يا هلا والله فيكم واحب اقدم لكم جزء من تقريري عن احدى سفراتي للمغرب البلد الحبيب ،،،
وبسم الله ابداء تقرير باليوم المشهود اللي قررت فيه انا وخوي دربي ابو متعب للتوجه لقضاء اجازة نصف السنة قلنا يا ولد وش رايك قال ما يبيلها كلام خل نروح لذيك الديرة والله خويكم في الله ما صدق خبر وانا اصفق لابو متعب ومن الفرحه بغيت ارقص له والله واتفقنا على بركة الله حتى اذكر انه كان وقت صلاة المغرب والله ونصلي ونتوكل على الله لمكتب الحجز يخافون واحد منهم يهون عن الروحه والله وامشي انا وابو متعب متوجهين لمكتب الحجز والضحكة ما تفارقنا جعلها دوم انشالله لنا ولكم واخوكم في الله قال ما ايطلع الا التذكرة معه ما يبيلها كلام تعرفون لازم تسهر مع التذكرة وتحافظ عليها لانها هي اللي راح توصلك هناك والله وانقز للبيت واجهز الشنطة واغراض الطلعة تقول بنهاجر حنا وعفشنا وهي كلها 15 يوم بس والله احلى ايام المهم ونمشي لموعد الرحله وتعلن الخطوط السعودية اقلاع رحلتها ما يدرون اني محضر قبل الرحلة باربع ساعات قالك بيوصل بدري بس لا تلوموني ودي انزل من الطياره وادف حتى اوصل بدري ، والله ونوصل مطار محمد الخامس الله يعزه وننزل من الطياره الواحد ماهو مصدق حنا في حلم والا في علم المهم وانا اقول لخوي دربي ابو متعب ابيك تصطرني على اذني اشوف انا بحلم والا بعلم والرجال ما صدق حتى ما شاورني على طول ويعطيني ذاك المخمس بس قلت بعدين ارجعها لك لما نرجع الرياض والله وطلعت في علم ما ني بحلم بس بعد ايش ونمسك ذاك السرا اللي يذكرني بالسرا عند الخباز ايام اول الله لا يعيدها السرا واصل وسط الشارع المهم ختمنا الجوازات وعدينا بسلام قال ايش قال بخشيش وانا ناقصك تبي علك خذ قال سير صاحبي والله وانا اسير زي البرق واقابل السواق ديالنا الله يستر عليه حبيب وعلى كيفكم وعلى طول نطير للرباط وانواع التمشي والانبساط وناخذ لكم ذيك الشقة الواعرة بـ 800 درهم في اليوم بس تستـاهل ومعها شغالتها سعدية على كيفك انواع الطبخ تقول انك في بيتكم والله وننزل نتسوق

ونخليها تسوي لنا ذاك الطاجن بالبطاطس المقليه اللي ما يخرش الميه والله وناكل اصابعنا وراه ونمشي قلنا نريح بعد ازعاج الطياره والخطوط بس على فكرة نسيت اسألكم سبق أن شفتوا طيارة يطفونها وهي تطير ؟ الظاهر يبون يقتصدون في البنزين ، والله انا قلت شوي ويقولون انزلوا دفوا ؟ ما عاد الا هي .
شكلي طلعت من الموضوع معليش ارجع لموضوعنا والله ونطلع نتمشى في الرباط
[هذا معلم في الرباط يقولون له تسعة قرون انا ما شفت ولا قرن بس يقولون قبل الاستعمار الفرنسي بكثير
والله وناخذ كم لفه عليه بس والله حلو المبنى يدل على التراث العريق للمغرب .
وبعدها طلعنا قلنا ناخذ فواكه تعرفون الفواكه هناك لا تفوتكم شي عجيب والله ونرجع للشقة وحنا في الطريق صادفنا شي غريب قلنا نشوف ايش هذا تعرفون اللقافة مرات زينه

وندخل مع هذي البوابه والله الشرطي ما قال اي شي قلنا اكيد كان تكلم بيقول ادفع بس طلع شقردي وما قال كلمه والله وندخل المكان ايش هذا يا ابو متعب قالوالله علمي علمك ونسأل واحد داخل يا ابو الشباب ممكن سؤال والله مدري وش قال هو يسب والا يقول اسف المهم خليناه في حاله وخلانا في حالنا والله ودخلنا والا ذاك المنظر العجيب الغريب والله اذهلني مناظر واناره خافته قلنا الله هذي شكلها سينما متعودين على مصر والله وطلع شي ثاني اخليكم تشوفوه يمكن بالصوره يكون افضل

وبعد السؤال قالو لنا ان هذا قبر محمد الخامس وتشوفون الشخص اللي جالس هذا يقرا قرأن الظاهر اربع وعشرين ساعة هذي شغلته المهم شفنا الوضع كذا تذكرنا الموت قلنا نطلع يا ابو متعب قال تم والله ونمشي متوجهين للشقة للعشاء ونكمل السهره في احد المقاهي .
في احد الايام اللي قضيناها في الرباط قررنا انا نشوف البحر ونروح للشأطي اخونا في الله ابو متعب ناوي نيه يقول اذا ما خليتهم يختاروني لمنتخب السباحة في المغرب والله ونتوجه مع السواق للبحر وحنا في الطريق والا ذاك البحر المهم ويوقف السواق واخونا في الله ابو متعب سابقه بيسبح يا ابو الشباب لحظة خل نتفاهم شوي وهو راجع يقول مشينا المكان مايصلح شوفوا وين صار مودينا السواق

هذي مقبره على البحر شكلها مقبره خمس نجوم وناخذ كم صوره هناك ونمشي طبعاً بعد ما سلمنا على اهل القبور ماتلاحظون لناكم يوم ما نطيح الا في قبور الله يستر لا وقبور خمس نجوم .
والله ونتوجه للبحر الصدقي نبي نشوف بحر ونبي نصيد سمك بس ما معنا سناره لاكن ابو متعب ما يقصر انت قله هناك سمكه وشف وش راح يسوي ، يحمد ربه بغيت اسوي فيه مقلب بغيت ارسله على سمك قرش بس فكه الله وعدت على خير

هذا هو الكورنيش والله جوه حلو قضينا فيه اوقات ممتعة لا تفوتكم ، بس لا تسبحون كثير نصيحه
والله نطلع متوجهين لشقتنا ونمر ذيك الحديقة قلنا ناخذ فيها لفه مسوين نحب الطبيعةوالخضرة والله ونتمشى فيها وناخذ شاهي مغربي يحبه قلبك تحت احدى الاشجار (ونتبادل اطراف الحديث) سارقها من كتاب المطالعة حق اخوه

هذي الحديقة ديالنا اللي شربنا الشاهي المغربي فيها ،كني صرت امون صارت حديقتنا وبعدها رجعنا للشقة نخطط ليوم ومكان جديد
هذي الصورة لقطناها في الرجعة من الكورنيش مبنى حلو
وراح اوافيكم انشالله بتقرير عن باقي الرحلة في القريب العاجل .
بس على الله يعجبكم التقرير والصور الملحقة معه وهذي بس اول يومين وشلون الايام الباقية واشكركم على اهتمامكم وتقبلوا تحيات اخوكم Steef_Mna7ee

الأخ steev_mna7ee

وجودك معنا مكسب بلا شك
أخوي تقرير ممتاز ، موثق بالصور ، بدايه مشجعه جدا
أتمنى لك كل توفيق ، وننتظر بشوق أكمال ما بدأته مع اضافه تفاصيل أكثر

وهذاك اللي في الصوره طول اليوم شغلته يقرى قرآن عتد القبر أجل كم له من سنه على هالحال زين والله الشغله الحلوه يكسب أجر وفلوس

د الدرب
Bluee
مشكورين اخوي ولد الدرب واخوي بلو على مروركم الكريم اللي زادني شرف كبير وراح يعطيني الدافع اني انشالله اقدم اي شي يحوز ولو على جزء بسيط من رضاكم لأنه بصراحة المنتدى هذا حبيته والاعضاء الموجودين على متابعتي لهم حبيتهم في الله ، ونقول انشالله يوفقنا الله ونطلع جميع في سفره وحده وعلى طياره وحده بعد قولوا امين .

محسن1980
الكابتن فهد
SaudiMfls
TMEEM
الوحيد
مشكورين والله على مروركم وانشالله في القريب العاجل ننزل باقي التقرير ؟ حمستوني والله انتم
ما انسى اشكرك يا محسن على تقريرك اللي ماكل الجو الايام هذي ما شالله عليك صحيح خبير .
الكابتن فهد تقول الصور مقلوبه والله انا شكيت وراجعت الموضوع والصور والحمد لله كل حاجة في السليم يعني ومشكور على مرورك .
هلا بسعودي مفلس ؟ لا تقول مفلس على كذا كيف بتسافر المغرب لاكن ولا يهمك يا شيخ انت بس تمر المقابر اللي مريناها في الرباط وبتعين خير انشا الله ، وبخصوص الطياره والله مدري بس الخطوط المغربية ما تصلح الظاهر حتى طياراتهم ما تبيهم .
مرحبا اخوي تميم ومشكور على مرورك ، هلا والله فيك واحيي فيك شعورك الطيب .
الوحيد تسلم لي والله على مرورك وانت صادق كلنا مقصرين من ناحية الرباط وبصراحة انا ما احبها هي مرة وعدت .

لهاشمي
ابو لبنى
الشاكي الباكي
تسلمون لي والله على مرورك الكريم يا الزوينين والواعرين والله كذا تخلوني انزعط في المنتدى الزعطة الواعرة وفي اعضائه المتميزين ما شالله عليهم .
واحب ارحب برفيق دربي ابو لبنى حياك الله وراح صدقني تحب المنتدى واعضاء المنتدى كلهم واعرين .
وخذ البيتين هذي عشانك ولعيون اهل المنتدى
سلة فـواكه من بـساتـيـن مـكنــاس >>>>>> والــدار كــازا عــامــره بالمـسايـيـر
كتبت لك شوقي وانا اسج هوجاس >>>> وان هيضني الهوجاس انا اجيك يا طير