السلم علكم ورحمة الله وبركاته .. أهلاً بالجميع

سبحان الله الواحد يتعيجز ينزل تقرير كامل مرة وحده .. لو هو منزلها حبة حبه وهو هناك كان أحسن وأخف ..

عدد الزملاء في هذه الرحلة ( 17 )

المهم .. يا جماعة , وأنتم تقرون التقرير .. ممكن تلاحظون أحرف طارت .. أو انحاشت .. فـ لا تشرهون

المهم نبدأ معكم التقرير كامل بإذن الله من البدية لـ النهاية ..

طبعاً بأذكر استخراج الفيزا بشكل سريع .. الفيزا اضطرينا نستخرجها بشكل سريع لأن الرحلة كانت قريبة جداً ولا جانا رد الموافقة إلا متأخر ,
فـ حولنا الفيزا إلى الـ VIP عشان تطلع بشكل سريع مع دفع 700 ريال للفيزة الواحدة ..
المهم طلعت الحمدلله الفيزا ..

طبعاً مجموعة طالعين ع الإتحاد ومجموعة طالعين ع الـ bmi
الأولى فيها انتظار بـ أبو ظبي ساعة والثانية دايركت ع لندن

طبعاً الرياض ع أبو ظبي ساعة تقريباً ومن أبو ظبي ع لندن 7 ساعات تقريباً ..
مجمل الرحلة 9 ساعات ( لأن فيه ساعة انتظار في أبو ظبي )

طبعاً الكل لازم ياخذ معه اللاب توب .. والكل يخاف من اللي يسمع أنه اللي يحصلون في جهازه برامج منسوخة يسجن ويغرّم غير أنه يكون الويندوز نفسه منسوخ تكون الطامة أشد
وكانت هذه النقطة اللي مخوفتني حقيقةً ..
وكنت متصور بأجلس بالمطار 4 ساعات تفتيش وتحقيقات وغيرها من هالأمور > هذا ع كلام اللي سألتهم ..
لكن طلعوا أسرع من مطار الملك خالد الدولي

وصلت المطار ( هيثرو ) عبيت الأبلكيشن في الطيارة - وممكن تاخذ نسختك من المطار وتعبيه هناك -
تدخل المنطقة الخاصة بختم الجواز
يـ/تسألك الموظفـ/ـه ليش جاي ؟ لأنهم يقارنونها بالفيزا ..
( طقق ) < صوت ختم الجواز بالدخول
تدخل وتاخذ جوازك وتنزل تحت للعفش ..
تاخذ عفشك وتمشي وتطلع من المطار .. وانتهى
يعني الحمدلله لا فتشو اللاب توب ولا شيء ..
وكل اللي معي كانوا متخوفين من هالنقطة
خبركم الشغل هنا كله نسخ × نسخ

طلعنا من هيثرو ع اكسفورد ( الطريق مسافته ساعة تقريباً )

الحمدلله طلعنا وكان فيه السواقين تبع المعهد اللي ناوين ناخذ فيه الكورس
معهد ( EF )
وصلنا للمعهد وكان ممتاز ويعج بجميع الجنسيات ( أسبانيا - اليابان - الصين - روسيا - .. وغيرها من الجنسيات ) بالإضافة إلى السعودية طبعاً ..
وتحتل الجنسية الأسبانية المركز الأول من حيث العدد

هو المعهد الوحيد الذي يمتلك مبنى خاص به وأرض يمتلكها ,
مكانه جميل جداً

السكن /
كل واحد سكن عند عائلة .. وكل واحد يدعي ربه انه تجيه عائلة كويسة وناس محترمين ..
والحمدلله كانت العوائل بنسبة 90% ممتازين ..
إلا ما ندر في بعض العوائل ..

فاصل : ما راح أطول بكل نقطة .. لأنه لو بأطول راح أذكر الرحلة من أولها لـ آخرها
راح أعطيكم نقاط رئيسية وسريعة وتوضح المقصود
اللي يبي تفاصيل يبلغني عنها وأنا حاضر

نكمل :
أول يوم راحة .. ثاني يوم بدينا الدوام .. طبعاً الكل في بداية الدوام متحمس .. وبعد اسبوعين أو ثلاثة بعضهم قلبوها سياحة مع دوام هههههههه
بدينا نحضر وكان الجو ممتاز الحمدلله

خلونا من المعهد .. لأنه جو روتيني .. تطلع له الصبح وتخلص دوام وترجع للبيت .. أو تتزل للسيتي سنتر ع الكوفي أو نتعشى سوا مع الزملاء فلذلك خلو هذه تفاصيل تذكر في وقت آخر ..

طبعاً المدة طويلة ( 9 أسابيع ) فـ استغلينا الوضع روحة وجية وسياحة بالويك اند واستكشاف ..

طبعاً راح أبدأ بالسياحة :

التنقلات داخل المدينة كان بالباص .. وكان معنا كرت نركب الباص فيه ..
وممكن تشتري كرت شهري بـ 30 باوند لشركة معينة أو 50 باوند لأي باص في أي مكان بالمدينة اللي أنت فيها

وطريقة التنقلات سهلة خصوصاً لما تكون عارف المنطقة أو معك خريطة .. لأنه بالخريطة موضح كل شيء .. حتى الشوارع الفرعية الصغيرة موضحة عليها

طبعاً تركب الباص وتلاحظون وجود مقاعد لكبار السن والمعاقين .. هذه ما تجلس فيها إذا كان فيه أحد من هالإثنين
لكن يحق لك تجلس إذا ما كان فيه أحد .. لأنه لو جلست عليها وفيه كبير بالسن ركب الباص وما قمت له .. بيحقدون عليك كل اللي بالباص ..

لأنه صارت قدامي مثل هالمواقف ..
فـ احتراماً الواحد يقوم لهم ..
هذه بالنسبة لداخل المدينة

التنقلات لـ خارج المدينة عندك القطار .. ( فيه باصات برضه .. بس القطار ريح بالنسبة لي )
شيء رائع جداً .. وبالموعد المحدد مو مثل بعض الناس

القطارات توصلك لكل المدن .. ومدن عن مدن تفرق من حيث عدد الرحلات يومياً .. مثلاً لندن فيه كل فترة وبورمث فيه كل 4 ساعات

يعني ما تقول والله اليوم هذا ما فيه قطار يودي للمدينة اللي أبيها
كل المدن تقدر تروح لها .. بس التوقيت لازم تعرفه .. عشان ما يفوت عليك
لأنه هناك ناس تحترم الوقت ..
حتى لو قصيت التذكرة ودفعتها ولا حضرت .. راحت عليك .. لكن ممكن تحول الوقت إلى وقت آخر ,

القطارات رائعة جداً ونظيفة والكراسي مريحة ..
لكن فيه نوع من القطارات اللي تكون مجرد حلقة وصل .. تكون كراسيها مقابلة لبعض
ومتعبة شوي .. وتكون أزفت .. إذا كان زحمة ..

ولكن الباقيات كلها ممتازة ورائعة ومريحة .. وطبعاً يفضل أنك تكون موجود بدري عشان تختار المكان المناسب .. خصوصاً إذا كان قروب ..

الأسعار عندهم نار لـ أبعد درجة .. وهذا الشيء مو مستغرب ع دول أوروبا ..
أبسط مثال

علبة الكوكاكولا أحصلها عند بقالة بـ 0.95 بنس وأحصلها عند بقاله ثانية تبعد عن الأولى بكم محل بـ 1.40 باوند
يعني ما فيه حماية مستهلك إطلاقاً !
ومثلها أكياس البطاطس والشوكولاطات .

المنتجات الأخرى فيها شيء واضح من الغلا ..
الماركات هناك تحصلها بأي مكان نوعاً ما ..

ماك - برجر كنج - كنتاكي - بيتزا هت - دومينوز - صب واي
منتشر هناك بكثرة ..

فيه منطقة هناك أو قرية اسمها ( بيستر ) أنصح اللي متواجدين في بريطانيا الآن يزورونها .. وأنصح اللي بيروح .. يمر عليها
منطقة رائعة جداً .. كلها ماركات .. أسعارها معقولة .. منخفضة عن اللي موجودة بلندن بشيء بسيط .. تفتح الساعة 8 الصباح وتغلق الساعة 8 العصر
فيها كوفي ومطعم

حقها يوم واحد فقط .. للي بيجزم يشتري .. لكن اللي بيشوف ثم بيشتري لازم يرجع لها ..
تذكرتها بالقطار رمزية جداً ( باوند واحد فقط ) من اكسفورد طبعاً ..
ما أدري كم التكلفة من لندن .. أو أي منطقة أخرى
لها تغطية خاصة بأحد الردود بحول الله ..

أنا مقر إقامتي في اكسفورد .. فـ المدن اللي زرتها :
لندن - برايتون - بورمث - بورت سموث

طبعاً المفروض أنه زرنا مدن أكثر .. لكن ما تداركنا الأمر إلا متأخرين مع الأسف ..
يعني ما فكرنا بالسفرات والروحات والجيات إلا متأخر ..

كان المفروض نروح لـ أدنبره لكن للأسف ما أسعفنا الوقت :/ !

طبعاً أفضل مدينة سياحية وشاطئية هي بورمث ( أتعب وأنا أقول رائعة ) تسوّق وفنادق وبحر ,
وقت روحتنا لليوم الأول كان الجو مغيّم ومطر خفيف وهواء ..
فـ الشاطيء كان فاضي
شرينا لعبة سمك ( دورت لها صورة للأسف ما حصلتها )
اللعبة ترميها كأنها سهم للطرف الآخر ويطلع منها صوت تصفير عالي جداً ..
كل ما زادت قوة الرمية كل ما زاد قوة التصفير .. << علاقة طردية

فـ توزعنا كل واحد بزاوية .. وبعيد عن الثاني عشان تكون الرمية أقوى والمجال أوسع ..
( تغطية بورمث بأحد الردود بحول الله )

برايتون مدينة شاطئية عادية جوها وقت روحتنا لها جداً سيء .. حر .. متنا من الحر
فيها منطقة ألعاب .. تخوّف .. روعة للي يحب المغامرة ..
صغيرة جداً .. ما توسعنا في التمشي فيها ..
( تغطيتها برضه ح تكون في أحد الردود )

لندن وما أدراك ما لندن
مدينة لا تنام إطلاقاً ..
تذكرت مكة .. شرفها الله
شارع العرب اللي ما أدري وش يبي .. الهايد بارك ..
وغيرها من المناطق اللي زرنها
( برضه لها تغطية خاصة في أحد الردود بحول الله )

بورت سموث .. أكرهها
قارب كبير .. تركب فيه يمشي على الساحل ويوريك السفن الحربية .. يمر ع سفينة قديمة جداً تنزل لها تتمشى عليها
ترجع .. تطلع لـ برج كبير .. تشوف المدينة من هالبرج
ومع ذلك ما أعجبتني أبد ..
( لها تغطية خاصة بأحد الردود )

والمعهد ( EF ) بيكون له تغطية بأحد الردود برضه ..
لكن بشكل مبسّط لأني ما أذكر أني صورت كثير بالمعهد

هذه الرحلة والحمدلله كانت رائعة جداً رغم ما فيها من بعض الأمور ..
لكنها رائعة .. اشتقنا لها الحين بصراحة
شعبها نوعاً ما مقرف ..
بالنسبة لي : أعرف العربي عشان أبتعد عنه إلا ما ندر ,
مع الأسف .. بعضهم يفشل :/

الهدايا اللي شريتها الحمدلله وفقت فيها (بشهادة الحاضرين في الرحلة )
وضحت انه يفضل تروحون للمنطقة اللي ذكرتها لكم .. بالأعلى ( بيستر )
ممتاز جداً
عن نفسي أنا : شريط منها شنط وساعات وعطورات وألعاب و و و .. الخ
Dior - DKNY - CK - ... etc
شريت هدايا من دبنهامز برضه .. ملابس أطفال , ودمية ( بطريق ) طوله متر إلا شوي

الجو وما أدراك مالجو .
متقلب ..
باليوم الواحد تمر كل الفصول ..
الصباح صيف .. الظهر خريف .. قبل العصر شتاء .. المغرب ربيع
من جد .. جو متقلب ..
طلعت مره للمعهد الساعة 9 وكان الجو شمس .. ولابس صيفي ..
ونظارات شمسية .. الساعة 11 الجو انقلب .. هواء .. ثم أمطرت وأنا ما مع المظلة ولا شيء
من عقبها صرت أشيل معي شنطة فيها النظرات الشمسية .. والمظلة

احصائيات الرحلة :
حجم الصور : 5.75 جيجا
عدد الصور : 2660 صورة
< يوم قلت لأخوي العدد .. قال : بس هذه الصور ؟ قلت إيه .. انا كل يوم أشوف نفس المكان .. ليش أصوره أكثر من مره .. ما استوعب إني مطوّل بالسفره

فـ هذه صور المجلد الخاص بالرحلة /

اعذروني على الإطالة في المقدمة ..
لأني فعلاً أطلت

قريباً بحول الله التغطية الأولى بالصور ,
الليلة .. بإذن الله

[ وَ ]
تابعوني في مدونتي الشخصية / ممنوع وضع رابط موقع شخصي - ملبورن

هنا التغطية الأولى لبداية الرحلة ..

الصور من وق السحاب ,

وهنا بعد وصولنا لـ هيثروا ..

في الطريق لـ اكسفورد

وهنا الطرق المؤدية للمنازل

هذا الشارع الرئيسي لـ المجمعات ..
الشارع ممتلئ جداً بـ الأسواق من كل الأنشطة ..
الواحد ما يمل وهو يمشي هنا لو لمدة طويلة .

هذا الشخص يرسم وجهك .. تمسك الورقة له .. وكل شوي يناظرك ويرسمك ..
ورسمه مدري وش يبي هههه

هذه أكبر حديقة في اكسفورد ..
الساوث بارك
رائعة جداً

برضه في الحديقة نفسها

’,’

اهاا .. جينا للمطاعم
هههه أنا نسيت أتكلم عنها فوق بصراحة ..
لكن المطاعم هناك مثل الموجود عندنا في السعودية - الرياض بالنسبة لي - بنسبة 80% تقريباً
إلا كذا مطعم دخلته وأعجبني .. بس نسيت اسمه , يعني من المطاعم اللي ما أذكر أنها موجودة بالرياض ,
بالنسبة للمطاعم المنتشرة - ماك , برجر كنج , كنتاكي .. - فأسعارها أغلى من هنا طبعاً .. بفارق بسيط مو كبير مره
يعني تقريباً زيادة 10 ريال للوجبة الوحدة .. أو أكثر أحياناً

المطعم هذا ( The First Floor ) تعشينا منه .. بوفيه مفتوح
لأجل وجود شخصية مهمة .. زارتنا من السعودية
وكان عدد اللي تعشوا فيه 12
وطلعنا بمبلغ جامد شوي
حول الـ 2000 ريال تقريباً ÷ 6.9 = 290 باوند

فـ المطعم كان أكلاته منوعة وحلوه ..

هذه الغطية الأولى لـ اكسفورد ..
وقريباً التكملة ,’

عدنـــا .. ومع بورمث

وهي أفضل مدينة شاطئية .. وأروعها وأجملها ..من جميع النواحي .. ليست بالكبيرة .. ولكنها جمية جداً .!

تغطية بسيطة لـ بورمث ..
هي مدينة ساحلية .. تبعد عن اكسفورد ساعتين ونص للقطاات المتقطعة .. وساعة ونص للقطارات الدايركت .. يعني تبد عن لندن ( + ساعة ) في كلا الحالتين .

بورمث من المدن الهادئة والرائعة .. أسواقها جميلة .. مطاعمها رائعة .. شاطئها نظيف .. السكن فيها كثير جداً .. إلا أنه الواحد يتعب يحل شيء في الإجازات والويك اند

هذه الصور لـ بورمث >

وانتهت التغطية لـ بورمث : )

قريباً التغطية المتبقية للمناطق الأخرى ,

شكراً لكم , واعذروني لتأخير :/ !