هلا بالمشرف الحبيب مهند
امسك الدائري الشمالي طال عمرك واتجه غرب وللتوضيح اكثر للاخوه تكون وكالة العيسى على اليمين ,,
يتقاطع معاك طريق الملك فهد وبعده التخصصي وبعده طريق تركي الاول (مخرج 2 ,, وهناك من يسميه مخرج تركي بن ناصر نسبه الى قصره على التقاطع نفسه ) وانت لا تزال باتجاه الغرب ماشي ,,
بعد كذا تشوف تقاطعات وجسور تتجه يمين تروح الدرعيه وصلبوخ ولو اخذت الجسر يسار تروح ناحية الحي الدبلوماسي والاختيار الثالث الذي لم يكتمل بعد و ينتظره اهل الرياض هو الاستمرار بالطريق على طول لكي تكتمل حلقة الدائري بالتقاء الشمالي مع الجسر المعلق عبر وادي لبن ,,
ما علينا ,, رح يمين ويجيك مدخل الدرعيه على شكل جسر فوق الطريق السريع,,
خذ الاشاره يسار واستمر مثل ما تقول الاخت نوف حتى ثالث دوار وعليه يقع مجمع الدوائر الشرعيه بالدرعيه,,
رح يمين واستمر لحد ما ينزل الطريق في وادي ويجيك دوار استمر على طول بلا توقف حتى تلاقي نفسك في سد العلب
طبعا الدوار الاخير ممكن تطلع معاه يسار يوديك منطقة شفا الدرعيه او ما يسمى جاكس نسبه الى اول شركه وجدت في الموقع هناك منذ سنين وهي منطقة استراحات وهناك من استقر في المكان كسكن رسمي
بعد ما تدخل يمين بعد الدوار الثالث وقبل بداية نزولك الوادي حط بالك لمحل اتصور اسمه دويل ولون لوحتهم احمر
عندهم خوش قهوه يضبطونها ويبيعونها مع الترمس (الحافظه) بخمس وعشرين ريال
طبعا قهوه سعوديه
واذا معاك الترمس يحطون لك قهوه بعشره
جرب وانت الحكم
