 |
 |
 |
||
|
|
|
||
 |
|
 |
|
|||||||
| التسجيل | الرئيسية | معرض الصور | المنتدى | إشارة الأقسام مقروءة | التصنيفات |
| البوابـات الـــــعــــامــــــة هنا ستجد جميع المواضيع التي تخص عالم الرحلات البرية والبحرية وأدواتها اللازمة. |
 |
|
|
أدوات الموضوع | طريقة العرض |
23-06-2008, 11:20 PM
|
#1 (permalink) |
|
عضو العرب المسافرون المميز
 
تاريخ التسجيل: Jun 2005
المكان: β... Canada ...β
رقم العضوية :28478
مشاركات: 1,677
|
فرســــان .. حتماً سنعـود! - تقريــر رحــ ThE PrOGraMmEr ــلـة إلى فرسـان
 بسم الله الرحمن الرحيم .. السلام عليكم ورحمة الله وبركاته ..  في صبيحة أحد الأيام .. وحين كان المبرمج فاغراً فاه و "يقلّب" في ايميله  .. وجد احد مقاطع الفيديو لرجل عماني يصيد سمك القرش ويدبغه دبغاً مبرحأ! .. حتى استغاث القرش قائلاً .. انقذني يا حليب السعوديييية .. لكن حليب السعودية كان مشغولاً بترميم بيته للأسف .. وراح القرش غلطة  المبرمج .. وبحبّه الغريزي للحيوانات وللصيد .. "قفّلت" معه  .. وفاضت رغبته المتكدّسة والعظيمة لصيد السمك بسبب ذلك المقطع ..  لأني من زمان وانا ودّي برحلات صيد زي الناس وما لقيت اللي يبرد قلبي! << والله قلبة اللهجة ما عاقت معي بمجرد ما انهيت المقطع .. التفتت على البثر الماثل بجنبي في الدوام قائلاً .. ابو صالح ياخي فيني شهوة صيد سمك! .. تكفى تخبر لي حل؟ .. تقدر تضبّط لنا رحلة صيد؟ .. طق ابو صالح صدرة حتى سمعت احد الضلوع انكسر (مشكلته يتحمّس واجد الله يهديه) .. وقال ما لك الا الرحلة اللي تطيّح اللي في راسك ..! لم يعلم المبرمج ان "ابا صالح" كان صادقاً .. وتوقعه يدربي راسه كالعادة  .. وانه مهوب قد "كسرة الضلع" اللهم يا كافي! .. وكذلك لم يعلم ان مقطع الفيديو لذلك القرش المسكين الذي تم جلده من قبل الرجل العماني .. كان بدايةً لعشق لا ينتهي  .. ولرحلات إستكشاف لجمال اخّاذ ومجهول .. ولطبيعة وشواطيء مدفونة للأسف .. فرسان اول ما يسمع الواحد عنها .. يقول ايه! جيزان يعني .. وش تبي بها!  يا ناس ليش انتم تحكمون بدون ما تشوفون الشيء بأنفسكم وتحكمون عليه؟! تدرون وشلون .. اربطوا الأحزمة  .. وكل واحد يلبس فنيلة برتقالية وذلك لإجراءات السلامة .. وخلّوني اقلع بكم مع تقريري المتواضع  عن الجزيرة الحالمة والمظلومة .. فرســـان ..  << انا الكابتن وعلى كيفي .. ابي فنيلة برتقالية .. فسفورية .. ان شاء الله ابي البّسكم شلحة! ما عليكم منّي << والله الكابتن الأخلاق بعد نرجع لموضوع ابو صالح .. ما كانت الا اسابيع معدودة .. الا والرحلة مجهّزة ومضبّطة مسبقاً مع مجموعة من اطيب الناس اللي قابلتهم .. ومن اهل فرسان نفسها .. بدون ما ادخل في تفاصيل هالرحلة .. رحنا وانتهينا .. وبدت قصّة عشقي بعد ما رجعت << ياخي انت عبيط .. ولا تستهبل .. الحين تقرير وزحمة .. وما تدخل في تفاصيل .. وتقول لهم اني رحت ورجعت وخلصت الرحلة! بالله عليك!! يعني مسوي التقرير عشان تبيع حلاو بقر فيه؟يا ناس وش فيكم شبيتوا علي .. اصبروا طيب تجيكم السالفة .. اللي حصل .. اني رجعت .. وانا عاشق لهالجزيرة جداً .. وكانت كلها شهر وشوي .. وانا راجع لها مع نفس اللي رحت معهم .. وزاد معنا واحد كان رافض وبشدّة انه يجي .. لكنّي اقنعته  ..رحنا وخلصت الرحلة ورجعـ.. << انقطع الإتصال مع هذا المستخدم بسبب ان تلفزيون سامسونج مقاس 46 بوصة انرمى على جبهته من قبل احد متابعين التقرير .. وذلك جزاءً له على استهباله المتكرّر في التقرير .. راجعونا بعد 3 شهور اذا فاق المبرمج من غيبوبته .. << كيف الحال يا صندوق التنمية << شكل هالمرة يبي يجيني تلفزيون صدق عاد ههههههههطيب يا ناس عطوني فرصة اتكلم .. والله ابشرح لكم كل شيء .. رجعت من الرحلة الثانية .. وما ان وصلت الى شلّة الدشير المقرّبين لي (لأن اخوياي حقين الدوام كنّك داخل قسم هيئة حي الملك فهد .. كلّهم مطاوعة ) .. الا وكدت اغرق بسبب الوابل الذي جائني من الشتائم والـ"ذبّات" على سفرتي لفرسان! << هيّن بس .. من يضحك اخيراً .. يضحك كثيراً انت وياه ..المبرمج .. وكعادته .. يلعب في راس اللي قدامه بالكلام .. مع بعض من الفقشات  .. والتبهير بالصور ..ما ان انتصف المبرمج في سرد احداث رحلته الرائعة لفرسان (وهذا كله ولا يزالون العيال شابين فيني حش ) .. حتى بدأت النظرات تتغيّر .. وبدأ التفكير في تجهيز رحلة الدشير الى فرسان يصبح جدياً ! .. وييين كلامكم تو وتقطعون فيني وحش .. كلها ساعة وانتم مقتنعين يا مخفّات؟عشان ما اطوّل الموضوع اكثر من اللازم .. وعشان ما يكون التقرير ممل .. ابدخل في الموضوع على طول<< يقالّك الحين ما طولته؟ يا طلّاب .. اقلبوا الصفحة بدال 18 .. الى 65 .. افاااااا يا الوطواط .. هذا وانا اقول انك شاطر! .. وين كتابك؟(الوطواط يهمس في اذن المدرّس "المبرمج") .. ممتاااااز يا الوطواط .. اصلاً ما يحتاج كتاب << الوطواط يبي يضبّطني مع واحد في الجوازات عشان اجدد جوازي بدون ما يتلكعون على ختم تايلند .. فصار من افضل الطلاب .. نخش سيدة في الموضوع .. بعد كم شهر من روحتي الثانية .. تم الترتيب لرحلتي مع الدشير المذكورين آنفاً (وعددنا 3 .. وللأسف رابعنا سافر لأستراليا يكمّل درساته قبل ما تتسهّل لنا الرحلة .. الله يوفقه يا رب ) .. وهم ..1- انا .. املحهم .. وامير الرحلة .. واكثرهم حنكة .. وكل شيء فيني زين .. على اني اصغرهم سناً 2- محمد .. والملقب "ابو حوش" في الرحلة وفي هالتقرير .. شخص يعتمد عليه .. وكان هو الوحيد اللي ما قعد يحش فيني يوم اسولف .. واكثر العيال حماساً .. لكنه اذا جاع ودّك تسطّره .. 3- برضه محمد .. والملقّب "ابو نايف" .. وهذا كان اقللل العيال حماساً .. ومعليش يبو نايف لو قلت .. وبصمت بالعشرة .. انك كنت جاي "مجاملةً" لي ولأبو حوش .. لكن الحمدلله ان الوضع تغيّر .. << "ابو نايف" يقول في نفسه .. وش دعوى .. وانا ما يعتمد علي؟ طبعاً ابو نايف ما يناااااااام ابد اسم الله عليه .. لدرجة انه ممكن تصير تسولف معه .. ما تدري الا وهو يشخر فجأة!! واللي يقهرك انه يقوم ويقول ما نمت!!!! ما لكم بالطويلة << هذي المرة العاشرة تقولها!! ونخش في التقرير من بدايته .. حجزنا كان قبل الرحلة بحوالي شهر .. وعلى خطوط ناس (وهذا موقعهم .. اضغط هنا) .. والحمدلله طحنا لنا على سعر خرااافي! .. طلعت التذكرة رايح جاي للشخص .. ب200 ريال .. (لاحظوا انها على الخطوط السعودية بأكثر من 600 ريال! )..الذهاب كان يوم الإربعاء بتاريخ 18/6/2008 من الرياض الى جيزان .. الساعة 10.45 صباحاً .. والعودة كانت يوم الجمعة بتاريخ 20/6/2008 من جيزان الى الرياض .. الساعة 10.35 صباحاً ..  اخذنا إجازة يوم الإربعاء من دواماتنا .. ومن الساعة 7.30 وحنا قايمين .. مع اني كنت خايف ابو نايف يجحدنا ..ما رتبت شنطتي الا الصبح كالعادة .. وشوي و"ابو حوش" جايني .. وعقبها بعشر دقايق .. "ابو نايف" واصلنا .. ما شاء الله .. الأمور تمام حتى الآن .. اتّجهنا .. وببطون فارغة .. الى مطعم كبدة تاكل اصابع الهندي اللي في المطعم من لذاذتها! افطرنا على عجلة من امرنا .. واتجهنا لمطار الملك خالد الدولي في الرياض (مسوي كابتن صدق شكلك! ) بسيارة "ابو حوش" ..وإليكم هذه الصورة من الطريق ..  اوه نسيت اقول لكم! راح يكون معنا في هالتقرير بإذن الله .. حوالي 200 صورة .. وحدة تنطح وحدة .. وكعادتي ارجع اقول .. اللي وده يسوي ذيب ويقعد يعد .. الله يقويه << والله اكبر دليل انك نصّاب .. انك تقول "حوالي" .. وبعدين تقول وحده تنطح وحده! الكاميرا المستخدمة من نوع Canon PowerShot G7 .. وهي كاميرا شبه إحترافية .. اقصد .. تقدر تسوي فيها كل شيء تسويه على الكاميرات الإحترافية .. الا انّك تغير العدسة .. لأن عدستها ثابتة ..هذي صورة الكاميرا من احد المواقع على الإنترنت ..  الكاميرا 10 ميغا بيكسل .. ودقتها ما شاء الله تبارك الله رائعة .. مثل ما قلت .. ما يعيبها الا انك ما تقدر تغيّر عدساتها .. وطوّروها وطلعوا اختها الجديدة الـ G9 .. نرجع للتقرير .. لحظة دخول مواقف المطار ..  سارت امورنا بسلاسة في المطار لولا بعض الفلسفة من موظّف البّوابة!! واقفين ساعة ننتظر .. ليش؟عشان يدخلون العوايل قبلكم!! ليش وش ممكن نسوي يعني!! المشكلة اننا دخلنا بعد العوايل على طول .. واجتمعنا معهم في الخرطوم حق الطيارة!! يعني لو في راسي اسوي مشاكل او اتحرّش .. ما ردّتني حركتك اللي يقال لك تنظيم يا فاشل! .. لكن للأسف .. مهيب واقفة على هالشيء .. اشياء كثيرة لا تزال مفهومة بالمقلوب ..! خطر يحطون مقابر للعوايل! المهم .. جلسنا في مقاعدنا .. وكان للأسف مقعدي لحالي .. ومقعد "ابو حوش" و"ابو نايف" مع بعض في الصف اللي وراي .. هذي صورة من الشبّاك وانا في مقعدي ..  طبعاً طيران ناس .. حتى سما .. ما عندهم وسط .. يا تجيك طيارة جديدة ونظيفة ومرتبة .. ولا وحدة كنها التكاسي اللي يكدّون في مكه! والحمدلله كانت ذي زينة وجديدة .. والخطوط بشكل عام تنظيمها جيد .. وهذي صورة من مقعدي ..  اقلعت الطيارة في وقتها ولله الحمد .. وهذي لحظة الإقلاع .. ولاحظوا الغباااااار ..  طبعاً كنت خايف بشكل غير طبيعي من هالغبار انه يحوسنا هناك .. خصوصاً اني انا اللي متزهّل للعيال بأني اونّسهم واضبّط لهم اطلق رحلة .. لكن الحمدلله تسهّلت من رب العالمين .. ارتفعنا شوي ..  طبعاً "ابو نايف" نام على طول حاولت انام لأني ما كنت نايم زين .. والحمدلله نمت شوي وريّحت .. وقمت وحنّا فوق ابها .. وكان الجو خرافي ما شاء الله .. والسماء غيووم! .. وجت هالصورة ..  وهذي اقرب .. مع جناح طيّارة "ناس" ..  يتبع>>
|
|
|
|
23-06-2008, 11:20 PM
|
#2 (permalink) |
|
عضو العرب المسافرون المميز
تاريخ التسجيل: Jun 2005
المكان: β... Canada ...β
رقم العضوية :28478
مشاركات: 1,677
|
شوي واحنا واصلين فوق أراضي جيزان .. لأن ما بين أبها وجيزان الا 20 دقيقة تقريباً بالطيارة .. وهذي صورة من الجو قبل الهبوط ..
 قربنا اكثر ..  الحمدلله على السلامة .. هبطنا الساعة 12.20 الظهر تقريباً .. طبعاً نسيت اقول .. ان "ابو حوش" هاوي للتصوير الإحترافي مثلي .. فالصور لكل هالتقرير .. من تصويري انا وياه .. وقد اكون انا صورت في هالرحلة اكثر شوي .. لكن حبيت اقول لكم هالشيء .. بس للمعلومية .. لحظة النزول من الطيارة في مطار الملك عبدالله في جيزان ..  المطار صغير صح .. لكن جديد ومرتب ونظيف صراحة ..  الجو كان حررر .. ورطوووبة .. وهنا بدت تقفل مع "ابو نايف" لأنه يتعب مع الرطوبة شوي في التنفس .. وانا زاد همّي طردياً .. خايف ما تعجبهم .. واللي هذا اوله .. !الله يسهلها بس .. طلعنا من المطار .. وقلنا للتاكسي ياخذنا للميناء اللي تطلع منه العبارة .. كان موعد تحركها الساعة 1 الظهر .. وتأخرت الى الساعة 1.30 .. صورة من الطريق للميناء وحنّا في التاكسي ..  التاكسي اخذ 10 ريال على كل شخص .. يعني 30 ريال .. وكان معنا واحد من اهل فرسان .. طبعاً حاسب السواق لحاله .. سواق التاكسي اخلاقه كنها ريحة فمّي وانا قايم من النوم! يقطع ابو شكله كنّه مودينا ببلاش! ينفخ واخلاقه دمار .. المهم .. انا طبعاً كل شوي يضيق صدري زود .. لأن كل شوي جاي شيء اسوأ من اللي قبله! الرطوبة والحر! .. سواق التاكسي واخلاقه! .. والقادم مذهل اكثر! نسيت اقول لكم .. ان العبارة مجانية من الدولة .. وممكن تنقل سيارات فيها (تكفّي 30 سيارة على ما اعتقد) لكن لازم حجز مسبق عن طريق مكتب خاص لهم .. طبعاً انا بحكم اني جيت مرتين قبل .. وهذي المرّة الثالثة .. كنت حريييص على العبّارة مرة .. والله وقسم بالله مهوب عشان الفلوس ابد!  .. لكن لأنها مريحة مره وما تحس بالأمواج وبالمطامر .. لأنه مهوب بس من عيوب فرسان! .. الا اكبر عيب في فرسان هو الإنتقال بالقارب الصغير من جيزان الى فرسان .. والعكس .. متعب مره ..على فكرة .. اهل جيزان واهل فرسان يسمون هالقارب .. وغيرها من القوارب .. "فلّوكة" .. الفلّوكة اول ما تركبها تكون فله وممتعه .. لكن المسافة بين فرسان وجيزان 50 كيلو .. وتاخذ بين 50 دقيقة الى ساعة وربع على حسب قوة الأمواج (طبعاً الأمواج ما تدري عنها العبّارة من ضخامتها) .. مثل ما قلت للعيال .. كنّك راكب بيت .. كان ذاك اليوم امواااج قوية مرة ..انتم ممكن تتسائلون .. ليش قاعد اتكلم عن الفلّوكة !.. وانا رايح ابركب العبّارة !.. الحين تعرفون .. دخلنا المكتب حق الحجز على العبّارة .. وكان صندقة ما يجلس فيها ولا غنم ودجاج! غريبة صراحة دولة بهالميزانية وهالإمكانيات وتشوف فيها هالأشياء .. كنّك في موريتانيا! .. عموماً مهوب موضوعنا ..دخلنا وقالوا لازم تاخذ رقم على بال ما يجي الموظف حق التذاكر .. خذنا رقم وجلسنا ننتظر .. الساعة 1 .. 1.10 ! 1.20! الموظف ما بعد جا! الساعة تقريباً 1.30 شرّف طويل العمر! .. ولاحظوا ان العبّارة المفروض تمشي 1.30! طبعاً احنا ننتظر رقمنا! والناس كلها قايمة ومساقط وتنظيم زيــــــ0ـــرو! انا قلت ابقعد الين يجي رقمنا .. بقينا احنا آخر ناس مع كم شخص زود! قام "ابو حوش" وقال للموظف هاه كم باقي لرقمنا؟ قال الموظف وبكلللل بجــــــــــاحة .. يمكن ما يمديكم على العبّارة!!!!! طيب ياخي لنا اكثر من ساعة واحنا ننتظر .. وماخذين رقم .. وانتم اللي مأخريننا .. وش ذنبنا تروح علينا العبّارة ؟ قال والله ما ادري (انا اقول في نفسي الله يستر عسى يمدي عليها) .. طيب يالله عطنا التذاكر ولا يكثر لا بارك الله فيك وفي اللي حطّك هنا ..!! خذنا التذاكر ونطلع من المكتب نركض لبوابة العبّارة! .. نوصل ويقولنا العسكري وبكل اريحية! .. العبارة فاتتكم!! .. طيب هم اللي أخرونا ساعة عندهم ..! قال ما اقدر اسوي شيء .. قلنا لعل الأمر فيه خيرة لنا ان شاء الله .. وطلعنا خائبين الأمل ..تدرون وشلون .. احس اني كثّرت عليكم وحنا تونا في اول يوم دراسة .. ولا وش رايكم؟ << الا يا رجال ودّك تعجل تخلّص الحلقة ولا مهوب زود اخلاق وحرص فيك ..اتمنى يعجبكم التقرير كبداية .. انتظروني في الحلقة الثانية مع العديد من المفاجآت .. والقادم مذهل اكثر ان شاء الله .. وترا ان ما جاني ردود زينة مانيب مكمّل .. << لا تكفا! .. يرحم أمّك!!اشوفكم على خير .. تحيّاتي لكم .. ThE PrOGraMmEr
|
|
|
|
|
24-06-2008, 01:04 AM
|
#4 (permalink) |
|
كاتبة متميزة
تاريخ التسجيل: Oct 2005
المكان: قطـــــــــــــــــــــــر
رقم العضوية :50360
مشاركات: 9,333
|
لبسنا التي شيرت البرتقالي
بس شمعنى برتقالي ذكرتني بعمال البلدية..تقرير رووووووووووووعه روووووووووووعه روووووووووعه مبين من أوله خفة الدم اللي تعودناها من المبرمج .. والصور اللي ما شاء الله وااااضحة.. وتراني بأعد الصور أنت اللي قلت 200 أنت اللي جبتها لنفسك.. تعجبني التقارير اللي تشجع السياحة الداخلية.. وبصراحة فرسان أول مرة أسمع بها.. ومتشوقة جداً جداً للتقرير .. تم حفظه بالمفضلة لسهولة الوصول له.. منتظرة بقية المغامرة ..
|
|
|
|
|
24-06-2008, 03:14 AM
|
#5 (permalink) |
|
مشرف دول آسيا الأخرى و الإمارات
تاريخ التسجيل: Jan 2006
المكان: طـبـعـاً دبـــــي
رقم العضوية :55662
مشاركات: 2,860
|
السـلام عليـك أخي العزيز والمبدع  ThE PrOGraMmEr تحية طيبة وبعد ،،،أحييك  على تقريرك الجديد الرائع من بدايته ، وإنته من الأعضاء اللي لهم بصمة مميزة في وصف رحلاتك بأسلوب كوميدي ساخر لاينازعك فيه أحد  أضف إلى ذلك صورك الرائعة  التي أمتعتنا بها في تقريرك النمساوي ، وها أنت تواصل ذلك في تقريرك هذا ، وإن شاء الله سأظل متابعاً للأجزاء القادمة . بالتوفيق  إن شاء الله
|
|
|
|
|
24-06-2008, 06:02 AM
|
#6 (permalink) |
|
مشرف بوابة الكاميرات ومعالجة الصور
تاريخ التسجيل: Apr 2005
المكان: دولة الكويت
رقم العضوية :20682
مشاركات: 2,672
|
سلام عليكم و رحمة الله و بركاته هذا أنا أحد أشهر المتربصين لروائعك التصويريه في تقريرك السابق لأقصى أطراف النمسا الرائعه .. أيضا سوف أتلصص على مناواتك التصويريه الفذه بــــ Canon PowerShot G7 في قلب أجزاء هذا التقرير والذي من المأكد سوف يكون رائعه من الروائعك بهذا المنتدى ..!! لك مني كل التقدير ،،،
|
|
|
|
|
24-06-2008, 10:42 AM
|
#7 (permalink) |
|
مسافر متالق
تاريخ التسجيل: Jun 2006
المكان: السعودية .. في قلبي ..
رقم العضوية :93049
مشاركات: 695
|
السلام عليكم .. كيفك؟ .. من زمان عنك وعن تقاريرك الممتعة مااصدق انك رحت جزيرة فرسان !! جيزان !! .. عشان تصيد سمج !!! .. ضاقت يعني !!!  وما راح اصدق الا اذا شفت الصور .. وريتنا كم صورة حق الطيارة وشلون ندري بالله اما التاكسي ياخذ على كل راس 10 ريال !! اول مره اسمع صراحة .. مره زعلت على الي صار لكم .. احس لو انا كنت جلدته جلد مبرح شكلكم ركبتوا فلًوكة في النهاية في الانتظار ...
|
|
|
|
|
24-06-2008, 02:25 PM
|
#10 (permalink) |
|
مسافر متميز
تاريخ التسجيل: Jan 2006
رقم العضوية :54896
مشاركات: 238
|
اخيرا لحقت على تقرير قبل لا يقضي ومن مين من المبرمج
تابع صراحه حمستني اروح هناك وانا ما بعد شفتها وبالنسبه للاماكن السياحيه عندنا ما شاء الله بديرتنا اماكن سياحه شتويه وصيفيه بمختلف مناطق المملكه لاكن محد حولك عندنا ثلوج بالشمال وطبيعه بالجنوب وجزر وبحر بالشرق والغرب غير الحرمين الشريفين الله يحفظهم والله لو نلتفت لها شوي ان نصير اطلق من لبنان بالسياحه <<<<<<<<< اياك اعني واسمعي ياجاره (مير محد سامعني) واصل رعاك الله
|
|
|
|
|
24-06-2008, 04:15 PM
|
#11 (permalink) |
|
خبير استراليا
 
تاريخ التسجيل: Jul 2005
رقم العضوية :35381
مشاركات: 2,059
|
دعوة لنهائيات أوربا وأخرتها فرسان وأنا أفتح رسالتك وأنا أهوجس يمديني أخذ إجازة من الدوام علشان هدية مشرفنا وأخرتها سمك وفرسان <<< جريتني على وجهي مبدع أخوي كالعادة الحمدلله أني لحقت الموضوع من البداية
|
|
|
|
|
24-06-2008, 06:06 PM
|
#12 (permalink) |
|
أبوتركي
تاريخ التسجيل: Mar 2004
المكان: وطني الحبيب .. وهل أحب سواه ؟؟
رقم العضوية :1910
مشاركات: 5,797
|
ماشاء الله تبارك الله أخي الكريم والمبدع
يظهر إننا هالمرة مع تقرير من نوع خاص إبداع بالاسلوب .... تصوير رائع .... جهد جبار أسأل الله لكم التوفيق والسداد منتظرين البقية بارك الله فيك بفارغ الصبر
|
|
|
|
|
24-06-2008, 06:23 PM
|
#13 (permalink) |
|
عضو العرب المسافرون المميز
تاريخ التسجيل: Jun 2005
المكان: β... Canada ...β
رقم العضوية :28478
مشاركات: 1,677
|
هاه يا شباب .. من عنده سؤال من الدرس الماضي؟ لازم تفهمون ترا .. لأن فيه كويز الحلقة الجايّة .. آخر ما وقّفنا عنده يا طوال العمر .. كان يوم اننا بدينا نصيد السمك .. ولا واحد انتبه اني طمرت!! وش هالطّلاب الدّاجين!! متى اطريت صيد سمك انا!؟ كل واحد يجيب ولي امره بكرا .. وحلقة ما فيه الحين اسوي زحمة وحلقة وتقرير .. وانت ما تذاكرون! ليش ليييش؟  طيب هالمرّة ابمشيها عشانكم توكم لحمكم طري .. والمرة الجاية ابسوي بكم زي العماني ما سوا بالقرش مهوب بس استدعاء ولي امر .. على فكرة .. اللي يبي يشوف المقطع اللي كان له الفضل بعد الله في كل هالرحلات (اللي هو حق القرش اللي قلت لكم) .. يتفضّل هالرابط .. إضغط هنا عودةً لطريقنا من المطار الى الميناء .. نسيت اعطيكم هالصورة .. هذا شيء مدري وشو صراحة بس اعجبني وصورته  اقول لكم .. طلعنا من عند العبّارة قافلة معنا .. وتعبانين من الركض ومن الرطوووبة .. طبعاً خلاص ما لنا خيار الا الفلّوكة .. والشكوى لله .. ندور تكسي عشان يودينا للميناء الثاني حق الفلّوكات .. ما فيه (طبعاً اقل من كيلو المسافة .. لكن كانت الرطوبة والحر لا تطاق ولا لعدّة امتار ..)ندوّر يمين يسار .. برضه ما فيه كنا ناوين ما ناخذ حبوب دوار البحر الا من فرسان بحكم اننا نبي نروح بالعبارة .. ما راح نحتاجها الا في فرسان .. لكن دام اننا الحين انحصر اختيارنا بالفلّوكة .. لازم من هنا من صيدلية في جيزان ناخذها بدون نقاااش .. ما فيه الا نطقّها رجلية للصيدلية وامرنا لله .. سألنا والحمدلله كانت فيه صيدلية قريبة .. يمكن 4 دقايق مشي ..وصلنا .. وقعدنا لنا ربع ساعة عشان البراد داخل الصيدلية بعدين اخذنا الحبوب وطلعنا (قيمتها 5 ريال بس! .. ووحدة بوحدة من جد!).. مرينا بقالة .. واخذنا مشروبات باردة عشان هالجو لا بد منها .. طبعاً اسرع قارورة ماونتن دو شفتها تخلّص في حياتي كانت ذاك اليوم .. شربها ابو حوش في 1.357 ثانية!بس مهوب منك .. من العطش والله .. المهم خذنا الحبوب (لازم قبل الرحلة بحوالي نص ساعة تؤخذ).. وكملنا مشي شوي الى ما لقينا تاكسي ورحنا معه بـ 5 ريال .. كلها دقيقة واحنا واصلين للميناء .. هذي الفلّوكات المخصصة لطريق (فرسان - جيزان) والعكس ..  لقينا زحمة غير طبيعية عند خفر السواحل (لأنه لازم تسجّل بطاقة احوالك انك طلعت من جيزان متّجه الى فرسان) .. طبعاً كل الزحمة من اللي صار لهم مثلنا وفاتتهم العبارة .. ونفس الوجيه اللي شفناها في مكتب العبارة لقيناها هنا ..استغل ابو حوش الوقت اللي اخذناه في الإنتظار .. وخرج لنا بهالإبداعات من الصور ..     هذا طير سبيييكة .. احس ان اخوياه يزرفون ساندوتشته في الفصل  وهذا والله ما ادري ليش كل ما اشوفه اتذكر عدنان ولينا .. والله يا ناس يشبه لشيء في عدنان ولينا بس عجزت اتذكره ..!  قارب .. اعياه الزمن وملوحة البحر!  بعد وقت لا بأس به ضاع في إنتظار الموظف حق خفر السواحل انه يخلص العدد الكبير من البطاقات اللس عنده .. تحرّكنا اخيراً .. وكانت الساعة اذا ما خانتني الذاكرة .. 2.10 بعد الظهر ..وهذي صورة من داخل الفلّوكة .. ويظهر ابو حوش على الجنب .. وأحد العسكر اللي كانو معنا .. على اليسار ..  (يعطيك الخاتم يبو حوش )طبعاً مثل ما قلت لكم مسبقاً .. اول ما تتحرّك الفلّوكة تصير ممتعة وضحك مع المطامر في الأمواج .. لكن شوي تبدأ تقرف من الوضع! احد القفزات .. وضحكة اليمة مني انا وابو نايف  نسيت اقول لكم .. الفلّوكات اذا كان عدد الركاب قليل (يعني اقل من 6) .. ياخذون بين الـ 250 الى 350 ريال على المشوار .. سواء رايح او جاي كلها واحد .. اما اذا كانو ناس واجد .. زي حالتنا (كنّا 12 شخص) .. فياخذون 50 ريال على الشخص ... فدفعنا 150 ريال لنا الثلاثة .. صورة من شبّاك الفلّوكة ..  وحدة ثانية .. بس مع عكس الفوكس ..  طبعاً اهل فرسان اللي يتنقّلون كثير بالفلّوكة .. ما عندهم اي مشكلة!! ما شاء الله تبارك الله تقول راكبين أودي من الراحة والهدوء! حتى دوار البحر ما يحسّون فيه! الغريب في الموضوع .. معلومة قد سمعتها قبل .. لكن تأكدت من العسكري اللي كان معنا في الفلّوكة وصارت صحيحة! طبعاً على كلامه .. والعهدة على الراوي .. يقول لك عشان تتجنّب دوار البحر بدون ما تستخدم حبوب .. خذ لك تقريباً كمية بيالة شاهي من موية البحر .. واشربها! لكن مانيب مسؤول عن اي نتائج .. اللي يستفرغ ولا يجيه تسمّم ما لي دخل .. انا استخدمت الحبوب وصراحة مريحة جداً ومفعولة ولا احلى .. وقيمتها رخيصة مره!المهم .. انتهى المشوار بعد عناء .. خصوصاً في آخر المشوار يوم قفّلللت معنا من كثر المطامر كننا بشاص في النفود! لقينا العبارة اللي كان المفروض نروح فيها قد وصلت من زمااان .. وهذي صورتها ..  ومن زاوية ثانية اقرب ..  يتبع>>
|
|
|
|
|
24-06-2008, 06:24 PM
|
#14 (permalink) |
|
عضو العرب المسافرون المميز
تاريخ التسجيل: Jun 2005
المكان: β... Canada ...β
رقم العضوية :28478
مشاركات: 1,677
|
وهذي لحظة الوصول الى الميناء .. وطبعاً التصوير ممنوع بحكم انها منطقة عسكرية رسمياً .. بغوا يجلدون ابو حوش يوم طلّع الكاميرا لكنه ذيبان امداه يلقط هالصّورة .. الطريق اخذ بالضبط ساعة وعشر دقايق .. يعني يوم نوصل كانت تقريباً الساعة 3.20 او 3.30 .. طبعاً مثل ما قلت لكم مسبقاً .. كنت منسّق مع واحد من اهل فرسان .. هو واخوه مع بعض .. عندهم قوارب وعدّة صيد .. يعني ادوات رحلات متكاملة مـــن الـــى .. ومصرّح لهم من خفر السواحل انهم يطلعون بناس زي كذا للنزهات .. (ما فيه الا هم .. وواحد ثاني اللي مصرّح لهم رسمياً .. لأنها برضه منطقة عسكرية اللي يطلعون منها قوارب الصيد) .. ما راح اعطيكم تفاصيل الإتفاق اللي بيني وبين الرجال اللي قلت لكم الحين .. عشان ما احرق البرنامج عليكم .. لذلك راح اخذه حبّه حبّه .. وابيكم انتم آخر التقرير تتوقّعون كم كلّف .. اوكي.. ؟ الرجال اللي كان المسؤول عن استقبالنا في الميناء .. وبشكل عام عن تنقّلنا بين السكن والميناء وغيرها من التنقلات في فرسان .. اسمه "ابكر" .. وعلى فكرة ابكر اسم احد الجزر القريبة من فرسان .. وكثير تلاقي هالإسم في فرسان .. على فكرة .. تصدّقون ان فرسان اكبر من البحرين كمساحة!! لكن طبعاً ما فيه اي مقارنة كبنيان وسكّان ..سكانها على كلام ابكر حوالي 20 الف .. هي عبارة عن مجموعة كبيرة من الجزر .. حوالي 84 جزيرة .. متفاوتة بالبعد عن الجزيرة الأم .. ومتفاوتة بالأحجام بعد .. وصلنا .. واذا بـ "ابكر" في إنتظارنا .. بالهايلوكس الهايلوكس عندهم اهم من ماء الشرب .. موجود بكثرة غير طبيعية ..كالعادة .. كنّا جوعانيين .. وحول ما اطقطق على رقبة ابو نايف من الجوع! بس انه كان وقت صلاة العصر .. وقفنا عند المسجد وصلينا الظهر والعصر جمع تأخير .. وطلعنا كالذئاب السيبيرية .. تبحث عن طرف رائحة دم! حتى ان ابا نايف قد بدأ يلتهم حذاء ابو حوش من الجوع .. لولا ان ردعته عن ذلك التصرّف .. وعزّيته بقرب وقت الطعام .. المهم .. وصلنا لمطعم .. كان عليه رز! شيء غير طبيعي .. يا شيخ تاكل الهندي اللي يشتغل فيه بكبره وراه مهوب بس اصابعه اخذنا دجاجة ونص مضغوط .. مع رز احمر .. اجتمع اننا 1- جوعانيييين .. 2- والرز والدجاج كانو لييينة ولذيييذة .. فأكلنا اكل بدون عقل حتى ان كرشة ابو حوش ما طاعت تطلع مع المحل الا يوم هدمنا جدار المحل المحل صغير .. وخدمته سيئة .. وكلّه ذبّان .. لكن يغطي طعم الأكل على هذا كلّه! خذوا هذي صورته .. وانصح به وبقوّوة ..   كان اتفاقي مع ابكر واخوه "ابو امجد" "عصام" (ابو امجد هو اللي يكون معنا في الرحلات البحرية وفي كل شيء .. يعني ابكر بس في التنقلات بالسيارة) .. كان الإتفاق اننا نوصل لفرسان .. ونطلع مباشرة لرحلة الصيد على الساعة 4 بدون ما نروح للفندق .. حتى اننا ما حجزنا الفندق الا ليوم الخميس بس (طبعاً احنا اليوم الإربعاء للّي مهومب شاطرين ونسوا وش اليوم ) ..ما راح اتكلّم عن الفندق الحين .. وخلوه في وقته .. اخذنا حبوب دوار البحر .. ووجّهنا من المطعم .. الى مرسى "جنابة"  << اسمه غريب!!مرسى جنابة هذا .. على طول جنب الفندق اللي سكننا فيه.. ولا دقيقة بالسيارة .. و 5 دقايق بالرجلين .. ارجع واقول .. ما راح اجيب اي طاري للفندق .. الا اذا وصلناه اوكي ..؟ وصلنا شاطيء جنابة .. وهذي صور له ..   طبعاً تلاحظون عدد القوارب الكبير .. وانا اقول لكم تو انه بس 2 مصرّح لهم! القوارب هذي كلها ملك لناس .. ويطلعون لحالهم .. لكن اللي يسوون رحلات للناس .. بس الأثنين اللي قلت لكم .. صورة مقرّبة .. وتلاحظون فيه اثنين من محترفين دوري أمم اوروبا  الى هاللحظة .. والعيال ما بعد شافوا من الوناسة شيء .. ما شافوا الا اخلاق تجاريّة وحر ورطوبة ..! بداية الراحة النفسية للعيال .. والأهم لي انا لأني شايل هم مثل ما قلت .. كانت بتعامل ابكر المثالي! ما شاء الله تبارك الله على ذوليك الأخوان .. يحرجوووونك بأدبهم وطيبتهم واخلاقهم العالية .. وهالشيء لاحظته في اهل فرسان كلهم ما شاء الله ..انا بديت ارتاح شوي يوم شفت العيال معجبين جداً بأبكر .. ولأني عارف ان ابو امجد يبي يعجبهم بعد .. من اول ما سلّمنا على ابو امجد وركبنا القارب .. والنفسية منقلبة تمااااماً .. 180 درجة! طبعاً للأفضل .. اولاً .. كان فيه هواء بارد وراااايق جاي من البحر .. ثانياً .. انبسطوا جداً من ترحيب ابو امجد وابتسامته وخفّة نفسه .. وكذلك خفّة دمه .. لأنه راعي استهبال ثالثاً .. الأمواج اللي كانت فيه وحنا في الطريق خفّت مررره .. رابعاً .. ركبنا القارب ومعنا شناطنا .. وغيرنا ملابسنا وطقينا الشورتات والفنايل الكت  ..وهذي صورة وحنا تونا مغيرين الملابس .. ويظهر ابو نايف يمين .. وابو حوش يسار .. من هنا .. The Fun has begun!!  وبدت الفلّه وسعة الصدر .. طبعاً ابو امجد الله يجزاه خير .. حرصاً منه على سلامتنا وراحتنا .. اخذ اكبر قارب عنده (واللي هو مخصص ل 8 اشخاص فوق .. بينما حنا بس 3!) ما كانت الا دقايق معدودة .. الا وابو امجد داق سلف لمكينة القارب وحرّكنا .. وبدت ابتسامة رضا وإعجاب ترتسم على وجيه الدشير .. تعبيراً عن الرضا والوناسة .. خصوصاً على وجه ابو نايف اللي كان اكثر واحد قافلة معه ..هذا ابو امجد وهو يدق سلف بالقارب  صورة مقرّبة .. بالله ما تحسّون بالسماحة في وجهه؟  ابو امجد كان معه مرافق (علي .. او "ابو عيسى").. يساعده في .. رمي المرساة .. تنزيل العفش .. تحضير العشاء .. إلخ هذي صورة ابو عيسى .. اكبرهم سناً .. وبرضه حبيب وخبرة إبحار وصيد ما شاء الله!  صورة مرسى جنابة بعد ما تحركنا ..  ابو عيسى .. وصورة .. امها بورتريه .. وابوها سيلويت << ما راح يفهمني الا راعين التصوير ههههههه صورة ثانية .. ولاحظوا الوزرة .. وهي اللبس الرّسمي لكل شيّاب فرسان!  مشينا بالقارب حوالي ثلث ساعة .. والهواء راااااايق .. ووقفنا في مكان مثله مثل غيره .. لكن صيّادنا بخبرته من يوم انه طفل ما شاء الله في البحر .. عرف ان هالمكان فيه صيد! سبحان الله! شيء غريب .. ما تدري وشلون يعرفون المكان المناسب! لكن خبرة حوالي 40 سنة .. كفيلة بهالشيء .. للأسف ان ابو حوش الله يهديه ما كان شاحن بطارية الكاميرا فل (لأن الكاميرا حقته طبعاًً ) .. فلذلك الصور لهاليوم مهيب كثيرة مره بعد ما ركبنا القارب .. لكن عوّضناها من بكرا ..طبعاً السنّارات بسيطة جداً .. عبارة عن قطعة فلّين مربّعة .. ولافين عليها خيط الصيد وفي نهايته خطّاف وثقّالة طبعاً .. كل واحد اخذ سنّارته .. ورمى خيطه .. ابو نايف كان لي تجربة صيد معه في منطقة الشعيبة جنب مدينة جده .. وكانت سيئة جداً .. اولاً اننا ما اخذنا حبوب دوار البحر وسبب لنا هالشيء غثيااان .. ثانياً والأهم .. السمك في بحر جده ما يقاااارن بالسمك في بحر فرسان ابد .. فلذلك الصيد في الشعيبة كان قلييييل .. لدرجة اننا جلسنا 4 ساعات او اكثر! وانا ما صدت فيها الا سمكتين .. وابو نايف ما صاد شيء .. بالإضافة الى الغثيان مثل ما قلت! فكانت سمعة الصيد سيئة عند ابو نايف .. لكن الوضع تغيّر في فرسان ..كثّرت عليكم الكلام .. رمينا السنّارات .. والطعم كان سمك سردين (ذاك الصغار اللي كبر الإصبع) .. ما امدى الطعم يوصل القاع الا والخيوط تشد!! ما شاء الله تبارك الله .. الثروة السمكية في فرسان خرااااااااافية .. و كثرة السمك لا توصف .. وهذي اول صيدة لي انا وابو حوش في نفس الوقت .. هامورتين تحبّها قلوبكم .. (ابو حوش يمين .. وانا يسار .. ويظهر ابو امجد بإبتسامته ورانا .. ) الشعور بالإنتصار ..  صورة الشبك واحنا توّنا ما لنا ولا 5 دقايق واقفين! (بالله كيف نعالي البرتقالية؟ ) على فكرة .. ترا النّعال الزرقاء اللي يمين .. معروضة على الإي باي .. ومسيومة حتى الآن ب 460 دولار .. ولا زال باب المزايدة مفتوح .. وتراها من توقيع المصمم العالمي.. مقتدر الزمان إبداع الدين .. من بنغلاديش الشقيقة .. << تراه يطق لروبرتو كافالي بإصبع استمر الوضع بنفس هالإبداع والصيد الوافر ما شاء الله .. وبعدين فاجأنا ابو نايف بصيدة غريبة!! شيء غير مألوف نسبياً! .. تدرون وشلون .. خلّوه في الحلقة الجاية .. وابيكم انتم تتوقّعون وشو الشيء اللي صاده ابو نايف! << اما قطعتي .. ذكّرتني بقطعات مسلسل Lost و Prison Break .. اذا تحمّست خلّصت الحلقة اتمنى تكون الحلقة اعجبتكم .. وبدت تتغيّر النظرة عن فرسان .. مع ان القادم .. لا يزال .. مذهل اكثر!!تحيّاتي لكم .. ThE PrOGraMmEr
|
|
|
|
|
| زوار هذا الموضوع الآن : 1 (0 عضو و 1 ضيف) | |
| أدوات الموضوع | |
| طريقة العرض | |
عادي
|
|
التوقيت حسب جرينتش +3. الساعة الآن 06:32 PM.
العاب - العاب بنات - صور اطفال - صوت الاسلام - الفراشة - عالم حواء - الحياة الزوجية - منتديات - كورة - ابراج – حظك اليوم - اخبار - كليبات - العاب فلاش
Search Engine Friendly URLs by vBSEO 3.1.0