 |
 |
 |
||
|
|
|
||
 |
|
 |
|
|||||||
|
|
أدوات الموضوع | انواع عرض الموضوع |
10-10-2004, 10:21 AM
|
#1 (permalink) |
|
مسافرجديد
تاريخ التسجيل: Oct 2004
الدولة: الكويت
رقم العضوية :15357
المشاركات: 18
|
معلومات تهم المسافر لجولد كوست (2)
* التسوق
المحلات التجارية تسكر الساعة خمس ، اللهم إلا بعض المحلات اللي يملكونها الآسيويين و اللي يبيعون فيها الالعاب الفرو للكوالا و الكنغر و بعض الكريمات و القبعات و غيرها من الاشياء اللي يحبها السواح لكنها مكرره بكل محلاتهم تقريبا .. يعني تفرح فيها يوم يومين بعدين تتعود  و عموما ما راح تلاقي بجولدكوست الكثير من المحلات العالمية " و انا بصراحة أعتبرها ميزة علشان ما يضيع الوقت بالتسوق " . لأن غلب الملابس المعروضة لها علاقة بالبحر . لكن طبعا في محلات بمستويات حلوة و في ماركات لكنها مو بكثرة . لكن هذا ما يمنع أن للتسوق متعة و زيارتك للمجمعات واجب لازم يؤديه السائح و أهم المجمعات الموجودة في جولد كوست : 1-Pacific Fair باسيفيك فير : و هو اكبر مجمع بالجولدكوست و الأجمل يطل على بحيرة ، فيه المحلات بشكل منازل بأحياء متشعبه " أو مثل ما نسميه فريج متطور " و باقي المحلات في داخل المجمع . و هذه صورة توضح شكل المحلات اللي بالفريج :  و هذا شكل المجمع من بره  2- Australia Fair أستراليا فير مجمع حلو و أكثر السواح يروحون له بسبب قربه من السيرفرس بارادايس . أنا ما حبيته وايد بسبب الزحمه اللي فيه .  3- Robina Town Centre روبينا تاون . حلو و السواح فيه نوعا ما قليلين . و طلته عالبحيره حلوه وايد .  4-Surfer's Paradise السيرفرس بارادايس : و هو عبارة عن سلسلة محلات تطل على ساحات مفتوحة ما تدخلها السيارات " إلا بالطرق الفرعية " . بالليل يقومون بعض الأشخاص ببعض العروض الرياضية أو التمثيلية أو الموسيقية أو غيرها . يمتاز هالسوق بوجود المطاعم باختلاف أنواعها و أسعارها غير الكافيهات ، فعلشان جذي تلقى هالمكان فيه روح و حركة لي منتصف الليل ، و أحيانا تقام أيام الجمعة من بعد المغرب إلى نص الليل كشكات من جهة البحر يبيع فيها أشخاص أعمالهم اليدوية اللي فعلا روعة سواء لوحات أو مشغولات يدوية أو شموع و غيرها من الأشياء اللي فعلا فظيعه ، و مرات يبدا بعض الفنانيين بتشكيل مجسمات و شخصيات من الرمل .. و لما ينتهون ينورون حواليها إما بنار خفيفة أو شموع بحيث يبين لك الشكل من أروع ما يمكن . وهذي بعض الصور للسوق : %20Tourist%20Atmosphere%20(Small).jpg) %20Brothers%20Neilsen%20(Small).jpg) للعلم : السوق يوم الجمعة بالليل يكثر فيه الشباب بأشكالهم و لبسهم الغريب ، خاصة من الجهة حوالين الماكدونالد والمطاعم ، فلا تتفاجأ و لا تنصدم لأن اليوم الثاني بتختفي هالأشكال تماما ، و تقدر إنك تتحاشى تروح لهالمكان يوم الجمعة بالليل " بالنهار دواماتهم .. عادي ". 4- Runaway Bay Shopping Town رن واي بي .. هذا بعيد ، يعني بالباص ساعة إلا ربع تقريبا ، بس بصراحة حلو وهادي و بعيد عن السواح تماااااما ، فيه محلات شويه غير عن الباجي ، لكن الأحلى لما تطلع من المجمع و تقعد على لبحر ، البحر هناك مريح للعايلات ، أقصد إنك ما تشوف ناس يسبحون و لا متسدحين يتشمسون ، غالبية القاعدين سواح أجانب أو عائلات استرالية ، القعدة هناك فعلا ترد الروح ، الطيور بأشكالها تطير حواليك و تنزل يمك ، الجو رهييييب فيه نسمة برد ، الرمل " و أذكر وحدة بالمنتديات قالت عنه و امدحته " مو طبيعي ، والله فاااتح و ناعم مثل الملح و لا يلصق بطريقة مزعجة فيك ، و البحر صاااااااااااااااااافي و أزرق ، والرمل يلتف على الماي بطريقة عجيبه .. يعني تشوف جدامك بحر و بعدين خط من الرمل " اليابسه " و بعده بحر .... و لأن الصيد ممنوع و الله من تحط رجلك بالماي تشوف السمك حواليك بأحجام مختلفة من الصغار إلى 30 سم تقريبا . فعلا هالرحلة ضرورية للاسترخاء بعد التعب من لوية الأماكن الترفيهية و الأسواق . 5- Sanctuary Cove سانجري كوف هذا قمة ، أهو جديد و ما انتهى العمل فيه هالسنة - بعيد و أبعد من السوق اللي ذكرته من شوي " رن واي " . و طبعا كل ما ابتعد صار المكان أهدى ، و اهو قريبا منتجع ، طبعا أنا ما أقول قمة عن مستوى المحلات ، عن مستوى المناظر و الطبيعة و الراحة فيه ، حوالين المنطقة هذي كله مزارع و مالعب جولف .. و بوسط السوق تقدر تصعد على جبل صغير شبيه بالتلة ، فيه الاشجار الروعة و نوافير الماي ، و هالجبل تابع لفندق حياة ريجنسي " ملاحظة بأي بلد تزورها و ما تعرف المواقع الأحسن فيها احجز فندق حياة و انت مغمض لأني لاحظن أنه دايما يختار أحلى مكان بالبلد " . الفندق رهيييييب ، تقدر تحجز غرف أو مثل نظام الشاليهات اللي تطل عالمسابح و البحر ، أسعاره مثل أسعار الفنادق الدرجة الأولى ، اللي طايحين عليه السواح اليابانيين ، العرب ما يحبونه لأنه بعيد عن السيرفرس بارادايس ، بس نصيحة ، لو في مجال مثلا إنك تحجز لك آخر يومين فيه لا تتردد ، فعلا رااااحه و استجمام .. و من كثر ما انه كبير يتنقل اللي مسئول عن خدمة الغرف بسيارة صغيرة مثل سيارات الجولف " أو السيارات اللي تستخدم للتنقل داخل المطارات " و هذي صور للمنتجع هذا حمام السباحة مسوينة كأنه شاطئ لأنه دامجينه مع الرمل  و هذا المدخل الرئيسي للفندق بالليل  و النوافير بالمدخل الرئيسي  و كل يوم الصبح تطل على هالمنظر .. يا سلاااام  6- و هذي أسماء أسواق غير اللي ذكرتها ، إما ما زرناها أو ما كانت تختلف وايد عن اللي ذكرتهم : Broadbeach / Oasis / Neicon Plaza -South Tweed - Tweed City - The Pines- Southport Park -Harbour Town - Marina Mirage / Mariner's Cove |
|
|
05-11-2004, 03:46 AM
|
#2 (permalink) |
|
مسافر خبير
تاريخ التسجيل: Mar 2003
رقم العضوية :3
المشاركات: 8,022
|
رد: معلومات تهم المسافر لجولد كوست (2)
ماشاءالله عليك اختي
ماخليتي شي عن التسوق في جلود كوست ... اتصور انه غني جداً لكل أخت باحثه عن التسوق لانه بلغة نسائية بحته ... ياليت لو موضوعك هذا كان داخل ضمن الحلقه الأولى علشان مايتشتت ويكون موضوع كامل ومالكامل غير رب العزه والجلاله .. تحياتي لك ولمجهودك |
|
|
|
15-12-2004, 01:15 PM
|
#4 (permalink) |
|
مسافر متميز
تاريخ التسجيل: May 2004
رقم العضوية :5157
المشاركات: 199
|
رد: معلومات تهم المسافر لجولد كوست (2)
لسه أنا راجع من جولد جوست ما شفت فيها شي حلو وايد غير الألعاب انا الصراحة أشوفها مدينة مملة غير ما وضعوا الناس في مخيلتي عنها حتى الأسواق أسعارها غالية وماركاتها موجودة في بلداننا الخليجية اللهم الكافيهات في كيفيل إيفينيو وعلى سرفر بارادايس وفنادقها ضعيفة بالمقارنة مع فنادق دولة مثل ماليزيا نعم شعب راق ومعاملة جميلة ولكن البلد أعتقد ان الناس تبالغ في مدحها له فقط الألعاب وثلاثة حدائق رئيسية وأفضلها عالم البحار ثم عالم الأفلام والجدير بالذكر مستوى هذه الحديقة أقل من ريع مستوى عالم الافلام في أمريكا فقط لشركة واحدة هي وارنر برذرز ولا يوجد إنتاج للأفلام ثم عالم الأحلام وهناك على بعد ثلاث ساعات الغابات المطرية التي لم أرى فيها نقطة ماء وحديقة الحيوانات البعيدة ثلاث ساعات من جولد جوست وما في شي أكثر
بس مادري ليش الناس مطفوقة على جولد جوست كل يجي يقول أنا رحت جولد جوست شوفوني على شنو يا بابا |
|
|
|
22-12-2004, 10:10 AM
|
#5 (permalink) |
|
مسافرجديد
تاريخ التسجيل: Oct 2004
الدولة: الكويت
رقم العضوية :15357
المشاركات: 18
|
رد: معلومات تهم المسافر لجولد كوست (2)
أشكر كل من رد عالموضوع
ya-mas أنا كنت حابة أنه يكون موضوع واحد .. لكن خفت أنه يكون ممل طيف الورود شكرا على ردك الطيب أخي الكريم هولاكو .. أول شي اشكرك على الرد و ثانيا أنا ابد ما قارنت استراليا بأمريكا . أمريكا عالم بحد ذاتها و كل ولاية لها ميزة تختلف عن الولاية الثانية . لكني ذكرت بواحد من مواضيعي أن الكثير من السواح قام يخاف انه يروح امريكا بعد احداث سبتمبر و الكثير من الناس بدوا يحولون للشرق . و بدا يشوفون اشياء غير اللي تعودوا يشوفونها و استراليا كانت من البلدان الحلوه اللي ممكن للانسان ان يزورها . ثالثا : انت رحت ماليزيا و بالفعل فنادقها أحلى . لكن تقدر تنكر أن استراليا كبلد بشكل عام أحلى ؟؟ رابعا : الفنادق مستويات .. كان ممكن تقدر تغير فندقك لو ما عجبك ، و اعتقد ارقى فندق هناك هو فرزاتشي . الا اذا كنت تتكلم عن الشقق الفندقيه فأكيد المقارنه بتكونمو عادلة لما تقارنها بفنادق ماليزيا الضخمه . خامسا : بموضوعي الاول ذكرت خطأ يرتكبه السائح لقولد كوست ، و هو انه يحكر نفسه باماكن الالعاب و الكوفي شوب بالمجمعات . جولد كوست متعتها انك تأجر سيارة و تطلع بره لمناطق ثانية ، أو اخذ باص لو ما تحب تسوق بالسفر .. بتمر على مناطق روعة و تريح النفسيه .. هالمناطق تذكرك بالسفر بالسيارة بامريكا من ولاية للثانية ، لما تمر على المراعي و الجبال. جربت تروح لاقصى شمال جولد كوست أو اقصى الجنوب ؟؟ " مو خط واحد لانه مو تعذيب .. وقف بالاستراحات و عند البحيرات و الحدايق مثلا " فعلا مناظر و رحله روعه " . كنا نوقف و نأجر مراكب مرات و الصغار يأجرون جيت سكي و نروح جزر صغيره و قريبه .. يعني نغير . سادسا : يمكن زيارة الالعاب للعوائل اكثر متعه من الشباب ! فيمكن لو كانت عايله اعتقد إن كل شخص بيختار له مكان حسب اختلاف العمر . و ينتهي اليوم و ما خلصت العايله لف المدينة كلها . و لا تقارنها مرة ثانية بأمريكا .. امريكا عالم ثاني سواء من الاستيديوهات أو الديزني لاند و السي ورلد .. سابعا : ليش ما استغليت سفرك و سويت اشياء عمرك ما سويتها !! انا كنت احسد الشباب هناك ، يوم يغوصون مع اسماك القرش و يوم مع الدلافين و مره يروحون رحلة السفينه للحوت و مرة يركبون الغواصة ، و مرة يركبون الهليكبتر . هذا غير المخيمات الليلة المنظمة و رحلات الصيد " الحداق "و الركوب بالمنطاد و غيرها و غيرها من النشاطات اللي ما نسويها ببلدنا !! صدقني لو مسوي جدول كل يوم شي من هالاشياء كنت فعلا استانست . سابعا : لو تحب الاجواء الاوربية المفروض انك تطلع من جولد كوست و تسكن ببرزبن مثلا .. لانها تشبه بفيينا نوعا ما . وصلنا ثامنا ؟؟ واااو بالنهايه حبيت اقول لك ان الناس فيما يعشقون مذاهب ، و لولا اختلاف الاراء لبارت السلع بالنسبه لنا .. صغارنا اكثر شي اغرموا فيه الكوالا و الكنغر .. و مستعدين لو توديهم بس يجابلونهم و يوكلونهم .. اذكر بنتي قالت لي خل نشتري كوالا . و لما قلت لها انها غالية قالت مو مشكلة نبيع البيت و نشتريها بتصيعنا البنت علشان سواد عيون الكوالا .
|
|
|
|
15-01-2005, 12:20 PM
|
#7 (permalink) |
|
مشرفة سابقة
تاريخ التسجيل: Mar 2003
الدولة: دولة الكويت
رقم العضوية :5
المشاركات: 4,711
|
تسلمين إختي حل وترحال على الموضوع الحلو و ما قصرتي على هالمعلومات المهمه عن بلد رائع  و فعلا مثل ما قلتي الي يذهب لجولد كوست لازم ينسي الأسواق و يكتفي بأسواق باقي المدن الاستراليه بريزبن , ملبورن , سيدني أما جولد كوست فهي للإنطلاق والمتعه والرياضات .  تحياتي ........ |
|
|
|
17-01-2005, 01:34 PM
|
#9 (permalink) |
|
مسافر متميز
تاريخ التسجيل: May 2004
رقم العضوية :5157
المشاركات: 199
|
الأخت حل وترحال
من قال أنني لم أقم بكل هذه الرياضات لقد ذهبت وأستمتعت وخرجت من جولد جوست بالسيارة وبالباص وذهبنا لبرزبن ومدينة تسمى Ispawichعلى بعد ساعة ونصف من جولد جوست وأيضا توجهنا من جولد جوست إلى New South Wiles جنوبا وعبرنا أماكن كثيرة بحيرات وجبال وانهر جميلة وأعجبتني رحلة Whales Island الجميلة جزيرة الحيتان أيضا أتجهت شمالا إلى Sunshincoast وفيها نفق تحت البحر طوله 8 كيلومتر ولكن صدقيني جولد جوست مو مثل مالناس وضعوها في مخيلتي ولا أشوفها بالمستوى بالمقارنة مع أوروبا وأمريكا ولين الحين ملاحظ الكل يقول : أنا جاي من جولد جوست كانه راح الجنة ورجع وتلاقين معظمهم بس جالسين في المقهى والألعاب وينامون لين الظهر ويسهرون بالليل وخلاص وسامحيني ترى أنا أحترم رأيك بشدة ولكن هذا رأيي ولولا الأذواق لخلت الأسواق |
|
|
|
25-05-2005, 05:38 PM
|
#14 (permalink) |
|
ابوعبدالله
تاريخ التسجيل: May 2004
الدولة: الخبر - السعودية
رقم العضوية :3789
المشاركات: 1,203
|
اخوي usf
هذا رأي هولاكو الشخصي وانا احترمه، ومثل ما قال لولا تعدد الاذواق لبارت السلع لكن لا تنسى ان هولاكو بنى رأيه مقارنة بأمريكا واوروبا يعني اذا انت لفيت امريكا واوروبا كثير وزرت ديزني لاند و يونيفيرسال ستوديو ومدن الالعاب اللي من هالنوع، راح تصير جولد كوست عاديه بنظرك. اما اذا انت او المدام اول مره تطلعون بره الدول العربيه، فجولد كوست جميله وفيها نشاطات كثيره، وعندك تقارير الاعضاء وشوف اللي يناسبك. انا من رأيي ان جولد كوست تستاهل الزياره لو 5 ايام، يكفي الجو اللي يرد الروح وطيبة الشعب. عموما، انصح تجربون مدن جديده وحلوه مثل كايرنز و جزيره هاميلتون... يقولون طبيعتها احلى من جولد كوست. وبالتوفيق |
|
|
|
27-05-2005, 05:57 PM
|
#15 (permalink) |
|
مسافر متميز
تاريخ التسجيل: Mar 2005
رقم العضوية :19765
المشاركات: 163
|
أختي الفاضله حل وترحال ، أخي الفاضل هولاكو "يمه إسمك يخرع يخوي ! ، شف لك حل
"مساكم الله بالخير انتم وكل الاعضاء الي شاركو في الموضوع، حبيت ادلي بدلوي "على قولتهم" بهالموضوع خصوصا انه يتعلق بقولد كوست أختي حل وترحال، أنا اتفق معاك 100% انه حلاة الرحلة في قولد كوست أو في أي مدينة في العالم ما تكمل الا اذا الواحد استأجر سيارة وطلع يفر يمين ويسار فوق وتحت واستكشف المنطقة وقراها وجبالها وانهارها وبرها وبحرها، وهذي هي طريقتي دوما في السفر. الأخ هولاكو، أكثرنا زرنا امريكا وما خلينا فيها شي ما شفناه وهي قارة متناثرة بمعنى الكلمة وهي تعتبر "التوب" بصراحه كلامك سليم ، لكن كونك تقول قود كوست ممله !! إسمحلي ما اتفق معاك، ترى قولد كوست الي يميزها اكثر شي الراحه النفسية والجو المعتدل وتعامل أهلها الطيب إضافة الى ذلك الكمية الهائله من الرحلات والمغامرات الي متوفرة بسهولة وايضا يميز قولد كوست صغرها كمدينة وكثرة المتعة والرحلات وبالنسبة لي شخصياً حبيتها أكثر لاني قضيت فيها معضم شهر العسل وتربطني فيها ذكريات حلوه . وبالنسبة للثلاث الحدائق الرئيسيه الي فيها صح انه حدائق ديزني لاند افضل منها لكن بالنسبة للناس الي ماسبق وزارو ديزني لاند تراها تعتبر "وااو" وحتى الي زارو ديزني لاند عجبتهم لان فيها العاب ممتازه ونضام ممتاز ومناضر حلوه ايضاَ، أضف الى هذا كله ان الشعب والدوله ما بينهم وبيننا اي مشاكل الحمدلله ولا يهتمون بالدين لان غالبيتهم ملحدين وبالتالي مارح تحصل اي مضايقات ، بصراحه انا شفت استراليا افضل بلد تزوره بعد امريكا لانه تقريبا فيه من امريكا كتخطيط مدن وشوارع "هاي واي" وهي قارة ايضا متسعه ويمديك تستأجر لك سيارة وتتنقل من جنوبها الشرقي "تمسانيا" الى ميلبورن وكانبيرا وسيدني وقولد كوست وصولا الى "Great Barier Reef" أو كارينز .يالله ما ودي اطول عليكم ، سعدت المشاركة معاكم
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض العادي
|
|
|
الساعة الآن 02:16 AM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||