مدة الرحلة : أسبوع فقط لا غير شامل أيضا ( وقت رحلات الطيران ) !

تاريخ الرحلة: 1 /2008/7 الى 7 /2008/7

عدد الأشخاص : واحد (أنا فقط )

الطيران : مصر للطيران - خط مباشر (القاهرة – بانكوك). حوالي 9 ساعات ونص دايركت

لازم أخد قرار: أروح الهند و لا أروح تركيا و لا تايلاند ؟؟؟؟!!

بصراحة قراري للسفر لتايلاند جاء فجأة ، حيث كنت أفكر كيف سأقضي أجازتي القصيرة في يوليو و هي أسبوع فقط ، أنا معتادي قضاء اجازتي الصيفية غالبا مع عائلتي و غالبا ما نسافر كل عام الى مقرنا الصيفي بشقتنا في مدينة مرسى مطروح على البحر المتوسط في غرب مصر. و قليلا ما كنا نسافر للخارج للأننا أصلا كنا نعيش بالخارج فترة كبيرة لذلك كانت اجازة والدي دائما نزور وطننا مصر لزيارة أقربائنا في القاهرة . لكن شعرت بملل كبير للذهاب كل عام لنفس المكان ( مرسى مطروح) اللي نسافر له على مدى 10 سنوات متتالية لذلك جاء قرار سفري للخارج هذا العام.

القرار بالنسبة لي بقضاء أجازتي خارج مصر وليس مع أي أحد من عائلتي، كان صعب الى حد ما ( ميزانية محدودة حوالي 1000 الى 1300 دولار لكل الرحلة ) طبعا قرار صعب لأن مبلغ زي ده في بداية حياتي العملية يعتبر كبير بس قلت وماله السفر متعة لا يضاهيها متعة أي نعم مبلغ ممكن يكون قليل بس حأحاول أكيف نفسي في حدود امكنياتي المادية. و قررت أبحث على النت : فكرت أروح الهند بناءا على دعوة أحد أصدقائي الهنود و لكن وجدت ان الهند دولة كبيييييرة جد في المساحة ومحتاجة وقت أطول من أسبوع ، فكرت أروح تركيا و بالفعل أخذت جولة على شركات السياحة التي بتعامل معها بحكم عملي كمرشد سياحي في مصر للسائحين من متكلمي الانجليزية حيث لنا امتيازات كثيرة و عروض وخصومات على الفنادق و تذاكر مصر للطيران ... الخ ، و ادوني أسعار كويسة جدا بس حوالي 500 دولار طيران وفنادق ( يا بلاش) و قررت اخيرا ورتبت نفسي خلاص على تركيا ا و قررت أروح للسفارة التركية في القاهرة بس وصلت متأخر بسبب الزحمة و كان يوم خميس قلت مافيش مشاكل الفيزا لتركيا بتطلع بسرعة ، بس حصل حاجة خلتني أغير رأيي ... جه فيلم حرامية في تايلاند بالليل يوم الخميس و أنا بتفرج قلت في عقل ايه رأيك في تايلاند بدل تركيا ..... وكان ... بسرعة قعدت أبحث على النت و رتبت كل حاجة على النت بداية من حجز تذكرة مصر للطيران لبانكوك مباشر 3500 جنيه مصري الى حجز فندق رخيص وكويس في بانكوك بالقرب من المعالم والآثار ... كل ده وأنا قاعد في البيت في أقل من 3 ساعات كنت مظبط كل حاجة هههههههههه و ناقص بس التـاشيرة لتايلاند . و استنيت ليوم الأحد علشان السفارة تفتح و رحت عملت الفيزا في أقل من 3 أيام بكل يسر.... و استعديت للسفر على خيرة الله .....

لكن قبل السفر بحوالي 4 أيام اتصل بي مدير أحد شركات السياحة في مصر ليطلب مني ان أكون مرشد لسائحين من رومانيا وحددوا له انهم يريدوني أنا بالتحديد لأن أقربء لهم جاؤا مصر العام السابق و قلت له بس بصراحة حتبقى صعب جدا اني أسافر و قلت له الوقت محدود كان برنامجهم السياحي في مصر ( آثار صعيد مصر المنيا ، سوهاج ، الأقصر ، ثم العودة عن طريق الغردقة كل ده في 4 أيام !!!!!!!!!!!!!!!!) فاعتذرت بلباقة عن هذه الرحلة ، بعد ربع ساعة وجدت نفس الشخص يتصل و يترجاني للذهاب معهم ، كنت خايف لأتأخر و سفر كبير حوالي 800 كم رايح و 800 جاي و بالسيارة هلاااااااااااااااك وكمان لسه أسافر 9 ساعات طيران في نفس يوم العودة من الغردقة !!!!!!!!!!! المهم الراجل قال لي معلش و حاول و أوعدك حتوصل القاهرة صباح يوم طيارتك كمان علشان يبقى عندك وقت تريح فيه وفي النهاية وافقت

ما قبل السفر

وطلعت رحلة العمل مع الناس الرومانيين لصعيد مصر كانت مهلكة للغاية بس كانت ممتعة برضه والحمد لله صلت يوم السفربالضبط للقاهرة الساعة 10 صباحا و رحت منزلي في الهرم هلكان ونفسي أنام بس في مشكلة لسه موضبطش شنطتي ... رحت واخد نفس شنطتي وضفت عليها حاجات و اللابتوب و الكاميرا و الموبايل . كانت الساعة حوالي 1 ظ ، المفروض أتحرك لمطار القاهرة الدولي حوالي 5 علشان أوصل على الأقل 7 أو 8 م علشان الشيك ان للطيارة اللي حتطير الساعة 10 م .

المهم بابا هو اللي وصلني للمطار بس الطريق كان واااااااااقف وقفة !!!!! ، طبعا انتوا عارفين زحمة القاهرة ، الساعة وصلت 7 و نص ولسه موصلتش !!!! 8 لسه لغاية لما وصلت حوالي 8 وربع الحمد لله وصلت ، رحت أصلي المغرب والعشاء وودعت بابا وماما وأختي ....

بس شعور غريب جدا حسيته و أنا بودعهم ، كنت فرحان جدا للسفر بس كنت حزين جد في نفس الوقت وضاعت سعادة السفر اللي كنت حاسس بيها ،،، ولقيت ماما وبابا فضلوا يبصوا عليا لغاية لما دخلت منطقة المغادرين المحظورة ووزنت شنطتي و لا حظت متابعة عيون بابا وماما لي و عينهم كان فيها دموع و أنا بدأت أدمع برضه من جوايا رغم ان كل الحكاية أسبوع لغاية لما اختفوا و ذهبت للجوازات ، وكلوا مشي تمام و بسهولة بالذات لما يعرفوا اني مرشد سياحي ... و استعدينا للصعود للطيارة كانت حوالي 9 و تلت .

قلت اتصل بماما وبابا وحشوني رغم اني لسه مغادرتش مصر وشايفهم من ساعة فقط ... على فكرة بعد لما تدخل منطقة المغادرين في مطار القاهرة الخط المصري (اتصالات ) يشغل خدمة التجوال أوتوماتيك . حتى لو مازلت داخل مصر !!!! يعنى لما تعمل مكالمات لداخل مصر تحسب وكأنها دولي !!!!

وجاء الصعود للطيارة و قعدنا شوية حوالي 20 دقيقة وقبلها ب 5 دقايق على الاقلاع اتصلت بماما تاني و قلتلها ادعيلي يا ماما ربنا يحفظني ...... معرفش ليه كنت زعلان و خايف ومرعوب يمكن علشان أول مرة أسافر للخارج لوحدي بدون والداي .... يمكن لأني أول مره أسافر رحلة طيران طويلة زي دي و لكني ياما ركبت طيران و بحبه ... معرفش !! بس قلت في نفسي الحافظ هو الله في أي مكان في الدنيا و قعدت أقرا قرآن و دعاء السفر . و أعلن الكابتن عن الرحلة و أقلعت الطائرة بسلام.



الى اللقاء ... في الجزء القادم " على الطائرة الى بانكوك "

انتظروني ... و معذرة اذا كان اسلوبي ركيك لغويا ( مزيج من فصحى و لهجة مصرية ) لأن مبألفش كتير بالعربي الفصحى ومعظم دراساتي وأبحاثي بالانجليزي .