بسم الله الرحمن الرحيم

إخواني أعضاء منتدى العرب المسافرون
محد ينكر بان هذا الصرح الشامخ يعتبر مرجع للجميع وموقع من أثرى المواقع العربية اللي تزخر بالمعلومات السياحية...
أفادونا الأعضاء فيه بتجاربهم.. وحذرونا من الأخطاء اللي وقعوا فيها.. الله يوفقهم وين ماراحوا..ويكتب لهم السعادة وين ما كانوا..

راح أكتب تقريري المتواضع على ثلاث مراحل ..
المرحلة الأولى بريطانيا(4 أسابيع)
السكن في برايتون مع زيارة لندن بين فترة وأخرى..
المرحلة الثانية فرنسا(باريس)3 أيام..
المرحلة الثالثة(إيطاليا: روما- ريتشوني-فينيسيا - ميلان)7 أيام..
وأتمنى انه يكون على الأقل لو جزء من الدين اتجاه هذا المنتدى وأعضائه..

تقريري عن بريطانيا ما أقدر أسميه تقرير ولكن أقدر أسميه (تجربة) لعل أحد يستفيد منه واللي راح يكون على شكل حلقات لأني قاعد فيها شهر وصعبة اني اكتب كل يوم وش صار فيه خصوصا بأن بعض الأحداث قد تتكرر(إن ما كانت أغلبها)...
أما تقريري عن (باغي) وعن إيطاليا راح يكون يومي ...



طاقم الرحلة كانو 3 أشخاص



بدأنا ترتيب الرحلة تقريبا في بداية الفصل الدراسي الثاني ..
اجتمعنا في مطعم على شارع العليا العام في الرياض وأول سؤال انسأل كان وين نبي نسافر؟؟

كانت تدور في راسي فكرة اني أدرس لغة في الصيف ولاحظت ان الفكرة مشتركة بيننا..
حنا لغتنا حلوة بس قلنا خلنا نجرب الوضع منها نستفيد لو شوي في اللغة ومنها سياحة ومنها نعيش مع عائلة وناخذ تجربة..!!

عقبها سألت بعض اخوياي اللي قد درسوا لغة برا وكانت اختيارات دراسة اللغة بين بريطانيا وكندا..
اللي يمدح كندا واللي يمدح بريطانيا وكلن له وجهة نظر!
فضّلت بريطانيا على كندا لعدة اسباب اهمها ان بريطانيا اقرب..
ويوم فكرت فيها قلت اصلا انا منب رايح ادرس واكرف وانا توني طالع من اختبارات(توني مخلص ثالث جامعة)!!

صورة معبرة عن السنة اللي فاتت



يعني بالكثير راح اسجل 4 اسابيع في المعهد اللي راح ادرس فيه..
عشان كذا ما أحسها تسوى اني اروح لكندا وأصك مشوار عشان اربع اسابيع بس..!!
غير كذا أقدر اني اطلع من بريطانيا الى أي دولة اوروبية ثانية بدون ما أشيل هم المشوار ..

طيب وش هي المدن الاوروبية اللي ودي ازورها؟؟؟؟
طاح اختيارنا على حبيبة القلب (باغي)لمدة 3 أيام..
وعلى ايطاليا بمدنها المختلفة لمدة 7 أيام..
اخترت مدن كثيرة في ايطاليا(4مدن) مع ان المدة اللي راح اقعدها هي بس 7 ايام لاني احب اني اشوف اكبر عدد من المدن واهم المعالم في كل مدينة ومنب من النوع اللي لازم يطول في كل مدينة يقعد فيها ويلف كل شي زين ولاّ شين..

عقب ما قررت وتوكلت على ربي وضعت الخطة وهي بريطانيا وبعدها فرنسا وبعدها ايطاليا..
يعني ننزل من فوق الى تحت..


وسائل التنقل داخل اوروبا كانت :
من لندن الى باريس: كانت بالطيران الاقتصادي easy jet
ومن باريس الى روما: بالطيران الاقتصادي easy jet


easyJet.com - book cheap flights, hotels and car hire online

وداخل ايطاليا كانت بالقطار
(راح اكتب اسعار التذاكر وكل شي يتعلق بالتنقل في التقارير الجاية)


بعدها سألت اللي درسوا في بريطانيا عن احسن مدينة ..
قالوا لي اذا انت رايح ومنت حاط في بالك انك تدرس وتكرف رح لبرايتون لأن مشكلتها ان العرب فيها كثيرين..
قلت ماعندي مشكلة خصوصا انها مدينة سياحية وغير كذا قريبة من لندن يعني تقريبا ساعة بالقطار..

الخطوة اللي بعدها كانت اني كيف اختار المعهد
افضل المعاهد في برايتون كانت
Eurocenter
تبي موقعهم؟؟
تفضّل
Embassy CES
تبي موقعهم؟؟
تفضّل
St.Giles International
تبي موقعهم؟؟
تفضّل
EF
تبي موقعهم؟؟
تفضّل
رحت لمكتب خدمات تعليمية عن طريق واحد قد تعامل معه
ونصحني بـ St.Giless International وهو اللي اخترناه
الـ EF أغلب الناس ما ينصحون فيه من الناحية التعليمية(المشكلة انه اختصار لـ Education First )
بس اللي لاحظته هناك انه معهد فلّه..
كل شوي يسوي لك رحلات وطلعات وزيارات ..
يعني كل ما أمشي أشوف قروب للمعهد ومعهم (guide ) سواء في لندن أو برايتون..

اخترت دراستي انها تكون من 7 جولاي الى 1 اوغست(4 أسابيع)
اما من 2 اوغست الى 12 اوغست فكانت بين ايطاليا وفرنسا(10 أيام)

وعلى هذا الاساس رحت ادور حجز طيران..
اخترت الخطوط السعودية وخط السير كان
الرياض-لندن-ميلان-الرياض
الذهاب 5 جولاي والعودة 12 اوغست
اخترت يوم السبت 5 جولاي (لازم اسافر قبل 7 جولاي اللي هو يوم بداية الدراسة)
ذاك اليوم كان فيه رحلتين وحدة الظهر(مباشرة من الرياض الى لندن)
ووحدة الليل اقلاعها كان الساعة 11:55 عن طريق الدمام..
واخترت هذي الرحلة لأن الرحلة الاولى اللي هي الظهر راح توصل في الليل ولازم اني آخذ الباص عقبها واطلع على برايتون .. والوضع بالليل صعب ..
اما لو رحت برحلة الليل راح اوصل الصبح والناس توها بادية دواماتها ويمدي ان الواحد يمشي اموره ان شاء الله..
مابغيت احجز قبل 5 جولاي لان أغلب العوائل تقبل انك تسكن عندها من قبل دراستك بيومين الى بعد دراستك بيومين وبعضهم بيوم ..
الحمد لله لقيت حجز بسهولة لأني حاجز بدري (تقريبا قبل رحلتي ب 4 شهور)

عقب ما حجزت برحلة الليل شريت التذاكر
كان سعر التذكرة 3270 ريال سعودي(الرياض-لندن-ميلان-الرياض)
اخذت هذا السعر بـ(low fare) لأني شريت التذاكر قبل السفر ب3 شهور تقريبا..
وهنا تجي فايدة التخطيط المبكر ..

بعدها اتفقنا مع المكتب ودفعناله..
نصيحة: 1-اذا انت ناوي تدرس لازم تخلص امورك من بدري عشان تلقى سكن تسكن فيه سواء عند عائلة او سكن طلاب
2- انصحك انك ما تروح لأي مكتب وخلص امورك بنفسك(بالنسبة لدراسة اللغة في فترة الصيف).
ولا أسهل منها لأن المكتب اللي تتعامل معه ياخذ عليك زيادة وبعض الأحيان ما ياخذ زيادة بس تصك مشاوير الدنيا عشان تخلص امورك..
انا رحت له تقريبا 10 مرات وكل مرة عشان شي
مرة عشان آخذ القبول والمرة الثانية عشان ارجع له ورقة القبول لان كان فيها خطأ وغيرها كثير وكثير..

كل اللي تبيه انك تعرف أي مدينة تبي تروح وعقبها تعرف اسم المعهد اللي تبيه(وكل هذي تقدر تسألها واحد جرب ودرس) وتدخل على موقعه في النت وتختار خياراتك اللي تبيها وتحط رقم الفيزا وكذا خلاص تكون خلصت(اغلب المعاهد تقدر تدفع لهم عن طريق النت)
واذا ما فهمت أي شي ارسل لهم ايميل
والمكاتب بعض الأحيان ما يهتمون للشروط اللي تعطيهم اياها عشان العائلة..!
يعني مثلا انا اشترطت ان يكون عندهم انترنت وبدون حيوانات وان نكون انا اخوياي قريبين من بعض(يحق لي أتشرط لأني حاجز بدري) ويوم عطيت المكتب هذي الشروط وجاه قبول العائلة عطاني الأوراق واخونا في الله ما قرا الأوراق ويوم رحت للبيت لقيت ان العائلة ما عندها نت وكل واحد منا بعيد عن الثاني ولقيت عندهم كلاب(الله يكرمكم)
يعني كل شي عكس اللي ابغاه..!!!
اما لو سويت امورك عن طريق النت يمديك تتفاهم معهم انت بنفسك عن طريق الايميل بدون القروشة ذي كلها..

وبرضوا اذا تعرف واحد في المدينة اللي تبي تروح لها خله يتفاهم مع المعهد مباشرة
(وهذي وجهة نظر شخصية)

اخذنا ورقة القبول من المكتب ورحنا نطلع الفيزا
وكتبت تجربتي يوم طلعت الفيزا على هذا الرابط
قدّمت على الفيزا اليوم

الحين صارت الفيزا جاهزة واوراق المعهد جاهزة
لاحظ ان المعهد يرسلك القبول اول شي عشان تقدر تطلع فيزة طالب (اللي هو قبول الدراسة)
وعقبها يرسل لك قبول العائلة(يعطيك وصف عن العائلة وعنوانها)
قبل السفر بيوم اتصلت على العائلة وعلمتهم متى أبي أجي عشان يقعدون في البيت ويستنوني لأن في احتمال انهم ما يكونون في البيت

يوم السفر
قرب يوم السفر وبدأت الاستعدادات له ..
بديت أتقضى أول ما بدت العطلة وأكمل الناقص عشان ما انزنق بعدين
وجا يوم السفر ..
جلست على مكتبي اللي في الغرفة وقعدت افكر وش اللي ممكن احتاجه من صغير الى كبير..
وكل شي يخطر ببالي اكتبه ..



وكل ما قلت خلصت اروح ارتب الأشياء في الشنطة واكتشف اني ناسي شي وعلى طول اكتبه في الورقة قبل ما أحطه في الشنطة عشان تسهل على مراجعة الورقة قبل ما أصك الشنطة..

هذي صور أخذتها قاعد أجرب الكاميرا







وهذي صورة تبين حوسة السفر!!!







طلعنا للمطار بين صلاة المغرب والعشا والحمد لله وصلنا بدري لان الطريق ما كان زحمة
وعقب ما وصلنا لمطارنا الحبيب قصينا البوردنج وحطينا العفش..
كنت متخوف من سالفة انهم يشيكون على اللاب توب اذا فيه برامج منسوخة ولا لا اذا وصلت هناك عشان كذا حطيته في الشنطة الكبيرة حقت العفش!
بس الحمد لله ما سألوا عنه
والأمور مشت بسرعة الحمد لله

عقبها نزلنا تحت وتعشينا في مطعم كودو حق المطار لأن ولا واحد فينا يحب أكل الطيارة بس الجوع يجبرك انك تغير فكرتك تماما..
الغريب الموضوع اني يوم قصيت البوردنج قال لي رح عند آخر كاونتر على اليمين ويوم رحت له طلب مني الجوازات و البوردنج وختم على البوردنج والى يومك ما ادري وش معنى هالختم ..!
الظاهر ان ما كنت واهم انه كان مكتوب عليه SPA بس منب متأكد..

ويوم جيت عند الجوازات وعطيته الجوازات والبوردنج سألني عن الختم وقلت له : علمي علمك والله..
قال لي: الظاهر انكم مراقبين (قالها بمزح)..
عطيته ذيك الابتسامة وقلت في نفسي(لعنبوا مزحك اللي تعرفه)..

المهم دخلنا والغريب في الموضوع اني كنت خرمان شاهي وكل ما اروح لكافيتيريا يقول لي ما عندي شاهي!!!بس مويه وعصيرات!!!
قلت شدعوة يبو!!!عقبها أخذت موية ودزيت!!!
البوابة على ما أذكر كان رقمها 24 دخلنا معها(احلف) وتوجهنا للطيارة..

اقلعت الطيارة في وقتها الحمد لله وتوجهنا للدمام ..
كانت مدة الرحلة ساعة تقريبا..
أقلعنا تقريبا الساعة 12 بالليل..
ووصلنا الدمام تقريبا الساعة 1 بالليل..



وصلنا الدمام وبدو الناس يركبون معنا..

أقلعنا من الدمام متوجهين للندن ..













كانت مدة الرحلة تقريبا ست ساعات وشي..
سألت المضيف عن LONDON CARD
لأن أنا ووجهي نسيت أسأله وقبل ما أوصل قلت له يالحبيب أبي كرت ..
مسوي انا اللي أبي أذكره..
قال لي يبو الشباب مخلصه!!!
وزعناها من زمان!!!
قلت له جب لي 3 الله لا يهينك
قال لي اللي عندنا كانت بالعدد وكل واحد أخذ وحدة
قلت له يعني وش بسوي فيها؟؟ آكلها مثلا؟؟
المهم راح وجاب لي ثلاث وقال هذا الموجود عندي
هذا الكرت يا طويل العمر الظاهر ان كل واحد مب اوروبي او امريكي(منب متأكد) لازم يعبيها
اذا وصلت راح تلقا كثير منها عند الجوازات(يعني لاتشيل هم اذا ما عطوك) بس فايدة انك تعبيها في الطيارة هي انك توفر وقت وما تعبيها هناك..

وصلنا لندن الساعة 7 وربع الصبح..
أول ما نزلنا ما غير نمشي مع هالعالم اللي تمشي ونتبع اللّوحات..
وصلنا للجوازات وكانت زحمة غير طبيعية ..
بس زحمتهم غير..
ايه والله غير..
خلال ربع ساعة واحنا خالصين امورنا و مختمين جوازاتنا..
طبعا لازم يسألك ليش أنت هنا وكم تبي تقعد ووين ساكن ومن هالأسئلة..
والأسئلة تختلف من شخص لآخر ..
يعني مثلا أنا سألني بس ليش جاي ووين راح تدرس بس..
أما واحد من أخوياي سأله كم تبي تقعد ووين ساكن ومن هالأسئلة ..

عقبها رحنا ناخذ الشنط ..
والحمد لله ما تأخرت..

الحين جا دور كيف اني اروح من لندن الى برايتون
كانت عندي 3 طرق:
1-بالتاكسي
2-بالقطار
3-بالباص

التاكسي ميزته انه سهل انك تاخذه وينزلك عند العائلة على طول بس مشكلته انه راح يضربك بالسعر..
سمعت انه من لندن الى برايتون راح ياخذ عليك تقريبا 100 باوند وفوق..
(لو يرجع بي الزمن رحت بالتاكسي لأننا 3 أشخاص ولو نتقاسمها راح تطلع علينا تقريبا بنفس سعر الباص وزيادة شوي، بس بيني وبينك الزيادة هذي ما تسوى على حساب راحتك)

القطار حلو بس لازم انك تطلع الى أي محطة قطار جوا لندن من عندها تاخذ قطار ثاني يوديك الى برايتون يعني راح تدفع تذكرتين وراح تشيل عفشك بين قطارين (يعني الزبدة انها حوسة)

اما بالباص قال لي عنه راعي المكتب اللي تعاملت معه عشان المعهد
اسم الشركة:National Express
تبي موقعهم؟؟
موقعهم عالنتكيف توصل لها؟؟
انا اول ما اخذت شنطتي قعد اشوف اللوح وادور Bus station ..
ويوم وصلت للصالة اللي قبل ما اطلع منها برا سألت واحد من اللي يشتغلون في المطار وقالي لي انزل من ذيك النزلة وشف اللوحات ..
المشوار أخذ منا تقريبا 10 دقايق الى ربع ساعة مشي بس الحمد لله وصلنا بدون ضيعة..
كل شي عندهم سهل ..
شف اللوحات ودربي راسك وراح توصل ..
ومن سأل ما ضاع!!
يوم وصلنا شريت لي تذكرة الى برايتون تقريبا سعرها كان 25 باوند عالواحد..
(قد قال لي واحد انك اذا شريت لك التذكرة من النت راح تطلع عليك أرخص بس صراحة ما حاولت)
طبعا يوم شريت التذكرة قالت لي باقي لك 5 دقايق والباص بيتحرك..
الباصات عندهم توقف على شكل خطوط بالطول وكل خط له رقم..
رحت ادور عالباص لقيتها بنت اللذين حاطه لي Bath مب Brighton
باث مدينة ثانية غير برايتون
المهم رحت لها وغيرت لي التذكرة الى برايتون ودفعت الفرق..
والباص اللي باقي له 5 دقايق قد مشى واللي عقبه يجي بعد ساعة الا ربع تقريبا..
المشكلة في الموضوع اني مكلم العائلة(عجوز) وقايل لهم اني راح اوصل الساعة 10 قريبا والباص الجاي يوصل تقريبا 9 ونص ومشوار الطريق يبيله ساعتين تقريبا..

قعدت اتصل عشان أقول لها اني أبي أتأخر الين ما انمسح اللون الأخضر حق زر السماعة الخضرا والعجووز ما ترد..!!
ركبنا الباص طبعا زي باصات النقل الجماعي (يعني بس مجرد تشبيه ولا أصلا ما في أمل تقارن بينهم)
وسواق الباص هو اللي ياخذ شنطتك منك ويحطها مع الشنط تحت ..
الباص يمر على كم من نقطة قبل ما يوصل للمحطة حقتك ..
حنا من ضمن الأماكن اللي راح لها الباص مطار قاتويك وكم من مكان ما أذكر أسمائهم..

الباص نزلني في مكان اسمه Pool Valley
موقعه عالخريطة
المكان هذا قريب من البحر (تقريبا بينهم شارع) وهو مكان وصول أغلب الباصات الى برايتون والمكان اللي تطلع منه برضوا..
نزلت تقريبا الساعة 12
اول ما نزلنا من الباص الجو كان غيم ومطر و برررررررررررررررررررررررد ومطر والهوا قوي يعني بالعربي رحنا فيها حنا ووجيهنا، تي شيرت صيفي وما في شي لا تحته ولا فوقه..
وأول شي سويته اني فكيت الشنطة وطلعت البلوفر ولسا جمدان بعد..
عقبها أخذنا الشنط وعلى طول اقرب محطة تاكسي (جنب محطة الباصات على طول) واستنينا الين ما جانا الدور
ومن التاكسي على طول على العائلة
(طبعا زي ما قلت قبل شوي ان المعهد او المكتب اللي يتفق مع المعهد يعطيك من ضمن الأوراق ورقة قبول العائلة اللي فيها وصف بسيط عن العائلة وعنوانها وارقام تلفونها)
اول ما وصلت ونزلني التاكسي كانت حالي يرثى لها تقريبا 24 ساعة مواصل لاني ما نمت في الطيارة
والجو برد (يعني كملت)
واللي زاد الطين بلّه أني انصدمت اول ما وصلت عند الباب
ما كنت أتوقع ان البيت بهالحجم!!غرفة سواقنا أكبر منه!!
واللي صدمني أكثر وأكثر اني يوم وصلت عند الباب ألقى العجوز ملصقة لصقة مكتوب عليها ان الجرس خربان واذا تبي شي انت ووجهك طق الباب بقوة
طبعا أنا وقتها قلت: أيواااااااااااااااااااااااااااااااااااااا هذا اللي كان ناقصني..

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو

__________________

البحث عن مواضيع لنفس العضو