السلام عليكم ورحمة الله وبركاته

نبهني أحد الاخوه على ضرورة الاطلاع على موضوع الاخ المتفائل

وبعد ماقريت الموضوع ، وبعد شفت نداء أختي عنود الغيد تطالبني أني ارد

ولانني من ضمن بعض من الناس اللي تكلموا عن حليمه وسووا لها دعايه

فقلت لازم يكون لي رد في هذا الموضوع ..

في البدايه أحب أوضح اني انا ما استفيد حاجه من حليمه ، ولاهي من أهلي

ولا من اصدقائي عشان ادافع عنها ، ولكن انا بقول رأيي من وجهة نظري الشخصيه

اولا : كلام الأخ المتفائل لايعتبر دليل قاطع على تلاعب من قبل حليمه (( ان بعض الظن أثم ))

ثانيا : مش معنى انه حليمه تقول للناس عن العموله يعني انها نصابه ، ممكن تكون

صادقه وهي تنبهنا ورغم اني ما اذكر انها قالتي هذا الكلام .


وعلى سالفة العموله بخبركم عن موقفين صارلولي ويا حليمه واللي يأكد لي انها مب نصابه

نصابه ، بل بالعكس أحسها انسانه وايد صادقه وتخاف الله .

الموقف الاول ...

قبل ما اسافر الصين عملت بحثي عن كل شي ، وعرفت انه كلمة قوديان تعني عموله

وانه نتحذر من المترجم اذا سمعناه يقولها ، وفعلا هذا الموضوع كان في بالي وكنت دايما

اراقب حليمه لما تتكاسر وياهم اذا تقول هاي الكلمه ، وماسمعتها الا في هذاك اليوم اللي كنا

فيه في سوق الاضاءه واشترينا اضاءه من شركه كبيره بمبلغ محترم ، وانا يالسه اسمع

حليمه تكاسره من قلبها سمعت كلمة قوديان تتكرر من لسانها ومنه ، نقزني قلبي

وقلت في خاطري هاي هي الكلمه ، معقوله يالسه تطلب عموله ، لكن انا بصبر لين تخلص

وعقب بشوف شو بتقول ..

سار الريال اللي تكاسرت معاه والتفت حليمه النا ، وسألتها: شو صار حليمه بيوافق انه ينزلنا

ردت وقالت هو سألني انتي ماتبين عموله ، ما اقدر انزل السعر عشان اقدر اعطيج عموله

تقول حليمه : انا قلتله ما ابا عموله وانته نقصهم واذا انته مزيد عشان عمولتي فشيلها

وهو قالها بيكلم المدير وبيرد ، وبعدها نزل في السعر ولكن حليمه مارضت وحاولت تنزله أكثر

يومها تصارعت وياه من قلبها وقدرت انه تنزله أكثر .

(( وعلى فكره هذا المحل هي ما اختارته لي ، هي كانت مودتني محل ثاني تعرفه وانا

ماعجبتني بضاعته واخترت أنا هذا المحل ، عشان ماتقولون متفقه وياه )).

الموقف الثاني...
انه حليمه رجعت النا مبلغ قالت انه في محل عطاها عموله ، ولو هي خذتها نحن

ماكنا عرفنا .

مثل ما انته قلت موقف يا أخوي المتفائل خلاك تشك في حليمه ، اعتقد هاذيل

الموقفين بعد يخلون نظن الخير فيها ، وغير جذي انا ابدا ماحسيت انها تستغلني

او تخدعني ، بالعكس احسها وااااايد زينه وتعلمني في بعض المواقف شو اقول لراعي

المحل أكون انا المستفيده ، وفي اوقات كثيره كنت انا اتفق مع المحل وعقب هي اتي

ولما أتي كانت وايد تكاسرهم وساعات تتضارب وياهم ، والله انه ساعات يحترق قلبها

أكثر عني.

والواحد مايحكم على موقف ممكن يفسر بعدة تفسيرات ، ومانتهم حد الا بدليل قاطع

علشان مانظلم الحرمه خصوصا وهي مسلمه وتنتظر وليدها بعد فتره قصيره .

كل شخص نتعامل معاه له ايجابياته وسلبياته ، وحليمه من الناس



قريبا جدا ان شاءالله بنزل تقريري عن رحلتي الثانيه لكوانزو ، واللي كانت حليمه فيه

مترجمتي وبذكر السلبيات والايجابيات اللي شفتها من حليمه ، بس مش لدرجة حراميه

انا بريت ذمتي وعبرت عن رأيي في انسانه ماشفت منها الا الخير .




تحياتي ...

أم عيسى

أخويه انا مش ضدك ، ولا انا مع حليمه ، ولكن انا في رأيي لو ذكرت الموقف وممكن

تذكر اسمها ، وتقول انك شاك فيها وتطلب من الناس اللي تعاملوا وياها او بيتعاملون

وياها يتأكدون من هذا الشي ويؤكدون علينا ، بدون ماتحكم عليها وتحذر الناس منها

وتسوي بلبله وتخوف الناس منها وتقطع رزقها وهي ممكن تكون بريئه .


عموما جزاك الله خير وانته أكيد نيتك الخير النا وهذا مانشك فيه ..