورو قال بدون عداد)) قلت غالي قالي الطريق كله لفات وطلوع ونزول وضيق جدآ المهم كاسرته لين 70 يورو ورحنا معه وطلع كلامه كله صحيح الطريق جدآ ضيق وطلوع ونزول والبلده بعيده اخذت الرحلة بالتاكسي حوالي 45 دقيقه اما مع الباص تاخذ ساعه وشوي وب 2.80 يورو وهذا متأكد منه ((طبعآ رجعنا مع الباص بعد الانتهاء من آمالفي)) المهم ركبنا مع التاكسي اول ما ركبت والله يا سيارته تفوح منها ريحت الكحول وحتى وهو يكلمني من فمه انواع روائح الكحول ... الرجال فاقد الظاهر ... قلت الله يستر المهم اثناء روحتنا ل آمالفي قمة في الاسمتاع والروعه بماتشاهده في الطريق الضيق بين الجبال والشاطىء على يسارك كل شوي طالع وكل شوي نازل روعه كان المنظر مابين جبل اخضر وشاطىء جميل ((من جد فلللله ينبهر الواحد إذا شاف المنظرهذا)) المهم وصلنا للفندق اخيرآ ... كان فندقنا 3 نجوم وكان في مستوى اعلى مع فندقين اخرين من باقي الفنادق في آمالفي لذا كان له إطلاله اجمل من باقي الفنادق على البحر طبعآ فندقنا تمشى 10 دقايق نزولآ لين توصل ل قريه آمالفي  صورة للبحر من شرفة الفندق ... روعه تناول الفطور في الصباح الباكر من هذا المكان .. اليومين الي جلسنا فيها ب آمالفي كنا نفطر هنا مع بعض السياح والاغلبيه يفطرون تحت جوا الفندق طبعآ اليوم الاول يوم وصلنا دخلنا الفندق وصلينا وتروشنا وبدلنا ملابسنا ونزلنا لوسط القريه مافيها شيء كثير يذكر فقد للاسترخاء والاستمتاع بالطبيعه الجميله والجلوس في المقاهي المنتشره في وسط القريه والاستمتاع بالعروض الموسيقيه في المساء او الدخول للمحلات التي تبيع التحف وغيرها او الاستمتاع بالتمشي على شاطىء البحر  صورة التقطتها وانا نازل لقرية آمالفي والواضحه على يسار الصورة وتشوفون الشجر والشاطىء الرملي هذاك شاطىء القريه  صورة من وسط القريه  صورة من وسط قرية آمالفي ((شوفو الجسور اعلى الصورة الي تربط بين البنايات من اليمين إلى اليسار جميله))  صورة للعروض الموسيقيه ... في الليل صراحه كانت حلوه وخاثرة كنت توني متعشي بيتزا ولازانيا من الي هيا بعدها جلست على احدى طاولات المقاهي وخذت لي شاهي مع نعناع وتكيت استمتع بالمعزوفات الجميله خصوصآ وان الطقس جدآ رائع في الليل ولكن النهار الشمس قويه شوي هذا بخصوص اليوم الاول .. اليوم الثاني بعد ماقمنا وصحصحنا وافطرنا في الفندق في ذيك الشرفه الجميله وشربنا الكاباتشينو وبعدها ليصت المعده بعصير ليمون بعد مادبيت في الفطور نزلنا ل البلده وقلنا بنروح ل جزيرة كابري قالو الوقت متأخر الحين الساعه 9 الصباح كل الرحلات من 8 تقدرون تروحون ل بوسيتانو ومن بوسيتناو تروحون ل كابري ... قلنا وش رايك نردها في بوسيتانو وبس خصوصآ ان لازم نرجع بدري شوي عشان نروح ل قرية رافيللو .. توجهنا بالباخرة ل قرية بوسيتانو ب 5 يورو الشخص الواحد ذهاب بس والعودة ب 5 يورو المهم تقدرون تروحون ل بوسيتانو هذي بالباخرة او بالسيارة طبعآ رحنا بالباخرة ونزلنا في بوسيتانو هذي صورة من الباخرة اثناء المغادرة من آمالفي والاتجاة إلى بوسيتانو  صورة ل قرية بوسيتانو جزء من مباني القريه والذي يقع في موقع مرتفع طبعآ قرية بوسيتانو اكبر من آمالفي واكثر حركه واكثر محلات واكثر تواجد للسياح من آمالفي ولكن شاطىء آمالفي اجمل وموقع آمالفي افضل خصوصآ إنها مركز للانطلاق لباقي الامكان مثل رافيللو وبوسيتانو وكابري وغيرها ولكن بوسيتانو اجمل.. السكن في آمالفي افضل وكل يوم رح لمكان وارجع ل آمالفي إضافه إلى ان آمالفي اقرب ل ساليرنو من بوسيتانو .. طبعآ الساحل هذا ساحل آمالفي تقع عليه العديد من القرى وتتميز القرى التي توجد على سلسلة الجبال المقابله للبحر بأشجار الليمون يعني الليمون علاة القرى هناك هذا ماتشتهر به .. طبعآ مو اي ليمون حجمه كبير مرة كبر حبة الشمام او الجرو او الخربز  صورة ل شاطىء بوسيتانو   صورة لجزء اخر من القرية الكبيرة والجميله  صورة ايضآ من موقع اخر لهذه القريه الاخاذه ((حركه الاخاذه))  صوره حلوه للشاطىء وشوفو الجبال تسلسلها جميل هذا هو الليمون الي قلت لكم عنه   صورة اخرى للشاطىء من بعيد  صورة ل قرية بوسيتانو ونحن نغادرها راجعين ل آمالفي الان وصلنا ل رافيللو قرية قريبة جدآ من آمالفي 20 مع التاكسي و 40 دقيقه مع الباص ولكن موقعها عجيب تقع بين الجبال وجزء منها يطل على البحر والاجزء الاكبر بين الجبال ... قرية رائعه جميله جدآ للاسترخاء فقط مافيها شيء تسويه إلا انك تطلع فوق وتتعشى وتشرب كاباتشينو او شاهي وتمتع بالمناظر الطبيعيه من حولك والاجمل من كذا ياناس بالليل روعه لاتوصف بعد ان يحل الظلام تشوف اضواء البيوت الخافته على اجزاء متفرقه من الجبال فوق وتحت ويمين ويسار وكأنك تشوف ((الثريا)) روعه ياناس هذا احسن شيء في رافيللو  صورة من رافيللو للبحر  صوله لي وانا جالس في وسط الساحه الي بالقريه ..  صورة اخرى من رافيللو للبيوت التي تتناثر على الجبال المحيطه بالقريه  صورة روعه من رافيللو وقت الغروب شيء جميل شوفو آمالفي تحت اضواء القريه هذا مايخص هذا الشاطىء الجميل قرية آمالفي وبوسيتانو ورافيللو شاطىء للاسترخاء والتمتع بالجو اللطيف جدآ والاستمتاع بالطبيعه الساحره للابصار مافيه شيء كثير تستكشفه صراحه عجبني جدآ جدآ هذا الشاطىء .... بكمل بعدين الباقي بيزا وفنيسيا وليجو دي جاردا وميلانو وكومو ((تعبت قسم بالله)) |
|
|
|
|
01-08-2005, 08:30 PM
|
#6 (permalink) | ||||
|
مسافرجديد
تاريخ التسجيل: Mar 2005
الدولة: Riyadh
رقم العضوية :19672
المشاركات: 59
|
الله الله عليك ياأسم على مسمى .... اقتباس:
اقتباس:
اقتباس:
اقتباس:
لي إن شاء الله رجعة لموضوعك وللصورة اللي سحرتني واللي ضيقت صدري وخلتني مقدر اكمل !!!! |
||||
|
|
|
|
26-07-2005, 04:58 PM
|
#11 (permalink) |
|
مسافر متميز
تاريخ التسجيل: May 2005
رقم العضوية :22429
المشاركات: 185
|
جراتسي للجميع يعطيكم الف عافيه ــــــــــــــــــــــــــــــــــــــــــــــــــ ـــ بيزا اليوم الاخير في آمالفي تحركنا بالباص من آمالفي ل مدينة ساليرنو ب 2.80 يورو للشخص الواحد بعد الوصول ... طبعآ قاصين تذاكرنا من مكتب سفريات في آمالفي مقابل تقريبآ الواحد 45 يورو المسافه بعيده وقاصين التذاكر من مكتب سفريات اكيد بتكون غاليه شوي لو قصيناها من المحطه نفسها ارخص .. عمومآ كان المفروض تكون الرحله مدتها 6 ساعات ولكن القطارا سلك طريق اخر بسبب انهم يقولون حصلو (قنبله) في سكة الحديد بين نابولي وبين روما ومحطة روما ترمني لاتستقبل القطارات الان وراح القطار من طريق اخر ابعد خذنا حوالي سبع ساعات ونصف .. توقفنا في فلورنس وغيرنا القطار إلى بيزا المهم بعد الوصول إلى بيزا على طول كنا جايعين وتعشينا في ماكدونالز الي في المحطه وبعدها قصينا تذاكر لبكرة ل فنيسيا بعد ماخلصنا من كل هذا رحنا للفندق على رجلينا قريب جدآ ولا 200 متر من المحطه عمومآ بيزا بلدة صغيرة وهادئة ورخيصه ارخص مكان رحنا له في إيطاليا كلها .. دخلنا الفندق وريحنا شوي وبعدها رحنا نتمشى في المدينه الصغيره وخذنا لنا جيلاتو على الطريق ((صار من الاساسيات)) ورحنا للنهر الي فيها وبعدها رجعنا للفندق ونمنا وبعد ماصحينا على طول افطرنا ورحنا لل بيازا دي دومو يعني الساحه حقة البرج المائل والكنيسه الي عنده والمتحف الصغير والمقبرة ..طبعآ رحنا على رجولنا لأن البدلة صغيرة والساحه كانت قريبة منا  هذي صورة للكنيسة الي في الساحه ويظهر جزء من البرج ... وواحد حاط عليه اكس من مشجعين الميلان وانا مشجع للانتر حتى النخاع  صوره اخذتها من اعلى البرج لمدينة بيزا ويظهر ملعب نادي بيزا  صورة ل برج بيزا المائل .. وسعر التذكرة للدخول للبرج 15 يورو ... من جد تحس بميلان البرج وانت تصعد له وفي احد الادوار قبل الدور العلوي تحس وانت تدور على محيط البرج بالميلان فعلآ طبعآ انا مصور صور كثيرة للساحه والمتحف والمقبرة وللنهر وساحه صغيرة في وسط المدينه ولكن تعرفون عدد الصور الي صورتها كثير جدآ 360 صورة تقريبآ لذلك اخترت افضل الصور والجديده ونزلتاه يعني لو تشوفون موضوع فؤاد الي مثبت وتشوفون صور بيزا تقريبآ زي الي صورة بالضبط يعني ماحبيت اكرر ..طبعآ مدينة بيزا هادئة جدآ ورخيصة ايضآ ارخص مكان رحنا له في إيطاليا ومافيها شيء يذكر غير البرج والساحه الي عنده فقط نهر صغير وبعض الاسواق الصغيرة طبعآ مدينة بيزا الطبيعه الي تحيط فيها جميله وكلها خضرة واشجار وجبال شوفو الصورة الي صورتها من فوق البرج وتعرفون طبعآ سكان القريه هذي نفسياتهم زي العسل افضل من سكان روما وآمالفي بالتعامل المهم بعد ماخلصنا زيارة الساحه رجعنا للفندق وسوينا تشك اوت وعلى طول لمحطة القطارات للذهاب ل فنيسيا ... وبكذا انتهت زيارتنا القصيرة ل مدينة البرج المائل بيزا ... |
|
|
|
|
26-07-2005, 09:09 PM
|
#12 (permalink) |
|
مسافر متميز
تاريخ التسجيل: May 2005
رقم العضوية :22429
المشاركات: 185
|
فنيسيا فنيسيا او فينيس كما يقولها الإيطاليين مدينة الاحلام والرومانسيه المدينة العائمه الحالمه المدينة التي طالما سحرة العقول الابصار نعم إنها فنيسيا يالها من مدينه فعلآ هي التي انبهر بها شعراء اوربا وأدبائهم وكتبوا أفضل مالديهم فيها أسألو شكسبير عنها او بروست ... حقآ إنها فريده من نوعها وعجيبه وداعآ لزحمة السيارات وادخنتها الخانقه اهلآ بالجندول الرحلة استغرقة حوالي 3 ساعات من بيزا إلى فلورنس او فيرنزي ومنها إلى فنيسيا طبعآ فنيسيا لها محطتين الي يبغى يروح ل فنيسيا المائيه عليه النزول في المحطة الثانيه واسمها سنتر لوشيا اول ماوصلت بالسلامه طلعت مع المحطه وعلى طول اول ماشفت القوارب والقناة المائيه وقفت دقيقه منبهر ما اتكلم من روعه وغرابة ماشاهدت كان اول منظر اشوفه شيء ... بعد كذا رحت وشريت خريطه ل فنيسيا وعرفت وين موقع فندقنا وأستفسرت من العاملين في محطات السفن اي محطة انزل وقالو لي ركبت مع السفينه الي بتمر على هذي المحطه ((على فكرة السفن هذي زي الباصات في المدن خخخخخخ )) ركبنا انا وخويي ومعنا عفشنا اخذ علينا احنا الاثنين 5 يورو مع العفش المهم وصلنا لمحطتنا ونزلنا ... وسحبنا شناطنا لين الفندق ماكان بعيد مره وكان موقعه فعلآ رهيب مشي حوالي 10 دقايق لين توصل ل ساحة سان ماركو الشهيره ... والمشي عاد في فنيسيا غير إذا لبست ذاك الشورت والفنيله الكت والجزمه الرياضيه المريحه وتمشيت في ازقتها الضيقه وعبرت القنوات المائيه مرة طالع من جسر ومرة نازل من الثاني ... فعلآ تستمتع ...   هذي صوره ل اشهر جسر في فنيسيا جسر ريلاتو عنده الحركه نشطه جدآ وتلقى على الجسر زحمه والجسر نفسه كبير وعريض جدآ على الجسر محلات وجنبه الاسواق والمطاعم ..وهو يطل على القناة الكبرى او الجراند كنل  صورة ل جزء من فنيسيا و ل قصر الدوج او قصر الابداع او قصر الامتاع او قصر الجمال او قصر الفن او قصر العجائب سمه ماشئت ... قصر تجد داخل صالاته الفسيحه افضل فنون الرسم الجدران والاسقف كلها لوحات كبيرة جدآ جدآ وزخارف مزينه بالذهب .. ادخل وتمقل بالسقوف حقة القصر سعر الدخول 12 يورو  صورة للساحه الشهيره ساحة سان ماركو اخذتها وانا اعلى برج الكامبنيل او برج سان ماركو  صورة ل كنيسة سانتا ماريا وإلى اخر جزء من القناة المائيه الكبرى .. الجراند كنل  صورة ل إحدى جزر فنيسيا الساحره وتظهر إحدى الكنائس عليها ترميم  صورة لواجهة ساحة سان ماركو ويظهر العمودين الذي كان في السابق يتم الإعدام بينهما للمحكوم عليهم بالإعدام ((الله يكفينا الشر))   صورة من ساحة سان ماركو لبرج سان ماركو الكامبنيل وإلى بازلياكا سان ماركو او كنيسة سان ماركو سعر الصعود للبرج 15 يورو وسعر الدخول للكنيسه فيها قسم للسياح وبعض المعروضات من تحف 4 يورو حقيقه هذه الكنيسه تتميز بالرسومات الجميله في اسقفها  صورة لأحد اشهر الجسور في فنيسيا جسر التنهدات ...وهو الذي يربط مابين السجن على اليمين وقصر الدوق على اليسار  صورة للقناة الكبرى او الجراند كنل ..اخذتها وانا على جسر ريلاتو وكان زحمه مرة بالعافيه صورة  صورة لإحدى القنوات المائيه الجميله .. ويظهر على اليسار الجندول بكل فخامه واناقه اسعار الجناديل من ال50 يورو وفوق طبعآ الفخم شوي غالي اكيد المهم كاسرهم تراهم يلعبون على بعض السياح السبايك  إحدى القنوات المائيه .... هذي شوارعهم خخخخخخخ  صورة ل إحدى القنوات المائيه وقت الغروب منظر رائع  صورة ل قصر الدوج من الامام .. تشوفون الجسر الي على اليمين هذا دائمآ عنده واحد يعزف على الجيتار عزف روعه دائمآ مسنتر عنده هذا كل شيء عن المدينه الرومانسيه فنيسيا او مدينة التنكر ياحب اهلها للأزياء التنكريه والاقنعه هذي علامه فنيسيا او ماتشتهر به ايضآ تشتهر بصناعه الزجاج ... من اطرف ما مر علي هو ان العالم دائمآ يقولون ان فنيسيا غاليه وهي في اسعارها غاليه شوي بس مو كثير يعني لافرق يذكر بينها وبين المدن الايطاليه هذا الي جربته .. المهم اقولكم الغريبه ان ارخص مويه شريتها في رحلتي كلها في إيطاليا إلي سويسرا إلى باريس كانت في فنيسيا كان سعرها 65 سنت بس ولا عمري شرية مويه بأقل من يورو ونص ......ايضآ انتبهو اكثر من مرة اشتري من محل في إيطاليا ويرجع لي قطع معدنيه يورو وبعدين احصل بينها ليرة إيطاليه مرتين حصلت لي والثالثه رجعتها للمحل قلت يمكن الايطاليين نصابين خخخخ يوم رحت ل باريس تغدينا في مطعم فخم نوعآ ما المهم رجعت لي قطع يورو وبينها دولار استرالي خخخخخناديتها قلت يالحبيبه انا الحين في باريس مو في استراليا ووريتها الدولار الاسترالي خذته وعطتني يورو والظاهر انها كانت مدبرتها اشوفها تضحك بخبث مع واحد من الجراسين في فنيسيا ... ذاك اليوم دخلت لمطعم ولقيت ذاك النادل المغربي قلت بس جابك الله يابو الحبيب وش عندكم سباجيتي زينه مافيها خنزير قال سباجيتي فواكه البحر ... انا جربتها وإلا ماجربتها من بعدها ادمنت عليها إدمان ياناس لذيذه مرة ....صرت ادورها دواره في كل منيو وبكذا انتهينا من هذه المدينه الجميله .. الغنيه عن التعريف والتقديم اتمنى اني مانسيت شيء |
|
|
|
|
«
رحلة شبابية ،،،للبلاد الاوروبية(هولندا & بلجيكا & فرنسا & ايطاليا & سويسرا & المانيا)
|
بوتيشكا في روما :)
»
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض المتطور
|
|
|
الساعة الآن 11:02 AM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||