 |
 |
 |
||
|
|
|
||
 |
|
 |
|
|||||||
| بوابة السفر إلى بريطانيا UK وإيرلندا Ireland في هذا المنتدى يتم تزويد المستخدم بالتقارير المصورة الخاصة ببريطانيا وإيرلندا بالإضافة الى مكتبة صور خاصة. |
| Tags: ليدز, لغة, انجلترا, england, دراسة, يورك, kuwaiti londoner, leeds, سكاربرة, york, yorkshire |
 |
|
|
أدوات الموضوع | انواع عرض الموضوع |
11-10-2007, 07:50 PM
|
#1 (permalink) | |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
دراستي للغة في يورك
عيدكم مبارك ،،
 الموضوع عبارة عن تقرير لدراستي الصيفية للغة سنة 2007 ،،  الرحلة كانت لمدينة يورك في شمال انجلترا ،، و سبب اختياري لهالمدينة بالذات هو اني سبق و زرتها السنة اللي طافت 2006 و عجبني طابع المدينة التاريخي و بعد لان المدينة مافيها وايد عرب و حتى الجالية المسلمة قليلة جدا جدا جدا ،، لاني ما كنت حاب اني اختلط مع عرب و اني اقتصر معرفتي بناس اكون مطّّر اني اتحجى معاهم انجليزي ،،، و ايضا من الاشياء اللي خلتني اختار يورك هو ان كان بودي اني ازور مدن الشمال و طبعا يورك قريبة منهم ،،، المدرسة هي melton college وقع اختياري عليها بعد مشاورة اخوي ملبورن و كان السبب الرئيسي في اختياري لها ان مافيها طلبة خليجيين "قلييييل جدا" بعكس مدرسة English in york اللي كان فيها خليجيين و انا سبق اني راسلتهم و لكن ردهم كان مخيب للآمال اقتباس:
،،، علشان جذي توكلت على الله و قلت مالي الا ميلتون كوليج ،،، مدة الدراسة كانت 7 اسابيع "summer course" ،، من تاريخ 25\06 الى 12\08 2007 ،،، الحجز كان بدون وساطة مكتب ،،، انا راسلت المدرسة و بعدها حولت الفلوس على حسابهم عن طريق حوالة بنكية ،، المبلغ لكامل فترة الدراسة كان 2,409,15 باوند استرليني 727,65 للسكن مع العائلة ،،، 1,470,00 للدراسة ،،، 50,00 رسوم ،،، 39,00 تأمين سفر ،،، 122,50 للـfull board بالنسبة للحجز طريقته كالتالي ،،، طبعا بالبداية راسلتهم بالايميل استفسرت عن بعض الاشياء في الكوليج بعدها انا قدمت على الكورس عن طريق موقعهم على الانترنت http://www.melton-college.co.uk/application.htm و بعدها دزوا الفاتورة على الايميل و فيها كل بيانات حسابهم ما عليك الا انك تقوم بالتحويل ** ملاحظة : الدفع لازم يكون قبل 5 اسابيع من بداية الدراسة "حسب المذكور على موقعهم" و بصراحة بالبداية الوالد كان متخوف من الدفع بدون وساطة مكتب ،، لكن الحمدلله كل شي صار ok ،،، بعدها المعهد ارسل لي المعلومات عن العايلة و كان موقع البيت ممتاز فقط ميل واحد بالضبط عن المدرسة ،، و راح اذكر المعلومات عن العايلة بالتفصيل بعدين ،، أما بالنسبة للفيزا فانا كان عندي الفيزا السياحية و كان باقي منها 4 سنين ،، فما كانت مشكلة بالنسبة لي بعدها جاء موعد السفر ،، السفر كان مع عائلتي مثل ما جرت العادة كل سنة ،، رحنا تاريخ 15\6 الى لندن ،، و بعدها من لندن انا رحت بروحي الى يورك كان يوم الاحد 24\6 قبل الدراسة بيوم ،، خذيت القطار من محطة kings cross ،،  تذكرة القطار بـ48.50 باوند كما هو واضح في الصورة ،، و السبب انها غالية هو ان التذكرة فقط ذهاب ،،، الرحلة تاخذ تقريبا ساعتين ،، و القطار متوفر فيه wireless internet للي يحب انه يستخدمه الدفع في الكمبيوتر نفسه ما عليك الا انك تختار المدة و تدخل رقم بطاقتك ،،، انا جربته مره ،،، بعد ما وصلت محطة القطار اخذت تاكسي الى بيت العائلة و ما كان وايد بعيد ،،، لكن اللي حصل ان وقت اللي وصلنا الشارع ما لقينا البيت !!! و السبب في هالشي هو ان البيت في square و ما تمشي فيه سيارات و انا لقيت المرة مارجريت ناطرتني بره و لا جان مالقينا البيت ،،، بصراحة فكرة انه يكون مجموعة بيوت على شكل square و بدون لا يكون فيه سيارات عجبتني ،، لان كان فيه وايد يهال قاعدين يلعبون بره بدون ما يخافون عليهم اهلهم ،،، و هذي صور البيت من بره طبعا ما مخذها من ايام ثانية مو اول يوم:    البيت اهو اللي على اليسار اللي جباله القاري الاحمر  هالدب حطته الشركة اللي بنت هالبيوت الحلوو في المنطقة اللي فيها بيتي انها واااااااايد آآمنة و ما فيها مراهقين ابد ،، غير عن الطلبة الثانيين اللي يعيشون في "acomb" لان هناك فيه واايد مراهقين ،،، لكن ما حصل ولا مشكلة لاحد عايش هناك اما بالنسبة للبيت فكان واايد كبير ،، انا كان لي غرفة بروحي فيها تلفزيون و فيها حمام خاص لي بالاضافة الى ثلاجة صغيرة "حجمها معقول لشخص واحد" بس لي ،،، يعني غرفتي كأنها suite ،،، و اللي احسن من هذا كله ان العايلة عندها وايرليس انترنت و بما اني كنت ماخذ اللاب توب اهم عطوني الnetwork key مالهم ،،،،،، |
|
|
|
|
11-10-2007, 07:54 PM
|
#2 (permalink) |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
الموضوع اهداء لاخوي ملبورن
لرد جزء من جميلك ،،،و اتمنى انكم تعذروني اذا تأخرت في تكملة الموضوع ،،، لان راح اكون مشغول ان هالسنة رابعة ثانوي و بعد العيد فيه امتحانات  و ياريت اخوي ملبورن انك تذكر الاشياء اللي تبيني اكتب عنها ،، لان هذي اول مرة اكتب مواضيع من هالنوع و مو عارف شكتب صراحة |
|
|
|
|
11-10-2007, 08:15 PM
|
#3 (permalink) |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
و هذي صور لغرفتي :
 هذي الغرفة اللي فيها الغسالة و النشافة و ثلاجة صغيرة حقي و مايكرويف ،،، هذي الغرفة العادة ماغريت الـhost mother و دانيل الـhost father ما يدشونها ابد ،، اللهم وقت اللي يغسلون الملابس و وقتها انا ما اكون في البيت ،،،   و الثلاجة اهم ما يستخدمونها ،، بس هالصورة انا صورتها آخر يوم لي و كانوا حاطين فيها شوية اغراض على اساس اني راح اطلع ،،،  هذا الحمام –كرمكم الله- و هو يفتح على الغرفة    و هذي صور الغرفة و سوري على العفسة عاد انتوا لا تدققون  :   |
|
|
|
|
11-10-2007, 08:33 PM
|
#4 (permalink) |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
و هذي صور للبيت من داخل :
 هذا المطبخ ،،،، الله ياني كليت عيوووش من هالمطبخ  الله يخليلي مارغريت بس   الله يهديهم مارغريت و دانيل فاتحين لهم بار في البيت ،،،، بصراحة يشربون وااايد ،،، يعني عادي عندهم يشربون بطل في اليوم ،،،، و في آخر 3 اسابيع لي بدا اييون طلبة 18+ ،، و دانيل ما يقصر في ضيافتهم يلكونه 24\7 بس طبعا ما يسكرون  هذي صورة للصالة  طاولة الطعام ،، و هالصور انا ماخذهم من آخر يوم لي في يورك علشان جذي البيت شوي معفوس لان الطالب اليديد كان توه ياي و لو تلاحظون جنطته على اليمين  تلفزيووونهم رووعة ،،، لا و آخر اسبوع حطوا القنوات الرياضية اللي تطلع الدوري الانجليزي "sky sport"  الحديقة الداخلية ،،، لكن للاسف في اغلب الايام الجو كان ما يشجع على القعدة فيها ،،، و على فكرة دريشة غرفتي تطل على الحديقة   ترى الصالة العادة ما تكون معفوسة جذي ،، لكن اليوم اللي صورت فيه كان حالة استثنائية  الصالة و خلفها الحديقة ،، |
|
|
|
|
12-10-2007, 02:24 AM
|
#5 (permalink) |
|
عاشقة لندن
تاريخ التسجيل: Jun 2004
الدولة: جدة
رقم العضوية :7061
المشاركات: 6,156
|
ياسلام عليك أخوي Kuwaiti Londoner
يعطيك ألف عافية على المعلومات التي ذكرتها والصور الاكثر من رائعة  بصراحة السكن ألي سكنت فيه عجبني كثير  جزاك الله كل خير والله يوفقك في دراستك أن شاء الله |
|
|
|
|
12-10-2007, 04:29 AM
|
#6 (permalink) |
|
مسافر متميز
تاريخ التسجيل: Feb 2006
رقم العضوية :61523
المشاركات: 157
|
Kuwaiti Londoner
حمستني أغير المعهد ومكان دراستي . من ويمبلدون لـ ميلتون كوليج تصدق إن السكن ماشاءالله تبارك الله حلو , مو حلو الا قليله عليه كلمة حلو ماشاءالله , خلني أوصل بالسلامه وأشوف سكني كيف إذا مو حلو بغيره << تأثر الولد هههههههه ربنا يوفقك ياعم أخوك : أحمد |
|
|
|
|
12-10-2007, 09:23 AM
|
#7 (permalink) | |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
اقتباس:
و فعلا انا ما توقعت انه بيتهم يكون جذي حلو ،،، |
|
|
|
|
|
12-10-2007, 03:05 PM
|
#9 (permalink) | |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
اقتباس:
و اذا ما عجبك لازم ما تتردد انك تقول للمعهد يغيرلك العايلة "خصوصا اذا كانت فترة اقامتك طويلة"،،، موفق بدراستك |
|
|
|
|
|
12-10-2007, 03:24 PM
|
#10 (permalink) |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
اليوم الاول في يورك :
"العايلة و الطلبة اللي في البيت" العايلة مكونة من ريال "دانيل" و مرة "مارغريت" عمرهم 61 اسكوتلنديين ،، و عندهم احفاد لكن ما يعيشون معاهم بس يزورونهم ،، و العايلة ما عندهم كلب لكن حفيدهم عنه و الكلب العادة ما اييبونه انا طول فترة اقامتي عندم صادفته مرة واحدة ،، لان وقت اللي ايي اكون في الكوليج ،،، بصراحة دانيل و مارغريت ناس روووعة و يدخلون القلب بسررررررعة ،، انا قبل ما اروح ليورك كان اكثر شي متخوف منه اهم العايلة ،، لكن بعد ما قعدت معاهم حبيتهم بسرعة ،، و من ثاني يوم حسيتهم مثل اهلي ،،، ناس متفهمين و يتغشمرون مع الواحد ،،، و الواحد ما يمل من سوالفهم ،،، طبعا استقبلتني مارغريت ،، و ورتني البيت ،، قعدنا بعدها نسولف و هي سألتني عن الاكل ،، الاشياء اللي احبها و اللي ما احبها ،، و بصراحة عذبتها بالنسبة للأكل لان ماكو شي يعجبني اذا المسألة فيها اكل ،، لكنهم متفهمين جدااا ،، مارغريت و دانيل متقاعدين ،، لكن دانيل يشتغل مرات في الـ"race course" لسباقات الخيول ،، و هو العادة مرة او مرتين بالاسبوع على حسب ،، و على فكرة المضمار قريب جداااا ،،، لكنهم متواجدين على طول في البيت على الاقل واحد منهم ،،، فقط صار مرة انهم بروحون اشوفون مباراة "سلتيك" في الـpub و فضى البيت ،،، لدرجة اني ما احتجت اني آخذ مفتاح للبيت ،،، و في اول يوم لي اهو كان يشتغل فما شفته الا بالليل ،،، و هو بصرااااحة رااائع و دمه واايد خفيييف ،،، و ياما دشينا في نقاشات سواء رياضية ولا سياسية و غيرها من النقاشات ،، الشي الراائع في دانيل و مارغريت انهم دائما يسولفون مع الطلبة و نقعد نسولف معاهم عن المدرسة و حياتنا الاجتماعية في المدرسة اما بالنسبة للطلبة الثانيين اللي ساكنين في البيت : بأول اسبوع لي في البيت كان فيه طالب ايطالي عمره 17 و في الاسبوع الثاني ييه طالب ثاني اسباني عمره 14 فصار فيه طالبين،، بعدها في الاسبوع الثالث و الرابع الطالب الايطالي راح و بقيت مع الاسباني ،، في الاسبوع الخامس الاسباني راح و يي بداله "مدرس انجليزي" بعد من اسبانيا كان يَدْرس في مدرسة english in york و معاه مرة اسبانية و هم مو صغار في نهاية العشرينات على ما اذكر ،، قعدوا اسبوع فقط لان قبلها كانوا ساكنين مع عايلة ثانية ،،، في الاسبوع السادس قعدت بروحي ،،، اما في اسبوعي الاخير سكن معانا طالب بلجيكي عمره 18 ،،، و على نهاية الاسبوع وقت اللي انتهت فترة اقامتي في يورك جاء طالب ايطالي بعد في العشرينات "صحفي" يدرس في English in york ،، و عموما في البيت ما يقعد اكثر من 3 طلاب "اثنين بالاضافة لي" ،، لان بيتهم يتكون من 5 غرف ،،، 3 للطلاب ،، وحدة حقهم و غرفة خامسة ما يستخدمونها ،،، و كانوا جميعهم شباب ما عدا الطالبة الاسباني اللي قعدت اسبوع و كان هالاستثناء لانها صديقة العايلة ،،، غير جذي اهم يستضيفون شباب فقط ،،، و السبب انه الطلبة الثانيين "غيري انا" ما عندهم حمام خاص فيهم ،،، فـ مارغريت ما حبت انه يكون في طالب و طالبة لهم حمام مشترك حيث انه انا الوحيد اللي لي حمام خاص في البيت ،، حتى اهل البيت ما عندهم حمام خاص بهم و للمعلومة الـ"مدرس" الاسباني ،، و الايطالي الصحافي ،، سبق لهم انهم قعدوا مع دانيل و مارغريت السنة اللي طافت ،، و ردوا قعدوا معاهم هالسنة ،،، و بعد في طلبة نرويجيين يقعدون معاهم كل سنة بعد الصيف لانهم يدرسون في الجامعة ،،، لان بصراحة هالعايلة ما في منها * * * * * * * * * * * * * * * * * * * * * * * * * * * * * * في اول يوم قررت اني اروح للكوليج و اشوف الطريج المؤدي لها ،،، و انا كنت طابع خريطة تبين الطريج من البيت الى الكوليج ،، لكن للاسف و قت اللي طلعت نسيت اني اخذها معاي ،، و المشكلة انه مارغريت طلعت من البيت بعدي فما قدرت ارد و آخذها فما كان فيه حل الا اني احاول اني اروح لها و اعتمد على ذاكرتي ،،، الطريج الى الكوليج سهل وايد لان اغلب الطريق عبارة عن شارع رئيسي مقابل لمضمار السباق ،،، و طريج الكوليج هو نفسه الطريج الى سنتر المدينة ،،، لكن ما عرفت اي لفة ادخلها علشان توديني الى الكوليج ،، * لكن الكوليج خارج اسوار يورك ،،، و وقت اللي كملت مشي شفت محطة القطار و بما انه يوجد information centre في المحطة قررت اني اروح لها ،،، و هناك عطوني خريطة و دلوني على الطريج ،،، و بالفعل كان وااايد سهل الطريج للكوليج ،،، و بعد ما دليتها رديت البيت ،،، و العادة انه الطريج اللي الكوليج ياخذ مني تقريبا 13 دقيقة |
|
|
|
|
12-10-2007, 11:34 PM
|
#12 (permalink) | ||
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
اقتباس:
تسلم ،،، اقتباس:
و ان شاء الله باجر انزل تكملة للموضوع ،،، |
||
|
|
|
|
13-10-2007, 05:26 PM
|
#15 (permalink) |
|
مسافر متالق
تاريخ التسجيل: Mar 2006
الدولة: Edinburgh. Scotland
رقم العضوية :66368
المشاركات: 610
|
الأكل :
بالنسبة للاكل مع ان العائلة لم يسبق لها ان استقبلت طلاب عرب و مسلمين لكنهم اساسا ما يكلون لحم خنزير و انا اساسا ذكرت هالشي "اني ما اكل لحم خنزير" وقت اللي راسلت المعهد ،،، و غير عن هالشي ،، اهم متفهمين حتى انهم وقت اللي دروا ان في الكويت ناكل عيش مع اللحم و الدياي بدأوا يطبخون عيوش جم مرة في الاسبوع !!!! و كانوا الاشياء اللي ما احبها ما يطبخونها و اذا طبخوها يسوون لي شي بديل ،، الريوق عندهم الساعة 8 الصبح ،،،، و العشاء الساعة 7 و لكن في آخر 4 اسابيع غيروه بناءا على طلبنا انا و الطالب الثاني اللي معاي و خلوه الساعة 6 ،،، و في آخر اسابيع لي معاهم كنت انا اكل الساعة 6 و الطالب الثاني يحطون له العشا الساعة 7 ،،، و مرات اذا كنت بتأخر بره البيت يخلون لي الاكل و بعدين يسخنونه لي يعني ماكو أي مشاكل معاهم بالنسبة للاكل ابدااا ،،،،الغسيل بالنسبة لغسل الملابس فهو مرة وحدة يوم اليمعة ،،، و يبدلون شراشف السرير و فوط الحمام يوم الاحد ،، لكن مرات اكون طاق مطر و بنطلوني مبتل فهم عادي عندهم اني استخدم النشافة في أي وقت ،،، و في مرة احتجت انهم يغسلون ملابسي قبل يوم اليمعة و طبعا اهم ما مانعوا الانترنت طبعا الانترنت موجود وايرلس مفتوح 24\7 ،،، سرعته 1028 مو متأكد لكنني الحين عندي 514 و اللي في يورك كان واااااااايد واااااايد اسرع منه ،،،، و على فكرة انه الطلبة الثانيين اللي ما يكون عندهم لاب توب يخلونهم يستخدمون كمبيوترهم ،،،،، و ترى عايلتي مو العايلة الوحيدة اللي توفر انترنت ،،، لان فيه بعض اصدقائي عندهم انترنت في البيت لا و العايلة تخليهم يستخدمون الكمبيوتر ،،، و فيه عوايل عندهم printer ،،، |
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض العادي
|
|
|
الساعة الآن 01:59 PM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||