نظراً لقرب موعد الاجازة الصيفيه !! وما له من اتصال مباشر في الختات لعمة الدنيا (على قولة ابو مضاوي ) !!

ونظراً لكثرة الاسئلة عن الاسعار والتكلفة والمناطق وتوزيع الوقت والاكل وخلافه !! حبيت اني ادلو بدلوي في هالموضوع !!! ولست الافضل في هالموضوع لكن الشباب ما راح يقصروووووون وراح يعقبون على الموضوع ويصححون لنا بعض المعلوماااااااات ..

1 - بالنسبه للتذاكر حالياً الجاردوه 1860 تقريباً والسعوديه حوالي 1960 ريال -- بس اذا تاخرت شوي راح توصل 2380 - 2450 بالراااااااااااحه .. الحق عمررررررررررك.
وهناك خطوط اخرى من الكويتيه والقطريه والاماراتيه والخليج وغيرها واساعرها من 1800 الى 2000 ريال بس لازم يكون هناك ترانزيت .

2 - بالنسبة للسكن : الافضل السكن في شقق او فندق غرفتين ( كل 2 في غرفه) .. اسعار الشقق تتراوح من 450.000 ربيه ( 50 دولار) الى 750.000 ربيه ( 85 دولار) .. اما الفنادق من 180.000 للغرفه الى 390.000 ربيه على حسب الفنادق ( طبعاً ما جبنا طاري الخمس نجوووم لانه بيصير غالي).

3 - بالنسبة للمواصلات : التكاسي رخيصه في اندونيسيا .. يعني مشوار السوق حوالي 10.000 ربيه ( 4.5 ريال ) وعلى حسب عددكم راح تقسم على المجموعه - طبعا هذا اذا سكنت في وسط البلد واكيد راح تسكن هناك .. وبالنسبه للمطاعم قريبه ايضاً يعني من 10.000 الى 15.000 المشواااار الواحد -- اما الملاهي والسينما والتمشيات فتقريباً 20.000 ربيه للمشوار .. وعلى حسب كثر مشااااويرك احسب تكلفتك اليوميه !! وانا اتوقعها ما تتجاوز 150.000 ربيه لليوم الكامل ( تكاسي) ..
اما اذا بتطلع براء جاكرتا ( الجبل وباندونق وخلافه) فلابد من استئجار سياره يوم كامل مع السائق والبنزين بـ 300.000 ربيه ( 130 ريال) والسبب هو انك في الجبل لازم تروح للبراكين والشلالات وحديقه الزهزر وينابيع الماء الحار !! يعني تحتاج سياره تحت رجلك على طول الساعه .. واذا كنتم مجموعة بتصير اخر حلاوه.

4 - الاكل : اااااااااااااه جيت على الجرح !! يستحسن تاخذون معكم عدتكم من السعوديه (الرز كيس ابو 10 كيلو !! والبهارات والخبز والمعلبات وفك الصلصه !! واخيراً البابونج اللي هو الينسون حق المغص (لان المغص هذا شي رسمي هنااااااك) واذا نسيت شي ذكروووني ) .. وخذ يا طبخ ونفخ طوووول اليوم !! اوووووووووف شي رهيـــــــــــــــــــــــــــب
اما المطاعم العربيه ومطاعم الفاست فووود فهي كثيره وتوفره في كل مكان خاصة وسط جاكرتا (اماكن تجمع العرب والسعوديين بشكل خاص) واساعرها حدود ال 20.000 ربيه للوجبه الواحده / نفرررر - يعني اذا 4 راح تدفعون من 80.000 الى 120.000 على الغداء ( مثال : 4 نفر برياني دزاز + 4 سفريت + سهن سلطه) طبعاً النطق بالاندونيسي .. واذا بتقلبها سباقيتي من ماكدونالدز بتكلفكم 40.000 ربيه ل 4 اشخاص مع البيبسي

5 - الترفيه : الترفيه في اندونيسيا هو زيارتها !! لانك مجرد ما توصل هناك بتحس انك رفهت عن نفسك يعني ببلاش !! واحد فاهم غلط ههههههههههههههههههههه
هناك السينما وسعرها حوالي 30.000 للشخص الواحد واذا بنزيد عليها الفشار والكت كات والكولا بتصير 50.000 بالرااااااااحه !! ايضاً هناك الملاهي (دنيا فنتاسي) سعر الخدول حوالي 35.000 ربيه للشخص ( العب حتى تتعب!! مع الاخذ في الحسبان بان بعض الالعاب تلعب مره واحده واذا بتكرها لازم تدفع !! بس مبلغ بسيط) -- ايضاً هناك الذهاب للاسواق والتمشيه فيها مثل سوق سنايان بلازا (بس لا تشترون من هنااااااك اي شي لانه غالي مرررره - حتى الكوفي شوب اشتروا من عنده اكواااا- مويه وتخب عليكم !!) و سوق تمان انقريك ( هذا السوق الصيني الضخم والفخم !!) وغيرها من الاسواق الشعبيه مثل منقا دوا ( سوق رخيص وحلو - بس يصكر الساعه 5 مساء .. يعني الواحد لازم يبكر وهو رايح له) .. هناك ايضاً البحر ( منطقة انشوووووول) ممكن تروح هناك على البحر وتركب لنش وتستمتع بالهواء الكووووويس على البحر .. ولا ننسى تمان ميني و عمود عصويد ( مونااااس ) !! ..

6 - القطه : هنالك قطه من يوم تطب جاكرتا وهي قطة السكن وهذي محررررمه على الباقين !! يعني اللي يلمسها يوبخ توبيخاً لا باس به حيث تؤخذ يده ويضرب عليها بشويش عشان ما يزعل وتقفل معه طول السفره ويخرب الرحله على الباقين !! ويقال له : ياللي مش كوووووووويس ( هذا هو التوبيخ !! ) وفي اعتقادي يبي لكم متوسط 50 - 80 دولار يومياً قطة سكن - يعني على كل نفرررر 15 - 20 دولار بعد التقريب العشري (واحد يتحلم في الرياضيات ) وهذا جداً مناسبه .. طبعاً اذا كنتم 3-4 اشخاص . اما الشخص الواحد فيدبر عمرررره ولا يمرنا بكرررره

اما القطه اليوميه !! وهي قطة التكاسي والمطاعم والترفيه وخلافه : اتوقع يبي لها 200.000 ربيه للشخص يومياً يعني اذا كنتم اربعه بنتصرفون من 80 - 100 دولار يومياً للاربعه اشخاص جميعاً .. تراااني مراعيكم لو غيركم دفعتهم 150 دولار ..

7 - الصرف : يتم اخذ الدولارات من المطار وعند الوصول الى جكجك ( جاكرتا بعد الدلع ) !! يتم وضع كامل المبلغ في صندوق الامانات ( السيفتي بوكس ) ويتم صرف مبلغ 100 دولار فقط حيث سعر الصرف = 900.000 ربيه .. واذا خلص المبلغ تصرف 100 دولار ثانيه وهكذا !! طبعاً المهم انك ما تشيل المبلغ كله في جيبك وينسرق وتتطورط وتذب وجهك على العالم !!
بالنسبه لاماكن الصرف : تلقاها في المطاعم العربيه غالباً وفي الاسوااااااااق مثل سوق اتريوم الدور الرابع والبنوك طبعاً .. واسعارهم قريبه من بعض يعني يمكن يفرق 5000 ربيه من شخص لاخر !!

8 - كيف توفق بين جاكرتا والجبل وباندونق وبالي وغيرها : طبعاً كل شخص ومزاجه !! يعني هناك اشخاص يريدون المدن اللي ما تنام مثل جاكرتا (تسمى مدينة ال 24 ساعه / يعني الليل مثل النهار ) وفيه ناس كثير يحبوووون المدن الكبيره هذي لانك ممكن تطلع في اي ساعه تلقى الناس صاحين !! لكن ما دامك في اندونيسيا لابد من زيارة المناطق الساااحره مثل البونشاك وشباناس وباندونق طبعا والطريق من الجبل الى باندونق شي سااااحر ورهيب مناطق جميلة جداً .. يستحسن السكن في الجبل (بونشاك ) او قريب منه يعني شباناس .. حيث يوجد فلل 3 غرف و 4 غرف بسعر في مجمعات خاصه !! والاسعار من 300.000 الى 500.000 حسب السكن والفخامه والسكيورتي !! طبعاً لازم الواحد يسكن في الاماكن اللي في سيكيورتي ولو كانت اقل فخامه من غيرها لان الامن اهم شي ..
يعني جاكرتا يبي لها 5-7 ايام و الجبل 3-5 ايام زباندونق 3 ايام ويخب عليها وبالي 3 ايام .. طبعاً ممكن تزيد وتقل على حسب ارتياح المجموعه للمنطقه اللي ساكنين فيها ..
بالي : جزيرة هادئة وجوها رائع ويبي لها ناس رومانسيين !! بس فيها الاوروبيين والاستراليين السياااح مثل الرز !! يعني ديرررره ما تصلح للسعوديين والخليجيين بشكل عام .. لكن البعض تصلح لمزاجهم خاصة اللي يحبوووون الشواطي وطقتها ..
باندونق : مدينة تجيب الهم !! ( لا تصدقون - بس المشكله الساعه 8 المساء ما تلقى ولا ماس في الشاااارع ) لكن حلاوتها في المناطق القريبه منها مثل البراكين والمياه الحاره !!

اتمنى اكوووووووووووون افدت الكثير من الشبااااااااااااب اللي ناوين يسافروون في هالعطله الصيفيه !!

هذا لعيوووووووووووووون الماساااااااااااااااااات الاعضاء الكويسين وخااااصة عصويد الذيب