بسم الله الرحمن الرحيم

في البداية اهديكم السلام جميعاً وارق التحايا واعذب الاماني بدوام التواصل والألفة والمحبة بيننا جميعاً في هذا الكيان العامر..
متمنياً ان يجمعنا الله بكم في اسعد الاوقات وارقى الاماكن .

كانت فكرة السفر مصقوله .. والجيب مشخوله .. والـنـفـس خضرا
وباقي الرفيـق ابطـولـه .. بـفـكـر مـذهـولـه .. يـدبـر لهـا عـذرا

اتفقنـا على تاريخ السفر انـا ورفـقـة الـفـَـلـَـس المكونه من ثلاثـة اصخاص والذي قد سبق وان تعودنا على بعض وفهمنا بعض جيداً اكثر من المتوقع .. وعلى قول احدهم : لو نقص احد من هذا الرباعي لمـا طابت الرحلـه .. حيث اصبحنا جميعاً نكمل بعض والبعض يكملنا .. وكيف لا !!! وهـذه السفرة تعتبر الثالثـة لـنـا سويـاً لأندونيسيـا بالتحديد .. ومع هذاك البراد المغربي في احدى اركان شوارع جده المشهوره ..أتـخـذ القـرار !!!
لملمنا عفوشنا وحبكنا اعذارنا وأشـرنـا الجـواز .. والـشـدق امـتـار !!! .
الـ 20 من ابريل .

مـرّ عليّ .. لا مـرّ انـت .. لا مـرّ انـت اول .. لا بيتنـا اقـرب .. لا بيتكم ابـعـد .. لا حارتكم مليانـه وراعيـن وبسـاس تسـنـتـر فـوق سيـارتـي ليل نهـار .. لا حـارتـكـم انت اللي بـزارينـهـم حتى الجمـس يسـمـونـه كامـري .. اقـول اخلصـو علينـا بـس .. ومـن هذا الاختلاف الـعـذب الذي بـدأنـا بـه مشـوار سفرتنـا كمـا هي العادة دوماً بين احباب السفـر واصحاب القرار والقياده . ومن اولها لم نتفق وكل واحد اخذ ليموزين وتقابلنا في المطار . ( ياليتني ما مدحتهم ) .

اقلعت الرحلة 981 جارودا من مطار جده .. ومغطـه 9ساعات ودقيقتين كما اوضح مضيف الطائره وما ني عارف كيف حبك وحدد الدقيقتين عبر هذه الرحلة اعلى الصحاري والمدن والمحيطات والجزر .. والله ياهـو دقـيـق و ممتـاز .. اقصـد طيـار مخضرم .. قفلو الجوالات قفلنا .. فكو الاحزمه فكينا الاحزمه .. ممنوع التدخين .. منعنـا .. خـذو تعشـو .. انقا ماو . طيب اخمدو ارقدو .. ما نقدر . طيب اقرو جرايد اندونيسيه .. مانعرف . طيب وشفيكم .. ما ندري .. اخلصو بس اهـبطـو بنـا .. طيب اصبر .. ماني صابر . ومن هذي السوالف حتى التسع ساعات صارت ثمان وسبع ونص وست وعشر وخمس واربع وعشرين .. وساعه ونص وثلاثين دقيقه واربطو الاحزمه استعداداً للهبوط بمطار سوكارنو .. وقـربااااااااااااع ........
وبدون شعور كل واحد منا رفع راسه من فوق الكرسي يشوف خويه الا ونتلاقـى بالعـيـون ومحد مصدق ..
( السـالـفـه اثـرنـا كـلـنـا مـن الـلـي يهـاب وتتصـافـق براطمـه خوف مـن ركـوب الطائرات ) .
وطلبتكم لا تقولون لحـد .

نـزلـنـا المـطـار واشكالنا الله لا يوريكـم .. اللي لابس كـوت على قميص مـزر وجنـز ( تـقـل مذيـع أيـرانـي ) واللي تي شيـرت ريال مدريد الاسود برقم ومطقمـه مع ( وزار ) فرزاتشـي مع شـراب وزنوبـه " الله يكرمكم " ( تقل في لجنة ترسيم الحدود ) .. واللي مسوي فاهم مره ولابـس طقـم ترنـق ابو خط مع تي شيرت نفس اللون كم طويل .. ما يدري انها صايره بجامات ها الايام .. وخـلوهـا على اللـه ..
وصلنـا كاونتـر الجوازات , ويـقـوم واحـد فـيـهـم بـعـد مـا تمقـلـنـا صـح .. يـدور على اخويـاه داخل ذيك الصنـاديـق يجمـع هـديـه لـنـا ..
بـدل مايـطـلـبـهـا مـنـا .

اخـذنـا عـفـوشـنـا وصرفنـا دولاراتنـا كـتـقـزيـره للوصول لجاكرتا .. وسـواقـنـا في الانتـظـار على هذاك الكيجان ومـع هذاك الخط اللي يـرد النـفـس وتـروووس على فـنـدق الاتـريـوم كـإستـفـتـاح وتجـديـد عـهـد لـعـادة لـم ولـن تنقطـع بإذن الله .. كـان سعـر الفـنـدق في الايـام العـاديـة 415.000 روبيـه .. وفـي الـويـكـنـد السـبـت والاحـد 350.000 روبيـه . ( من كاها طبعاً )

جـاكـرتـا كـانـت حـر نسبيـاً مـع بـعـض زخـات المـطـر الخفيـفـه مسـاءً ..

خـذ غـرفـتـك وضبـط عـفـشـك وخـذ دشـك ولا تنسى الملابس اللي عليك جبها معك في كيس .. و بـعـد سـاعـه الـوعـد كـبـتـشـيـنـو الاتـريـوم .. تـم ,, تـم . وتـم اللقـاء بينـنـا .. وعلى مطعم ابو نـواس وهـذيـك الغـدوشـه .. يعـنـي " غدا وعشاء جميع " .. و عوده على الفـنـدق للتمغـط والاستـرباع حتى الساعـه 9 مساءً مـوعـد تـمـريـن الجـيـنـزات والتيشيرتات الجديده ..:
" لـزوم الـف لبـسـه بـعـديـن غـسـل " ..

ذهـبـنـا كـمـا هـو العـاده في كل سفـره على " Sarina- After Our " لـطـقـطـقـة كـم قـيـم بـلـيـاردو و لإثـبـات انـنـا فـعـلاً وصـلـنـا جـاكـرتـا .. ويـاليـتـنـا صـدقـنـا بـعـد , الا بـاقـي مـشـكـكـيـن .

ولكـن وللـه الحـمـد ان الـشـك قـُـطـع باليـقـيـن بـعـد الاستـلام والتـسـلـيـم للـخـفـارات .

الـصـرف كـان مـنـاسـب قيـاسـاً بـمـا كـان عليـه وهـو الـ 100 $ = 955.000 روبيـه .. ويا نازل عشرة الاف او خمسة الاف على حسب الصرف والويكند وقرب اقفال السوق وهكذا .
وللريـال السعـودي = 2540 روبيـه .. ويـا نـازل ويـا نـازل .. لآن عمره ماطلع عن هذا وانا هناك .

وبـعـد لـيـلـتـيـن وكـمـا جـرت العـاده الانـتـقـال لـفـنـدق اخـر وكـان الاخـتـيـار على فـنـدق :
ALiLA Jakarta
Jl. Pecenongan Kav 7-17
Jakarta 10120
Indonesia
P: +62 21 231 6008
F: +62 21 231 6007
http://www.alilahotels.com/jakarta/

صوره للغرفه من الداخـل


منظر من الغرفه لجاكرتا


سـعـر الغـرفـه مـن كـاهـا ديلوكس = 58 $ مع الفطور .. اي ما يعادل 550.000 روبيه .

الفندق جميـل وراقـي وخدمه ممتازه ولكن موقعـه في الدخول اليه والخروج منه على شارع ضيق نسبيـاً وليس ببعيد جداً عن سوق " بـازار بـارو " .

التكاسي تـم ملاحـظـة ارتـفـاع التسعـيـره من العـداد سابقـاً يفتـح على 3000 روبيه .. والان اصبح يفتح على 4000 روبيه وما هناك ذاك الفرق .. والبعض لا زال متمسك بالتعريفه الاولى وحاط لك لصقـه سـاده نصف الزجاج الامامي ما تشوف شيء وكـأنـه يـقـول للـنـاس تـرانـي مـا غيـرت تسعيرتي .

زحمة جاكرتا هي هي والطقاطيق هي نفسها والباجات ماهنا فرق وابشـركـم " مجمع الاتريـوم " مكـانـه مـا تغـيـر ولكـن اصبـح الدور الرابـع كلـه مطاعـم والطاولات على المـمـر قـدام كـل مـن هـب ودب .. خاصـة لـو طلبـت لـك " استـيـك لحـم " و " ناسي قورنق " و " شوربه صينيه بلونين " تلقى العالم رايحه جايه مـن جنـبـك ويالله لك الحمد .. الكـبـتـشـيـنـو غـيـرو طاولات قسـم والقـسـم الثـاني كما هـو .. وابشـركـم ايضـاً انـهـم عـيـنـو مـع اللـي يبـاشـرون وحـده " دبـه " تـقـعـد فـوق راسـك حتى تطلب افـوكـادو .. واذا قـلـت تـم .. جابتـه مشـفـوط منـه الله يزيدها صـحـه ..

المتعـه فـي قضـاء النهـار حقيقـة فـي مجمـع " تمـان انقـرك " حيـث السـعـه واللجـه والمطاعم الممتازه والتسـوق ويضيـع نصف نهارك ما تشعـر بـه .. واحذرو التهور ودخول صالة التزلج لأن واحد من الصحبه ماخلى كريم اندونيسي ولا لصقة الا ودهـن بهـا اسفـل ظهره ..
وطول الرحله وهـو .. انـواع الـ آآآآآآه والـ آآآآآدوه .. ولا تفكرونه انـا .. لأنـي محترف هذي الحركات من ايام ما كان الوالـد الله يطول عمره " سـنـيـر في الظهـران ارامكـو " اكفـششششش .
يبقى مجمع الـ تـامـان انقـرك هو الافضـل بين مجمعات جاكرتـا كرأي شخصي
ولكـن مشـوار العـوده يجيـب النـوم .

مـجـمـع تـامــان انـقـرك


اسعـار الفـنـادق مـن كـاهـا حسب الصفحة الصفراء اللي رازيـن بهـا على المكتب عندهم
سوف ارفـقـهـا فـي مـوضـوع خـاص انشـاء الله قريبـاً .

اسـرار الاجـتـمـاع الـخـاص الـذي تـم بـيـنـنـا لـتحـديد الوجهـه القـادمه ..
بـيـن بـانـدونـق والجبـل وجوقجاكرتـا وبـالـي .. في الحلقـة القـادمه انشـاء الله
وتـرانـا رحـنـاهـا كـلـهـا ... ( اوعـى تـغـيـر المـحـطـه وسيب ايدك من الريموط ) .

ولـكـم اجـمـل التحايا والمنى بقضاء اجمل الاوقات مع هذه الحلقات

ســـــــبــــــــايدي
مـاشـMaCaNــان