وخروا عني أنا ييت

كيف حالك بومحمد وشو أخبار حمودي ان شاءالله كل الاسره في صحه وعافيه

انا بعطيك بعض المعلومات وان شاء الله تفيدك ياطويل العمر

انا سرت في عام 2001 ماليزيا وزرت جزيرة بينانغ ولانكاوي

وقتها يلسنا في بينانغ اسبوع ومنها رحلة يوم واحد ورجعنا فيه زرنا لانكاوي بالبحر

بالنسبه للنكاوي أنا شفتها حلوه ولكن لانه سفرنا كان في الصيف فالجو كان حار ومشمس وهو

اللي نكد علينا رحلتنا ، واذكر في هذا اليوم زرنا حديقة خاصه بالثعابين وكان فيها عرض للأناكوندا

ويومها حطيت الاناكوندا الصغيره على كتفي .

وأذكر بعد زرنا الاكواريوم ( الأحياء المائيه ).

اما بينانج الصراحه نسيت اسم الفندق اللي سكنا فيه ، ولكن بما انكم شباب فوايد بتنبسطون

على الرياضات المائيه ، انا ما عجبتني وايد بينانج وتندمنا انه سكنا فيها اسبوع ، وانصح بزيارة

مزرعة الفواكه ، وايد حلوه لو الجو جميل ، اما حديقة الطيور ما انصح بزيارتها لأنه كانت فيها روائح خايسه

ولاأنصح بزيارة اسواق الجزيره ، لأنه اسواق كوالامبور أجمل بوايد .

أذكر في جبل صعدناه بالتلفريك وكانت المناظر حلوه من فوق ، اسمه مرتفع بينانج penang hill

عموما بيفيدكم الفندق بالاماكن السياحيه اللي عندهم .

بعض الاماكن السياحيه اللي سمعت انها موجوده بس مازرتها :

مزرعة الفراشات + معبد الثعابين + وحديقة العصافير

وحديقة بينانج botanical gardens وهاي الحديقه زرناها من برع يعني مادخلناها واكتفينا باطعام

القرود اللي موجودين قبل الحديقه ، واعتقد داخل الحديقه فيها شلالات ، واذكر قريب من الحديقه

زرنا مرتفع بينانج .

كل رحلاتنا في هاي الجزيره ماخرب عليها الا الجو .

الحين بنتكلم عن كوالامبور آخر مره زرتها في سنة 2004 ويلست كل المده فيها وهي 17 يوم

ومامليت منها ، وسكنا في برجيا تايم سكوير .

نتكلم عن السكن :

وااايد روعه وفيه نظام شقق وغرف ، ونحن اذكر أخذنا شقه أم غرفتين وصاله ومطبخ وحمامين

مع الافطار ، ميزة الفندق انه فيه كل شي ، يعني في داخله مدينة العاب حلوه للصغار والكبار

وفيه مول كبير ، ومن داخل المول نسيت أي طابق تطلع على محطة القطار ، والقطار معلق تركبه

مسافة يمكن دقيقتين يوصلك للمنطقه اللي ورا فندق برجايا جهة فندق ريجنيت ، هاي المنطقه

تعج بالاسواق والفنادق والمطاعم العربيه والحياه .

تحت فندق برجيا في ستاربكس واليلسه فيه تطل على الخارج ، حلوه اليلسه فيه .

من الاسواق اللي حبيتها المول اللي ملاصق للبرجين المشهورين في ماليزيا

وعندهم بعد السوق الصيني ، واللي فيه الشنط المقلده وهو مثل الصنادق والمكان جدا ضيق

ومن المولات اللي حبيتها في كوالامبور ، ميجا مول وهو كبير وفيه سينما .

وانته في كوالامبور أنصح بزيارة صن واي لاجون فيه سنتر تسوق ، والعاب مائيه

وزيارة مرتفع جنتنج وخذوا جاكيتاتكم لأنه المكان باااااارد .

وممكن زيارة مرتفع الكاميرون ، وطبعا هاي المرتفعات تبعد بالسياره عن كوالامبور بالساعات

يعني يبالها طلعه من بدري ، وطبعا تأجرون تاكسي وتتفقون معاه انه يكون معاكم كل الرحله

لين يرجعكم الفندق ، الصراحه مرتفع الكاميرون لو انه بعيد بس انا حبيته وايد ، واذكر اني كنت

ساكنه في مرتفع جنتنج ومنه طلعت على الكاميرون وهذا الكلام كان في 2001

وما أدري بالضبط كم يبعد عن كوالامبور .

شو بعد ياهداوه ...

كوالامبور واااايد جميله وحبيتها واااايد ، وعيالي يتمنون يزورونها مره ثانيه ، وفيها وايد أماكن

تستحق الزياره ، أيوه ذكرت منتجع فاموسا ، وهذا سرناله بالقطار وبتنا فيه يومين ، وفي المنتجع

عندهم نظام شاليها ونظام شقق وفندق ، وانا انصح بالفندق .

وهذا المنتجع فيه وايد أشياء حلوه مثل سفاري + الالعاب المائيه ، نسيت بعد شو فيه

أذكر لما سافرت آخر مره لماليزيا سنة 2004 كنت حامل في شهري السابع بولدي الصغير دودي

وكانت حركتي قليله ، في الصباح بعد الافطار في البوفيه ارجع اريح في الشقه وعيالي يسيرون

ويا ابوهم في حوض السباحه الخاص ببرجايا ، ووايد كانوا يستمتعون ، وانا اطبخ لهم الغدا

هذا كل اللي اسعفتني ذاكرتي ، وبيني وبينك بنتي كوكي فتحتلي شريط الفيديو لسفرة ماليزيا

علشان تنعش ذاكرتي

اتمنى اني افدتك يابومحمد وأي سؤال انا حاضر

هداوه ...