 |
 |
 |
||
|
|
|
||
 |
|
 |
|
|||||||
| دول أخــــرى تعنى هذه البوابة بتزويد المستخدمين بجميع المعلومات المتنوعة الخاصة بالسفر الى نيوزيلاند. |
 |
|
|
أدوات الموضوع | انواع عرض الموضوع |
|
|
100%
31-10-2009, 09:35 PM
|
#7 (permalink) | ||||||
|
مسافر متميز
تاريخ التسجيل: May 2008
رقم العضوية :186676
المشاركات: 379
|
اقتباس:
هلا .. الحمد لله . حياك اقتباس:
حياك الله أن شاء الله الجزء القادم يعجبك  اقتباس:
هلا أخوي .. والله الأشغال تخلي الواحد يتأخر لكن بحاول أني ما أتأخر حياك اقتباس:
هلا بالطير وضحتها بالتقرير .. أنهم ما عندهم طلاب فقالوا لي بندرسك بالساعات (لحالي) بـ 55 دولار بالساعة صعبه أدفع 55 دولار عشان ساعة!! حياك اقتباس:
الروعه مرورك يالغالي عافاك الله اقتباس:
هلا وسهلا بالحر الأحلى مرورك المتواصل ما يحتاج تتأس يالغالي .. عاذرك |
||||||
|
|
|
03-11-2009, 08:02 PM
|
#11 (permalink) |
|
مسافر متميز
تاريخ التسجيل: May 2008
رقم العضوية :186676
المشاركات: 379
|
حياك الله أخوي أوكلند وين هالغيبات يالغالي .. والله لك فقده لكن ما نملك لك ألا الدعاء .. جزاك الله خير وبالتوفيق .. |||||||||||||||||||||||||||||||||||||||| أعتذر كنت ناوي أكمل قبل أمس لكن أنا وجهازي كنّا تعبانين  غداً بإذن المولى .. أكرر اعتذاري  |
|
|
|
|
03-11-2009, 09:01 PM
|
#12 (permalink) | |
|
مسافر متميز
تاريخ التسجيل: Sep 2007
الدولة: نيوزلندا
رقم العضوية :154904
المشاركات: 510
|
اقتباس:
السلام عليكم حياك الله اخوي : المظلوم حقيقة مثل ما قلت سابقاً قد تاخذ الدنيا منا اكثر مما نعطي ولكن معزتكم دائما في القلب ودائم انتم في البال وجزاك الله الف خير يخوك وبانتظارك يالغالي واسال الله ان يعينك لانه بصراحة كتابت التقارير او التجارب تحتاج صبر وتركيز وانا اول من فشل في هذا الموضوع في انتظارك يالغالي |
|
|
|
|
|
04-11-2009, 04:32 PM
|
#14 (permalink) | ||
|
مسافر متميز
تاريخ التسجيل: May 2008
رقم العضوية :186676
المشاركات: 379
|
اقتباس:
أعانك الله على غربتك .. وكتب الله لك الخير في كل أمورك اقتباس:
هلا عبدالله تسعدني متابعتك |
||
|
|
|
|
04-11-2009, 07:06 PM
|
#15 (permalink) |
|
مسافر متميز
تاريخ التسجيل: May 2008
رقم العضوية :186676
المشاركات: 379
|
: : : بسم الله الرحمن الرحيم : : : (((...* الجزء الثالث *...))) بعد ما تأكد السفر وحجزت الطيران واستلمت ورقة القبول من المعهد بعد مشقة وتعب باقي شراء الأغراض والحاجات اللي راح أحتاجها بالسفر طبعاً واجهتني مشكلة بسيطة أنه كان عندنا صيف وبنيوزلندا شتاء .. فعشان كذا الملابس الشتوية صعب تحصلها بأي محل لكن وجدت ضالتي بالبطحاء  ... وتحديداً عمائر الراجحيكنت تقريباً كل ويك اند اروح للرياض عشان هالأغراض المهم شريت أغراضي ... وجهزت كل أموري فيه حاجات من رأيي أنها مهم تأخذها معك منها :- قاموس ويفضل يكون إلكتروني – دفاتر وأقلام – شنطة ظهر صغيره – مكينة حلاقه – دفتر ملاحظات صغير – تمر وقهوه (للي مايقدر يعيش بدونهن خصوصاً برمضان) – لابتوب - كاميرا- فلاش ميموري (إذا بغيت تأخذ صور أو تعطي أحد صور) – أذكار الصباح والمساء – مصحف أنا نسيت المصحف .. لكن كنت أستعين بهذا الموقع (جزاهم الله خير) http://www.quranflash.com/# ولا تنسى الجواز والتصريح والتذاكر وأوراقك المهمة وفيه شيء حتى الآن وأنا متضايق أني ما سويته وهو أني آخذ هدايا لهم فيها شيء يتعلّق بالسعودية واللي قهرني أكثر أني يوم مشيت من واناكا فيه طالب تايلندي كان يسكن معي بنفس السكن أغلب هداياه اللي عطاني إياها من تايلاند أحس أني شطحت برا الموضوع  المهم قبل السفر بيوم .. قمت الصبح كعادتي وأفطرت بعدين رحت أزبرق نفسي عند الحلاق  رحت وحلّقت بعدين مرّيت على الصيدلية وخذيت بعض الأغراض وأتذكر أني أخذت كمامات (عشان أنفلونزا الخنازير) ومعقّم لكن ما استخدمت إلا المعقّم ورجعت للبيت وجهّزت شناطي وأغراضي وهاذي صورة شنطتي ببداية الترتيب  لاحظوا التمر وفنيلة النصر وشماغ من رحت لين جيت وهو بالشنطة  الشيء المهم واللي راح أحتاجه بالرحلة حطيته بشنطة الظهر أو بشنطة اللابتوب لأنها هي اللي بتكون معي بالطيارة طبعاً آخر يوم لي لازم كيك وحركات .. هاذي كيكتي  ما تذكرت أصور ألا بالنص والعائلة كانت مجتمعه هم وبزارينهم أنتهى اليوم على خير وجاء يوم السفر ... قمت من النوم >>> لا يا شيخ  أشوف ناقصني شيء منا والا منا ... لكن الحمد لله كل شيء كان تمام الآن خلاااااااااص أنا جاهز للسفر تغدّيت مع الأهل آخر غداء عليه القيمة وجلسنا نسولف شوي .. ومافيه نصيحة بالعالم ما سمعتها بذيك الجلسة حتى أني بغيت أهوّن من كثرها >>> بعد كل هالتعب وتهوّن اللي يقول أنتبه لا ينسرق جوازك .. واللي يقول أهم شيء محفظتك لا تضيع .. والبعض الآخر (وهو اللي خلاني أشتري الكمامات  ) يقول يا ويلك لو مالبست الكماماتوكتبت لهم أرقام ومعلومات المعهد والعائلة ... ورقم متوهق ولكن!! (بس كتبته لهم خطأ من اللخبطة اللي كنت فيها )المهم رحت وكشخت وجلست أنتظر .. كانت رحلتي الساعه 7:55 دقيقة بعد صلاة العصر .. جاء الوالد يقول يالله يا حمودي مشينا للمطار  .... ما أقدر أصف مشاعري ألا بالفصحى .. فاعذروني .... || بدأ قلبي بالخفقان .. فقد كانت أول رحلة أقضيها خارج السعودية .. وأول رحلة بدون الأهل أعين أهلي تتّجه نحوي .. بنظرات حزينة ودّعت والدتي .. أخواتي وأبنائهن .. أخواني ودّعتهم والعبره تخنقني .. ولكن لازلت أحاول تلطيف الجو .. بلا فائدة خرجت .. ولكن أتت القشة التي قصمت ظهر البعير أبنت أختي تلحقني وتقول : حمودي وين تروح ؟؟ بهذه اللحظة خنقتني العبره حتى بدأت عيناي تغرق بدموعها (لما لها من مكانة خاصه لدي) وقلت لها : بروح لـ الدمام ويمكن ما أجي بدري . قبّلتها وخرجت .. || خرجت مع الوالد للمطار .. والوالد فيه من طبعي كثير لأنه كان يحاول يضحّكني .. لكني أعلم مافي قلبه .. المهم راح الطريق مابين سوالف ونصائح >>> ما خلصت النصايح صورة من الطريق  وصلنا المطار .. نزلت أنا وشناطي والوالد راح يوقف السيارة طبعاً الوالد بس هو اللي راح معي للمطار (لأن الباقين بيسوون فلم هندي بالمطار لو راحوا )خذيت عربية ودخلت للمطار .. وأنا خايف من وزن الشنط اللي معي لأنها كانت ثقيييييله وصل الوالد .. و رحنا لكونتر الخطوط السنغافورية ومن سوء الحظ انكسرت أحد كفرات الشنطة الكبيرة (الشنطه هاذي لها سااااااالفه بالتكسير بتشوفونها بآخر التقرير كيف بتصير .. وكلّه بسبب أني دورت على الرخيص  )حطيت الشنطة الكبيرة والصغيرة ع الميزان (المسموح كان مكتوب بالتذكرة 20 كيلو) طلع وزن الشنط 32 كيلو .. قلت يوووووه من يبي يفكها مره ثانية وقدام خلق الله >>> يالله بالمضارب سكّرها قال لي الموظف : أنت عندك وزن زائد لكن عشان الوالد بمشيك . قلت : ماقصّرت وبيض الله وجهك . رحت عشان أختار المقعد ... كنت أبي بالصف الأول وبجنب الدريشه قال لي الموظف : بدري عليك .. هالمكان الناس حاجزينه قبلك قلت : طيب حطني بأي مكان جنب المسارات (تعرفون الرشيقين صعبه قومتهم من عند الدريشه )أخذت البوردنق وكل أموري جهزت بعدين رحت وحوّلت الفلوس للدولار الأمريكي ... ودّعت الوالد قبل دخولي للجوازات ... وقال لي كلمه ما أنساها قال : انتبه لنفسك وأي شيء تحتاجه قل لي .. أنت ببلد غربه دخلت على الجوازات طلع موظف الجوازات يعرف ولد عمّي وخذ من هالأسأله و اللقافه اللي على غير سنع ... حتى أنه من كثر الاسألة نسى يطلب تصريح السفر !! عدّيت من الجوازات والتفتيش بسلام وكان قبل صلاة المغرب بلحظات قعدت شوي .. بعدين أذن لصلاة المغرب فرحت توضيت وصليت المغرب والعشاء جمعاً وقصراً بعد الصلاة جلست أتأمل بوجوه المسافرين >>> من الفضاوه  إلى أن أعلنوا عن رحلتنا وكان أغلب المسافرين من الخادمات وسواقين المهم صفوا طابور طوييييييييييييييييل وأنا على نياتي صفيت وراهم مادريت الا اللي يجي أحد موظفين السنغافورية ويأخذ السعوديين والمسافرين (غير الخادمات والسواقين) ويدخّلهم من مسار ثاني !! بصراحة ... ما أعجبني تصرفهم .. هم دافعين فلوس زي ما حنّا دافعين !! لكن كلّمت اللي كان جاس بجنبي بالطيارة .. ليش سوو هالحركه ؟؟ قال : لأن إجراءاتهم تطوّل .. وحنّا إجراءاتنا بسيطة . ... والله اعلم ... المهم صعدت الطيارة .. والمضيفين  والمضيفات  كلّن فاكن لك خشّته ويضحك ويرحبيخلونك غصب تضحك بوجيههم .. حتى لو مالك نفس تضحك وصلت لمقعدي .. كنت أتمنى يكون أحد يتكلّم عرب بجنبي لأن ورانا حوالي 9 ساعات طيران (مع ساعه ترانزيت بدبي) الحمد لله جلس بجنبي واحد سعودي وبيننا مقعد فاضي >>> أحلى كلام اللي كان بجنبي من الوفد الطبي للمنتخب السعودي لألعاب القوى للناشئين (أن ماخانتني الذاكرة) ما شاء الله عليه .. سواليف وتنكيت ووناسه وحش بخلق الله ... أستغفر الله بس >>> وش بعده قعدنا نسولف وفي خضمْ سوالفنا جابو لنا وجبه خفيفة برحلتنا من الرياض لدبي >>> وينك يا سيبويه تشوف  طبعاً وصلنا دبي .. نزلوا بعض الركاب وركبوا آخرين وجاء واحد كوري وجلس بالمقعد الفاضي  .. والله ياهو ينام نوم .. طول الرحله وهو نايم >>> حاقد عليه  بعدين حصل موقف طريف ... ضحكت ضحك أنا واللي كان بجنبي لين دمّعت عيوننا  السالفة .. أن الخطوط السنغافورية يعطون فوط دافية عشان تمسح فيها وجهك ويدينك كان فيه حرمه من ركبنا الطيارة وهي تتمكيج .. وتحط حمره وحالتها صعبه جداً جداً يوم وزعوا الفوط وهي تمسح وجهها ... وينحاس كل اللي حطته .. فعشان كذا أنصح الحريم لا يتهورون >>> ياويله  ........ وأخيراً ........ بعد رحلة طويييييييييلة ضيعتها بين أفلام وسواليف وغفوات أم ربع ساعه تجيب الهم والغم والمرض و... وقراءة بكتاب كفاحي .. يحكي قصة هتلر ( برأيه أن أي مشكلة بالعالم سببها اليهود ) هتلر هذا شخص غرييييييييب ومكافح ... عنده صفات بشخصيته متناقضه يكره اليهود كره .. أكثر من كره بعض المسلمين لهم !! المهم .. خلونا من هتلر >>> حس أنه شطح شطحتن محترمه وصلنا لسنغافورة .. كنت تعباااااان وفيني نوم .. و وراي 7 ساعات ترانزيت أنا من النوع اللي مستحل أنام نومه زي الناس بالطيارة .. ومن سوء حظي ما حجزت فندق بالمطار وأصلاً ما أدري أن فيه فندق بالمطار .. المهم نزلت من الطيارة .. واستقبلونا موظفين بالمطار عشان يعطوننا رقم البوابة اللي راح نأخذ طيارتنا القادمة منها طلعت البوابة بمبنى (ترمنال) رقم 2 .. ولازم تستخدم القطار عشان تاصل هناك (أسهل وأسرع) وتعرفون واحد أول مره يسافر ولغته مو ذاك الزود ... وخايف أضيع  فكنت أي كونتر أو موظف مطار أشوفه أوقف واسأل .. وكانوا بصراحه خدومين جداً (لا تخاف من سؤالهم حتى لو لغتك ميح ) دلوني على مكان ركوب القطار (مع أن فيه لوحات واضحه لكن مع الربكه والخوف تحس بغباء يجيك فجأه وبدون مقدمات )شطحه لعيون مطار سنغافوره مطار أتعب وأنا أقول كبيييييير ... أتعب وأنا أقول جمييييييل ... أتعب وأنا أقول نظيييييييف ... أتعب وأنا أقول مرتّب مطار فيه كل شيء .. أسواق .. كافيهات .. مطاعم .. فنادق (بكل مبنى فيه فندق) .. انترنت سريع مجاني .. أماكن جلوس مع تلفيزيونات للتسليه .. حتى البلايستيشن والاكس بوكس موجود .. ألخ .. ألخ .. ألخ مشيت.. ومشيت .. ومشيت .. ومشيت >>> بيقول لكم أنه طوّل وهو يمشي لين وصلت لمكان القطار   بدأ يقرّب قطارنا  يالله جاء قطارنا .. بروح أركب  ركبت القطار إلى أن وصلت إلى مبنى 2 وشفت البوابة اللي راح أطلع منها .. هنا أرتاح بالي ارتحت شوي ع الكراسي .. وبدأت الهواجيس تروح وتجي .. حتى وصلت لمرحلة أني تمنيت أرجع للرياض صوره وأنا جالس بجنب البوابة  يوم شفت أن نفسيتي شانت .. قلت خل أتمشى شوي رحت وتمشيت .. ورقيت للمطاعم .. وحولت الفلوس للدولار النيوزلندي صوره من المطار  وهاذي عشان حساس  بعدين .. رجعت لنفس مكاني وأشوف الساعة ألا باقي حوالي 4 ساعات حاولت أنام .. أغفي خمس دقائق بعدين أقوم  المهم .. أني مانمت لا بالمطار ولا بالطيارة بصراحة بذيك اللحظه غبطت اللي كانوا نايمين بالمطار .. حتى أن بعضهم حط شنطته مخدة ورايح بسابع نومه ومن الطفش والحالة المزرية اللي كنت عليها صورت هالصورة >>> مدري وش كنت أحس فيه  وبعد جهد جهيد أعلنوا عن رحلتنا المتجهة إلى كرايشتشيرش دخلت التفتيش .. وعديت بسلام  ركبت الطيارة .. وكان بجنبي رجال وحرمته من الهند (وياكثر سوالفي مع الهنود بواناكا أو كوينزتاون وحتى بالطيارة ) الطيارة هذي كانت أفضل من السابقة (هاذي كان فيها 99 قناة منها قناتين عربية والسابقة حوالي 20 فقط بدون قنوات عربية) يوم جاء وقت الغداء أو العشاء أنا كنت طالب وجبة مسلم والهنود بعد كنوا طالبينها .. قلت الحمد لله طلعوا مسلمين لكن المصيبة .. جاء وقت المشروبات .. كلّهم طلبوا خمر .. أنا صار وجهي كذا وكذا وكذا  و  و  وقلت بنفسي : هالحين تاكلون حلال وتشربون حرام .. وين عقولكم ؟؟!! وجباتهم كانت متوسطة المستوى .. لكن اللي أكلتها من قلب تشيز كيك بالفروله .. بصراحه طعم ما أعجبني أكلهم  ماعلينا .. مر الوقت بطيء .. وأنا ماغير من فلم لفلم .. لين طقت تسبدي (هاذي تحتاج ترجمه .. يعني إلى أن زهقت)ورحت أتمشى بالطيارة .. ومريت الحمام على طريقي (وهاذي فائدة المقعد اللي بجنب المسارات .. تقوم متى ما تبي  )رجعت لمقعدي مرّ الوقت إلى أن بدأ المضيفات يوزّعن بطاقات دخول نيوزلندا  أخذت بطاقة .. وعبيت اللي أعرفه واللي ما اعرفه خلّيته فاضي وأنا سارح بخيالي .. كيف راح تكون نيوزلندا .. وهل المعهد والعائلة كويّسين ألا والهندية تعكّر صفو خيالاتي و تناديني .. وتسألني .. لو معي أكل بالشنطة هل أكتب أنو معي ..؟؟ بغيت أقول لها لا عشان تتوهق  >>> محد قال لها تعكّر صفوي قلت لها : من الأفضل أنك تقولين أنه معك أكل قالت : لا هذا مو أكل .. هذا نوع من أنواع الحلا الهندي ياليل الذكاء اللي مو خالص قلت : بس يعتبر أكل . وبالأخير أقتنعت ويوم طاحت الميانه بيني وبينهم .. قعدنا نسولف وبالأخير قالت لي : تصدق يا حمودي أني أول ما شفتك حسبتك من الهند ؟؟ بهذيك اللحظة كنت أدور وجهي ماقدرت أحصله .. يعني بعد كل هالكشخه ورايح للحلاق وجاي من الحلاق ومسوي صنفره .. لكن .. الله كريم >>> تحطّم  وصلنا كرايستشيرش .. جيت للجوازات طلبت مني موظفة الجوازات بطاقة الدخول والجواز .. عطيتها وقلت لها أن فيه أشياء بالبطاقه ماعرفتها وأشياء كتبتها وأنا مو متأكد فعطتني بكل احترام وبابتسامة دفتر فيه ترجمة للبطاقة وقلم وقالت كملها هنا بعد ما كمّلتها سألتني ليه جاي .. قلت للدراسه .. قالت كم بتقعد .. قلت أقل من 3 شهور بعدين طلبت تشوف تذكرة العوده .. عطيتها قالت لي ثانكيو .. ولكم ان نيوزيلاند .. بعد ماختمت على جوازي رحت عشان آخذ شناطي من السير ولسوء الحظ ولأن الرخيص مخيس كما قال الحكماء شلت شنطتي لكن الكفر الوحيد تعلّق بين حد السير والسير نفسه وانكسرت (توكم ماشفتوا شيء من مغامرات هالشنطة )المهم حطيتهن بالعربية .. وكان فيه كلاب –أعزكم الله- تشم شنط المسافرين .. والحمد لله محد قرب لي رحت للتفتيش ويوم درا أن معي أكل .. قال وش معك ؟؟ ياوالله البلشه .. تمر بالانقليزي ونعرفه .. قهوه سهله .. لكن الهيل شلون أقولها له صرفتها وقلت له شيء حنا نحطه مع القهوه العربية >>> فهم .. فهم .. مافعم بالطقّاق  قال لي رح مع مسار 3 .. قلت أبشر ماطلبت شيء دخلت مسار 3 (أعتقد أنه نفس مسار 4 المرعب لأن مسار 1 و2 يفتشونهم عن طريق آلات) جاء دوري عند الرجال .. قال حط شنطتك على الطاوله طبعاً أنا كنت دااااااااااايخ .. لي يومين مو نايم ألا تقريباً 5 ساعات  فحاولت أشيل الشنطة مو قادر فجاء الموظف نفسه وشالها وقال : يبدو أنك متعب >>> ترجمه نصيّه قلت : متعب وبس .. خلصنا بس الله يهديك .. فتح الشنطه وهو يسولف معي .. ويوم درا أني رايح لواناكا .. قال : هالمنطقة رائعة .. وأنا متأكد أنك راح تستانس هناك كلامه عن واناكا طمأني زيادة سكّر الشنط .. وقال امسك الباب قلت : على هالخشم قال : عليه الشحم >>> قوي .. وعنده علوم قبايل هالنيوزلندي طلعت من عنده بعد ما رجع أغراضي للشنطة وتأسف مني ع الحوسه اللي سواها وطلّعت جوالي .. ألا رسالة من متوهق ولكن!! يقول : إذا وصلت لكرايستشيرش طلّع بطاقة فودافون ودق علي . جوالي كان شحنه عالآخر وكاميرتي كانت بالشنطة الكبيرة والنفسيه كانت زفت فما صوّرت شي بكرايستشيرش أو كوينزتاون رحت لمكتب فودافون اللي بالمطار .. وطلّعت شريحه .. ودقيت على متوهق وقلت له أني وصلت الآن باقي على رحلتي الداخلية حوالي 3 ساعات رحت وقصيت البوردنق وخذوا 25 دولار لأن كان معي شنطتين والموظف اللي قص لي البوردنق سألني من وين .. قلت من السعودية .. رد علي السلام عليكم .. ابتسمت وقلت وعليكم السلام قال من الرياض أو الدمام أو جدة >>> شكله مايعرف من السعودية ألا هن قلت من الرياض .. قال كثيرين يجوننا من السعودية .. قلت أيه لأننا مانحتاج فيزه عطاني البوردنق وقال رح حط شناطك هناك حطيت شناطي وجلست أنتظر متى يعلنون الرحلة من الطفش طلعت برا المطار بشوف الجو والبراد كيف .. كان الجو بارد لكن مو برد شديد رجعت لداخل المطار .. وطلّعت جاكيت ولبسته لأن رحلتي قرّبت >>> مبسووووط  لكن فيه شيء خوفني كثييييييير .. أن الرحلة اللي كانت قبلي لكوينزتاون أُلغيت لكن الحمد لله ... رحلتي كانت في موعدها **بتشوفون مناظر مقززه بمطارات نيوزلندا .. وبتحمد الله أنك مسلم** نرجع .. ركبت الطيارة المتجهة لكوينزتاون المناظر كانت خلااااااااابه من الطائرة .. قمم ثلجية .. بحيرات .. خضار لكن جوالي بدأ يوصوص .. فخليت باقي الشحن لقدّام بعد تقريباّ ساعة وصلنا لكوينزتاون ..  وما أنسى لحظة نزولي من الطيارة (مافيه بوابات .. تنزل من سلّم الطيارة) كان وقت الغروب .. منظر رااااائع .. الجبال حولك .. والبراد يشق وجهك شق دخلت المطار وعلى طول على سير العفش لأن كان وراي باص لازم ألحق عليه وإذا مالحقت عليه بنتظر بالمطار ساعتين .. عشان الباص الثاني وأنا ما ودي بالباص الثاني .. لأني انتظرت بما فيه الكفاية أخذت الشنط .. سألت موظف بالمطار عن مكان الباص .. ودلني عليه طلعت للمكان لكن مالقيت الباص (كونيكشن باص .. لون الباص أصفر وأزرق  .. تفائلت يوم شفت الألوان )قلت هذا اللي مكتوب لك يالمظلوووم لازم تنتظر ساعتين زيادة لكن جاء الفرج من الله .. ودق علي مدرسنا بول وقال لي : لازم تلحق ع الباص رح ودوّر عليه .. هو ينتظرك >>> كان متحمّس .. وحسسني أني بفلم أكشن طلعت برا المطار .. وألقاه بالجهة الثانية والسواق معه دفتره وقاعد يدور منهو الناقص يوم أقبلت .. جاه أحساس أني أنا الناقص >>> واضح من وجهي قال لي : انت موهاميد >>> بغيت أحب راسه من الفرحه قلت : أييييييييييييييييييه موهاميد قال : أركب بالباص ركبت الباص .. وكان مدة الطريق حوالي الساعه ونص وقف الباص عند مدينة صغيره .. وأنا كنت نائم .. ونزل واحد من الركاب .. أنا قمت من النوم .. وسألت اللي بجنبي .. وصلنا لواناكا ؟؟ مدري وش قالت ... قلت سوري .. قالت أنت رايح واناكا ؟؟ .. قلت يس .. قالت أجل كبّر وسادتك تونا ما وصلنا المهم كمّلت نومي إلى أن وصلنا واناكا قال السواق يالله وصلنا .. نزلت من الباص وكان باستقبالي متوهق ولكن!! وبول وبنته ماي (عمرها 3 سنين) سلمت عليهم .. بعدين حطينا الشنط بسيارة بول (باص المدرسة العجيب )وهاذي صورة ماي نروح للتزلج >>> يا حليلها   طبعاً قبل سفري كنت أقول أني ماراح أخطي وأروح من جهة السواق مثل كثيييييييييييير من أعضاء البوابة (لأنهم عكسنا بنظام المرور) لكن غصب .. غصب .. تسويها أخذوني للعائلة .. وكانت العائلة مكونة من حرمة (آنا) وزوجها (نسيت اسمه) وقطة سوداء (سبايكي) (الزوج مايجي الا بالـ ويك اند ومو كل ويك اند) حطيت شناطي بغرفتي .. وعطيت متوهق أغراضه اللي موصيني عليها جلس بول ومتوهق يسولفون وأنا مني معهم .. أدوّر ع الفرااااااااااااااااش .. لكن مجامله لهم اللي أذكره من هالليلة أن متوهق كان يشرح لهم طريقة عمل المقلوبه >>> وهو وقته خلصوا سوالفهم .. راحوا لبيوتهم قالت لي آنا : تعال يا محمد للمطبخ رحت للمطبخ .. وقعدت تهذر علي بكلام إلى الآن مدري وش قالت بس اللي فهمته أنك لازم تسوي فطورك بنفسك .. وإذا بغيت تطبخ ماعندي مانع بعد ما شافتني تعبااااان وماني رايق له قالت بكرا نكمل حتسينا .. أنت رح نم قلت : أوكي .. قد نايت دخلت غرفتي الباااااااااااااااااااااااااااااااردة .. درجت الحرارة كانت مقاربة للصفر .. شغلت الدفايه وقعدت أتأمل الغرفه >>> قصتي مع التأمل قصه بذيك اللحظة تذكّرت أن لي أهل بالرياض يبون يتطمنون علي فطلّعت جوالي بدق على أهلي أطمنهم أني وصلت .. لكن جوالي كان شحنه خالص بس والله جوالي ماقصّر من كرايستشيرش وهو يوصوص إلى أن وصّلني لواناكا قلت نم والصباح يحلّها الحلّال نمت نومه من ألذ وأصعب النومات اللي نمتها بحياتي .. مع أنه كان بررررررد .. وأنا صعب أنام بغير سريري لكن هذا التعب وما يسوي إلى هنا انتهت رحلت الذهاب إلى نيوزلندا ما يستفاد من هذا الجزء: 1\ حاول قدر المستطاع أنك تجهّز أغراضك بدري .. لتجنب نسيان أي شيء . 2\ أحمل معك شنطة ظهر صغيرة بالطيارة .. عشان أوراقك المهمة وجوازك . 3\ نصيحة .. أشتر شنطة زي الناس .. لا تنّكب وتتفشّل .. ولا تدور ع الرخيص أبداً بسالفة الشنط . 4\ الوزن الزائد .. مو مشكلة بالذهاب لكن بالعودة يسوون لك سالفه . 5\ أن كنت سمين خذ مقعد عالطرف .. وأطلع و أدخل زي ما تبي .6\ إذا كان مدة ترانزيتك بالمطار 4 ساعات وفوق من الأفضل تحجز فندق بالمطار (فندق كروان بلازا يحتاج فيزه) هذا موقع الفندق اللي بوسط المطار ولا يحتاج فيزا وبكل مبنى (تيرمنال) موجود له قسم : 7\ أول ما تحس أنك ضايع .. اسأل ولا تخااااااف. 8\ إذا ما عرفت شيء ببطاقة الدخول .. مو مشكلة .. عندهم ترجمتها للعربية . 9\ حاول إذا سألوك تكون إجاباتك صريحة .. لا تخاف إذا بتدرس بالفيزه اللي يعطونك إياها من المطار .. لكن أهم شيء يكون معك تذكرة العوده قبل إنتهاء مدة الفيزه (3 شهور) 10\ حاول أن شحن جوالك مايخلّص .. لأن أهلك بيخافون عليك .. وهذا اللي حصل معي + احفظ معي + (neighbor (U.S.A) = neighbor (B.R = الجار (من يسكن بجانب منزلك) abandon = يهجر أو يتخلى عن boil = يتبخر الجزء القادم (( أول يوم بواناكا ومعرفة مكان المعهد والتاون )) ألقاكم  |
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض المتطور
|
|
|
الساعة الآن 10:33 PM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||