ونتابع معكم بقية رحلتي لعام 2007

بعدما استمتعنا بالمناظر والصور الجميلة في بتايا ..

كما ذكرت سابقا كانت فكرة برنامجي السياحي ان ازور ( بانكوك - بتايا - جزيرة كوشانج ) وبعد كدا احدد مدة اقامتي واشتري الملابس من ارخص مكان ووجدت با نكوك ارخص شي

المهم اكمل لكم رحلتي بعدما زرنا اغلب المراكز التجارية القريبة من مركز ريال جاردن جلست ما يقارب الثلاث ليالي في بتايا و في اليوم

الرابع قررت الذهاب إلي جزيرة كوشانج وكان الفضل لختياري هذه الجزيرة الرائعة الأخوان في هذا المنتدى الرائع .. وعلى فكرة بعد ما اخلص من جزيرة كوشان هرجع تاني لبتايا

لأني جلست هناك وجبت معايا صور كثيرة لبتايا بس انا ماشي حسب الأحداث إلي صارت معايا

المهم نرجع للأخ الموجود على الريسبشن في المنتجع وسألتو كيف اروح هذه الجزيرة قال إما بالتاكسي او بـ المني باص وسعره 500 بات = 50 ريال سعودي بس بصراحة عشان معايا الأهل خفت من البهدلة وطول المشوار

قلت خليني اخد تاكسي احسن وفعلا استأجرت تاكسي يوديني إلي ميناء Tar إلي من هناك اخد معديا لجزيرة كوشانج ......... لكن شوف ايش حصل معايا

اول شي طلبت من موظف المنتجع يجيب تاكسي يواديني للجزيرة فعلا وقف تاكسي وسألت كم السعر قلي 800 بات = 80 ريال سعودي قلت متأكد اعطيتو الخريطة إلي معايا قال ايوا وتاخد معديا من هناك

قلت حلو نفس الكلام المكتوب في المنتدى بس السعر مختلف كان والإخوان كاتبين 2000 بات وهادا قال 800 قلت شكلو مخربط في جزيرة اقرب طلعت الخريطة التانية وفيها الموقع اوضح لكنو اصر علا كلامو انو عارف المكان وقلي انت هتعرف اكثر مني في بلادي قلت والله كلام صح !!!

معليش يا اخوان هقول القصة بالتفصيل عشان الكل يستفيد من التجربة ويحطاط الجميع و تستفيدون

المهم طلبت من سواق التاكسي يوديني عند محل لتغير العملة فوداني للبنك لأنو كان على طريقنا قلت عادي المهم نزلت للبنك وكان زحمة ولما وصل دوري جلست اكثر من 10 دقائق عشان موظفة البنك تطلب مني جواز السفر

وانا مو فاهم هيا ايش تبغى ماهي عارفة تنطق كلمة باسبورت صح فسرت افهم اشياء ثانية فين وفين وانا بطلع االمحفظة شافت جواز السفر واشرت عليه قلت من الصباح قولي باسبورت والله طلعت عيني

قلت إيش هادا لغتها الإنجليزية مضروبة وصورت الجواز وصورت العملة إلي ابغى ابدلها وكتبت رقم العملة آه طلعت عيني وخلتني اعبي استمارة مشواااار وبصمتني عليها وخلت المدير يوقع عليها كل هادا عشان ابدل 100 دولار

قلت توبة ادخل بنك تاني خلينا على محلات الصرافة ارجل يعني انتبهوو لا تدخلو البنك عشان تغيرو عملة

المهم بعد هادا المشوار بدأنا بالتحرك مع سواق التاكسي وأنا في الطريق حبيت انام شوي قلت خليني اخد غفوة

فجأة زوجتي صحتي وقالت ترا سواق التاكسي مضيع طريقو وشكلو مو عارف وين هادي الجزيرة سألت السواق احنا وين سار يرد وهوا متوتر وقلتو ايش المشكلة

قلي بصراحة المشوار مرة بعيد باقي حوالي 300 كيلو بعد ما قطعنا اكثر من النصف ساعة وقلت طيب مو هادي بلدك صح ؟؟ وانت ادرا مني وانا قلتلك وين انا رايح المهم قلتلو يعيني ايش هترجعني ولا كيف ؟؟

قال خلاص انزل هنا ... طرت في قلت كيف تنزلني وانا معايا اهلي وفي نص الطريق وانا مااعرف فينا انا بالتحديد

سرت ورطان لا انا في بتايا ولا وصلت الجزيرة قلتلو كمل مشوارك وهزيدك قد ما تبغى بس وصلني قال خلاص ابغى 1200 بات قلت طيب بس اسأل قبل ما تحرك عشان ما تضيعنا معاك

والله مشي وسار كل شوي يوقف ويسأل لما عل قلبي وسرت صاحي معاه لأنو عبيط وسرت اضحك عارف بلدي اكتر مني سار يضحك وقالي سوري سير قلت يلا نصيبي وقعت مع سواقي مو عارف هوا فين رايح

المهم وفي نص المشوار ونتفاجأ الشرطة توقفنا سألت السواق ايش فيه قلي اكيد سرعة المهم نزل يكلم الشرطي انا قلت دحين يتساهل معاه برضو هدول اولاد بلد ويكرمو لبعض

لكن والله ما عندهم هدا الكلام ويعطيه مخالفة سرعة مسكين واخدو رخصتووو

والله حزنت عليه وكان معايا عصيرات وبسكوت وانتو عارفين لزوم السفر وطول الطريق سرت احاول اخفف عنو واعطيه عصير وغيرو عشان ينسى

وقلتلو تزعل هزيدك المهم يمشي شوي وارجعو اقول طريقك غلط مو هادا الإتجاه يسأل كيف عرفت حسب اللوحة الإرشادية يقول انت تقرا تايلاندي قلتوا لا مكتوب انجليزي يا غبي والله حالا سرت انا السواق المهم وصلنا بالسلامة بعد عناء

وعطيت سواق التاكسي 2000 بات قلت زي ما قالو الأخوان عشان ما اظلموو والله فرح جدا وشكرني وتأسف على ما حصل المهم قطعت تذكرة للمعديا وكان قيمتها 60 بات وابني مجانا يعني اخدو مني 120 بات

وطلعنا المعدية وكانت مليانا بالسيارات والسياح الأجانب وكان هناك كشك يبيع المرطبات والذرة وطبلت كوبين ذرة والله عمري ما اكلت الذ من هذا الذرة لا يفوتكم وكان سعر الكوب الواحد 20 بات يابلاش وهادي اسعار سياحية

وكان وقتها على غروب الشمس وبدأت طبعا بالتوصير واخد بعض لمناظر غروب الشمس الجميلة وانا اعشق غروب الشمس وكان منظر جميل جدا

والآن اترككم مع الصور


هذه المعدية الى ركبناها وزي ما قلت سعر التذكرة 60 بات















هذه صورة الجزيرة ونحن قترب رويدا رويدا والله شي جميل اينما يقع نظرك تجد المناظر الطبيعية الخلابة








شوفو جمال غروب الشمس ما اروع هذا المنظر بس لو كانت هناك شوية سحب كان كملت وطلع معاها الشفق الأحمر وكمل المنظر

وعلى فكرة تعبت لما جبت هذا المنظر مو من اول لقطة عشان ازبط المنظرة حطيت نظارتي الشمسية على عدسة الكاميرا لتخفيف قوة الإضاءة الصادرة من الشمس

يلا عيشووو خدو بعض طرق المصورين المحترفين مو خسارة في اخواني وحبايبي اعضاء ومشرفين المنتدى

عشان تقدر تجيب الصورة سليمة لازم تحط عدسة خاصة للشمس او قطعة زجاج داكنة اللون لتخفيف الإضاءة بس انا وقتها مكان معايا هادي العدسة بس استعملت نضارتي الشمسية وادت الغرض