 |
 |
 |
||
|
|
|
||
 |
|
 |
|
|||||||
| بوابة السفر إلى كندا Canada في هذا المنتدى يتم تزويد المستخدم بالتقارير المصورة الخاصة بكندا. |
 |
|
|
أدوات الموضوع | انواع عرض الموضوع |
|
|
22-08-2007, 10:15 PM
|
#1 (permalink) |
|
مسافرجديد
تاريخ التسجيل: Aug 2006
رقم العضوية :108466
المشاركات: 54
|
§¨`*:·..·:*¨§ من الـسـعـوديــة الــى كـــنــــــدا...-تقرير كامل §¨`*:·.·:*¨ بالصــور
السلام عليكم
كـــــــــــــــــــــــــــــــــــــنـــــــــــ ــــــــــــــدا- بريتش كولومبيا - فانكوفر - نانايمو الجزء الاول هلا وغلا فيكم...بصراحه ما ادري شلون ابدا واكتب لكم عن رحلتي او بالاصح احب اسميها مغامرتي اللي بدات من الرياض وانتهت في الهوم ستاي حقين شاكر كح كح ..عاد تدرون؟؟ ودي اجمع احلا واحسن الكلام واحلا اسلوب وابدا اكتب..بس قلت يالله يا ابن الحلال اكتب اللي يجي بخاطرك وحطه ,,, عموما نبدا بسم الله .. المكان :بيتنا الموقر في مدينة الرياض الزمان: الساعه ال 10 والنصف ليلا المناسبة: السفر الى كندا اللي صار يا طويلين العمر ان قبل الرحله تقريبا ب4 ايام جاني صقيقي الصقوق شاكر من القريات وجلس عندي الى وقت الاقلاع الى كندا =====>قل قسم بس عموما قبل ما ننقز للمطار انا والوالد الله يحفظه وشاكر تعرفون عاد لحظات الوداع ما اصعبها وكيف تجهيز الشنط والحاله حاله شوفو الحوسه 7 7 7  ======>وه وه ياناس دموعه على خده اول مرة في حياتي احس ان اصعب اللحظات لحظه الوداع....يالله ذكرتوني ببيتنا وكيف كان محيوس عشاني..العائله الكريمة كلها موجوده حتى شغالة خالتي جاية توادعني كح كح =====>اوووخص مو هين الولد مالت عليه هع هع وقسم حتى ان شغالتنا بكت عشاني يا حبي لها بس وه ياناس =====>يخطط يتزوجها ههههههه المهم يا طويلين العمر وادعت اهلي وخالاتي وعماتي والكل الكل من جيران واصدقاء واقارب وجاء وقت الجد =====>لاجاء وقت الجد وند يقابل ند>>>يدق رقبه ههههه وياطويلين العمر كنا متجهين للمطار انا والوالد وشاكر ...وخذلك نصايح من الوالد الله يطول بعمره ووصلنا الحمدلله للمطار بسلام وقابلنا فاهد النكبه هههههههه... =====>ماراح تلوموني لو تدرون ليش سميته النكبه ههههههههه الله يهديه فاهد بس ودي اكفخه ههههههههههههههههههههههه المهم على طول رحت للشحن وشحن شناطي ووزنتها الحمدلله كان وزنها 57 كيلو والوزن المسوح 32 كيلو لكل شنطه..وكل الشنطتين 64 كيلو وقصيت البوردنق وجلست اسولف مع الوالد شوي...وبعدين ودعته ودخلت جوا .. فيه شي مهم جدا جدا جدا جدا وانبه عليه وبقوة بعد... للطلاب اللي اقل من 21 سنه لازم لازم لازم تصريح للسفر ..لانه صار موقف قدامي لاثنين اخوان واحد رفضوا يطلعونه عشان عمره اقل من 21 ومامعه تصريح...انا خليت الوالد يسويلي تصريح من عند الجوازت الي بالمطار في نفس الكونتر اللي بتختم منه الجواز.يعني خل الوالد يجي معك او يكون التصريح معك .. ودخلنا على بركة الله جوا الصاله وانتظرنا طيارتنا عالخطوط البريطانيه BMI ايه قبل لا انسى صار قدامنا موقف ...واحنا بالطابور حق الجوازات ..كان قدامنا واحد بريطاني و2 بريطانتين===>كيف التعبير..؟؟ المهم اللي صار انه البريطاني والبريطانيه سوو قدامنا قله ====>يوم شافهم غمض عيونه ====>ايه هين عاد انا فلت افا ياذا العلم ..من اولها واحنا بديرتنا بعد؟؟ عاد الوالد يقول دقوا دقوا عالهيئه خلهم يجون يشيلونهم... ياحبي لا ابوي يستهبل هههههههههههه المهم ياطويلين العمر جاء وقت رحلتنا ودخلنا الطيارة بكل يسر وسهولة>>>ياعيني اهنيك عالاسلوب بصراحة الخطوط البريطانيه حلوووووووووة من وجهة نظري وخدماتهم روووووووعه بس انا من لقافتي والطيارة تطير شغلت الجوال ...ياحليلي انا على نياتي كنت بس ابي اشوف الساعه كم واقفله على طول...بس وقسم ما امداني اشغله الا الموظف واقف فوق راسي..ويعطيني ذيك الكلمتين مدرري وش معناهن..بس والله العالم انهن سبة او شتمه زي كذا ههههههههههههههههههههههههههه =====>ومير انه وجهه يوم هاوشه الموظف صار طماط انا من يوم صارلي هالموقف قلت الله يستر دامها عالموقف هذا اشوا..بس الله يستر من الجاي والله ويعطوننا وجبه كانت حلوة والله وانا اعجبتني وهذي صورتها ا  اممممم الطيارة حلوووووة وكبيرة >>>لا ياشيخ واخذت لها كم صورة وانا خايف من المضيفه ههههه  انا اموت واعرف هذا وش خلاه يطالع فيني يوم جيت اصورة؟؟ صدق ملقوف كح كح ..  احلا مافي هالصورة العبايه عاد وانا اخوكم والله من الفضاوة صورت لوحة التحكم اللي قدامي وهذي كم صورة واستغربت ان موجود عالخطوط البريطانيه اتجاه القبلة بس شي حلو والله ====>طيب انت وش لقفك؟؟   وهذي مسار الرحلة وبعض المدن الي مرينا عليها امممممممممممممممممممممممم والله عاد واجلس اسولف مع شاكر بس شكله كان دايخ الولد وراسه مصدع وطلبنا له بنادول واكل له حبتين ولا جاه النوم ههههههههه شكل الفيوزات ضربت عنده كح كح والله ويعطوننا وجبه ثانيه  بسم الله علي شوفو وجبتي مرتبه ماشاء الله تف تف ماشاء الله ===>اقول انطم بس  وهذي وجبة كتكوت شوفو مو مرتبه وع مالت عليه =====>الا غصب وجبته اللمرتبه هههههه امممممممممم والله واطالع من الشباك حق الطيارة والا اشوف الاجواء الخيالية ===>ياحظك؟؟ طيب وش تبيهم يسوون لك؟ عاد قلت خلني اخذ لي كم صورة وهذي هي  سبحان الله لا في الارض ولا في السماء >>>قل قسما قسمات بس     امممممممم وبعد هالصور اخذت لي غفوة مدري كم ساعه بس احسه مو كثير ====>اصلا انت زين انك دريت انك رايح كندا بس المهم وانا جالس كذا الا شاكر يناديني يقول ذيس از لندن ====>بدا الكذب من الحين؟؟؟ لا عاد جد والله ناداني يقول وصلنا لندن وعلى وقت الهبوط اخذت لي كم صورة للندن تصدقون تمنيت اني رايح لبريطانيا بدال كندا حسيت انها فللللللللللله مررررررة . وكان على لندن مطر خفيف والجو كان بارد   والله اللي ماصارت الرياض زي كذا ولو بعد 100 سنه كح كح بيني وبينكم وانا اكتب هالسطر اشتقت للرياض بس لا تعلمون احد ؟؟ اوكي؟     هذي وقت الهبوط والله مدري شلون كان لي قلب اصور وحنا بنهبط بس يللا لاجل عين تكرم مدينه\ ===>ايه هين بس والله ونوصل مطار هيثروا بالسلامه ====>الله يسلمكم كح كح بقولكم شي الي يقول مطار هيثروا تفتيش دقيق ومدري وش من هالخرابيط والله والله تفتيشهم عادي عادي جدا واقل من عادي بعد..يعني اللهم انك بس تحط اللاب توب بالسير والجزمات الله يكرمكم والهاند باق(شنطة اليد)واغراضك من كاميرا والخ وبعد ماتاخذ اغراضك بعد التفتيش تحصل على يمينك كونترات لجميع الخطوط العالميه امش الين يجيك AIR CANADA وروح للموظف او للموظفه وعطه التذكرة وهو يسنعك يسنعك = يسوي كل شي لك ====>يصلح يحطونك بدل اطلس كح كح يعني لا تشيلون هم مطار هيثروا عادي والله عادي الوضع مرة وبالنسبة للاخوات المبتعثات ...امر العبايه امر عادي ومتعودين عليه وكثير مرة ماشاء الله في مطار هيثرو حسيت نفسي بالسعودية من كثر ما اشوف العبايات ماشاء الله..الله يجزاهن كل خيروجلسنا نتمشى شوي وانا والعيال شاكر وفاهد وبندر ووليد في مطار هيثروا   لحظه دخولنا المطار ............ بصراحة ذبحنا الجوع وجلسنا ندور على مطعم ودخلنا اقرب مطعم على طريقنا ===>وهو جوعان يغني ويقول...ذبحنا الجوع يا بطني نبي كودو ولا هرفي ====>حامد زيد امس مرسل له كول مي كح كح  هذا المطعم الي اكلنا منه وبعد ما اكلنا الحمدلله رحنا جلسنا عالطاولة ونسولف شوي الا واشوف دميه؟؟؟ دميه = اللعبه اللي يحبونها البنات يسمونها عروسه كح كح الي مثل باربي =====> لا عز الله اللي افهوا منك وعلى طول تطري على بالي الكاميرا عشان ماتكذبوني وصورتها وقسم ياعيال اول ماشفت البنت ...قلت شكل ابوها وامها يستهبلون شارين لهم دمية من باربي ويلعبون على انفسهم يقولون هذي بنتنا لا جد والله تشبه الدميه بس انا ما تاكدت الا يوم شفتها تتحرك..تاكدت انها انسانه ====>قل قسم >>>حط اصبعه في فمه ويسوي علامة اكس على رقبته ويقول قسم طيب هذي صورتها وانتم احكمووووووووووووووو 7 7 7  هاه وش رايكم؟؟ لا تلوموني لا قلت انها دميه كح كح  ====>اموت واعرف انت وش لقفك تصورها وهي تحت الكرسي؟؟؟ صدق ملقوف  ياحليله الرجال يبي يعطي الدميه مويا كح كح ========================= اها وبعد سالفة البنت الدمية ذبحنا الجوع وانا وكتكوت قلت له ورا مانروح نتعشى ناكل اي شي قال اوكي =====> لاحظوا انهم بياكلون مرة ثانيه لا تلومونا ترانزيت بلندن 8 ساعات والله ونحصل هالبنت الشقراء اللي مير تهلي وترحب فينا وتقول هلو هلو ولكم ولكم ====>انحرجوا من اسلوبها وادخلوا المطعم غصب ====>والله مايندرى المهم ساعه كاملة عشان نطلب كل مانادينا وحده او واحد يصرفنا ويقول مو انا ==>يعلمكم انه يفهم عليهم ويعرف عنقليزي واخيرا جانا واحد شكله رحمنا وطلبنا منه الطلب..احنا طلبنا لحم...واخونا بالله شاكر يقول انا اللي ابي اقوله مانبي لحم خنزير انا قلت اوكي انت الي تقوله.. شوي اخونا شاكر يقول للرجال بليز بليز بليز ===>انا قلت بس خلاص الرجال بيعطيه الكلام اللي يجمد عالشارب شوي يوم قال الرجال يس سير..قال شاكر..نو هوق ميت؟؟ >>>معناها مانبي لحم خنزير رد وقال : وااااات؟؟ قال شاكر: هاه...هاه >>>احس شاكر بلع العافيه عاد كتكوت يناظر بالرجال ويقولي: ماجد تكفى تكفى رد عليه تكفى قله مانبي لحم خنزير عاد اخوكم بالله ميييييييييييييييييييييت ضحك مييييييييت ضحك هههههههههههههههههههههههههههههههههههههههههههههههههه ه وشاكر توهق بالرجال بس الي فالح فيه كلمة تكفى ماجد قوله قوله المشكلة ان كتكوت من يوم وحنا ناوين نطلب عشا وهو فاتح القاموس ويحفظ هالكلمتين نو هوق ميت ..نو هوق ميت..واخرتها الرجال خربط كل شي من يوم قاله الرجال ووووااات؟؟؟ هههههههههههههههههههههههههههههههههههههههههههه ..... عموما ادري ماراح تيعجبكم الموقف لانكم ماحظرتوا الموقف ولآ ان كان متو ضحك من جد .. المهم جلسنا نتمشى شوي بمطار هيثرو..بصراحه انا ما اعجبني مررررة صح انه حلووو بس من وجهة نظري انه مو فخم مرررة بس يللا قالوها الناس اذواااق والله وننتظر رحلتنا على فانكوفر وكانت الساعه 1 وربع جت رحلتنا وكنت عند الصاله 28 والصاله 28 تستغرق مشي عالاقدام 10 دقايق عشان كذا انصحكم انكم تمشون للبوابة اول ماتطلع جنب الرجلة عاللوحة الالكترونيه امممممممممممم وش بعد ياربي وش بعد ياربي؟؟ ايه صح اذكركم لا تنسون تاخذون صورة من القبول وتحطونها بالهاند باق لانهم راح يطلبونها منكم في مطار هيثرو ا اذا جيتم تركبون الطيارة الي متجهه لكندا وصار لنا موقف صغيرون بس يخوف..الموقف انه يوم جينا بندخل من البوابة رقم 28 ..رجعونا وقالت الموظفه بليز ويت... ونادوا مرة ثانيه للرحلة ..وجينا بندخل ورجعتنا مرة ثانيية وقالت بليز وييت؟؟؟ =====>وقتها بلعت العافيه وقلت عز الله رجعنا للسعوديه على اقرب طيارة هههههه بس الحمدلله شكلها كانت تاخرنا عشان ترتيب المقاعد .ما ادري بس اعتقد عشان المقاعد.. وركبنا الطيارة بسلام الحمدلله ... ترقبوا الجزء الثاني.. البنت الانجليزية في الطيارة الكندية====>>>كيف السجع؟؟ والموقف الي بغوا يرجعوني السعودية عشانه بس ربكم ستر.. ومواقف كثيرة انتظروا |
|
|
|
23-08-2007, 04:52 AM
|
#6 (permalink) |
|
مسافرجديد
تاريخ التسجيل: Aug 2006
رقم العضوية :108466
المشاركات: 54
|
شرفتوا الموضوع اخواني ويسلمو على رفع المعنويات
اللي يسال عن وش صار لنا مع القرصون...لا الحمدلله فهمناه بلغة الاشارات ههههههه درا اننا داجين ماحولنا احد بالانجليزي بس نقوله صورة هذي الاكله ويجيب لنا ههههههههه |
|
|
|
|
23-08-2007, 11:20 AM
|
#9 (permalink) |
|
مسافرجديد
تاريخ التسجيل: Aug 2006
رقم العضوية :108466
المشاركات: 54
|
الجزء الثاني
بعد سالفة المقاعد وما المقاعد المهم ماعلينا من اللي صار..ركبنا الطيارة الكندية...بصراحه الخطوط الكندية حلوة وجيده يعني مو على قد السب الي جاها من بعض الشباب... خدمة حلوة وكراسي مريحه من وجهة نظري.. عاد اقلعنا من مطار هيثرو متجهين لمطار فانكوفر كنا انا وشاكر جالسين جنب بعض وفاهد جالس بعيد عننا المهم جلست على يمين شاكر وحده وعلى يساري وحده وصرنا بالنص بينهن المهم بصراحه احنا من يوم اقلعت الرحله ..واحنا ذابحتنا اللقافه ودنا نسولف معهن بس مانعرف وشلون؟؟ ====>ياحليلهم مستحين المهم جلسنا نسولف انا وشاكر سوالف ما ادري وش تبي بس نضيع وقت ...واعطونا وجبه حلوة وتصبر عن الجوع انا ماصورت بالخطوط الكندية لان اغلب الوقت نايمين لان الرحلة بصراحه مررررررررررررررة طويلة طويلة طويلة >>>تعب وهو يقول طويلة  اممممممممممممممم ايه بقولكم سالفة البنت الانجليزية هذي ياطويلين العمر كانت جالسه جنب شاكر وبصراحه انا احس انها ملقوفه وحنا ملقوفين هي ودها تسولف وحنا ودنا نسولف بعد بس متوهقين حنا مانعرف انجليزي وهي تشوفنا نتكلم لغة غير لغتهم اخر شي اخوكم بالله تشجع وخربتها وقلت ياتجي معي صح ولا عمرها ماجت >>> الي يشوفك يقول خلاص بتنسجن ؟؟ ترا كلها سؤالين وبس والله واسالها وير ار يو فروم؟؟ ردت وقالت مي؟؟ بغيت اقول لها لا جدتي؟؟ بس اشوا مسكت اعصابي وقلت يس >>>وش عنده؟ قالت انجلاند يعني اانجلترا >>>امحق توصيف وسكت انا ويجيك شاكر من اقصاه ويجيب سؤال مدري من وين جابه؟؟ قال يو ستيودنت؟؟ هي قالت وااات؟؟ >>>وقسم بالله ماذبحنا الا كلمة واات؟؟ كل من قالها نبلع العافيه ونسكت هههههههه عاد شاكر تغير وجهه وسكت وبلع العافيه ومشت الامور تمام التمام بس بصراحه الرحلة ممله وطوووووووووووويلة ومافيها اي شي يذك ايه قبل لا انسى فيه موقف يموووت ضحك ههههههههه السالفه ومافيها ان شاكر من زود الكرم عنده كان مع الوجبه ايس كريم ..وهو مايبي الايس كريم ومسوي كريم ..والرجال يبي يعطي الايس كريم للبنت الانجليزية بس مايعرف شلون؟؟ عاد مد لها الايس كريم وقال لها....يبغى...؟؟ يبغى ههههههههههههههه وين يا ابو الشباب تكلم لك هندي انت؟؟ قال يبغى قال هههههه اما يبغى هههههههههههههههه الله يرجه امحق انجليزي عنده هههههههههههه يبغى.. يبغى.. ايه صح قبل لا انسى بالنسبة لكرت دخول كندا هو المفروض يكون في كل مقعد كرت الدخول...بس انا وشاكر ماكان في مقاعدنا الكروت ومن زود الحياء انا واياه ما طلبنا المضيفة كروت الا بعد ماهبطنا في فانكوفر عشان كذا احب انبهك انكم تطلبونها من المضيفة قبل الهبوط بساعه عشان يميدكم تعبون الابليكيشن =========================== والله ونوصل بالسلامه الى فانكوفر وبيني وبينكم انا كنت شايل هم الاسئله اللي راح يسالوني اياها والله وندخل مطار فانكوفر واحنا ماشين مع السير الي يودي للموظف جلسنا عالكراسي عشان نعبي كرت الدخول وعبيناه بسرعه =====>عبو الابليكيشن بسرعه عشانهم مترجمين كرت الدخول الى كندا لللعربي ونمشي مع الناس الين وصلنا والله ونحصل سرا طوووووووويل سرا = طابور ======>مو قلت لكم اصلح بدل اطلس؟؟؟ والله ونجلس الين جاء الدور لفاهد الشمري ...وراح فاهد للموظف بس الموظف سال فاهد اذا كنا معاه ولا لا؟؟ قال فاهد يس ونادانا كلنا عشان يخلص اجرءاتنا سوا المهم جاء وقت الجد وركبي قامت اتصافق مع بعض,,,,والله يا طويلين العمر ياخذ جوازاتنا وصورة قبول الجامعه واحنا متفقين ان محد يجاوب على اي سؤال مايعرفه وكل ماسالنا سؤال مانعرفه قلنا له نو سبيك انجلش وقالنا ستيودنت؟؟؟ قلنا يس يس ستيودنت ..بس هذي اللي اللي عرفناه وخلص اجراءاتنا بسهووووولة الحمدلله وقالنا روحو للاميريقيشن=====>ما ادري صح علي الكلمة ولا لا؟؟ المهم رحنا لهم ودخلنا ...وكل واحد راح لموظف... هنا النكبه ياعيال والله كل ما اتذكرت الموقف قلبي يدق بسررررعه المهم ويوم كل واحد عند الموظف عشان يخلص اجراءاتنا...اخونا فاهد الشمري الله يهديه ..احنا متفقين محد يجاوب على اي سؤال مايعرفه.. اخوي فاهد الشمري اسالوه قالوا له...ذس از براذر؟؟ يعني هل انا اخوه ولا لا؟؟ فاهد الله يهدديه يحسب براذر معناه صديق؟؟ قال يس يؤ يؤ يؤ يؤ ينعن اوم النكبه انا مادريت عن السالفه الا بعد ماطلعنا من المطار وانا شكيت بالوضع لان الموظف اللي عند فاهد قام وجاء عندي وسالني قال ذس برذر ؟؟؟ يقصد فاهد هل هو اخوي؟؟ قلت نو برذر ذس فريند.... الا والله الموظف ينقلب وجهه ويسال خويه مدرري وش يقولون انا قلبي نغزني قلت لا عز الله الي رجعنا للسعودية وقسم رجليني قامت اتصافق مع بعض من الخوف ويتكلمون ويتكلمون والله ويعصب الموظف شوي ..ومدري وش يقولون وشوي الا جلس يطقطق على الجهاز وختم عالجواز وعطاني ورقة مدري حقت ايش؟؟المهم انها ورقة مهمه يحطها بالجواز ويدبسها انا مسكت راسي يوم قالي فاهد انه قال للموظف اني اخوه وقسم بالله بغيت اكفخه مالت عليه عشان كذا انصحكم انصحكم انصحكم..اذا كنتم مجموعه كل واحد يروح بلحاله وتقابلوا اذا طلعتوا من المطار,, واحسن شي انك ماتعرف على احد ولا تسولف مع احد بالمطار ..خلص اجراءتك بنفسك واطلع ..لا تقول ولله بساعد فلان ولا فلان صديقي ..بالعكس خل كل واحد يسع نفسه بنفسه لا يصير لكم زي ماصار لي...نصيحه هههههههههههههههههههههههههههههههههههههههههههههه الله يرجك بس يا فاهد...بس الحمدلله عدت هالمشكلة بسلام ...الحمدلله ونروح ناخذ شناطنا ...ويوم جين نسال الموظف حق اللي يشيل الشنط؟؟ هاو ماتش؟؟ يعني كم تشيل لنا الشنط؟ ======>ينعن اوم الترجمه ياشيخ وهو يطالع بوجيهنا وقال السلام عليكم...يوم قال السلام عليكم بغيت اضمه من الفرحه قلت اشوا لقينا واحد بيسنعنا الا والله طلع باكستاني مررررررة فله ويتكلم عربي ...الا والله يشيل لنا شناطنا ويدور لنا على تاكسي انا وشاكر هذي الصور اول ماطلعنا من المطار   اخونا فاهد كان في استقباله عائلته ...وراح معاهم لديرته ابوتسفورد... بس انا شاكر بصرااااااااااحه تبهذلنا بهذله يحبها قلبك بس الحمدلله مشت امورنا والله وناخذ تاكسي يودينا للطائرة المائية =====>لان مدينتا في جزيرة ومانقدر نروح لها الا عن طريق الطائرة المائية او عن طريق العبارة ونوصل لمكان الطائرة وننزل شناطنا ماشاء الله شناطنا الشنطة الوحده كبر الواحد مننا 4 مراااااااااات ويوم نزلنها وحاسبنا التاكسي حاسبناه 30 دولار وندخل عشان نقص التذاكر الا يقولون فل مافيه الا بكرا ...يابنت الحلال منا ولا منا قالت مافيه كل شي فل =====>عاد طبعا لا تحسبون نتكلم انجليزي ترا كل شي بالاشارات ههههههههههه الا والله ونتوهق منا ولا منا ياشاكر؟؟ وش السوات؟؟ والله ماندري وش نسوي ولا ندري وين ربي حاطنا ونتصل على واحد من اخوياي هنا في كندا الا والله جواله مقفل يا ولد والله ونسال واحد كندي نقوله وير فيري ؟؟ يعني وين محطه الفيري الي هي العبارة؟؟ رد وقال تقريبا 25 دقيقة ...قلت ثانكس والله وننطق عند شناطنا ماندري وين ربي حاطنا بس ندربي روسنا على عماها الاوالله راعي التاكسي الي وقف قدامنا وقال تاكسي ..قلت يس بات باجس فيري بيج ....يعني نبي تاكسي بس معنا شناط كبيرة مرررررة ومايشيلها تاكسي واحد الا وقال السلام عليكم يو سبيك اربيك؟؟ انا قلت هاه ..وقسم طرت من الفرحه حسيت امي داعيتلي ..سبحان الله الا واقوله وعليكم السلام والله لولا الحياء كان ضميته هههههههههههههههههههه المهم والله ويسولف معنا عربي وينادي خويه الثاني رراعي التاكسي ونشيل شناطنا كل شنطتين في تاكسي ونقوله نبي الفيري وهو يودينا ماشاء الله عليه يعرف نص احياء الرياض من الربوة والعزيزية والعليا والمصيف والخ ..انا عقلي مو معه عقلي وشلون نبي نروح عالعبارة ووشلون نبي نحجز فندق ووشلون نبي نشيل شناطنا؟؟؟؟ المهم والله ويوصلنا لمكان العبارة ونعطي كل تاكسي 50 دولار ..ادري غالي بس وش نسوي غصب؟؟ ان ماطاعك الزمان ولا طعه؟؟ المهم والله ونقص التذاكر حقت العبارة الي هي الفيري..الا ورحلتنا بعد خمس دقايق والله وناخذ عفشنا ونجلس نسحبه الين العبارة عاد تخيلو كل واحد يسحب شنطتين وكل شنطه كبره 4 مرااااااااااات هههههههههههههههه وقسم عذاب عذاب تقطعت ايدينا وحنا نسحب ... والله ونوصل للعبارة الحمدلله ونحط شناطنا ونرتاح شوي...بس بصرااااااااااحه الشعب الكندي طيب طيب طيب طيب لا ابعد دررررررررررررجه عسل عسل...تعرفون اذا قالوا ينحط عالجرح يبرا؟؟ هذا هو الشعب الكندي ...حتى انهم يمزحون معانا ..حتى اول ماركبنا العبارة .. شافتنا وحده كندية وشافت شناطنا كبيرة قال ذس بيج اوول بيبول..يعني هذي الشنط لكل الناس اللي هنا هههههههههههههههههههه انا حسيت انها انتفتنا نتفه قوية هههههههههههه ====>انتفتنا محد راح يعرف معناها الا اهل الرياض كح كح وبصراحه كل ماقابلنا احد الا الابتسامه تشق وجهه ماشاء الله...والموضفين عسل والله عسل ويحبون المساعده ..حتى لو مايفهمون مايرحون من عندك الا لازم يفهمون وش تبي؟؟ والله وناخذ لنا اكل من مطعم العبارة وناكل ونعين من الله خير  تذكرت اصور الاكل بعد ما اكلنا الهبرغر هههههههههههههه وهذي صورة للعباره من داخل   ..ونجلس نتمشى شوي بالعبارة واصورنا كم صورة في العبارة   هذي صورة العلم الكندي...والعلم اللي جنبه والله مدري وشو؟؟ =====>قل قسم بس  وهذي السيارت الي في العبارة ..تصدقون مادريت ان السيارت تنشحن بالعبارة الا بعد ماشفتها . ===>طيب وش تبيهم يسوون لك؟؟يرقصون لك مثلا؟؟ بس اموت واعرف هالاشقر هذا ليش ما طالعني الا يوم جيت اصور؟؟ كان ملتفت قدام ويوم جيت اصور وهو يلتفت علي؟؟ مالت عليه   وهذي الصور يوم قربنا من مدينتنا مدينة نانايمو     واللله ونوصل بحمد الله وسلامته لمدينة نانايمو ونرجع مرة ثانيه ونسحب شناطنا يالله من شناطنا وقسم بالله ارفعت ظغطي تمنيت اني ماجبت ولا شنطه ======>لا ياشيخ؟؟ والله ونحصل تاكسي ويشيل شناطنا ونعطيه عنوان الهوتيل اللي عطتناه الجامعه عشان نسكن فيه الين بكرا ويودينا للهوتيل وحنا بالطريق قلت خلني اعرف الشباب على مدينتي  هذي واحنا بالطريق  وهذا ماك اهم شي..على اني للحين ما اكلت منه بس ان شاء الله بكرا با اكل منه يم يم يم هههههههههههههههههههههههههههههههههههه  وهذي محطه عندهم كح كح ونوصل للهوتيل ..والله ومايقصر راعي التاكسي وينزل شناطنا وينزل معانا ويساعدنا ... وصاحب الفندق وربي عسسسسسسسسسسسسسسل يوم درا اننا من السعودية وهو يطير من الفرحه ويرحب فينا ويولكم ..وحنا نقولة نو سبيك انجلش قود..وهو يقو نو بربلم نو بربلم ونعطيه الجواز والفلوس بس ويخلينا نوقع واشياء بسيطه سويناها...امممممممممم اخذنا برايفت روم ب75 دولار .بصراحه الي جاي على نانايمو ويبي فندق بس يضيفني وانا اعطيه اسم الفندق والله عسل صاحب الفندق عسل وبقوووة بعد ********خلاص اسكت لا ينقلب نحله الحين ههههههههه المهم ويعطينا المفاتيح ونطلع شناطنا فوق ونجلس شوي ...بصراحه ماقدرنا نجلس قلنا خلنا ناخذ فرة عالداون تاون... واول ما طلعنا من الفندق اخذت هالصور..   وناخذ لنا فرتين عالداون تاون بس كان كل شي مسكر تقريبا الساعه كانت 10 الليل والله ونرجع للفندق وننام بدون اكل..ذبحنا الجوع بس العالم كلها مسكرين ماحصلنا شي فاتح... وهذي صورة للغرفه الي احنا فيها  والله وننام ,,ونصحى الصباح الساعه 8 الصبح ...ونروح للجامعه على تاكسي.. ======>ترا قلنا للهوتيل نبي تاكسي وهو الي طلب لنا تاكسي بالتلفون بس 3 دقايق الا هو عند باب الهوتيل ويودينا لجامعة مالسبينا والله نروح لادارة الهوم ستاي ..ونسال عن الحرمة اللي مواعدتنا اسمها دونا...ونسال عنها قالو..تجي بعد ساعه ..قلنا اوكي.. والله ونطلع نتمشى عالجامعه ,,هذي صور لها..     هذي صورة للمدينه من الجامعه...الجامعه مطله عالمدينة...     عاد انا يوم شفت الاعلام هذي... ======>عاد تدرون هالولد اللقافه ذابحته .. سالت الموظفه قلت ليش ماحطيتو علم السعودية.. صرفتني وقالت قبل اسبوع شلناه..وكل شهر نغير اعلام... عاد انا ماتمشي علي هالتصاريف عطيها نظره كذا وقلت شور؟؟ قالت يس ======>وش عنده الولد مهايطي؟؟ هههههههههههههههه  والله وننتظر المانجر حقتهم...وتجي لنا ومعاها مترجم طلع من الاردن ويسلم علينا >>>يطير من الفرحه اذا شاف احد يتكلم عربي ههههههههههههههههههه والله ونسنع امورنا وكل شي ويتصلون على عائله شاكر عشان تجي تاخذه..اما انا قالو لي عائلتك مسافرة وماراح تجي الا بعد اسبوع.. =====>دايم يصرفونه هههههههههههه قالو لي راح تسكن مع صديقك الين تجي عائلتك..قلت انا نو بربلم =====>اوخص صار يتكلم انجليزي ههههههههههههههههههه والله وننتظر نص ساعه الا هذا ابونا جاي >>>صار ابوهم الحين هههههههههههههههههههههه والله ونسولف معاه شوي ماندري وش يقول وهو مايدري وش نقول بس طقطقنا معاه شوي... والله ويقول لنا قو؟؟ قلنا قو قو نعنبو من يردك.... ونروح للهوتيل وناخذ شناطنا يا طويلين العمر ونروح للبيت ...بسم الله ماشاء الله عالبيت كبيرررررررررر وفللللللللللللله وقسم كانه قصر هنا خلص الجزء الثاني ترقبوا الجزء الثالث سيارات ابونا الثلاث..والدبابين وكيف فتحنا حساب بالبنك؟ وطلعتنا مع خوينا السعودي؟ واشياء كثيرة ترقبوا |
|
|
|
|
24-08-2007, 10:15 AM
|
#15 (permalink) |
|
مسافرجديد
تاريخ التسجيل: Aug 2007
رقم العضوية :153758
المشاركات: 2
|
والله العظيم انك مبدع ومو طبيعي
جالس بالبي لحالي والرميت حقي بايت عند أصحابه بس صوتي طالع لبرى من أسلوبك المبدع عموما حياك حبيبي وحمدلله على السلامة انا أخوك فيصل من أوتاوا العاصمة طبعا لو احتجت شي ضيفني عندك ولايردك الا لسانك قال ايش على الايسكريم ............... الله يقطع ابليس صاحبك |
|
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض المتطور
|
|
|
الساعة الآن 01:58 AM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||