تابع اليوم الثاني

بعد ما طلعنا من مجمع الدانة أتجهنا للشقة وريحنا فيها لمدة ساعة ونص..
والساعة 7:30م طلعنا من الشقة وأتجهنا لمطعم قريت عنه بالتقرير اللي طبعته لأختي المرام وكان أسم المطعم بلوأيلفنت ومكتوب أنه موجود في منطقة السيف بجانب الريتز كارلتون ..
أخذنا سيارة بسائق مصري وقال أنه يدل المطعم .. ولما وصلنا منطقة السيف قال أنزلوا في (مجمع السيف) أكيد حتلاقوا المطعم فيه .. قلت له لا أنا اللي أعرفه أنه في منطقة السيف لكنه مب في المجمع.. المهم لف فينا منطقة السيف وما بقى حد ما سألناه بالأخير قالوا لنا أن المطعم مغلق.. بصراحة أنا مدري هو سكر نهائياً أو أنه يسكر الساعة 7:30م
المهم قلت لزوجي أنا شايفة جنب شقتنا في شارع المعارض مطعم أيراني اسمه أصفهاني ليه ما نجربه .. ورحنا أصفهاني (على فكرة السايق أخذ على المشوار 5 دنانير هذا وهو ما يدل الله يعين لو أنه يدل مدري كم بياخذ )
هذا هو كارت المطعم

وهذا هو شكل المطعم من الخارج (لاحظوا الصور ألتقطتها بالنهار في يوم آخر لكن أحنا رحنا المطعم الساعة 8 مساءاً)

*

وهذا قسم العائلات

وهذي الطاولة

وهذي ستارة لزوم الخصوصية (بصراحة أعجبتني جداً مطاعم البحرين كأن الواحد قاعد ببيته ناخذ راحتنا بالأكل )

وهذي الرسومات على الحائط مع الموسيقى الأيرانية تعطي أحساس رائع

*

وحتى الأضاءة رائعة .. كل شيء نحاسي الطاولات الأضاءة حتى خلاطات الماء بالحمام الله يعزكم من النحاس وما خليتها صورتها لكم.. وهذي هي الأضاءة

وهذي لوحة ينزل عليها ماء بشكل جداً رائع

طلبنا الأكل .. وجابوا لنا الشوربة وطبعاً هذي الشوربة مب من ضمن الطلب لكن يقدمونها ضيافة بصراحة لذيذة..

وهذا شيبس للصغار

وبعدها السلطة التبريزية والله أني وزوجي أدمنا عليها لذيذة بشكل مدري شيحطون فيها خلطة عجيبة

وسلطة الروب والخيار

والأطباق الرئيسية

*

طبعاً من حلاوة الأكل ولذته كنا محتاجين نغسل يدنا مع أن عمري بحياتي ما سويتها دايماً أكتفي بالفاين المعطر لكن هالمرة خذت راحتي بزيادة وأحتجت أغسل يدي بالصابون.. وتفاجئت بالحمام على الطراز الأيراني كل شي نحاسي .. على بساطة المطعم لكن مرتب وهذا هو الحمام الله يعزكم على الطراز الأيراني
هذا الباب

وهذي المغسلة

*

ودفعنا الفاتورة 9 دنانير ورجعنا الشقة

وكانت المفاجئة بأن اليوم بنغير الشقة لسويت وبصراحة أنا أشوف السويت أوسع وأشرح وأنتظروني بأعرض لكم صور السويت اللي أنتقلنا له..

أستلمنا السويت وبصراحة هو أحسه أشرح من الغرفة والصالة .. وأليكم الصور
هذا السويت بشكل عام (سعر السويت بالليلة 30 دينار = 300 ريال).. يتكون من مطبخ وصالة والسرير وعلى يميني وأنا أصور هذي الصورة يكون الحمام الله يعزكم وخلفي الباب..

بما أن على يميني الله يعزكم الحمام قلت أصوره بالأول

*

وبعده المطبخ وهو أصغر بقليل من مطبخ الشقة

*

وهذي الصالة والمطبخ ويظهر فيها باب السويت

وهذي الأسرة عبارة عن سريرين منفصلين

ويمكن دمجمهم حتى يصيرون سرير واحد (الصورة هذي ألتقطتها بيوم ثاني بالنهار)

وبالنسبة للعوائل الكبيرة واللي تحب تاخذ أكثر من شقة.. فيه شقة عبارة عن غرفة وصالة ومطبخ وحمام نفس اللي سكناها أول يوم متصلة بالسويت اللي أعرضه لكم حالياً وبينهم باب لو تلاحظون الباب اللي بأول صورة.. اللي هو بين شنطة السفر والتلفزيون .. يعني ممكن فتح الشقتين على بعض.. وهذا هو الباب


وبتغيير الشقة ينتهي اليوم الثاني لنا بالبحرين .. أنتظروني ومفاجأة اليوم الثالث والسياحة الحقيقية بالبحرين..

يا هلا والله بكراميلا خبيرة مصر .. وحشتيني .. شفتي 3 شهور أجمع معلومات عن مصر وما حصل لي السفر وتوقعت بهذي الأجازة ماني مسافرة لكن سبحان الله نصيب رحت البحرين .. الحمدالله زوجي بخير ولله الحمد .. والبحرين بلد جداً جميلة وتستاهل الزيارة..