بسم الله الرحمن الرحيم



* تجهيزات السفر *


في البداية احب اشكر كل من ساعدني ، وكل من افادني
90% من معلوماتي عن المكان اللي بروح له ، من هالمنتدى .. الله يعطيكم الف عافية


/


من حوالي سنة ، كنت ادور بالمنتديات لين طحت على هالمنتدى
وقمت اتصفح مواضيعه ، واعجبت بدول كثيرة .. لكن اكثر شي شدني النمسا
بالتحديد زيل ام سي ، كنت الاحظ تقريباً كل من راح لهالديرة يجي ويمدح فيها
واتفرج على صور الديرة اعجبتني مره

فـ كان حلم من احلامي اني اروح النمسا.



قبل العطلة الصيفية بـ شهر تقريباً تحمست لفكرة اني اروح للنمسا
بمان اني اعرف عنها اكثر من اي بلد ثاني ، صملت اني اروح للنمسا
خلاص .. حطيت في بالي ابي النمسا ، والله المعين .


/



أول شي سويته رحت لمكتب سياحة واستفسرت من عنده
وعطاني معلومات عامة عن التذاكر والفنادق

قالي التذكرة 3200 ريال الشخص
والفنادق تقريباً 12 الف ريال
وحذرني ، قالي اول شي واهم شي تسويه انك الحين تحجز طيران
وبعدها سو كل شي


بس انا ما اخذت بكلامه ، وخلاص اهم شي اخذت معلومات عامة
خلني اخلص دراسة واتفرغ للسفرة وطلباتها



اول ماخلصت ، رحت ادور حجز .. ماعاد فيه كل شي فل
او انتظار ، طبعاً هالكلام عن الخطوط السعودية

رحت ادور طيران ثاني .. زين لقيت طيران الامارات
بس طبعاً فرق السعر ،

يعني اخذت التذكرة بـ 4339 ريال
يعني طلعت علي التذكرتين 8678 ريال

قلت اقول امسك قردك لايجيك اقرد منه


وحجزت بتاريخ 26/7/2008 ترانزيت من الرياض الى فيينا مروراً بـ دبي ( 10 ساعات )

والعودة من فيينا لـ دبي 11/8/2008
ومن دبي الى الرياض 13/8/2008


/


رحت مكتب الطيار ، ادور حجز فنادق كامل المدة
طلع علي تقريباً 15 ليلة بـ 11 الف ريال


قلت بتهور وبتفلسف وبحجز بنفسي

رحت قريت عن طريقة حجز الفنادق وبصراحة اكتشفت انه شي سهل
ويعطيك خيارات اكثر ، وتتفرج لين تمل ، وتقرا في الفندق جميع ميزاته
فـ صملت احجز بنفسي .. والحمدلله حجزت وتيسرت الامور

من موقع Booking.com online hotel reservations
وموقع Hotel Reservations. Discount Hotels Worldwide

وهذا موقع يبحث لك في اكثر من ثلاثين موقع حجز فنادق ، رهيب الموقع
Compare Hotel Prices from Top Hotel Reservation Sites



وهاذي اسعار الفنادق :

* فيينا 3 ليالي 1195 ريال فندق Airo Tower Hotel Vienna
* زيل ام سي 5 ليالي 3960 ريال فندق Living Max
* سالزبورغ 3 ليالي 966 ريال سكنت عند عجوز بيتها زي الفندق
* ميونخ 3 ليالي 1557 ريال فندق K+K am Harras Hotel Munich
* دبي ليلتين 600 ريال فندق Grand Moov Hotel

/


طبعاً سألت عن فيزا الشنغن
وهاذي طلباتهم :



- طلب معباء بالكامل بالانجليزي تحمله من موقع السفارة. ( ابلكيشن )
- صورتين ملونه مكشوفه الراس.
- جواز سفر وصورة له.
- خطاب تعرف عمل من الوالد مع صوره للخطاب
بدون تفويض وماتفويض ، مجرد خطاب عمل من جهة عمله
ان كان جهة حكومة كويس .. وان كان قطاع خاص
لازم تصديق من الغرفة التجارية.
- كشف حساب .. وبعد هذا كشف حساب الوالد بدون اي شي زيادة
كشف حساب لمدة 6 اشهر عطيتهم .. ويكون فيه اكثر من 30 الف ريال.
- تأمين صحي .. يغطي كاااااافة مدة السفر ، لو نقص يوم رجعوك.
- حجز طيران .. صورة من التذاكر الالكترونيه بس .
- مبلغ 355 ريال للسفارة لكل طلب ( ابلكيشن ) كاش طبعاً
مافيه شبكة هناك خخخخخخخ.
- حجز فنادق .. لكاااااااامل المدة .. وطبعاً هالشرط
هو اللي اكثر الناس تنرفض طلباتهم بسبته ،
اول شي لازم تكون اكثر من نص المدة في النمسا
يعني فرضاً ناوي تروح للنمسا والمانيا .. ومدة رحلتك 15 يوم
لو كان في المانيا 10 ايام ، والنمسا 5 ايام
حتى لو تذاكر السفر ذهاب الى فيينا وعودة من فيينا
مايقبلون .. اهم شي .. اكثر من نص المدة في النمسا
اتمنى وصلت المعلومة.


طبعاً فيه واحد من المقدمين على الفيزا ، تذاكره على باريس
ذهاب وعودة .. وحجز فنادقه كلها بالنمسا .. رفضوه
يقولون لا انت تلعب علينا .. خخخخخخ قافطينه ، فاهمين لعبته

هاذي طلباتهم كاملة .



نصائح شخصية :

1- انصح اي واحد ناوي يروح للسفارة ويبي يخلص بدري
حاول تكون عندهم 7 ونص الصباح ، عشان تسجل اسمك عند حق الامن
ورح افطر وتعال قبل الساعه 9 عشان تدخل بدري ، وتخلص بدري
طبعاً يبدا تقديم الطلبات من 9 - 11

2- ان دخلت ، فيه ثنين .. يماني ولبنانية
اليماني اسمه علي .. ويتساعد معك
عكس اللبنانية الله يهديها .. متشددة مره
قليييل من تقبل اوراقه ، فـ نصيحة تروحون للاخ علي
حتى يعني لو فيه نقص بسيط ، يمشيك رهيب


3- ان عطوك موعد ، تعال لهم بعد 10 ايام .. بدون ماتدق عليهم
لان فيه بعض الاخوان يدقون عليهم يقولون لا توها ماخلصت تأشيرتكم
مع انها خالصة من زمان .. فـ نصيحة رح بنفسك وشف اريح لك




طبعاً انا قدمت اوراقي 29/6

وكل اوراقي كانت كاملة ، بس كان عندي التأمين
مايغطي كافة ايام السفر ، فـ رجعت لهم 30/6
وقدمت اوراقي، واخذوها وعطاني وصل وقال تعال بعد 10 ايام


جيتهم يوم 12/7 يعني بعد 12 يوم من تقديم الفيزا ،
دخلت واستلمت الجوازات بسرعه . بدون سرا ولا اي شي
عشاني بستلم الجوازات ، مو بقدم طلب


يوم شفت الفيزا تم اصدارها تاريخ 8/7 يعني قبل اربعة ايام
يعني اخذت الفيزا .. 8 ايام بس

* استئجار السيارة *


اول شي ماكنت ناوي سيارة ابددد
يعني اول مره اطلع اوربا ، فـ ماكنت مخطط اني اخذ سيارة
كنت ناوي اتنقل بالباص والمترو

لكن وانا رايح السفارة ، ومع اللطعه
جلست اسولف انا وواحد .. وقالي كيف السفرة تكون اذا معك سيارة
تحمست انا !

قلت له بس انا اول مره اطلع اوربا يعني مالها داعي
قال ابد صدقني ، انها اسهل من السواقه في الرياض


عاد انا تحمست زود
ورجعت البيت وقريت ردود الاعضاء
كلهم يقولون نص متعة السفر .. في السيارة
خلاص انا قلت مافيه سيارة سيارة الله لايعوق بشر


واروح احوس بالمواقع واسأل عن مواقع اجار السيارات

اخذت لفة في كم موقع

في الاخير استاجرت من ناشونال


عن طريق هالموقع
Autovermietung Wien, Autovermietung ضsterreich

سيارة هونداي
نوع السيارة ( اقتصادية ، مكيف ، قير عادي )
من مطار فيينا والتسليم في مطار فيينا
15 يوم ، كيلو مترات مفتوحة

بـ 429 يورو
يعني 2575 ريال سعودي

وهاذي صورة موتري :$



/


وهذا بعض المواقع لبعض شركات تأجير السيارات


Rent a car with Europcar, Europe's Leading Car Rental Company





Car Rentals from Budget






Avis Rent A Car, Inc.






The Hertz Corporation




وهذا موقع فيه سيارات رخيصة
يحولك على الشركة اللي بتاخذ منها السيارة

Car Hire with discount rates from Car Hire 3000


وهالموقع حلو ، يبحث لك في اكثر من 20 موقع سيارات

Car hire UK, USA, and Europe - Compare cheap car rental prices worldwide


/


وش تحتاج عشان تستاجر سيارة


ولا شي


مجرد رخصة دولية تطلعها من اي مكتب سفريات
انا طلعتها من مكتب الطيار بـ 125 ريال
وانت واقف يعطيك اياها

المطلوب منك :
- صورة جواز
- صورة رخصة القيادة
- صورتين 4 في 6 ملونه مكشوفة الراس

بس


/


اهم شي في السواقة واطلق ابو شي
GPS
بصراحة لولا الله ثم لولاه .. رحت في خرايطها خخخخخخ

جايب معي جهاز جارمن نوفي 660
خاص باوربا




سهل جداً استخدامه !


/


اول ماوصلت المطار هناك .. كنت طابع ورقة اجار السيارة
ورحت للمكتب اللي باخذ منه السيارة

لازم يكون معك كريدت كارد .. اهم شي !
كاش مايقبلون ابد

يوم وصلت للمكتب ، عطيتها الكريدت والجواز والرخصة الدولية

اخذت بياناتي .. وعطتني اوراق السيارة والمفتاح
وقالت رح للباركنق وعطتني رقم موقف السيارة
وانا احسب انه حوش فيه كمن سيارة


مادريت انه برج مواقف سيارات !!!
يوم وصلت للمبنى .. قريب طبعاً على طول تطلع من المطار تلقاه قدامك

طلع المبنى الاه 7 ادوار !!


ويالله يابو حميد دور الموتر
احوس في هالطوابق ، طابق ورا طابق
دخت وتعبت والله .. كانت الساعه 2 يوم وصلت
جت الساعه 4 وانا مابعد حصلت الموتر
يوم نزلت الدور الارضي لقيت مكتب انفورميشن
بغيت اصيح ، بعد هالتعب توني اشوف هالمكتب

فقالي فيه دور تحت في القبو
بغيت اسطره من زود الحماس

ونزلت تحت ولقيت السيارة .. والله لو تشوفون وجهي يوم لقيتها
كني لاقي لي كنز مب موتر *_*

والحمدلله ركبت السيارة وركّبت الجي بي اس
وحطيت عنوان الفندق وعلى طول عطاني الطريق


/


السواقه عندهم الصراحة سهلة
لكن فيه كم شي تحتاج تعرفهم

مثلاً ان كنت ماسك النص وتبي تسقط يسار ، لازم تصرب اشارة ياحبيبي
شغل الدايري واسقط على العالم بدون اشارة ولا هم يحزنون ماينفع هناك

اغلب طرقهم .. سيد واحد
يعني رايح جاي

الطرق السريعة عندهم .. اللي بين المدن
اغلبها مفتوحة السرعه ، يعني خل رجلك تحك بالمكينة من قوة الدعسة
فله الصراحة اطلق شي هذا هههههههه

هاذي بعض العلامات




يعني ادعس وعليك الامان .. السرعه مفتوحه !

تصدقون وانا رايح من سالبزروغ لميونخ ، كنت امشي 180 .. ومع ذلك ماسك الوسط
واللي على اليسار يشطفوني ههههههههه شي رهيب

ولا تستغرب شاحنه تشطفك بعد ! فله





هاذي يعني السرعة محددة 100 كيلو




وهنا السرعه 80

وهكذا .. <- حسيت اني مدرس مصري وانا اقولها


/


طبعاً السيارة ديزل
اغلب سياراتهم ديزل ، وسعر الديزل نفس البنزين مافيه فرق
الفرق ان الديزل يجلس اكثر من البنزين .. بس


واسعار الديزل بين (1.2 يورو - 1.4 يورو) لـ اللتر

وكل محطة تحط لوحة اسعار

زي هاذي




اعبي فل بـ 300 ريال *_*
فرق الرياض وفيينا خخخخخخخخخخخخ

عبيت ديزل كافة الرحلة بـ 1458 ريال بالظبط <- معه دفتر يسجل اول بأول هههههه
طبعاً لاتنسى ، تستلم السيارة فل و ترجعها فل نفس ما استلمتها
ولا تراهم يعبون ويخصمون من بطاقتك ويحسوبنه باغلى سعر وصل له الديزل
فـ عب ابرك لك وارخص


/


بالنسبة للسفر بين المدن ..

صراحة روعه ، مناظر تفتح النفس ، طبيعه وخضار شي خيالي
يعني يروح الطريق وانت ماحسيت
وفيه كل 10 كيلو ، 15 كيلو .. موقف
فيه دورة مياة وانتم بكرامه ، وفيه طاولة وكراسي تجلس عليها
يعني أدّلع











/


بالنسبة لمواقف السيارات

في النمسا ماوقفت ولا مره بفلوس ، دايم ادور موقف بدون رسوم
في ميونخ وقفت في كم موقف بفلوس

تدخل الموقف وتسحب لك كرت

وان جيت تطلع تروح للجهاز وتدخل الكرت وتسدد

وهاذي صورة الجهاز اللي تسدد منه




بعدين تروح لسيارتك وتروح للبوابه وتحط الكرت




/

هذا كل شي يتعلق بالسيارة ، واذا فيه اي سؤال انا حاضر