 |
 |
 |
||
|
|
|
||
 |
|
 |
|
|||||||
| بوابة السفر الى مملكة البحرين Bahrain مملكة البحرين ترحب بكم. |
 |
|
|
أدوات الموضوع | انواع عرض الموضوع |
02-03-2007, 09:53 PM
|
#1 (permalink) |
|
كاتبة متميزة
تاريخ التسجيل: Oct 2005
الدولة: قطـــــــــــــــــــــــر
رقم العضوية :50360
المشاركات: 9,357
|
الرحلة الحتشبسوتية للمملكة البحرينية (5 ليالي وأكثر من 1000صورة)
 بسم الله الرحمن الرحيم السلام عليكم ورحمة الله وبركاته أخوتي وأخواتي أعضاء منتدى العرب المسافرون.. أحببت أن أنقل لكم ما شاهدته في مملكة البحرين الرائعة بالصور والقليل من المعلومات (واللي عنده معلومات أضافية لا يبخل علينا) فكرة زيارة البحرين جاءت بالصدفة البحته.. كنت مقررة السفر للقاهرة وشرم الشيخ لكن الظروف لم تسمح لأرتباطات زوجي.. ولكن فجأة وبدون مقدمات أحس زوجي بتعب وأرهاق الساعة الثالثة مساءاً من يوم 24 فبراير 2007م.. وقرر مراجعة المستشفى العسكري بالبحرين على أساس أنه من أفضل المستشفيات بالخليج .. والساعة 7 مساءاً كنا أنا وزوجي وأطفالي بمطار الدوحة الدولي في أنتظار أقلاع طائرة طيران الخليج المتوجهة إلى المنامة في الساعة 8:40 مساءاً.. حبيت أشكر الأخت المرام لأني دخلت على المنتدى وطبعت جدولها المثبت بالبوابة وساعدني في معرفة الأماكن التي تستحق الزيارة بالبحرين.. لأن بصراحة ما أعرف شي سياحي عن البحرين.. ومقصرة جدا في دخول البوابات العربية بالمنتدى وكان جدولج يا المرام المنقذ وتسليت فيه بالطيارة أتصفح وأقرأ.. أسعار التذاكر كانت (ذهاب وعودة) الدوحة - المنامة - الدوحة درجة سياحية الكبار =640 ريال الصغار 3 سنوات =550 ريال المجموع 2 كبار و2 صغار = 2380 ريال في مطار الدوحة .. بصراحة كان خاطري بكاميرا كانون EOS 400D وكانت عند الوكيل بحوالي 4000 ريال ولقيتها بالمطار ب3450 ريال وعلى طول خذتها  .. فرصة وما أتفوت  بس خسارة لقيت الميموري كارد لها سعة 4 جيجا بمبلغ 640 ريال لكن ما خذته لأن 4 جيجا سعة كبيرة جدا ومب محتاجتها قلت أبغي 1 جيجا لكن ما كان عندهم ألا 4 بس وما خذتها ولكن لما رجعت الدوحة بعد 5 أيام طلبتها وقالوا خلصت بصراحة أنقهرت  وتحسفت أني ما خذتها  صعدنا الطيارة الساعة 8:35م طارت الساعة 8:50م مدة الرحلة 20 دقيقة ما حسينا بالوقت ولا فكينا الأحزمة  وصلنا البحرين الساعة 9:10مما كنا حاجزين السكن لكن سايق التاكسي نصحنا بشقق مفروشة بشارع المعارض اسمها اللاندمارك وصلنا الشقق وأعجبتنا وخذ على المشوار من المطار لشارع المعارض 10 دنانير يعني 100 ريال بصراحة أنصدمت بالسعر لأن المسافة قصيرة وأن كثر المبلغ بيكون 50 ريال لكن لأن التكاسي بالبحرين ما تمشي بالعداد فالمسألة متوقعة عموماً كل شي يهون لأني شفت بالبحرين طيبة بالناس ورقي وأحترام يخلي اللي يدخل البحرين ما وده يطلع منها ما شاء الله تراث مباني أثرية مساجد قديمة وحديثة وبيوت أثرية وقلاع ومدافن بالأضافة للكورنيش الراااااااائع والمجمعات التجارية والأبراج والمباني الحديثة.. يعني بلد ممكن نقول عنها أنها بلد سياحي وبالفعل كما تعتبر تونس البلد السياحي الأول بالمغرب العربي .. تعتبر البحرين البلد السياحي الأول في الخليج العربي وطبعاً مصر هي المتربعة على العرش في الشرق الأوسط من حيث السياحة وهذي المعلومات أخذناها من أحد الأخوة البحرينين المهتمين بالسياحة في البحرين.. عموماً خلونا نشوف شقق اللاندمارك بالصور .. هي شقق جيدة من حيث الموقع والفرش.. طلبنا سويت لكن اللي كان موجود شقة غرفة وصالة ومطبخ والله يعزكم حمام بمبلغ 40 دينار بالليلة .. ووعدونا أول ما يفضى سويت ننتقل له والسويت ب30 دينار بالليلة..  وهذا موقعها بالنسبة لشارع المعارض  وهذا شكلها الخارجي  وهذا الأستقبال العاملين من الجنسية الهندية وهم ودوديين جدا ومحترمين..  وهذي الشقة وتظهر الصالة والمطبخ وبعدها الممر وغرفة النوم  وهذي الصالة بشكل أوضح يظهر فيها التلفزيون به قنوات أوربت أضافة للقنوات العادية..  وهذا المطبخ به فرن كهربائي وميكرويف..وثلاجة وأدوات طبخ يعيبه أن مافيه غلاية كهربائية لتحضير النسكافيه والشاي..  وهذا المطبخ بصورة مقربة  وهذا الحمام يعيبه أن ما فيه سشوار  *  وهذي غرفة النوم بشكل عام مريحة وجديدة  وهذي خزانة الملابس وبجانبها قاعدة لوضع الشنط  وهذي الخزانة بصورة مقربة  وهذا السرير بشكل مقرب  وهذي التسريحة  كنا عطشانين جداً طلبنا عصير برتقال وحليب وطلع الحساب بدينارين و400 فلس مع الخدمة يعني 24 ريال  وبعدها على الساعة 12 بعد منتصف الليل حسينا بالجوع وطلبنا كلاب سندويش بدينار و800فلس مع السيرفس يعني ب18 ريال وتعشينا ونمنا .. وبهذا أنتهى اليوم الأول (يوم الوصول)... طول الوقت اللي كنت فيه بالبحرين كانت ناريمان على بالي وأقول شكلي بأشوف ناريمان ومرت ال5 ليالي ولا شفتج يا ناريمان (الله ما كتب لي أشوفج وأنتي بقطر ولا كتب لي أشوفج وأنا بالبحرين لكن الجايات أكثر من الرايحات وبأذن الله بنتقابل لأني حبيت البحرين جداً وحبيت شوارعها وأهلها ومبانيها وكانت هذي زيارتي الثانية للبحرين وأن شاء الله مب الأخيرة ولنا زيارات أخرى للبحرين)أنتظروني في اليوم الثاني |
|
|
|
02-03-2007, 11:25 PM
|
#2 (permalink) |
|
مسافر خبير
تاريخ التسجيل: Jul 2004
الدولة: الكـــــويـــــــــــت
رقم العضوية :9279
المشاركات: 4,065
|
الحمدلله على السلامه اختي
ومايشوف الشر زوجج والله يقومه بالسلامه وان شاء الله تزورين مصر بالقريب العاجل الحقيقه قلتي ان بطاقه الذاكره 4 جيجا بايت سعر ممتاز حرام تطوفينه وهي السعه المطلوبه حق السفر واكثر بعد ماشاء الله التقرير فيه تفاصيل كثيره وخصوصا الاسعار هذا شي مهم علشان الواحد يقارن الاسعار بين الدول والشقق اللي سكنتي فيها حلوة وفي شارع المعارض يعني كل شي يمج متابعين معاج اختي للاخر |
|
|
|
|
03-03-2007, 10:13 AM
|
#5 (permalink) |
|
كاتبة متميزة
تاريخ التسجيل: Oct 2005
الدولة: قطـــــــــــــــــــــــر
رقم العضوية :50360
المشاركات: 9,357
|
ياهلا فيك أخوي ناصر الكويتي ويشرفني مرورك بمواضيعي المتواضعة .. بالنسبة للذاكرة 4 جيجا كبيرة جدا بس ندمت أني ما شريتها .. لكن بأذن الله بأحاول أسأل عنها متى ما جات بالسوق الحرة وبأحاول أخذها .. وبالنسبة للشقة حاولت أجيب كل المعلومات عنها وصورت كل زاوية فيها وحتى أني سألتهم عن سعر الشقق الغرفتين والحمامين الله يعزك وقالوا لي أنها ب500 ريال يعني ب50 دينار..حتى أقدر أفيد أخواني وأخواتي بالمنتدى..وأشكرك على مشاعرك الطيبة أختي مير شاكرة مرورج وتعليقج ومشاعرج الطيبة.. وأنتظري بقية التقرير وأن شاء الله بيعجبج أخوي فهد الأحمد يسعدني مرورك بموضوعي وتعليقك الراقي ومشاعرك الطيبة.. بالنسبة للكاميرا اللي أستخدمتها بهذي الرحلة هي canon ixus60 صغيرة وخفيفة وتصلح للرحلات والذاكرة اللي أستخدمتها 1 جيجا وصورت 1900 صورة ما بين صور شخصية وصور أثرية وأخترت أفضل الصور وكانت 1100 صورة وأن شاء الله بأعرضهم وأتمنى يعجبونكم (ملاحظة الذاكرة 1جيجا يمكنها تصوير 3700صورة إذا كانت الصور صغيرة كما تشاهدونها بالتقرير وأذا حبيت أكبر الصور يقل عدد الصور إلى 900 صورة لذلك كنت ماخذة راحتي بالتصوير عندي مجال لحد 3700 صورة) وهذي هي الكاميرا اللي أستخدمتها   .. تابعوني فمازال في جعبتي المزيد من الأماكن والصور.. |
|
|
|
|
03-03-2007, 12:31 PM
|
#7 (permalink) |
|
كاتبة متميزة
تاريخ التسجيل: Oct 2005
الدولة: قطـــــــــــــــــــــــر
رقم العضوية :50360
المشاركات: 9,357
|
ملاحظة: نظراً لأن سفرتنا كانت بهدف العلاج وليس السياحة فأول يومين وهم يوم الوصول واليوم الثاني كانت خالية من أي مكان سياحي ولكن الجولات السياحية تبدأ من اليوم الثالث بعد الأطمئنان على صحة زوجي.. اليوم الثاني الأحد (25/2/2007م) (مجمع الدانة - مطعم الأصفهاني - تبديل مكان السكن من شقة إلى سويت) في الصباح ذهب زوجي للأطمئنان على صحته في المستشفى العسكري كنت في أنتظاره أنا والأطفال وصورت كم صورة لأطلالة الغرفة..  لو تلاحظون أغلب البنايات شقق مفروشة  وهذي الشقق بجانب شقق اللاند مارك مباشرة واسمها برج ليبارتي للشقق المفروشة  *  وعلى يسار الصورة يظهر المسجد ومجمع GUSI للتأمينات اللي بشارع المعارض..  وهذي صورة مقربة لشقق فينيسيا على اليمين  الساعة 2 الظهر خرجنا لمجمع الدانة للغداء ولعلمي بأن أي مجمع تجاري لا يخلوا من ألعاب للأطفال.. فكل همي في أي مجمع تجاري أدخله هو وجود مطعم وملاهي للأطفال ولا أنظر نهائياً للتسوق.. هذا الشارع هو شارع المعارض ويظهر طرف من مجمع التأمينات على اليمين  وبجانب مجمع التأمينات توجد جامعة دلمون للعلوم والتكنولوجيا  وبعدها بقليل يأتي بيت القرآن وكانت لنا زيارة لهذا المعلم الرائع في اليوم الرابع وهذا شكل بيت القرآن من الخارج وهو قريب من الشقة لمن يهوى المشي..  وأعتقد أن كان فيه طلاب مدارس يزورون بيت القرآن وهذي صورتهم .. ((كل مارحنا معلم من معالم البحرين وجدنا طلاب مدارس وروض في زيارة لهذا المعلم أما المتحف فكان أكثر من مدرسة في زيارة للمتحف حوالي 3 مدارس)) ..  وبعدها كملنا طريقنا وهذي صور للطريق من الشقة إلى أن وصلنا مجمع الدانة..  *  *  يظهر في يسار الصورة الجسر المؤدي لمدينة المحرق ويعتبر من أقدم الجسور أذ أن المحرق تربطها 3 جسور هذا يعتبر أقدمها ولكنه رائع..  وهذا الورد على طول الطريق ولاحظوا يتكون من مثلثات بيضا وحمرا ترمز لعلم البحرين .. من ملاحظاتي لشوارع البحرين النظافة والتنسيق بالأزهار والنوافير وكأني بشوارع الدوحة ولكن اللي يفرق هو مواقف الباصات بالبحرين فيه كراسي مظللة لمواقف الباصات أما عندنا في قطر فقط علامة بأن باصات كروة تمر من هنا وتتوقف هنا لكن لا توجد كراسي ومظلات أتمنى أن تتطور كروة وتحط كراسي  *  وهذا مطعم كل أفشان على كورنيش الملك فيصل وبصراحة هذا الكورنيش ما شاء الله واسع وراااااائع جداً وبه مطاعم وقعدات وألعاب للأطفال فهنيئاً لكم يا أهل البحرين على هذا الكورنيش الرائع..  وهذي أحد الأبراج الجديدة التي لم تكتمل بعد لاحظت وجود أبراج كثيرة في البحرين قيد الأنشاء وما شاء الله أشكالها وديزايناتها رائعة وتحفة ..  *  *  بعد الأبراج مرينا على مملكة الأطفال وهو مكان رائع للأطفال وزرناه في اليوم الخامس لنا بالبحرين وكل الأماكن اللي مرنا عليها كانت على كورنيش الملك فيصل..  وأكملنا طريقنا متجهين لمجمع الدانة..  *  *  *  *  *  حسب ما عرفنا من سواقين التاكسي أن هذا أكبر مجمع بالبحرين قيد الأنشاء وأعتقد أنه سيتي سنتر البحرين وهو عبارة عن مجمع والطوابق العليا بتكون فندق  ووصلنا مجمع الدانة  *  *  *  وهذي إشارة دخول المجمع  وهذي مواقف المجمع تكلفة السيارة من الشقة للمجمع 3دنانير يعني 30 ريال..  وأنتظروني مع باقي الصور من داخل المجمع..  |
|
|
|
|
03-03-2007, 12:45 PM
|
#8 (permalink) |
|
مسافر متالق
تاريخ التسجيل: Jan 2006
الدولة: سعودي في الدمام
رقم العضوية :54927
المشاركات: 878
|
بدايه حلوه اختي ... سجليني واحد نفرات شوف تقرير
 بس احس انه قص عليكم راعي التكسي خخخخخخ .. انا مره من المطار لين الرفاع بـ 7 دينار. عموما عليه بالعافيه ننتظر الباقي يا بـــطــــــلــــــــــــــــــــــــــــــــــــــ ـــــــه ههههه |
|
|
|
|
03-03-2007, 02:47 PM
|
#11 (permalink) |
|
كاتبة متميزة
تاريخ التسجيل: Oct 2005
الدولة: قطـــــــــــــــــــــــر
رقم العضوية :50360
المشاركات: 9,357
|
أخوي ناصر الكويتي يا هلا فيك وأنتظر باقي الصور .. أخوي eyesmax يا هلا فيك وبالنسبة للتاكسي بصراحة أول مرة نستخدمه بالبحرين وما ندري أنه يمشي بالبركة بدون عداد متعودين على عداد كروة وبعدين هو يستاهل وبالعافية عليه لأنه ودانا لشقق حلوة.. وشاكرة مرورك ..يا هلا فيك أخوي أبو أحمد 111 وجزاك الله خير على مشاعرك الطيبة وردك الراقي وتسرني متابعتك.. يا هلا بأخوي Emirates الإماراتي يشرفني مرورك بموضوعي وتشرفني بمتابعتك لباقي التقرير .. |
|
|
|
|
03-03-2007, 03:44 PM
|
#12 (permalink) |
|
كاتبة متميزة
تاريخ التسجيل: Oct 2005
الدولة: قطـــــــــــــــــــــــر
رقم العضوية :50360
المشاركات: 9,357
|
تابع اليوم الثاني .. مجمع الدانة .. الطريق من الشقة للمجمع (25 دقيقة مع الزحمة) وصلنا الساعة 2:30 الظهر لفينا في المجمع لمدة ربع ساعة واللي أستغربته أن المجمعات في البحرين تسكر محلاتها الظهر عكس المجمعات عندنا تفتح من 10 الصبح وتغلق 10 مساءاً .. المهم كانت المحلات مسكره وكنت أصور وبعدها عرفت من السكيورتي أن التصوير ممنوع وتفضلوا هذي الصور اللي ألتقطتها لكم من مجمع الدانة  * وعيالي ما صدقوا شافوا الحيوانات وأفتكروها ألعاب ويركبون على وحدة وينزلون ويغيرون وهم يدورون مكان القروش ويقولون ماما هاتي القوش (القوش = القروش) يالله ماما ألعاب..وأنا وراهم نزلوا هذي مب ألعاب ألحين بنروح الألعاب والموظفة المسكينة ساكته وأكتفت بالفرجة على عيالي وهم يبهدلون لها بضاعتها  *  *  *  *  وبعد ربع ساعة تمشي بالمجمع لقينا المطاعم وتغدينا بمطعم الأبراج وبعدها رحنا ندور الألعاب للصغار وأحترنا مالقيناها ولكن لما سألنا أحد الموظفين قال أتبعوا الخطوات اللي باللون الأخذر اللي بالأرض وهي بتوصلكم لملاهي الأطفال .. وتمينا نمشي ورا هذي الخطوات اللي مكتوب عليها (ويانا ويانا إلى شكازولو)  *  إلى أن وصلنا إلى شكازولو  *  وخذنا بطاقة أعتقد ب5 دنانير لألعاب الأطفال وألعبوا من الساعة 3 إلى الساعة 6 وكل ما تخلص البطاقة نشحنا ب5 دنانير..  الحلو في مدينة الألعاب رخص أسعارها يعني اللعبة بريالين (200فلس) والديكورات جدا حلوة وفيها أبتكار .. حبيت أنقل لكم بعضها مثل هذا المصعد  وهذي جهة من الألعاب  *  وهذي صالة صغيرة للبلياردو ديكورها غريب وجميل جداً  وهذي المرايات بصورة مقربة  وهذا الكرسي غريب وجميل على شكل تمساح  وهذا الباب ما أنتبهت له ألا من المقبض وعرفت أنه باب أعجبتني السحالي اللي عليه..   وهذي سيارات يوم شفت محد بالملاهي وعيالي يبون يلعبون فيها وشروط اللعبة لازم يكون عمر الطفل أكبر من 5 سنوات قلت والله ما أخلي بخاطركم شي يا عيالي وأركب أنا بسيارة وأشيل البنت ويركب زوجي بسيارة ثانية ويشيل الولد وما تسمعون ألا طرااااااااخ طاااااااااخ وتدعم .. بس بصراحة ونااااسة.. توني أدري أن السواقة حلوة  *  وهذي الألعاب اللي بالطابق اللي تحت بصراحة ما رحت لها لأنها ألعاب للكبار يعني ما تصلح لعيالي بس شكل الألعاب مسلية..  وهذا الكرسي على شكل حصان أبتكار شكله رائع..  وهذي نطاطية رسوم الدخول للطفل دينارين يعني 20 ريال وتكون من 3 أشكال هذي وحدة وفيه نطاطية ثانية وفي ثالثة بس مب نطاطية لا هي عبارة عن متاهة فيها شباك وكور وزحليقة مثل اللي موجودة بأي ملاهي..  ولما جات الساعة 6 طلعنا من المجمع  وأتجهنا لمطعم الأصفهاني في شارع المعارض حتى أنتعشا.. أنتظروني مع صور المطعم .. |
|
|
|
|
03-03-2007, 04:36 PM
|
#14 (permalink) |
|
كاتبة متميزة
تاريخ التسجيل: Oct 2005
الدولة: قطـــــــــــــــــــــــر
رقم العضوية :50360
المشاركات: 9,357
|
أخوي eyesmax تشرفني متابعتك وسالفة القوش في كل مكان يتهاوشون عليها حتى بالتاكسي ينثرونها وينزلون .. وبصراحة أنا ما أعرف قيمتها أعطيهم القروش مكتوب عليها 500 فلس وكميات كبيرة وبعدين أكتشفت أن ال500فلس = 5 ريال وعيالي جيوبهم مليانه حوالي 50 ريال وأنا حاطه في بالي أن القروش اللي في جيبهم ما أتعدى ال5 ريال |
|
|
|
|
03-03-2007, 04:46 PM
|
#15 (permalink) |
|
مسافر خبير
تاريخ التسجيل: Jul 2004
الدولة: الإمارات / دار الخير والعز / حرسها الله
رقم العضوية :11960
المشاركات: 3,711
|
أسأل الله لكم التوفيق
رحلة جميلة ،، وصور حلوة ،،، من ( بلادي ) شهادتي في البحرين مجروحة ،،،،، فأنا أعرفها رصيف رصيف وشارع شارع . لكنا بوصفكم جميلة ورائعة ألف سلامة للزوج ،، وعساكم على القوة ،، ومتابعين |
|
|
|
|
«
الموضوع السابق
|
الموضوع التالي
»
| الذين يشاهدون محتوى الموضوع الآن : 1 ( الأعضاء 0 والزوار 1) | |
العرض العادي
|
|
|
الساعة الآن 03:06 AM.
تجارة الكترونية
-
منتديات الامارات
-
العاب
-
العاب بنات
-
صور اطفال
-
صوت الاسلام
-
الفراشة - عالم حواء
-
الحياة الزوجية
-
منتديات ماجده
| ||||