الجزء الثالث : تلفريك لنكاوي الرااااائع وحديقة لاجندا وميدان النسر ..

بعد حديقة الفواكه طلعنا لتلفريك لنكاوي .. وهذي صورتين من الطريق





أجمل تلفريك رأيته .. وهو يقع في منطقة اسمها القرية الشرقية .. وهذي صورة للبحيرة وسط القرية ..



وفيها محلات ومطاعم منتشرة حول البحيرة ..

ركبنا التلفريك وهذي صورة في أول الإنطلاقة ..





وهذي صورة للشلال من التلفريك





وهنا بعض الصور قبل الوصول للمحطة الوسطى ..







وصلنا للمحطة الوسطى وكان الجو ممطر مثل ماشفتوا بالصور السابقة .. وهنا بعض الصور للمحطة الوسطى ..







فيديو 872 kb

ماصورت كل المنطقة لأن فيها ناس ..

http://www.thahoo.com/waleed/langkawi/2.rm


كملنا طريقنا للمحطة الأخيرة وهي اعلى منطقة يصلها التلفريك وهي منطقة مرتفعة جدا وهذي بعض الصور لها
















فيديو .. 2.83 mb

http://www.thahoo.com/waleed/langkawi/3.rm


وإذا كان الجو ممطر تحت في المحطة الأولى أو فيه هوا قوي .. يقفلون التلفريك ..

بعد التلفريك أخذنا غدانا وعلى الفندق مباشرة ..

قلت للسواق يجيني بحدود الساعة 1 الظهر من الغد ..

الفجر نزلنا للفطور والجو كالعادة كان رايق وممطر بشكل متواصل أكثر من الأيام السابقة ..

بعد الفطور طلعنا لشاطيء الفندق وكان فاااااضي مافيه إلا حنا .. بسبب أن الجو مغيم وممطر .. العادة الأجانب مايجون للشواطيء إلا علشان يتشمسون ويلعبون ..

ماشفنا إلا عايلتين سعودية جلسوا فترة بسيطة ومشوا .. والشاطيء كان كبير وحنا احتلينا الجهة البعيدة عن الفندق ..

جلسنا من الساعة 8 أو 9 تقريبا إلى 12 .. وماكان ودنا نبعد عن الشاطيء لأنه كان آخر يوم لنا في لانكاوي ..

وهنا ملفات فيديو للشاطيء والجو ممطر وراااائع جدا ..

http://www.thahoo.com/waleed/langkawi/sha6e1.rm

http://www.thahoo.com/waleed/langkawi/sha6e2.rm

جاء السواق .. وطلعنا لحديقة لاجندا وميدان النسر .. وهذه المنطقة هي المنطقة الرئيسية بالنسبة لبحر لانكاوي ..

هذي صور من حديقة لاجندا [ الرايقة ]



























وهنا يظهر ميدان النسر من حديقة لاجندا ..










يتبع

توجهنا لميدان النسر .. وهذي بعض الصور ..












































فيديو .. 1.70 mb

http://www.thahoo.com/waleed/langkawi/nsr.rm


الجزء الرابع والأخير .. بعض الملاحظات والنصائح بشأن الأكل والصرف وتحويل العملة ..

الجزء الرابع والأخير ..

أبتكلم شوي عن ماليزيا والصرف والأكل .. وكله يمثل وجهة نظري الشخصية وتجربتي هناك .. قد يكون شخص آخر لديه تعليق على بعض ماأكتب .. فلا بأس بذلك .. لنستفيد جميعا ..


الشعب الماليزي شعب طيب وخدوم ويفرح بالزائر .. لكن المصيبة من الصينيين والهندوس .. كثيرين هناك .. والصينيين مسيطرين على التجارة .. وتعاملهم سيء ..

طبعا فيه منهم الطيب لكن هذا الغالب عليهم والمعروف عنهم .. لذلك قدر الإمكان الواحد يحاول مايتعامل معهم خصوصا في التاكسي ..

المالاوي فيه منهم الاستغلاليين لكن هالنوع اللي عنده تصور أن الخليجيين يكبون فلوس وهو طماع .. فيستغل على كل حركة ..

فيه سواق مالاوي .. تعاملت معه آخر يومين في كوالالمبور .. حبيب وماشاء الله عليه ماتقضي سواليفه .. يعرف عربي.. لما وصلنا المطار نزل معي وبدا هو اللي يسوي لي كل شيء وأنا ماطلبت يوم خلصنا قال عطني فلوس زيادة غير فلوس التوصيل لأني ساعدتك .. عاد وأنا بالمطار كان معي كم رنقت والباقي حولتهن للريال السعودي .. قلت فرصة نتصدق عليه بهن .. وعطيته يمكن حدود 15 رنقت .. بس ماقصر كرف وشال الشنط وقام يطامر بالمطار ..


الجو هناك ثابت طول السنة مايعرفون شيء اسمه شتاء ولا شيء اسمه صيف .. جو واحد متوسطه بين 28 درجة إلى 33 درجة .. قلييل ينزل عنها أو يطلع .. طبعا الأجواء غائمة وممطرة طول السنة وتكون كثيرة بوقت وقليلة بوقت ..

تقول لي أبي امشي في كوالالمبور الظهر والجو مشمس .. أقول لك بتحتر الله يعينك خصوصا المشي الكثير .. واسأل مجرب ..

فريت حديقة الطيور قبل الظهر في كوالالمبور .. وكان الجو مشمس وحار .. فتعبت لأني مشيت مسافة طويلة ..



الأسعار تختلف على حسب الشيء اللي بتدفع عليه ..

تقول فنادق .. فنادق الخمس نجوم هناك أرخص من فنادق الخمس نجوم هنا بنص السعر .. لكن في حالة إنك عرفت كيف تحجز .. لاتحجز عن طريق مكاتب السفر والسياحة .. تراهم نصابين يزيد لك على سعر الغرفة 200 إلى 400 رنقت بالراحة ! أنا حجزت عن طريق شخص هناك وطلعت علي الأسعار جيدة ومعقولة ..


بالنسبة للي مايدل شيء .. مافيه أحد يعرف شيء بدون مايبحث ويسأل .. إذا حبيت تروح لازم تسأل وتقرأ تقارير كثيرة وتأخذ معك دليل سياحي مطبوع . وتلقاه منتشر بالمواقع والناس ماشاء الله مايقصرون خصوصا السياحة في ماليزيا تلقى لها أدلة سياحية كثيرة .. فيها أحسن المطاعم والفنادق والمنتزهات مع توصيف لأماكنها وأسماء الشوارع

وقتها بتروح متطمن لأنك بتصير عارف كل شيء إن شاء الله ..



وقت سفرتي كان أقل فترات وجود العرب في ماليزيا حسب علمي ..

كنت أسمع من اللي راحوا أن العرب وخصوصا الخليجيين كل مارحت مكان تحصلهم بكثرة ..

لكن بالنسبة لي قليل أشوفهم وإذا شفت عائلة سعودية فهم اللي كانوا معنا بالطيارة

يوم نروح كانت الطيارة فااااااااااضية كانوا الناس يأخذون الخمس مقاعد اللي بالنص ويقلبونهن أسرة وأنواع النوم .. ومع ذلك كان فيه مقاعد فاضية كثييير ..

السواح قليل وأغلبهم صينيين وقليل أوربيين وعرب .. وبعض الأماكن في لانكاوي إذا رحت لها مايكون فيها إلا أنا لحالي .. مثل حديقة الفواكه على كبرها وشهرتها بلنكاوي ..

رخص الأسعار .. بعض الفنادق عندها أسعار موسمية .. وغالبا تكون نهايتها بنهاية شهر أغسطس .. فاستفدت من هالشيء ..



بالنسبة للأكل .. في لانكاوي لاتدور غير ماكدونالدز وكنتاكي .. ولا فيه فروع عالمية أخرى ..

قريت في بعض الأدلة السياحية عن مطاعم عربية هناك وقلت بنغير ونجربها .. فيه مطعم لقيت في النت كم نفر يمدحه اسمه التلاقي .. قلت للسواق يوصلني له .. طبعا المنيو مليان ولما تطلب يقول لك مافيه .. الا قائمة المشويات والرز والمقبلات .. ومهب كلها بس أصناف معينة ..

أخذت رز بـ 25 رنقت .. طبعا بدون دجاج ولا لحم .. وطلع يالله يكفي اثنين .. أصلا على حاله هذا لو بتحطه عند عشرة ماخلصوه .. لأنه الله يكرم النعمة سيء ..

ومشويات مشكل مدري بكم يمكن بحدود 60 رنقت .. والله يكرم النعمة صح مستساغ .. بس الجودة متدنية بصراحة ..

الأسعار غالية جدا على الكمية اللي يحطونها لك .. كأنك تشحذ ..

وجربت مطعم ثاني عربي اسمه سوريا .. وأردى من اللي قبله .. وعقبها ماتعديت ماكدونالدز في لنكاوي ..


طبعا لأن السياح العرب كثيرين .. فبعض الناس هناك استغلاليين .. مسوي أكل عربي ومدري ايش وضارب الأسعار فوق ..

في كوالالمبور الخيارات أوسع .. فيه ماكدونالدز كنتاكي تشيليز برجر كنج بيتزا هات .. وفيه مطعم عربي اسمه المرجان في الدور الرابع من سوق البرجين .. شغله نظيف وجيد وجودته لابأس .. وسعره معقول ..

وفيه مطاعم عربية في كوالالمبور مثل الطربوش وخيمة الصحراء .. أكلهم مافيه زود وغالي على غير سنع ..

طبعا فيه مطاعم كثيرة هناك خصوصا الصينية .. لكن ماتضمن أنها حلال ..

ولازم الواحد ينتبه للي يشتريه للأكل سواء من مطعم أو حتى سوبر ماركت .. بالنسبة للمطاعم العالمية أغلبها حلال ومن باب التأكد اسأل اللي يبيع .. والسوبر ماركت أي شيء حلال بتلقى مطبوع عليه ختم حلال باللغة العربية والانجليزية ..

وكل وأنت متطمن لأن الحكومة هناك مسلمة وتتابع هالامور ..




الصرف والتحويل ..


فيه عدة طرق يتكلمون فيها الناس منها ..

1_تحويل الريالات إلى دولار أمريكي وإذا وصلت هناك تحوله إلى رنقت ماليزي - وهذي الطريقة ماعندي استعداد أسويها ..

2_ تأخذ معك كاش ريالات سعودي .. ( طبعا مهب كل المبالغ .. بس جزء ) وتحوله هناك إلى رنقت ماليزي .. وهذي طريقة معقولة خصوصا أني شفت هناك سعر التحويل بين الريال والرنقت ممتاز .. بين 95 إلى 98 للـ 100 ..

طبعا ابتعد عن التحويل في المطارات أو في الفنادق لأن سعر الصرف عنده فيه فرق كبير .. أو عند الصرافين المتجولين لأنهم ممكن يعطونك شيء مزور ..

فيه صرافين كثيرين في سوق البرجين وفيه منهم اللي أسعاره معقولة .. وفيه صرافين يمدحونهم في سوق اسمه الميجا مول في كوالا لكني مامريت عليه ولا شفته ..

3_ تحط فلوسك كلها في البنك .. وطبعا توزعها على أكثر من حساب من باب الاحتياط .. وتسحب هناك من بطاقة الصراف الآلي ATM العادية اللي تسحب فيها بالسعودية .. لكن أهم شيء أن بطاقة الصراف اللي معك فيها الشعارات اللي تدل على أنها تشتغل برا مثل .. maestro و Cirrus أما إذا كان مافيها إلا الشبكة السعودية والخليجية فما راح تشتغل معك هناك .. على حسب علمي .. وتقدر تطلب من البنك يعدلها ..

إذا استخدمت هالطريقة بياخذ البنك عليك فرق العملة + رسوم السحب الدولي وهي 60 ريال تقريبا .. في كل عملية سحب .. فاحرص أنك إذا جيت تسجب اسحب أعلى حد تعطيك آلة الصراف حتى لو كنت ماتحتاج إلا 300 رنقت .. فيه صرافات بنك ماي بنك .. تعطيك كحد أعلى 1500 رنقت وتقدر تسحب مرتين ورى بعض فيصير معك 3000 رنقت .. ومثل ماقلنا في كل عملية سحب ياخذون فرق عملة و 60 ريال كرسوم .. أغلب الصرافات الثانية ماتعطيك إلا 1000 رنقت في المرة الوحدة .. وأعلى عملة ورقية عندهم هي 50 رنقت ..


4_ بطاقات الائتمان .. فيزا وماستر كارد .. هذي لازم تكون دقيق فيها حتى ماتقع في الربا .. وفيه بنوك عندهم فيزا اسلامية لكن ماادري وش طريقتها بصراحة ..

لكن فيه خدمة حلوة عند البنك الأهلي .. وهي الماستر كارد المدفوع مسبقا .. وعلشان تطلعها مايحتاج تفتح حساب عند الأهلي لكن ميزاتها راااائعة واسلامية 100%

تطلعها بـ 100 ريال .. وتشحنها بالمبلغ اللي تحب .. ومقبولة في كل مكان في العالم وتستخدم على انها ماستر كارد عادية ..

بس بدل ماتسحب من فلوس البنك ثم بعد كم يوم ياخذون البنك من رصيدك فلوسهم وفوقها فوائد .. تصير تسحب من فلوسك مباشرة عن طريق الماستر كارد والبنك مايأخذ منك فوائد ..

ومن ميزاتها أنك تقدر تستخدمها في السحب الدولي على الصرافات .. زي بطاقات الصراف العادية .. بس هذي أحسن .. لأنهم بيأخذون عليك فرق العملة بس .. ولا راح ياخذون عليك رسوم السحب الدولي الـ 60 ريال .. يعني اسحب في اليوم 20 مرة ماعليك رسوم غير فرق العملة ..

وأنصح أي واحد بيسافر لأي دولة بالعالم يأخذ هالبطاقة المسبقة الدفع .. وتحط فيها فلوسك .. وتسحب زي ماتبي .. وتقدر تستخدمها على الشبكات في المحلات وعلى الصرافات بأي مكان ..


وأي استفسار حنا بالخدمة ..



وأتمنى أشوف التفاعل من البقية خصوصا بعد اكتمال التقرير .. لأني بصراحة متوقع تفاعل أقوى من كذا بكثير ..