في رحلتي للصين وبالتحديد من كوانزو في رحلة العوده صارتلي مواقف مب حلوه ، وكانت بالنسبه

لي رحله متعبه ، بخبركم عن احداثها للي ما قرأ عنها في بوابة الصين .

كنا انا وزوجي راجعين من كوانزو بعد اشترينا أثاث بيتنا ، وكنا راجعين على الطيران الكيني

على الدرجه السياحيه الى دبي .

ومن حظنا انه ورانا يالسين صينيين وجدامنا بعد صينيين لأني كنت احاتي الكينيين من

يلستهم عدالنا لانه بعضهم للاسف تكون ريحتهم قويه منفره وكان جدام الصينيين عرب

وفي الاين اللي عدالنا بعد يالسين عرب ، واول صف في السايد اللي عدالنا بعد عرب

(( لاتستعيلون ترى مواقفي اللي في الطياره كانت من الجماعه اللي حوالييه عشان

جذي اخبركم بهاي التفاصيل ))

بعد مايلسنا على كراسينا ، وقبل ماتطير الطياره ، والا اسمع صوت ورايه وايد مزعج

اتاري الصيني اللي ورايه يالس يلعب جيم بوي ومعلي على الصوت بدون مراعاة للاخرين

والقهر انه ورايه بالضبط ، حاولت اتجاهله بس ماقدرت الصوت مزعج ، والطياره بعدها ماطارت

قلت في خاطري بستحمل لين تطير الطياره واذا ماسكراها بخلي زوجي يكلمه ، وعقب

يت المظيفه تأكد على ربط الاحزمه وما ادري اذا هي طلبت منه يسكرها او هو بروحه المهم

سكرها وافتكيت من الصوت المزعج ، وطارت الطياره

واستقرينا في الجو وهدأت الامور .

بعد شوي والا بازعاج ثاني منه ، بس هاي المره ممن الجيم بوي انما من

صوته لانه هو وياربيعه اللي يالس عداله، دخلوا في نقاش طويــــــــــــــــــل

بالصيني وانا راسي يطقطق من هذرتهم.

ياربي شو اسوي ، ما لي غير الصبر .

صبرت ..وصبرت.. وصبرت ..لحد ما وصل الاكل ، وقتها انطبوا يعني سكتوا ويلسوا

ياكلون ، وعقبها فكونا ورقدوا .

ولكن انا طلعت ماكره سدحت كرسيه عليه وقت الاكل(( خساس فيه)) واحسه كان مضايق

احسن ، عشان يذوق شوي كيف يكون ازعاج الاخرين.

المهم بعدها حاولت ارقد شوي وهم طبعا رقدوا ، والعرب اللي جدام ماشاءالله مسوين برزه

وهم واقفين وهات رغي .

غفيت شوي وعقب قمت ، وحبيت اسير الحمام عزكم الله ، وقفت انتظرت دوري ،وبعدها

دخلت ، وبعد شوي وانا في امان الله ماوعيت الا حد يحاول يفتح الباب ، وانا متأكده

انه الحمام مسكر ، واللي واقف برع تأكد بعد هو انه الباب مسكر، وشوي.....

مره ثانيه ويدز الباب عليه .

( ياربي شو هاي الحاله ) وبعد شوي يكرر نفس الفعله ويدز الباب ويهزه

عاد الدم بيوصل لين الركب

طفرني وقهرني لدرجة كنت احس اني بضربه ، اللي ما عنده احترام ولاصبر


المهم انا طلعت من الحمام وانا منقهره منه ، واول مافتحت الباب طلع ريال صيني

هو اللي يزعجني رمقته بنظره كلها شرر ، وسرت مكاني

ولكن عقب فتره اكتشفت .... مابتصدقون ؟؟؟؟

انه اللي كان يزعجني هو نفسه اللي يالس ورايه ويزعجني طول الوقت

ما ادري حد مسلطنه عليه ، نص الرحله وانا منشغله فيه وبازعاجه .

في كل هاي المعمعه زوجي كان نايم .

وانا يالسه ما اعرف شو اسوي وخصوصا ماشئ افلام حلوه ، استوى شي شغلني

بقية الرحله.

تذكرون العرب اللي يالسين جدامنا ، كان في واحد عربي شوي كبير في السن وبصحه

زياده يعني متين شوي ، المهم هذا الريال فجأه تعب واللي حواليه مب عارفين

شو يسوون له كان يحس بدوار على غثيان على شعور بالبرد

(( ملاحظين متابعه الحاله مشغله عندي الرادار من الضيج يلقط الاخبار ))

بعد فتره ذكرت انه يايبه حبة فولترين ويايه ، صحيت زوجي من النوم وخبرته

بحالة الريال وطلبت منه يعطيه الحبه .

( على فكره الريال مول ماكله شئ طول الرحله )

قام زوجي واعطاهم حبة الفولترين ( انا مجربه مفعولها لما

يصيبني صداع من اعلى الدرجات ، آخذ الحبه وتسكن فعلا الالام )

انا قلت انشاءالله بيخفف عنه .

الريال على طول بلع الحبه مسكين واللي حواليه ساعدوه ويابوله الماي .

انا قلت في خاطري دقايق وبتتحسن حالته انشاءالله ، لكن للاسف الريال تسوء حالته

وتعبان وايد ، ووصل الموضوع عند كابتن الطياره والموظفين والكل يحاول يستفهم منه

عن حالته ، وهو فعلا تعبان وتشتد الحاله عنده ، ونادوا في الميكرفون اذا في اي دكتور

في الطياره ( عاد انا خفت انه الحبه مفعولها عكسي عليه )

نادوا اكثر من مره على دكتور بس للاسف محد رد ، واضطروا بعدها ينقلونه درجة رجال

الاعمال عشان يرتاح اكثر .

وصلنا الحمدالله ارض مطار دبي ، وطلبوا مسعفيين ، و سيارة اسعاف ، والمسعفين

يحاولون يفهمون شو فيه ، وفجأه صدوا صوبنا وسألوا زوجي كم الجرعه اللي

عطيتوه من الفولتريين ، انا تفاجأت وقلت ياويلي ليكون ظريت الريال بدال ما انفعه ، المهم

لما سأني زوجي عن الجرعه ، بصراحه ما كنت ادري كم الجرعه ، طبعا رديت اني ما ادري

والباكيت مب ويايه ، المهم نزلنا نحن على اساس بياخذونه على طول المستشفى ،وبعدها

ماعرفنا شئ عنه وكنت اتمنى اعرف شو حاله .


انطباعي عن رحلة العوده

هاذي اطول رحله بالطياره انا قمت فيها ، لانه في السيره كانت المده 7 ساعات او اكثر شوي.

اما في العوده اضني الدريول اقصد الطيار مبتدأ ... بطيـــــــــــــــــــــــــــــــــئ

وصلنا عقب 9 ساعات طيران ، هذا بالاضافه للمشاكل اللي صادفتني وبعد ماكان عندهم افلام

حلوه تسلي وقتك ، وكانت رحلة العوده متعبه وممله .