السبت 23 أغسطس 2008



قمت الساعة ثمانية تقريباً لترتيب أغراضي قبل الرحيل ، وكنت نسّقت مع العائلة اللي كنت عندهم إنهم يوصلوني للمحطة. وللأمانة أغلب العوائل هناك يحترمونك احترام كبير !


شعور غريب جاني في هالصباح !

فجأة كذا .. تمنيت إني ما فكرت أطلع بالقطار أبد ..!!

واحد غريب وفي بلد غير بلده و مايعرف عنها الكثير وطالع بقطار ، مين بيركب معه ؟ هل بيوصل سالم لجوهانسبيرغ ؟ هل معقولة الهدايا اللي شريتها لإخواني الصغار بتوصل لهم؟
هل كل الليالي الحلوة اللي عشتها هنا في كيب القلب راح تصبح ذكريات سيئة في حياتي؟
هل و .. هل .. هل ؟

كل هالأسئلة قعدت أفكر فيها وأنا أرتب أغراضي !

لكن مفيش حل اليوم أركب القطار الأحد أوصل لجوهانسبيرغ والاثنين رحلتي لأبو ظبي ومنها للرياض .. والتذكرة اندفعت فلوسها !

رضيت بالأمر الواقع وقريت الورد اليومي وكلمت أم العائلة اللي كنت عندهم وكانت تنتظرني تحت !
( دقة غريبة في المواعيد عندهم! ياليت يعطونا شوي :/ )

طلعت من مقر سكني في الـ Sea Point في آخر الـ Main Road بالضبط بجانب الـ Bp staion ! والطريق ما أخذ مني تقريباً 12 إلى 13 دقيقة .

محطة القطار داخل السيتي وسهل الوصول لها وهذي خريطة تبين موقعها بالضبط داخل السيتي



وهذه خريطة كاملة من GOOGLE EARTH توضح موقع المحطة داخل السيتي
http://www.tagzania.com/bigmap/pt/ca...-train-station


عنوان محطة القطار بالضبط:
Strand Street, Cape Town, Western Cape, South Africa‏



وصلنا لمكتب الاستقبال .. كانت يدي على قلبي لكن لمّا وصلت وشفت نوعية الركاب اللي راح أركب معهم ارتحت ... أغلبهم من ذوي البشرة البيضاء من الأوروبيين وفيه كم عائلة من الهنود .

هنا ملاحظة لابد من معرفة لأن القطارات الفخمة لها مكاتب يعني ما تروح للمحطة الرئيسية . تروح للمكتب والمكتب يستقبلونك ويطلعونك من باب من الخلف على طول على القطار.

أول ماوصلت لمكتب الاستقبال استقبلني أحد العمال ومباشرة أخذ مني الشنط بعد أن سألني عن اسمي وأعطاني رقم الغرفة اللي راح تكون من نصيبي في القطار .

3F هي الغرفة اللي راح تحتضنني يوم كامل أو حتى أكون أكثر دقة 26 ساعة !

بعدها طلب مني الجلوس في غرفة الاستقبال حتى موعد الرحلة وكان باقي تقريباً ربع ساعة



جلست في غرفة الاستقبال وجاني عامل المطبخ ومعه كوب قهوة وقطعة بسكويت والابتسامة على وجهه .. بصراحة انطباع رائع من أول لحظة!
وأكيد هم دارسين وش أثر الانطباع الأول لدى الزبون ! إذا انبسطت في أول الرحلة أكيد بتستانس لآخرها ، أمّا لو كان العكس أكيد بتجلس تدور الزلّة عليهم عشان تتهاوش معهم




حان موعد الرحلة .. طلعنا من الباب الخلفي لغرفة الاستقبال


قعدت أدور رقم القاطرة 3 اللي راح تكون فيها غرفتي إلى أن وصلتها ولله الحمد دخلت القطار وأنا أعد A .. B .. C .. D .. E .. F .. يااااه غرفتي !! .. مو معقولة عليها اسمي بعد .. حسيت نفسي مهم



طبعاً في كل قاطرة تقريباً فيها مجموعة غرف مرقمة بالحروف الانجليزية . والقطار فيه مجموعة قواطر .. كيف الشرح بس؟

دخلت الغرفة ولقيت ظرف محطوط بشكل مُلفت في وسط الغرفة على الطاولة ، ومكتوب على الظرف اسمي .. يالله كم أنا مهم ؟ : p



فتحت الظرف على طول لقيت فيه ورقتين ورقة من مدير القطار بإسمي فيها التعليمات الخاصة بالقطار وتمنيات بأن تكون الرحلة على متن هذا القطار رحلة سعيدة والورقة الثانية فيها برنامج القطار

السبت 23 أغسطس 2008

7:30 -9.00 الجلوس في غرفة الاستقبال في محطة كيب تاون وتناول الشاي والقهوة .
9:05 مغادرة كيب تاون وتناول المشروب الترحيبي في الصالة.
12:00 وجبة الغداء.
16:00 وقت الشاهي
19:00 وجبة العشاء

الأحد 24 أغسطس 2008

7:00-9:00 الاستيقاظ مبكراً وطلب القهوة في الغرفة على حسب طلبك
9:00 وجبة الإفطار
9:300 وقت الشاهي
11:20 الوصول إلى محطة قطار جوهانسبيرغ


( الإفطار والغداء والعشاء وحتى الشاهي والقهوة ممكن تطلبها وتجيك في الغرفة وممكن تطلع في الصالة وتاكل وتشرب مع الناس)

يعني دلع على أصووووله


نعود للغرفة .. طبعاً حصلت مع الظرف .. عفشي اللي سلمته لهم في البداية على طول وصلوه للغرفة




... وهذي شوية صور للغرفة


.. مناشف جديدة وأنواع من الصابون والشامبو..




..روب سباحة..
وهنا ملاحظة : كل قاطرة فيها دورة مياه –أكرمكم الله- ومروش وكلها نظيفة وينظفونها باستمرار.





.. النافذة وبالإمكان إغلاقها إذا رغبت في النوم ..




..الطاولة اللي تاكل عليها ممكن ترفعها وتحصل غسالة تغسل فيها يديك بعد ماتخلص من الدبغ : p !

.
.
.
.
.
تحرّك القطار .. وفتحت الدريشة وياليتني مافتحت!!
.
.
.
.

..أحلى وداعية ياكيب تاون..



مناظر من على الطريق










..تخيّل قاعد تشرب شاهي وفاتح النافذة وقاعد تتفرج..


طبعاً طلعت للصالة فيه مشروب ترحيبي وفيه كلمة لمدير المضيفين


اجتمع أغلب اللي في القطار في هالصالة وطلع مدير المضيفين يقول أتمنى أنا والطاقم اللي معي نخدمكم في اللي تبون ! من كلامهم وخدمتهم أحسهم يشتغلون من قلب ويفرحون لمّا تطلب أي حاجة .

رجعت للغرفة وفتحت النافذة وقعدت أتفرج

















بصراحة مثل المسبوه كل ما صكرت الكاميرا أرجع افتحها وأصور .. شيء لايُقاوم


...على الهامش:
ماتنفع خلفية لويندوز؟




أخذت لي غفوة وأنا قاعد أتفرج على هالمناظر .. صحيت على صوت المضيف يطق الباب يقول : حان وقت الغداء حسب توقيت القطار .. قالي تطلع تاكل في غرفة الأكل وإلاّ في الغرفة .. قلت أبيه في الغرفة .. وجهّز الطاولة في الغرفة


الغداء بصراحة لذيذ .. وقايلهم قبل أبيه حلال وماقصرواً معي ..
حاجة فيها ربيان وسويس رول مع الجبن مدري أيش يسمونه.. وخضار ساخنة لذيذة
طبعاً عندهم ثلاثة أو أربعة أصناف تختار منها .. لو تبي كلها جابوها لك ..













بعدها الحلى .. وفيه نوعين من حلى الآيس كريم ..
(مشروع تسميييين : p)





طلعت على الساعة 3:30 تقريباً للصالة أتفرج وأشوف الصالة وغرفة الأكل













..و هذي غرفة الغداء والعشاء إذا ماتبي تاكل في الغرفة



شربت شاهي في هالبلكونة .. –وأنا أتفرج على الطبيعة أسأل الله الكريم من فضله-


وقفنا قبل الغروب تقريباً لمدة ثلث ساعة صيانة سريعة للقطار ثم مشينا عقبها مباشرة ، سألت المضيف المنطقة اللي راح ننزل فيها آمنة أو لا .. قال آمنة 100% في المئة وفعلاً نزلت وطلّقت رجولي شوي






وجبة العشاء أذكرها كانت جبنة بيضاء وخبز وفيه شوربة حسب الطلب وفيه أصناف ممكن تختار منها اللي تبي

صور للبالكونة (أو الصالة بلهجتنا :d) في الليل




قهوة الصباح .. يااااه حاجة ثانية




وصولنا إلى جوهانسبيرغ - بحمد الله -