بسم الله الرحمن الرحيم الحمدلله رب العالمين وصلى الله على نبينا محمد وعلى اله وصحبه اجمعين ...

سلام عليكم ايها الاحبه

من زمان عن التقارير والرحلات :grins:

اليوم اعرض لكم رحلتي لمدينة الغاط التي تقع في المملكة العربية السعوديه شمال الرياض تقريبا 220 كيلو

تاريخ الرحلة في يوم الخميس 1-11-2007م

التي ابتدئتها من الساعه 10.30 صباحا من الرياض حتى وصلت الغاط الساعه 1 ظهرا وساسرد لكم الصور مع بعض التعليقات

اول ماتقابل في الطريق عند مخرج مدينة الغاط لابد ان تتقهوى وتاخذ لك فناجل وبيالة شاهي ولكن من نوع اخر .. من الكرم مشاء الله ...:grins:


وبعد كذا اتصل بي الصديق راشد ويسأل اين وصلت قلت له انا جالس اتقهوى عن البيالات الكبيره واصور قال ياخي والله انك فاضي يالله احنا نستناك وجزاه الله خير مرني ورحنا للمكان المذكور :grins: ويوم وصلنا ولا الاخ سلطان مشاء الله مسوي هاك القهوه الي تشق الراس شق


وهذي صورة جلستنا وتقهوينا والحمدلله


وبعد كذا بدأنا بالطبخ والنفخ وكلن بدا يشتغل الي يزين الطيور لان غدانا كان طيور قميري
والي غسل الرز والي قطع البصل والطمام <<< ماننحرم ياشباب من ذاك الغدى لاهنتو :grins: هذي صوره على عجاله للحمس وتسلم يمنيكم ياشباب


وبعدها بدأنا بالتصوير نظرا لان الغداء سيأخذ وقت حتى ينضج
واخذنا جوله على الارجل في المكان المحيط بنا حيث الجمال والطبيعه


المكان الي جلسنا فيه يسمونه اهل الغاط ( القلته )
وهو عبار عن شعيب به اشجار كثيفه ينتهي يانغلاق الجبلين
وفيه مويه تنبع على خفيف واشجار يعني البيئه مناسبه للتصوير وخصوصا الي بيجي معاه ماكرو بيطلع بنتائج حلوه انا ماكان معي ماكرو نظرا لاني كنت اجرب العدسه الجديده الوايد انجل 10-20 سيجما

خذلي صوره واخذلك صوره شكرا سلطان :grins:


الشباب مشاء الله عليهم متحمسين ماكان الحامل قريب مني نظرا لاني ارتفعت قليلا فقلت خلني ارفع الكميرا نظرا لان زاوية العدسه عريضه جدا فظهرت هذه النتيجه :icon120:


منظر طبيعي من نفس المكان


عنكبوت صغيره جدا استعرت العدسه 60 ملي من الصديق سلطان لتجربتها


وهذا عش عنكبوت كان غير واضح لدرجة ان الفوكس لا يقرأ الهدف بشكل صحيح لانه غير واضح اظطررت لتحويله مانول فكانت هذه النتيجه



بورترية بتطبيق اكشن ديف هيل اهداء للاخ راشد


والان جلسنا للغداء وكان بصراحه شي لا يوصف غدا قميري ياسلاام :grins:
تسلم يمين من كبسها


الشباب مشاء الله ماقصرو ادو الواجب وكفاية << مسوي ماتغدى معهم ههههه:grins:


ثم استودعنا الغاط بهذه البانوراما الليلية


وكانت رحلة متميزه لولا ضيق الوقت والا هناك اماكن تحتاج ايام لزيارتها وباذن الله ساحاول اخصص كم يوم لزيارة بعض الاثار القديمه هناك


الجدير بالذكر اني ماجبت معي جاكيت او شي يحمي عن البرد لان الهواء كان جدا بارد ونتيجة ذالك اصبت بالزكام والحرارة والحمدلله على كل حال

سلطان و راشد شكرا لا تكفي ...

اتمنى ان اكون امتعتكم واعذرونا على القصور

العدة والعتاد في الرحله

nikon D80 + ترايبود + 10-20 سيجما + 60 ملي استعاره من الاخ سلطان :grins:

شكرا لكم على المتابعه
تحياتي اخوكم

سعد بن عبدالله القاسم