السلام على كل اخواني وأخواتي في منتدى العرب المسافرون

اليوم التقي معاكم في تقرير جديد عن بلد جديده اول مره اسافر لها وهي الصين ، وبالتحديد

مدينة كوانزو التجاريه ، والهدف من رحلتي هي شراء اثاث واضاءه واكسسوارات لبيتي

الجديد ، والفكره جتني من خلالكم ، بالصدفه وانا اتفرج على بوابة الصين شفت مواضيع

الاخوان عن كوانزو وبعد بحث طويل وجمع معلومات وافيه قررت نسافر كوانزو ، ولكن

واجهتني صعوبه وحده وهي عدم اقتناع زوجي ، وبعد عدة محاولات معه وبالزن على

الودان ، يبنا راسه واكثر شئ قنعه انه بيوفر اكثر من لو اشترى من البلاد خصوصا الغلا

عندنا صار ماله حدود ، وطبعا مع ضرب امثله من تجارب الاخوان.

الاستعداد للرحله

اليوم الاول : يوم السفر الي كوانزو

21 / 12 / 2007 يوم الجمعه

انطلقنا من البيت الساعه 5،5 الفجر لانه الاقلاع الساعه 8 الصبح ، وصلنا المطار دخلنا

الشنط ، حاول زوجي يحصلنا كرسيين جنب بعض في الطياره ومايكون حد ويانا ، وفعلا

خبراه الريال الموجود على الكاونتر انه حجزلنا في مكان زين.

دخلنا السوق الحره عقب دخلنا صالة مرحبا وتريقينا من البوفيه ، قلت لازم اصور اليلسه من

صالة مرحبا للمنتدى ، وطلعت الكاميرا واكبس ، يالنحاسه مافيها بتري ، وطلبت من زوجي

يسير ياخذلي بتاري من السوق الحره ، وفعلا سار وللاسف ماحصل ،وحاولت احرك البتاري

وغيرت مكانهم واشتغلت صورت صور بسيطه وقلت اخلي الباقي للطياره .

خلصنا ريوقنا وتحركنا باتجاه صالة المغادره للطياره ، وركبنا الباص ولما وصلنا عند سلم

الطياره ، بسرعه ظهرت الكاميرا ، واحاول اكبس وفيها شوية بتري ، والريال اللي واقف عند

سلم الطياره يقولي ممنوع قلتله بس صوره وحده لما ابتسملي قلت يلا قبل مايغير رأيه ،

واكبس والا ماتصور ، مره ثانيه وبعد ماتصور وقف البتري ياهي نحاسه استسلمت وصعدت

ودخلنا الطياره .

وهنيه صار لنا موقف :

تذكرون الريال اللي على الكاونتر لما قال اوكيه انه نحن مع بعض ومحد عدالنا ، اكتشفنا

انه حطانا في الكراسي اللي في الوسط وهم 3 كراسي معنى هذا انه واحد بيكون ويانا ، وفعلا

كان في واحد صيني ، واللاين اللي عدالنا جنب الشباك في كرسيين واحد يالس عليه صيني

والثاني فاضي ، فقلت لزوجي كلمه نبدل الاماكن معاه ، توا زوجي يقوله بالانجليزي لو سمحت

والا يفز من مكانه ويتركلنا المكان ، اتاري الريال هذا مب مكانه ولما شافنا فكر انه المكان لنا

فنش وروح ، ضحكنا عليه ويلسنا في نفس المكان وقلنا اذا ييوا اصحاب المكان يحلها الف

حلال ، ومحد يانا ، وفرحنا بالمكان ولكن بعدين انقهرنا ، لانه الصيني اللي لازم كنا نيلس

عداله قام وسدح عمره على الكراسي الثلاث وهات شخير ، والمظيفه قومته قبل ماتطير

الطياره يلس لين ماطارت الطياره ، وعقبها سدح عمره ورقد ، قام وقت الاكل وكلا

وانسدح ورقد لين قبل مانوصل ، وانا طول الرحله اطالعه ومنقهره منه واقول يالنحاسه

لويلسنا عداله جان قام هو من مكانه وترحرحنا انا وريلي ، لا والمصيبه انه اصلا مب

مكانه هنيه وانه الكرسي اصلا فاضي ، لانه زوجي خبرني انه الريال اللي على الكاونتر

قاله انه حجزلنا 3 كراسي بس محد عدالنا ، اصباح الخير بوالعيال توا ذكرت بعد ماخذه

مكانا وريح اخينا ، يالا كل واحد بنصيبه .

الغريبه اول مره في حياتي ادخل طياره مافيها نظام وكل واحد يحجز الكرسي اللي يباه .

انطباعي عن الطيران الكيني :

الطياره كبيره ونظيفه ومب قديمه ، واكلهم زين وخدمتهم بعد بس يعيبها انه مافيها نظام

وانه الكينيين بعضهم وسخيين ، وهذا لاحظته عزكم الله في الحمام ، بالاضافه انه في نهاية

الرحله تشم اللي ماشميته في البدايه من ريحتهم .

وفي الاخير افلام الفيديو مافيه تشكيلها حلوه عشان تقضي الوقت اذا ماتبا ترقد

عاد انا طلعت الللاب توب ويلست اكتب في الوورد احداث اليوم ، وفي رجعتنا في الطياره بعد

كتبت شو صار آخر يوم لحد ماركبنا الطياره ، اما الايام الباقيه ماكان في وقت اكتب فكنت

اسجل في نوته ملاحظاتي عشان عقب اكتبهم بالتفصيل ، والحمدالله اني ماكتبت

صارلي مقلب ماتوقعته .

لما رجعت البلاد انصدمت صدمه يوم فتحت اللاب توب شفت كل الكلام اللي كتبته تحول باللغه

الصينيه ، كيف ما ادري ، طبعا صارلي احباط وتأخرت في تنزيل التقرير ، وعقب فشل كل

المحاولات في ارجاع اللي كتبته استخلفت الله ورجعت اكتبه مره ثانيه .

نرجع وياكم لاحداث يوم السفر

قبل مانوصل عطونا كرت نملي بياناته ، ومن ضمن الاسئله اللي حاطينها سؤال يقول كم تحمل

معاك من العملات الاجنبيه ومن العمله الصينيه ، وصابتنا الحيره هل نقول الصدق ، بس

نخاف يعرضنا للمشاكل ، طيب لو جذبنا ممكن نتعرض لمشاكل اكبر ، وتمينا في هاي الحيره

فتره ، وسار زوجي سأل المضيف عن هاي النقطه ورجع مش مستقر في الرأي ، وعقب

قلتله شوف نكون صادقين افضل مانكون جذابين ويكتشفون هذا الشئ وتصير مشكلتنا اكبر

وتوكلنا على الله وكتبنا كل المبلغ اللي عندنا ، ونحن ممقصرين ماخذين ويانا كاش

140000 الف درهم محوله بين الدولار والصيني ، طبعا هذاغلط اللي سويناه ، المفروض

ناخذ 50000 الف درهم وندفع عرابين على البضايع ، ولما نرجع البلاد نحول للمكتب باقي

الفلوس وتنشحن الاغراض ، الا في حالة لو بتم فتره الى ان تجهزاغراضك وتشرف على

شحنها ممكن في هاي الحاله اعتقد انك تشل هذا المبلغ الكبير او تفتح حساب في البنك عندهم

ويحولون لك المبلغ ، بس بالنسبه لنا نحن ، بعد مادفعنا العرابين قالت لنا حليمه ارسلوا لي

المبلغ على حسابي في البنك ، وفعلا حولنا المبلغ عليها مع رسوم المكتب 5 % ولكن فلوس

الشحن لسه لين تتأكد من المبلغ المطلوب ، وهي بتشرف عل شحن البضاعه

( الله يستر مابرتاح لين توصل بضاعتي واتأكد منها).

وصلنا مطار الصين وكانت الاجراءات سهله وسريعه ، بس انا كنت خايفه يفتشونا ويحققون

ويانا على المبالغ الكبيره اللي ماخذينها ، وانا في قلبي اقرأ وأدعي انه مايفتشونا لين

ماعديناهم وعند الخروج اشر واحد لزوجي انه نروح عنده للتفتيش ، طبعا تخيلوا حالتي

صح نحن ممسوين شي غلط لكن الواحد يخاف في بلاد الغربه وخصوصا اول مره ، وبعدين

انا مستغربه منهم هم ليش يسألونا هاي الاسئله خصوصا انه بلادهم تجاريه وكلها اسواق

نتابع وياكم الاحداث ...

وصلنا عند نقطة التفتيش ،وطلب المسؤوول انه نفتح الهاند باك اللي في ايدينا ، ويلس

يفتشها وحصل فيها نوع من الفواكه الغريبه كان شارنها زوجي لي آخر يوم ومالحقت آكلها

فخذيتها ويايه ، وسبحان الله كأنها سبب الله حطاه النا ، وهي كميه قليله ، اصلا انا نسيت انه

في الشنطه فاكهه ، المهم اخينا بدون احم رمى الكيس في الزباله ، وقال يلا روحوا .

الحمدالله نقذتنا هاي الفاكهه ومرينا بدون مشاكل ، وعند خروجنا دورنا الاخت حليمه ، بس

ماشفناها ، وعقب اتصلت فيها وعرفت انه ماجت المطار لانها ماكانت متأكده من ييتنا

المهم اتفقت معاها نلتقى وياها في الفندق .

مقلب مع التاكسي ...

طلعنا ندور تكسي يانا واحد قال تبون تاكسي ، ردينا يس ، سألنا وين تبون ، الحمدالله انه

عنوان الفندق عندي بالصيني ، قال تعالوا وراي ، المهم مشينا وراه مسافه لين ماابتعدنا عن

المدخل وعقب شفنا سياره شكلها مب تكسي كأنه سياره خاصه ، سألته بكم ؟ قال انتوا تعالوا

بس ، قلتله اقولك بكم ؟

بعد ماقال السعر بصراحه ما ارتحت فقلت لزوجي احسن ناخذ تكسي رسمي شكله هذا

يشتغل لحسابه ، وهاذيل مالهم امان ، وزوجي كان نفس الرأي .

رجعنا نجر شنطنا عند مدخل المطار وسألنا عن التاكسي ، وحصلنا موقف خاص بالتاكسي

وكل واحد يركب حسب الدور ، وهذاك الخايس خذانا على غفله من غير مانستوعب ونحن

مثل الاغبيه مشينا وراه .

وصلنا الفندق ، وبصراحه روعه من برع ، سوينا شيك ان ودخلنا غرفتنا ،وكانت المفاجأه

الحلوه.

ياسلاااااااااااام على هاي الغرفه بصراحه روعه وتشرح القلب وتخفف التعب من فخامتها

وايد وسيعه لانه نحن طالبين ديلوكس ، وفيها غرفة الدرسنج روم مع التسريحه ، وفيها

ركن للمكتب كامل مع خط انترنت مجاني ، وفيها كاونتر خاص للثلاجه وابريق الشاي مع

انواع من الشاي والقهوه طبعا مجاني ، هذا غير كل يوم لازم يحطون لنا دبتين ماي معدني

وصحن فواكه مجاني ، بالاضافه الى جلسات متنوعه في الغرفه ، وبعد طلبنا منهم طاولة

الكوي والكوايه وماقصروا من عطونا ياها ماخذوها لين ما روحنا ، والتلفزيون بلازما ولكن

مافيه قنوات عربيه ولكن البي بي سي موجوده ، وشهدنا هناك اخبار اغتيال بنازير بوتو ،

واخيرا عزكم الله الحمام يامحلاته كبير وقسم الشور والبانيو رهيب ومجهز بتلفزيون بلازما

وكل هذا ب 460 درهم وشامل الافطار ، وبعد حصلنا كوبون خصم للعشاء في مطعم الفندق

على السي فود ( طبعا نحن مافوتنا ).

نتابع احداث اليوم ...

بعد ما دخلنا الغرفه ، سار زوجي للماكدونالد اللي عدالنا عشان يشتري عشا ويشتريلي بتاري للكاميرا

وانا يلست ارتب الاغراض ، وانتظر حليمه ، وبعد شوي وصلت حليمه ، تعرفنا على بعض واتفقنا انه باجر

بنبدأ بسوق الاثاث في شندو ، وهي بتحضر النا سياره تكون معانا طول اليوم ب 300رممبي

وصل زوجي وتعرف على حليمه ، وودعناها على انه باجر الساعه 9 بنطلع .

اللي يضحك في هذا اللقاء اللي وياها انه نتكلم وياها باللغه الفسحى ، وانا اضحك على عمري

وعلى زوجي لما نتكلم بالفسحى ، لكن اضحك على زوجي اكثر لانه احيانا يحول العامي فسحى

فأهلك من الضحك وما اقدر ايود نفسي .



انتهى هذا اليوم واترككم مع الصور

الفندق من الخارج

حليمه طالعه في الصوره

الفندق من الداخل

مدخل غرفتنا

غرفة التسريحه

جزاك الله خير اخوي ابو ضرار ، عرفت الخطأ امس وحاولت انزل الصور مره ثانيه بس كان الانترنت

معلق عندي ، وبنزلهم مره ثانيه الحين ، فاذا في مجال تصعدلي الصور تحت موضوعي

مباشره بكون لك شاكره، وانشاءالله بقية التقرير بيكون مضبوط .

صور فندقنا الجميل في كوانزو

الفندق من الخارج

الفندق من الداخل

هاذي اليلسه الجميله في طابقنا بعد خروجنا من المصعد

الممر المؤدي الى غرفنا

مدخل غرفتنا

غرفة التسريحه

حمامنا الجميل

غرفتنا من الداخل

صور للغرف السويت اللي عدالنا بس غرفتنا كانت اشرح واحلى

طلة الفندق من الخارج من الطابق 33

عناوين المترجمين وشركات الشحن

1- المترجمين عادة ياخذون 100 رممبي في اليوم الواحد

2-المكتب عادة ياخذ 5 %

(( في كل مره بعطيكم معلومات تفيدكم في كوانزو ، وهاي المعلومات انا يبتها من خلال بحثي

قبل السفر من الاخوان في المنتدى ، ومن خلال رحلتي لكوانزو ))

لنا لقاء قريب معكم في اليوم الثاني الى سوق الاثاث (( شندو ))

الله يسلمك اخوي اسير المحبه

الحمدالله المقالب ماكانت وايد ، ونحن توفقنا في سفرتنا بس يعيبها قصر المده

اما صورنا في دبي فهاي بتييك سالفتها في التقرير الياي ، واهم شئ صور كوانزو

بالنسبه للصور الصغيره ماقصر ابوضرار جزاه الله خير عدلي الصور ، وعرفت شو الخطأ اللي سويته

وانا عدلت الصور مره ثانيه ، شوفها واستمتع

المزيد في الطريق انشاءالله وكله فايده وبحاول مااطول عليكم تعرف مسؤوليات البيت والعيال

هي اللي تاخذ من وقتي

تحياتي لك

الله يسلمك اخوي فزاع

والامر يستاهل العنوه من وجهة نظري

انا ركزت في سفرتي على كل من مايخص البيت من اثاث وغيره ، ولما سرت هناك انا طبعا مسوي

بحثي عن الاسواق وعناوينها ، واختياري للاشياء سواء اثاث او غيره تم حسب ذوقي ومن نظرتي

اعرف نوعا ما اميز الزين من الشين ، وبتعرف معلومات اكثر من تقريري خلال تقريري

اما حليمه كان لها دور في اخذنا للامكنه اللي مانعرفها وفادتنا في كثير من الامور ، وانا وايد

ارتحت وياها خصوصا انها حرمه فسهل اتعامل وياها وهذا وايد ريحني ، وغير جذي الحرمه

وايد امينه وصادقه

انتظر لنهاية التقرير عشان تستفيد من تجربتي

بغيت اعرف متى سفرك ؟

تحياتي لك

اهلا وسهلا فيك ويعافيك

والياي احلى انشاءالله

تحياتي لك

احب ارحب بأخونا ابو الضرار اللي مايقصر ويانا جزاه الله الف خير

ويشرفني مرورك على تقريري ، وماقصرت بتعديلك للصور الصغيره

واذا ممكن احذف الصوره المخفيه ، لأني كنت اجرب حجم الصور عقب حذفتها من البومي

فطالعه الخانه فاضيه وماخذه مكان على الفاضي

انتظرك تواصلك الدايم ويايه ، والف شكر لك