 |
 |
 |
||
|
|
|
||
 |
|
 |
|
|||||||
 |
| أدوات الموضوع | انواع عرض الموضوع |
20-05-2009, 12:46 PM
|
#1 (permalink) |
|
مسافر متميز
تاريخ التسجيل: Jul 2007
الدولة: الامارات
رقم العضوية :148376
المشاركات: 466
|
رحلتي الى باريس بالتفصيل وبالصور في شهر العسل ،،
انا نزلت ها الموضووع من قبل بس الصور امتسحت والحين برجع انزل الموضوع مره ثانيه
رحلتي في شهر العسل الى (( باريس ))<< صووور .. ]** السلام عليكم ورحمة الله وبركاته *** شحالكم وشخباركم :.؟؟ العنوان واااضح. بنزل لكم تقرير كاااااااامل عن (( باريس )) .. بصراحه انا وايد استفدت من ها المنتدى .. واشكر كل اللي في المنتدى بصراحه ما قصرتوا ويانا في اي شي .. (( اولا: : بغيت اقولكم شي بتلاحظون ان النك نيم اللي ع الصور غير ها النك نيم ... لان انا منزله الموضوع في منتدى ثاني .. وثانياا : : اسمحوللي ع اللهجه لان انا كاتبه باللهجه الاماراتيه والمصطلحات يمكن شوي تختلف بس اللي ما يفهم اي كلمه يقولي )) الحمدلله الله تمم عرسي على خير .. وعرست تاريخ 19 / 6 / 2008 والحمدلله كان احلى يوم في حياتي..وتاريخ 22 / 6 / 2008 سافرنا شهر العسل إلى (( باريس )) .. وطبعااا ما نسيتكم وصورت لكم كل شي .. واتمنى القى ردود حلوه منكم علشان تشجعوني اكمل التقرير وانا بنزل لكم على اجزاء .. مدة الرحله كانت 9 ايام لاتنسوني من دعواتكم ان الله يوفقني في حياتي اليديده ... من مطار دبي .. طيران الامارات .. درجة البزنس ..  مدة الرحله في الطياره تقريبا 6 ساعات .. كنت استعمل كيمرا Kodak .. وهاي صورتها 12 ميغابيكسل  السكن كان في فندق (( هيلتون )) قريب من شارع الشانزليزيه .. الليله كانت ب 1450 درهم .. وقضينا فيه 9 ليالي .. يعني ما غيرناه .. وبصراحه الفندق كان حلوو .. وهاي صور من الفندق الصور طبعاا كانت من الانترنت لان انا الصور عندي امتسحت  ..هاي البطاقه لباب للغرفه        هاي الخريطه وين مكانه بالضبط عن شارع الشانزليزيه  الجزء الاول .. وصلنا تاريخ 22 / 6 / 2008 تقريبا الساعه 7 المغرب .. وخلصنا الاجراءات في المطار والحمدلله خلصنا بسرعه وخذنا الشنط وسرنا الفندق :13 (47):.. تقريبا 40 دقيقه من المطار للفندق .. المهم وصلنا الفندق وحطينا اغراضنا وارتحنا شوي ونزلنا نستكشف المكان قبل ما يظلم الجو وقلنا بنتعشا في شارع الشانزليزيه .. نزلنا والجو كان روووووووووووووعه و تعشينا في مطعم (( بينو )) وخذنا بيتزا طعمها لذييذ وخذنا بيبسي ..وها المطعم مشهور في شارع الشانزليزيه .. وتعشينا وبعدين تمشينا في الشارع لان الجو كان ما يتفوت بس باااارد وايد ,, وع الساعه 12 تقريبا ردينا الفندق .. تاريخ 23 / 6 / 2008 نزلنا من الفندق وسرنا قوس النصر وتصورنا فيه وطلعنا ولفينا مشي من الساعه 1 لين الساعه 5 العصر كنا نستكشف باريس .. وسرنا ع الساعه 5 ونص برج ايفل وبصراحه ها البرج فضيع روووعه وركبنا من الطابق الاول لين الطابق الثالث والمنظر من فوق ما يتفوت شفنا باريس بكبرها . اسمحووولي بنات انا صورت كل شي من بداية الرحله لين ما ردينا بس الصور اللي في تاريخ 22 / 6 و تاريخ 23 / 6 امتسحت وباقي التقرير كله بيكون بالصور ان شاء الله  .. بس لقيت لكم كم صوره هاذا قوس النصر  وهاذا برج ايفل ..   تذكرة الدخول لبرج ايفل لآخر طابق ب 12 يورو يعني تقريبا 60 درهم .. الجزء الثاني .. تاريخ 24 / 6 / 2008 طلعنا من الفندق وقلنا بنستكشف المحلات اللي في شارع الشانزليزيه والمحلات كله ماركات عالميه وها المحل المشهور في الشارع اسمه (( سيفورا )) للعطور والمكياج .. وموجود عدنا في الامارات في مركز دبي فيستيفال سيتي  وخلصنا من الشارع وسرنا آخر الشارع وشفنا مباني وايد حلوه .        وهاذا مطعم فيه اكل فرنسي واكل امريكي      وهاذا ميدان الكونكورد  وفي ها الصوره برج ايفل طالع  وها التماثيل في كل مكان موجوده في باريس   وتمشينا ولقينا كوشك صغير يبيعون فيه سندويشات ومشروبات خذنا كوكاكولا وخذنا الخبز بالنوتيلا اي وحده تسير لازم اجربه وهو في كل مكان يبيعونه يسوون الخبز جدامج ويحطون عليه كاكاو النوتيلا والله لذيييذ ،، صح انه يبيعون منه في السينما بس اللي في باريس غير والله  ولقينا بحيره صغيره ..   وهاي حديقة ..  ..  وصلنا آخر الحديقه وحصلنا متحف اللوفر .. كنا بندخل بس حسينا ان ما شي وقت .. وقلنا بنسير له باجر العصر ..وطلعنا من الحديقه ..   الجزء الثالث .. تاريخ 25 / 6 / 2008 في ها اليوم سرنا متحف اللوفر.. ها المتحف اعتقد انه كان قصر وبصراحه فخم واااااااااااااااايد.. وحلوو واايد يعني اذا حد بيسير ويبا يلفه كامل ياخذ 4 ساعات يعني مشي من الخاطر فيه ..وهاي بوابة المتحف   وهني ندخل من ها الهرم وننزل تحت بالسلم المتحرك .. بس قبل ما ننزل من السلم المتحرك في تفتيش يعني اللي يشل وياه شنطه ولا شي لازم يفتشونه .. ونزلنا وخذنا تذكره الشخص ب 6 يووروو ...يعني ب 30 درهم .. وفي عندهم خريطه للمتحف كاامل وفي بكل اللغات حتا اللغه العربيه موجوده   وهاذي هي التذكره  وهاي هي الخريطه  وهني فتحت لكم اياها وصورتها كامله  ويوم شفنا ان المتحف وايد كبير ولازم نمشي فيه واااايد قلناا لازم نشرب وناكل شي وفي كوفي تحت صغير .. خذت سندويج دياي وبيبسي .. بصراحه البيبسي اللي في باريس يرد الرووح طعمه حلوو وايد احلى من البيبسي اللي عدنا    المهم تمشينا وشفنا في الخريطه ان (( الموناليزا )) موجوده في المتحف قلنا لازم نسير ونطالعها ..  تمشينا مشي لين ما وصلناها وشفنا الناس كلهم متيمعين ع الصوره ,,  وهاي هي صورة الموناليزا المشهوره .. ما يسوى علينا لفينا المتحف لف علشان ندورها وآخر شي تطلع ها الصوره الصغيره ..هههههههه   والحين بحط لكم صور وااايد من المتحف وشوفوا فخامة القصر وكيف عايشين الملوك عندهم .. كل شي له فخامته يمكن تملون من الصور في المتحف بس في ناس تحب تشوف ها الصور والسموحه بخليكم ويا الصور ..    وهاذا صورة الصقف وااايد حلوو..  وهاذيل الصورتبين تبين لنا كيف شكل الملكه والملك عندهم .. حلوه الملكه    وهاي غرفة الملك  حتا الساعه فخمه  واحلى شي عيبني في القصر غرفة الطعام وااااااايد حلووه وفخامتها فضيعه  والحين شوفوا الصور واحكموا عليهن كل صوره احلى من الثانيه      وهاي الصوره من الدريشه شوفوا القسم الثاني من القصر .. بصراحه واااااااايد كبير ومتاهات من الداخل ،، لدرجه ان سوو له خريطه من كبره ..  من برع ومن داخل كله نحت ع الجدران  فضيعه ها الصوره  وهني الرسامين يحاولون يرسمون الصور اللي في اللوح  كل القصر فيه لوحات    وعندي صور وايد من المتحف بس اخافكم تملووون وقلت بختصر الصور عليكم .. وبعد ما خلصنا من المتحف طلعنا وقلنا بنتمشا ع نهر السين ... ها اول ما طلعنا يلسنا شوي نرتاح واشترينا ماي وشربنا من عقب المشي اللي مشيناه بس وناسه .. هني متجهين صوب نهر السين  وها القصر من برع  ونحن نتمشا سايرين صوب النهر سمعنا اغاني ودق والتفتنا يمين يسار ماشي يوم شفنا تحت ان في 2 من الشباب الفرنسين يدقون .. وناسه هههههههههههه  وهني وصلنا نهر السين ونزلنا وتمشينا ...  وبصراحه كان يووم واااايد حلوو وخصوصاا ع الساعه 8 يوم نسير نهر السين المكان هاااادي و رووومااااااانسي صدق من سما باريس بلد العشاق ونشوف السفينه وهي في النهر ومجابلنا برج ايفل .. والساعه 10 بالليل تظلم باريس .. الجزء الرابع .. تاريخ 26 / 6 / 2008 في ها اليوم خامس يوم من رحلتنا .. قرننا نسير مركز الافييت سمعت عنه وااايد وشفت شكله في الانترنت ان واايد حلوو وقلنا بنسير له المهم نزلنا من الفندق وكان عدالنا ستار بكس ونحن كل صبح لازم نسير ستاربكس علشان نتريق فيه .. وهاذا هو مكانا ما نغيره    وطلعنا من ستار بكس ونحن ما كنا نعرف وين مكان مركز الافييت واستوت لنا قصه في ها اليوم .. المهم قلنا بنسير محطة القيطار وبنسأل اللي هناك وها نحن في الدرب  وسرنا عند شباك التذاكر وقلت للحرمه اللي هناك ان المركز فيه محلات للتسوق .. وقالت لنا الحرمه اللي تشتغل هناك ها متحف مش مركز المهم قلنا يمكن هي ما فهمت علينا ولان لغتها فرنسيه ونتعامل وياها بالاشارات ونراويها الخريطه المهم قصينا التذكره للقيطار التذكره للشخص ب 1.5 يوورو يعني تقريبا 8 دراهم .. المهم خذنا تذكرتين وهي عطتنا خريطة القيطار ورسمت لنا بالقلم وين المكان . المهم نحن خذنا القيطار .. .. وغيرنا كذا محطه علشان نوصل المكان المطلوب  |
|
|
|
20-05-2009, 12:55 PM
|
#2 (permalink) |
|
مسافر متميز
تاريخ التسجيل: Jul 2007
الدولة: الامارات
رقم العضوية :148376
المشاركات: 466
|
ونحن كنا تحت الارض فجأه طلعنا فوق الارض ..
  ومرينا ع مناطق حلوه يعني طلعنا من المدينه شوي  واول ما طلعنا من القيطار لقينا جدامنا الانفرميشن يعني معلومات ..ها احلى شي عندهم اي شي في خاطرج أساليهم وهم بيدلونكم .  . ودخلنا وسألنا عن المركز وانصدمت منا قالت في ها المنطقه مافي مركز في ها المنطقه بس شي متحف الافييت ع فكره هم نفس الاسامي بس هاذا اللي نحن نباه اسمه جالري لافييت .. المهم يلسنا نفكر قلنا لها اوكي وين هوو عطتنا خريطه واتبعناها ونحن نمشي لقينا محلات حلوه وبصراحه المكان هاادي منطقه حلوه وبعيد عن الضجه    وها نحن في الطريج نمشي  واخيراا شفنااا ها المتحف وانصدمت قلت ليش مافيه ناااس وانا اذكر اني شايفه صورته ان فيه قبه من فووق المهم كملنا مشي صوبه قال دام ان وصلنا خلينا نشوف شو ها وبعدين بنسير المركز بنسأل عنه  وهني كاتبين قصة ها المتحف  ودخلنا داخل   ومحد كان في المكان غيرنا نحن هههههههههه المهم قلنا دام ان الجو وااايد حلوو ونحن قاطعين ها المسافه الطويله بنيلس نرتاح في الحديقه ... الجو روومااانسي ههههههههههه عاد ونحن عرسان ندوور كل شي رومانسي   المهم عقب ما خلصنا وارتحنا عرفنا ان نحن غلطنا وان ها اسمه متحف الافيت . وسألنا عن المركز وقالوا لنا اسمه جالري لافييت بس ما خسرنا الرحله لانها كانت حلوه .. وطلعنا من المنطقه متجهين صوب القيطار علشان نرد المنطقه   والقيطار كان فاضي   وصلنا شارع الشانزليزيه نزلنا في المحطه وسألنا عن جالري لافييت وقالوا لنا ان مكانه ورا متحف اللوفر وبعدنا مشينا . صح ان المشي تعب بس في نفس الوقت متعه في ها الجو الحلوو  ونحن نمشي لفت نظري فساتين عرسهم وااااايد بسيطه مب نحن ما نروم نوصل للكوشه من ثقل الفستان هههههههههههه  باريس في كل شارع كوفي ها احلى شي  وها محل شنط   والسكارا موجودين في كل الشوارع  كل ما اشوف شي حلوو في المحل لازم اوقف واصور ههههه      واخيييرا وليس آخراا لقينا جالري لافييت   وهاي القبه من فوق  وها شكل المركز من داخل كل طايق له اغراضه يعني الطابق الارضي للمكياج والعطور والطابف الاخير لاغراض المطبخ وفي طابق لملابس الاطفال وفي طابق لملابس النساء وفي طابق لملابس الرجال      وخلصنا لفيناه كامل عن خاطري وطلعنا ولازم نسير نهر السين علشان نتمشا   وخلاص تمشينا وتعشينا وردينا الفندق .. والحمص اللي ما نصبر عنه في باريس (ماعرف ليش كل ما اسافر الفليل احس بعمري اني وايد يوعانه يمكن من البرد ) وزين اني شاله ويايه حمص خخخخخخخخ  |
|
|
|
|
20-05-2009, 01:08 PM
|
#3 (permalink) |
|
مسافر متميز
تاريخ التسجيل: Jul 2007
الدولة: الامارات
رقم العضوية :148376
المشاركات: 466
|
الجزء الخامس ..
تاريخ 27 / 6 / 2008 في ها اليوم قررنا نسير حديقة (( ديزني لاند )) المهم نشينا الساعه 11 الصبح ، وطلعنا من الفندق الساعه 12 الظهر ،، وتبعد الحديقه عن الفندق 40 دقيقه .. المهم وصلنا الحديقه الساعه 12 و40 دقيقه:.. وها ونحن نمشي الى بوابة الحديقه  والحين وصلنا  وياهي فرحه والله .. كان حلم حياتي اسير باريس واسير ديزني لاند والعب فيها ..الله يطول عمر اللي حقق لي ها الحلم وهاي الأرضيه .. كل الحصا اللي تحتنا منحوت..كل حصاه عليها تاريخ ،، بس ماعرفت شو سالفة التواريخ  وهاي بوابة الدخول .. التذكره للشخص البالغ ب 49 يورو يعني تقريبا 250 درهم    وشوفوا الجو كيف كان كله مغيم وبصراحه رووووووووعه ويساعد ع اللعب  وهاي خريطة الحديقه .. موجوده بكل اللغات ما عدى اللغه العربيه  وقلنا اول شي بنسويه بنركب القيطار وبنستكشف الحديقه  وها الصوره من القيطار  وهني نزلنا من القيطار   وهاي الصور ونحن نتمشاا  في ها المكان شفنا الناس تركب سفينه صغيره وتلف في البحيره وركبناها وكانت حلوه ..  بس نحن ما ركبنا ها السفينه الكبيره .  هاي السفينه اللي ركبناها  وها الصور ونحن في السفينه    انزين تشوفون ها المبنى اللي ع شكل بيت ،، نحن كنا صافين طابور علشان اللعبه بس ماكنا نعرف شو هي اللعبه ،، المهم فتح لنا باب ودخلنا مجموعه ،، وسكر علينا الباب وكنا في ظلام محد يشوف الثاني والناس تصارخ وتضحك :12 (3): وناااسه مسووين جووو المهم في ها الغرفه اللي دخلناها نزلت بنا تحت وفجأه تبطل الباب ونزلنا وكل ثنينه ركبووا عربه المهم كانت اللعبه بيت الرعب وخلصنا وطلعنا منها بس ونااااسه اتمنا انكم فهمتوا اللعبه     طلعنا وكنا يوعانين وخطفنا على مطعم وخذنا بطاطس وبيبسي  ونحن يالسين ناكل سمعنا اصوات واغاني وضجه وقلنا بنسير نشوف .. وشفنا ان الرسوم اللي في الكرتون موجودين مثل (( سنديريلا ،، سنيوايت ،، علي بابا ،، الاميره والوحش ،، وحورية البحر ،، وايد شخصيات بعد .. كل الشخصيات راكبين مثل باص كله مزخرف والباص يمشي فيهم والناس كلهم متيمعين عليهم وانا بصراحه صورت فيديوو بس صورت صوره وحده .. لان ارتبشت هاذيج اللحظه والله حسيت ان عمري 8 سنوات من الربشه اللي كانت فيه كنت امووت في ها السووالف .. خاصه سندريلا ههههههههههه  عقب ما خلصنا وشفناهم كملنا مشي في الحديقه وعيبني ها المبنى  وهني وقفنا وقلنا بنركب ها اللعبه      وانطلقناا   وكانت اللعبه وااااااايد حلوه ركبنا قارب صغير ودخلنا في مكان كله عن اليهال بس استانسنا وكله موسيقى وعزف وكل ها الصور تتحرك ماعرف كيف اشرح بس المهم استانسنا الحمدلله   وطلعنا من ها اللعبه وسرنا صوب المتاهه وااااايد حلوه نمشي ونضيع بين المتاهات لين ما نحصل الدرب ونحن نمشي يصب علينا من الشير ماي ونترابع هي هاي اللعبه .    الناس تلعب وانا متفيجه اصور الورد ههههههههه  تعبنا من المشي وقلنا بناخذ بوب كورن وماي:.. بس البوب كورن مالهم رووووووووووووعه والله عمري ماذقت مثله .. بس اللي في العلب مب حلوو (( الفرش )) وااايد حلوو  هااا طعمه وااااااايد حلووو ولذيذ   وطلعنا نتجول في الحديقه      وهني مكان يصعدونه و كان فوق بيوت الرسوم المتحركه وطبعااا انا ماعندي شغله غير التصوير هههههههه           شفنا الناس تطلع من الحديقه الساعه 9 بالليل وطلعنا نحن بعد وها ونحن طالعين صوب البوابه  والتفت لورى نظره اخيره لدزني لاند وانا قلبي يعورني ماكان ودي اطلع من الحديقه وشفنا الناس متيمعين ع البوابه يشوفون فوق ويوم شفنا كان (( ميكي ماوس )) يسوي باي باي للناس وحتا نحن اخترشنا وياهم وناسه والله ..   وخلاص طلعنا من الحديقه  طلعنا الساعه 9 بالليل وصلنا الساعه 9 و40 دقيقه .. وتوجهنا الى نهر السين وجابلنا برج ايفل بس بقولكم معلومه عن برج ايفل ..  وهاي معلومه عن برج ايفل ..كل يوم الساعه 10 بالضبط يشغل ليتاته كامل ويلامع والله رووووووووعه ويلفت الانظاار لين 10 و5 دقايق ويسكر .. والساعه 11 نفس الشي لين 11 و5 قايق ويسكر .. والساعه 12 نفس الشي يولع ليتاته الساعه 12 بالضبط ويسكر الساعه 12 وخمس دقايق .. بس روعه .. ها ونحن يالسين ع رصيف مجابلين النهر ونشوف كل سفينه تخطف والجوو حلوو وهادي   وهني يوم ولع ليتاته الساعه 10 بالليل ,,, ها الوقت الساعه 10 وشوفوا كيف الدنيا منوره  وهني اظلم الوقت  وتمشينا شوي جدام وشفنا السفينه وقلنا بنركب وقصينا تذكر وركبنا (( بالنسبه لي كان احلى يوم في باريس )) .. ركبنا الطابق الثاني لانه مكشوف والجو كان برد مووووت عني انا اتنافض طول الوقت ههههههههه،، سوري لان الصور مب واضحه ماعرف شوياها الكيمره .    وها الصور ونحن في السفينه كل ما نمر عدال حد يصفقون ويستانسوون والله كشخه..ههههههه وايد ارتبشت في ها اليوم      والاغاني شغاله والناس يرقصووون .. وها برج ايفل ولع ليتاته الساعه 11 .. بس بالفيديوو اوضح انا صورت فيديوو   |
|
|
|
|
20-05-2009, 02:46 PM
|
#4 (permalink) |
|
مسافر متميز
تاريخ التسجيل: Jul 2007
الدولة: الامارات
رقم العضوية :148376
المشاركات: 466
|
الجزء السادس ..
تاريخ 28 / 6 / 2008 في ها اليوم ما كنا مخططين نسير مكان المهم نشينا الصبح وع طول (( ستار بكس )) وخذنا (( كراميل فراباتشينو)) وشربنا ويلسنا ..   وطلعنا شوي نتمشى عدال الفندق  وسرنا تجولنا في شوارع باريس    وع الساعه 11 الفليل سرنا شارع الشانزليزيه وكان في عرض عدال محل سيفورا في مكان داخله العرض وخذنا التذاكر (( تذكرتين و4 بيبسي ب 1000 درهم )) السعر كان وااايد غالي بس لازم ع شارع الشانزليزيه وها المكان اسمه (( LIDO)) بس عروض رووووووعه وكان داخل ممنوع التصوير بس طلعت لكم صور من النت.. بس بصراحه اللي عنده يهال لايدخل لان لبسهن كان مب زين والعرض كان مدته ساعتين    وكا العاده بنص الليل سرنا نتمشى ع نهر السين .. وردينا الفندق .. الجزء السابع والأخير تاريخ 29 / 6 / 2008 نزلنا وقت الغدى وسرنا شارع الشانزليزيه لان كان في خاطرنا ناكل بيتزاا وها الصورر بالعافيه    ولازم بيبسي .   وها هو الحساب 34 يورو تقريبا 170 درهم   خلصنا غدى الحمدلله وتمشينا في الشارع علشان نهضم الاكل        في ها اليوم بما انا آخر يوم لنا في باريس قررنا نركب الباص المكشوف بقولكم كيف نظام ها الباصات .. اول شي توقفون ع شارع الشانزليزيه في مواقف الباصات ولون الباص يكون احمر بو طابقين المهم تركبون الباص وتاخذون تذكره وها التذكره تكون ليومين الشخص الواحد اعتقد ب 24 يووروو تقريبا 120 درهم اعتقد جي لان نسيت سعره بالضبط المهم تركبون ها الباص ويعطيكم سماعه في كل اللغات ماعدى اللغه العربيه ويمشي الباص ويوقف عند كل معالم باريس اذا تبغون تنزلون عادي تقدرون وتصورون وتاخذون رااحتكم ويوم تشوفون باص ثاني تراووون السواق البطاقه اللي عندكم وتركبون وتكملون المشوار اتمنا انكم فهمتوا عليه المهم نحن استوى لنا موقف ان راعي الباص قص علينا وهو مغربي الجنسيه ولا عطانا فاتوره المهم نحن بغينا ننزل ونصور وبعدين بنركب باص ثاني .. يوم كنا بننزل قلنا له نبغي الفاتوره قال عيل لازم تدفعون اكثر قلنا له ليش قال لان انا كنت مسوي لكم خصم اول شي بس الحين اذا تبغون تنزلون وتردون في باص ثاني ادفعوو اكثر المهم دفعنا له وخذنا الفاتوره .فتحذرووا من ها المواقف .. هني اول ما ركبنا وها هو موقف الباص    واول ما تركبون يعطونكم سماعات وها الورقه   وها شارع الشانزليزيه   شارع الشانزليزيه ما يخلى من العالم  وها قوس النصر   وها المطعم (( بيتزا بينو )) روووعه اللي ذكرته في اول التقرير.  وها مقهى (( فوكيت )) اعتقد ان هو ها مال الوليد بن الطلال  نقظة ضعفي (( نهر السين ))   وها قصر نابليون  وهني تقربنا اكثر للقصر  وهاي السفاره مالت (( الامارات )) فديت علمنا  وها المكان مجابل برج ايفل روعه اليلسه هني    وهني لفينا من ورا برج ايفل               ويوم وصلنا ها المكان وقفنا وقلنا بنيلس وبنصوور وبنتمشاا  هاي الكنيسه (( كنيسة احدب نوتردام )) وكان يوم الاحد يعني صلاتهم      وطلعنا من الكنيسه وقلنا بنتمشا شوي جدام  وشفنا ها الرسام رسمه روووعه   ولقينا ها اللوحه .:13 (38):. ( الحي اللاتيني ) وانا قبل سامعه عنه وقلنا بنتمشا في الحي اللاتيني وبناخذ لنا شي ناكله   وفي كوشكات صغيره تبيع رسومات عن برج ايفل ومعالم باريس   ودخلنا من ها الممر ولقينا مطاعم   وشفنا محل مال الايسكريم والناس صافين طابور عليه ،،، وقلنا بنجرب بس بصراحه في حياتنا كلها ما ذقنا من ها اللآيسكريم نصيحه اللي يسير يجربه  هاذا آيسكريم ريلي  وهاذا الآيسكريم حقي   وقلنا بنسير ناكله على نهر السين:13 (41):  نزلنا تحت:13 (23):  ويلسنا وكلنا الآيسكريم وبعدين ركبنا الباص وسرنا شارع الشانزليزيه ومن هني فضت الكيمره :13 (36): تمشينا في الشارع لين الساعه 2 بالليل وشفنا الناس متيمعين .ومسوين مسيره لان اسبانيا فازت بس وناااااااسه عشنا الجو وياهم :13 (51): والبنات يوقفن في نص الشارع ويرقصن وبعدين ردينا الفندق ورقدنا :12 (17):لان ورانا سفر .. تاريخ 30 / 6 / 2008 سرنا المطار:12 (73):  وهاذيل شنطنا تلعوزنا والله من كبرهن ،، المره اليايه باذن الله بنشل شنطه وحده بس  وقلنا لازم نتغداا كنا يوعانين:12 (40):   ومن اليوع خلصنا كل الاكل خخخخخخ    وهني ركبنا الطياره ..:44 (25): ريلي رقد عني وانا من الملل :44 (25): يلست اصور . كنت اشوف فلم عمر وسلمى وناسه ها الفلم وااايد رومانسي عاد انا اموت ع الافلام المصريه :13 (41):   وهني عطوني آيسكريم  وصلنا بالسلامه :12 (19):  وخلصت الرحله الحمدلله انها كانت واااااااايد حلوه ومستحيل انسى ها الايام .. بس بصراحه واااااااااااااااااااايد تعبت لين ما نزلت الموضوع اتمنا اني القا ردود حلوه واي استفسار عن الرحله قولولي وان شاء الله ما بقصر وياكم .. ************ طلب اخير دعواتكم ان الله يوفقني ويا ريلي************ وكل وحده تقولي رايها في باريس وآخر شي ابغي اقول انطباعي عن باريس .. بصراحه واااااااااااااااااااااايد حلوه وخاصه المشي فيها .. وهي رومانسيه وااايد ،،وفي نظري انا انصح لو حد بيسير ويا عائله يسكن في منطقه اسمها الللافيدانس هاي منطقه فيها شقق وتطلع عليكم ارخص لان بصراحه الفنادق اللي فيها واااااااااايد غاليه .. وباريس وااايد غاليه والله في كل شي وبقولكم يوم ردينا الامارات يلسنا 10 ايام فيها وبعدين غادرنا تاريخ 13 / 7 / 2008 ميونخ .والنمسا وبلجيكا وهولندا . |
|
|
|
|
20-05-2009, 08:40 PM
|
#6 (permalink) | ||||
|
مسافر متميز
تاريخ التسجيل: Jul 2007
الدولة: الامارات
رقم العضوية :148376
المشاركات: 466
|
عندي ملاحظه للاخت miss_ana اللي قالت في تقرير اللي نزلته قبل ان انا رحلتي جديمه وان متحف اللوفر مافيه خريطه بالعربي انا صورت لج ها الخريطه
اقتباس:
اقتباس:
اقتباس:
اقتباس:
فديتج ها هو الدليل وهاي هي الصور وهني فتحت لكم اياها وصورتها كامله اتمنا ان الموضووع ينال اعجابكم وبعد اي ملاحظه انا موجوده واصلاا من الاساس ماله داعي احط صور غيري او جديمه او اجذب ترا اخر شي انا مابستفيد بس بزيد خبره للي بيسيرون قريب |
||||
|
|
|
|
21-05-2009, 05:11 PM
|
#8 (permalink) |
|
مسافر متميز
تاريخ التسجيل: May 2007
الدولة: الرياض
رقم العضوية :131613
المشاركات: 186
|
تقرير رائع أختي فراشة سويسرا وتسلم يديك
وألف مبروك على الزواج ... الله يوفقكم ويجمع قلوبكم على خير ..ويرزقكم الذرية الصالحة .. كنت بأسأل: أنا رايح في شهر 8 الجاي بإذن الله ومتردد بين الفندق الي سكنتيه الهلتون وبين ماريوتParis Marriott Rive Gauche Hotel & Conference Center وش رأيك !!؟ يهمني تكون الغرف واسعة وقريبة من الشانز وش تنصحيني؟؟ |
|
|
|
|
21-05-2009, 09:29 PM
|
#9 (permalink) | |
|
مسافر متميز
تاريخ التسجيل: Jul 2007
الدولة: الامارات
رقم العضوية :148376
المشاركات: 466
|
اقتباس:
تروح وترجع بالسلامه ،، والله شفت اللي في الصور الغرفه نفسها بالضبط الغرفه صغيره وع فكره فنادق اوروبا تقريبا كلها جذي ,, بس الفندق حلوو ومكانه حلوو وقريب من الشانز بس تمشي وانت تمشي رايح الشانز في سوبرماركت وستار بكس يعني حلوو انك تاخذ اغراضك من السوبرماركت وارخص وفي محل بعد قريب يبيع شرايح للتلفون ,,بس الماريوت بعد حلوو بس اللي ماعجبني فيه ان ع شارع الشانز يعني بالليل ازعاج وبعدين اغلى عن الهيلتون ,, والسموحه ع القصور واي استفسار فالك طيب |
|
|
|
|
|
23-05-2009, 11:05 PM
|
#14 (permalink) |
|
الكاتبة القديرة
 
تاريخ التسجيل: Jul 2005
الدولة: حبيبــــــــــ قطرــــــتي
رقم العضوية :34550
المشاركات: 4,921
|
مبين جدا انج استانستي وايد وونستينا معاج
واااااااااااااااااااااء ابي اسافر كله من الخنازير الي اربطت ريولنا واااااااااااااااااااااااااء (( اصيح من القهر )) |
|
|
|
|
24-05-2009, 02:32 AM
|
#15 (permalink) |
|
مسافر متميز
تاريخ التسجيل: Jun 2006
الدولة: الـريــــRiyadhــاض
رقم العضوية :88223
المشاركات: 542
|
الف الف مبروووووك على الزواج
الله يوفقكم بحياتكم ويسعدكم ويخليكم لبعضكم إن شاءلله التقرير حلو وتسلمين ما قصرتي وانا إن شاءلله ناوي أزورها و أزور الاماكن اللي ذكرتيها بالتقرير بأذن لله و أهم شي انتي استانستي في الرحلة الحمدلله تحياتي ،، |
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض العادي
|
|
|
الساعة الآن 04:37 AM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||