 |
 |
 |
||
|
|
|
||
 |
|
 |
|
|||||||
| دول أوروبـــــــــــــــا تعنى هذه البوابة بتزويد المستخدمين بجميع المعلومات المتنوعة الخاصة بالسفر الى النمسا. |
 |
|
|
أدوات الموضوع | انواع عرض الموضوع |
17-08-2007, 08:18 PM
|
#1 (permalink) |
|
عضو العرب المسافرون المميز
 
تاريخ التسجيل: Jun 2005
الدولة: β... Canada ...β
رقم العضوية :28478
المشاركات: 1,682
|
تقريــر رحــ ThE PrOGraMmEr ــلـة بنكهة جبال الألب النمساوية
  بسم الله الرحمن الرحيم... السلام عليكم ورحمة الله وبركاته,,, ها انا ذا آتيكم من جديد محملاً بما لذ وطاب في جعبتي من الأسلحة والطرف والمعلومات  ...والتي اتمنى ان تنال على اعجابكم ورضاكم,,اعزائي..النجاح اللي حققه تقريري السابق لرحلتي لتايلند ولله الحمد (على هذا الرابط...."إضغط هنا")...اعتبره دافع معنوي كبير..ومحفز قوي لي اني اكتب هالتقرير  ..لأن فيه "بعض" الأعضاء فعلا يستاهلون الواحد يتعب عشانهم ويسوي تقرير...لكن البعض الآخر يؤسفني اقول انهم ما يهتمون الا بأنفسهم وما عندهم اي استعداد الا لأخذ المعلومات دون حتى إبداء الشكر للجهود اللي تبذل لكتابة التقارير...سواء في تقريري او في غيره..على العموم ما يقصرون...يزيدون عدد الزيارات هههههههههههههبدايةً..وقبل ما ابدأ..احب اعتذر على التأخير في طرح التقرير اللي وعدت الكثيرين به وجالسين يتابعون معي كل فترة وفترة متى راح انزله...وهذا بقدر ما يشرفني ويحسسني بالأهمية...الا انه بنفس القدر يحسسني بالمسؤولية الكبيرة اللي راح اتحملها طوال وقت كتابة التقرير...ارجع لموضوع التأخير...صحيح اني صار لي الحين شهر بالضبط راجع...لكن فيه عوامل كثيرة أخرتني...ولعل من اهمها النفسية هههههههههه والله عقب هالسفره الحلوه..والأجواء الروعة..يجي الواحد للرياض وجوها (اللهم لا اعتراض)...فمن الطبيعي ماااااااا له نفس يكتب شيء...إضافة الى ارتباطات العمل والأهل والأصدقاء...كل واحد من جهة.. اعرف اني طولت عليكم الكلام...لكن ابنبه الى نقطة أخيرة قبل ما ابدأ...الصور اللي انا مصورها مجتمعة مع بعض...حوالي 4000 صورة  ...وكنت ناوي اني اصفيها واشوف اللي يصلح منها واللي ما يصلح وبعد كذا اكتب الأسم عليها واصغرها وبعدين ارفعها على مركز التحميل كلها مع بعض بعدين اكتب التقرير...لكن اكتشفت ان هالموضوع ما راح ينتهي الا على شتاء عام 2377 م...فقلت ما لها داعي يمكن تصير النمسا في ذاك الوقت زي الدهناء عندنا وما احد يروح لها...لذلك آثرت اني اكتب كل حلقة لحالها...وبعدين اختار صورها...وبعدين احملها...صحيح ممكن تطول الفتره بين الحلقة والثانية...لكن على الأقل راح يجيكم التقرير في عام 2007 ههههههههههههههههه...آخر نقطة...نتوقع ان نحلق خلال هذه الرحلة على ارتفاع يتراوح بين ال800 الى 1000 صورة...واحب انوه الى اني استخدمت نوع غير من الكاميرات عن التقرير اللي راح...وبدل ما كان التقرير الماضي بكاميرا جوال  ...صارت الآن بكاميرا احترافية 10.1 ميغا بيكسل...ومعها ثلاث عدسات ...بإستثناء اول الصور في التقرير لأنها كلها يا اما في المطار او في اماكن ما كنت اقدر اطلع الكاميرا فيها..ولذلك...كاميرا السوني اريكسون فيكم فيكم (قلللب)- - - - - - - [ملاحظة]: بداية التقرير "قد" تكون مملّة شوي..لأنها كلها حشو معلومات...تحملوني شوي.. أعضاء الرحلة مكونين من 9 اشخاص..7 كبار...وطفلين عن قبيلة الجنجاويد كلها (بسم الله عليهم ) فيهم من القلق والبثارة ما لا يعلم به الا الله.. التجهيز للرحلة وجمع المعلومات والإستعداد لها كان دوري انا وزوج اختي...والا الباقين "يدربون روسهم" ولو اننا مودينهم لمكة والطايف ما دروا..اختيارنا للنمسا كان لعدة اسباب...واولها هو انها افضل بلد يلبي كل احتياجاتنا..ولعل اول واهم احتياجاتنا هو الجو ..يا ساتر...انا ذاك اليوم طالع من الدوام واناظر درجة الحرارة في السيارة 49..!! وش ذا الإستهبال والغش يا ناس..!!  الشيء الثاني...اننا نحن العائلة الكريمة سبق لنا واننا الحمد لله رحنا بلدان كثييرة شرقاً وغرباً..والنمسا كانت من البلدان اللي ما جيناها..الا انا واخوي الكبير عام 2004 وكانت لمدة 3 ايام وكلها في فيينا...يعني ما نعتبرها زيارة.. الرحلة كانت على متن الخطوط القطرية..وهذا موقعهم.. ("اضغط هنا") خط سير الرحلة كان كالتالي.. رياض - دوحة - ميونخ - دوحة - رياض...ممكن تتسائلون ليش رحت عن طريق ميونخ...راح تعرفون خلال التقرير ان شاء الله... التذاكر كلفت حوالي ال2900 ريال للشخص الواحد...مع السكن في الدوحة والنقل من والى المطار ومع الوجبات خلال فترة السكن في الدوحة.. يوم الرحلة كان يوافق يوم الإربعاء 27 \ 6 وكانت الرحلة الأولى من الرياض الى الدوحة.. بسم الله نبدأ مع اول صورة في التقرير...وهو الشيء المسؤول عن نقل هذا التقرير لكم  طبعا خلال الفترة بين الصيف الماضي وهالصيف...تعمقت بشكل كبير في مجال التصوير الإحترافي واستهواني كثير...عشان كذا تشوفون العدسات والعدّة.. هنا صورة الفلوس اللي راح تكون في يدي..جديييدة ما ودك تصرفها  طريقة مبتكرة واول مره اجربها على كثرة سفري...لكن فعلا لقيتها مجدية وحلوة...  اطلقت على هالطريقة..طريقة "الشاورما".. الشاورما بعد تعبئتها في الشنطة..  حلاوة هالطريقة انها ما تاخذ مكان وفي نفس الوقت الملابس ما تتعرفط وتضطر انك اذا وصلت تسوي حركات العزوبية وتحط القميص او البنطلون تحت مرتبة السرير وتجلس عليها هههههههههه<<ترا ما تمشي علي هالحركات...قديمة انت وياه.. انطلقت "العائلة السعيدة" الى مطار الملك خالد...مودعةً بذلك لهيب وحر الرياض الله يكفينا الشر..وكانت الوجهة الى صالة الخطوط الأجنبية..  صورة لطيارة القطرية...يا ناس يلومونني في هالخطوط...والله حبيتها زيادة عن اول..  طبعا يجدر بالذكر هنا اني انا مجهز شنطتي تماماً وحاط كل اغراضي فيها..<<طبعا بتتسائلون ...طيب يا دلخ!!  طبيعي انك تبي تحط كل اغراضك فيها..!! ولا ممكن يعني تحط عطرين في جيبك وبنطلون وقميص في جيبك الثاني وتلف برمودا على جبهتك مثلاً..!..الحين اقول لكم ليش.. اكتشفت يوم اني وصلت للمطار..ان زوج اختي قليل الخاتمة..ناوي يشحن الشناط الى ميونخ على طول..!!  طيب يا صديقي يا عزيزي...اذا قمت من النوم بكرا في الدوحة..يعني اجيب تراب وافرك به اسناني مثلاً بدال معجون الأسنان!!..ولا اجيب مناديل مقويّة واعتبرها فرشة اسنان!! ...صدق انك ما لك خاتمة<<قلب عليه ..!!طبعا هو سوا نفسه يوم كفشناه انه ما كان يدري انها بتنشحن الى ميونخ...لكن يا سبحااان الله ...شاءت الأقدار انه يصير معه شنطة صغيرة حاط فيها كل الأغراض اللي ممكن يحتاجها خلال جلوسنا في الدوحة..طبعا تراه ما يدري...كل هذا صار صدفه اوكي..انتم قولوا ايه بس بعد ما حجرنا له...قال انا قايل لأختكم تقول لكم هههههههههههه والله يا انت ما تعرف تنصّب بعد بوابة الدخول الى طيارة القطرية..  طبعا تراها غش مهيب رقمها 16  ...مطار الرياض من يوم ما كنت بزر وانا ودي مره ادخل مع بوابة غير 36 ...والله يا هم مستهلكينها..!! المهم بس انها غش...تراها 36 مهيب 16 عشان تكونون في الصورة.. السناك اللي على الرحلة بحكم انه ما هو وقت وجبة...والرحلة قصيرة..  طبعاً محدثكم والله لو يعطونه كرتون كلينكس فاضي وفيه جوا شوي تايد برائحة الزهور مع مربى جح...وقالوا له ترا هذي وجبه...اكلها بمجرد انها اسمها وجبة (قولوا ما شاء الله انت وياه)وصلنا للدوحة بالسلامة..وهذي الصورة لحظة الوصول للمطار..  بحكم ان رحلتنا من الدوحة الى ميونخ كانت من بكرا الظهر...ما فيه اي مجال اننا نجلس في المطار مثل شغل الهنود في مطار الرياض..!! وما قصروا القطرية واعطونا 5 غرف دبل في فندق رمادا الدوحة.. وهذا موقعهم ("إضغط هنا") كان الفندق قسمين...واضح ان واحد قديم والثاني توهم بانينه...طبعا بدري عليك وحامض على بوزك يعطونك في الجديد احمد ربك عطوك غرفة ..لكن على انه قديم الا انه ممتاز من جميع النواحي..صورة للغرفة..  دورة المياه الله يعزكم..  ما ان تفرقعنا في غرفنا...حتى التم شمل العائلة السعيدة مرة ثانية...ونزلنا للمطعم للعشاء...وكان مثل ما قلت لكم مشمول مع تذاكر الطيارة.. تعشينا حتى وصلت مؤشرات التوانك على F وللأمانة...كانت فوق الF بشوي هههههههههههههههه طلعنا الى الغرف ونمنا..وصحينا من بكرا بدري لأن الرحلة كان وقتها الظهر.. بعد ما افطرنا في البوفيه المفتوح...وكان لذيذ مثل عشاء امس..جاء الباص اللي ينقل المسافرين من الفندق الى المطار...طبعا استنتجت فيما بعد ان رمادا متعاملة معه القطرية لركابها...وفعلا كانوا كل اللي معنا في الفندق شفناهم في المطار...الا واحد شكله كان سكران وجا وحجز في الفندق ما درا انه كنه صالة الرحلات الدولية هههههههههههههههههه لحظات الإنتظار في المطار...قضيناها في Costa Coffee وهذي صورته..  صالة المغادرة..."شبه فاضية"..  اللابتوب ما كان عنه غنى.. << غنى ولا فقر هأ هأ هأ..<<  ترا قسم بالله استهبل ما ابيكم تضحكون بس ابشوف ردة فعلكم..  الفارة جيري..لا يغركم شكلها...تراها بثثثثثرة..  اقول...مقطعتك الثقافة انت ووجهك..  صورة من الباص واحنا متجهين للطيارة..  صورة للطيارة بس انها تعوّر العيون  طبعًا جيري كانت مصرّة انها تجلس جنبي...وانا رافض بشدددة بحكم اني اعرف القلق اللي يبي يجيني...والرحلة طويلة واناودي اريح مخّي...لكن يقولون...من يضحك اخيرا يضحك كثيرا...انتصرت علي وجلست جنبها بعد ما سمعها الكابتن وهي تصرخ تناديني عشان اجلس جنبها...مجبرا اخاك لا بطل لحظة الإقلاع من الدوحة..  طبعا بعد البثارة والقلق من جيري لعدد من الساعات...نامت خلال 3 ثواني!!...والصراحة رحمتها لأنها نامت وهي تاكل خبزة...شكلها كنها من البزران اللي في افريقيا  اكتفي بهذا القدر للحلقة الأولى..لعدة اسباب...اولا اني كثّرت عليكم ...ولأني انا تعبت ...وبرضه عشان اشوف ردة الفعل الأولية للتقرير.. اتمنى تعجبكم الحلقة...واشوفكم الحلقة القادمة.. تحيّاتي لكم... ThE PrOGraMmEr |
|
|
17-08-2007, 10:25 PM
|
#4 (permalink) |
|
مشرف النمسا
تاريخ التسجيل: May 2007
الدولة: * في قلب زوجتي *
رقم العضوية :134545
المشاركات: 3,378
|
 والله ماشاءالله عليك ... تعرف كيف تشد المشاهد .. اسلوب ممتع وصور روعه ... والله يخليلك اولادك ويصلحهم .. شكل التقرير راح يكون من افضل تقارير 2007 ... سجلني ثاني متابع بالتوفيق يالغالي اخوك ابوعبدالاله |
|
|
|
18-08-2007, 02:38 AM
|
#8 (permalink) |
|
مسافر خبير
تاريخ التسجيل: Feb 2007
الدولة: دبي
رقم العضوية :123836
المشاركات: 1,305
|
هاهاها اتصدق اني واحد من معجبينك ، عاد لاتتغلى علينا ابتوقيعك هاهاها ،، لاوالله ما ابالغ الصراحه انا تابعت تقريرك عن تايلند واسلوبك بالكتابه شيق ومميز وضحكت بصوت مسموع بغرفتي ، مع اني فجر اليوم واصل من سفرتي للنمسا والمانيا وجالس اكتب بتقريري الا اني باجل تقريري لاجل غير مسمى ياخي سحبت الجو عنا انا يالس ادخل واطلع من تقريري بس عشان ازيد عدد الزيارات هاهاهاها اخر شي بتلاقيني مفترش على بوابة المنتدى واقول مشاركه اليله تبعد بلاوي كثيره ويابخت من زار تقريري هاهاهاها اقول اذا في صور زايده بطرشلك ايميلي هاهاها تسلم وننتظر تقريرك المميز
|
|
|
|
18-08-2007, 07:56 AM
|
#11 (permalink) |
|
مسافر متميز
تاريخ التسجيل: Nov 2004
رقم العضوية :16004
المشاركات: 241
|
ماشاء الله عليك
خفة دمك وروحك الحلوة معطية التقرير نكهة نجدية وانا اللي اقول ماغير اهل الشرقية خفيفين دم لوووووول امزح الحمد لله اني ماكتبت تقريري قبلك وش رأيك تكتبه عني امانة اخوي بروجرامير تبوس لي جيري على رأسها تزننننن ربي يحفظها لك |
|
|
|
18-08-2007, 11:22 AM
|
#13 (permalink) |
|
مسافر متالق
تاريخ التسجيل: Apr 2006
الدولة: الرياض * * والخبر **
رقم العضوية :69490
المشاركات: 706
|
ماشالله عليك ThE PrOGraMmEr
والله رووووووووووعة واللي مايتابع تقريرك هو الخسران أقول لو سمحت سجلني من المتابعين انشالله يابطل الزوووووووووم 10 ميقا ماشالله الكاميرا صافية وحلوة . أقول عجل بالباقي لاتعلقنا ههههههههه |
|
|
|
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
| انواع عرض الموضوع | |
العرض العادي
|
|
|
الساعة الآن 09:42 PM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||